سيبها هى اللى ترد (( فرح طنطا ))

صباح الفل

أنا رجعت من طنطا خلاص

الساعة دلوقتى سته الا ربع الصبح

الحمد لله صحيت امبارح بدرى وعلى ما ظبطت الحال بقت تلاتة ونص

هوبا ... دا النهارده الخميس

هوبا ... الموصلات زفت

هوبتين تلاتة اربعة نزلت وقفت فى الموقف بتاع نص ساعة

فضلت واقف محترم

مش عارف أزاحم الناس من كتر ما بطلت أخرج وبقيت حاسس إنى الدكتور كراملة سبعة ماجيستر وستاشر دكتوراه بوقفتى دى

المهم

لقطت عربية من اول الخط (( الساعة اربعة ونص )) وركبت ووصلت مع صلاة المغرب

نزلت فين فى طنطا

نزلت برا طنطا عند مدخل إخناواى (( قرية هناك قبل كوبرى المحلة ))

نزلت واتصل بصحابى وراحوا يستنونى على كورنيش بلازا

(( كافتيريا محترمة جدا ومن موقعى هذا أحب أسلم على حمزة وسلمان ))

وأنا عديت الطريق وصراحة رحت آكل

أصل العبد لله مكلش ولا لقمة من الصبح

يادوبك صحيت على كوباية المعلم شحاته أبو كف

يطلع حد مش عارف الكابتن العريق شحاته أبو كف ويقولى هوا مين :D

أقوله دا نور مثله نور الشريف مع سعاد حسنى فى فيلم جامد موت

المهم الكابتن شحاته كان بيجيب بيضة وكوباية لبن ويضربهم ويشرب

أنا عملت الخلطة دى بس بالخلاط

لييييييييييييه ؟؟؟؟؟؟

عشان خاطر الزفارة تروح

وفعلا مبقاش فى أى زفارة وكان مشروب مليان بروتينات

المهم روحت أكلت فى مسمط الريس هناك أول ما تعدى الطريق والجرسون اللى هناك جدع اوى

أول ما شافنى إفتكرنى بالرغم من انى مش فى طنطا كل يوم وجرى عملى الطلب بتاعى أبو خمسة جنيهات :D

حاجة كدا عالقد (( كبده )) لأن انا مش باكل من اى مسمط برا البيت :D

المهم طلعت جرى على بلازا

وصلت لقيتهم ملطوعين هناك

نزلت المشاريب بالترتيب والإجبار

هناك حمزة وسلمان بيشربونا اللى هما عايزينه وبالترتيب وبالإجبار :) صدق فإنها حقيقة

المهم طلعنا بعدها نجيب شوية العاب نارية من مكان فى طنطا وطلعنا على المكان اللى فيه القاعة

مكان محترم مش فاكر إسمها إيه كدا كوين

وهى طبعا كانت مليانة ناس

بجد شفت هناك بنات طنطا بجد بقى :)

أدب وجمال وعلم

ما شاء الله عليهم :)

طبعا بغض النظر إن محدش عبرنى بنظرة فى الفرح

ولا حد قالى عقبالك

إلا أنى مبردش على البنات اللى بيكلمونى

هسيبها هى اللى ترد على راى جنات (( حبيبى على نياته ))

ههههههههههههههههههههههههههههههههههه

(( بس أنتى طبعا أحلى من أى واحدة فى الدنيا
كفاية إنك أنتى أنتى
مش عارف أقولك بقيت بتخيل فرحى كل شوية
ومش متخيل قاعد مع حد غيرك))
طبعا الكلام دا لخطيبتى لو فكرت فى يوم تخش المدونة مستقبلا فى أحد الأيام منتفضحش بقى :$ :D

المهم خلص الفرح

صحيح الدى جى طول للساعة اتناشر

بس معلش قلت عادى

نزلنا من القاعة على اتناشر ونص

أربع عربيات عالطريق الزراعى بنوصل العروسة المعادى

كنا ماشيين بنرقص عالطريق (( صدق حدث بالفعل ))

المهم

انا قلت ربنا فك فقرى وراجع فى عربية مخصوص وكمان ماشيين بمزاجنا ومعايه صحابى

تقريبا انا اللى حسدت نفسى

المهم وصلناها المعادى وطلعناها الشقة كمان

وهوبا نزلنا جبنا أكل وكانز وطرنا عالدائرى

شوية والعربية اللى الفقرى جنابى راكبها وقفت

قال إيه عطل وكنا ماشيين على 180

فصلت فجاة ووقفنا براحة والعربية كانت بتتحرق :D

صباح الفل

فضلنا اربع ساعات عالطريق الدائرى

ساعة بنشوف المشكلة وبندور على حبل او wire من اى عربية تريلا معديه

بس مفيش كلب عبرنا (( زيادة فى الفقر ))

شوية والعبد لله إبتكر فكرة

أحنا نفك اليفط المتعلقة عالدائرى ونعمل بيها حبل

آه وربنا فكرتى :D

اهوه بالمرة أخلص تارى من بتوع مجلس الشعب :D

فكينا اليفط وبعد ما عملنا كل حاجة

قال إيه الفقر بيتفك دلوقتى وطلع لنا واحد بحته حبل

قلت رضا وشيلناها فى العربية ومشينا

ونزلت أنا عند منزل الدائرى عند غبور كدا عالطريق الزراعى

بس بعد ما اتفقت مع صاحبى نزل احنا التلاتة اسماعيلية يوم السبت نصيف فى اخر الصيف ونقضى يوم هناك وبعدين نروح بليل للدكتور المخ والاعصاب اللى هنتعالج عنده بعون الله

المهم

نزلت ركبت لحد البيت

فعلا نطلع من اليوم دا بكذا حاجة :

1- إياك تركب فى عربية مع الفقرى
2- إياك تعزم الفقرى على فرح (( ولو كان هيتجوزك خليكى من بعيد لبعيد كل واحد فى قاعة
3- إياك تفكر توصل العروسة لشقتها ... ليه فاكر نفسك أمها ولا العريس
4- إنى عايز أتجوز بس كل حاجة معاندانى ودا العادى بتاع الفقرى
5- إنى بفكر فى فتاة الأحلام اللى بدأت ملامحها تتضح قدامى أكتر ما باخد نفسى
6- إنى إتحرمت كتير من الدلع والحب والحنان وبفكر أعوض كل حاجة مع فتاة الأحلام دى وبدعى ربنا تكون عاقلة وتفهمنى
7- إن إياك ثم إيام وإياك وإياك إنك تعمل إيه وربنا ما فاكر نسيت :D
8- إنى هضرب كوباية شحاته ابو كف دى دلوقتى فى يوم الجمعة عشان اقدر اطير عالمنصورة
9- إنى هرجع ميت من المنصورة أكتر مما أنا ميت ناو
10- إن الفقرى كرامللة آه بس راجل أوى :)
11- وووووووووووووووووووووحشتيييييييييييييينى
12- إن فى تعليق ريته وغاظنى أوى لأنى مكنتش متوقعه عالبوست اللى فات

التعليقات عالبوست اللى فات هرد عليها وهنشرها بكره لما اجى من المنصورة
إنى بجد تعبان أوى وحاسس إن باب الأودة بيرقص وبينادى عليه أقوم أكمل معاه رقص
دعواتكم أن يعود الفقرى على خير

أنا هقوم أجهز شنطة السفر بقى عشان مش شايف قدامى ولازم أنجز :)

الفقرى يحييكم من قصره وعلو الدور اللى ساكن فيه بتواضع ويقولكم كلكم

رجاءا دعواتكم
هرد عليكم نفر نفر يا حبايبى :)
بس لما ارجع بعون الله

يا جماعة الله يهديكم اقروا البوست اللى فات كويس عشان هيبقى ليه تكملة
وهيبقى فى شعر ورد شعرى على كلام شعرا كبار وعايزين صقفة حلوة كدا
وكمان أنا مش طارح حالة عامة وبطلب رأيكم
أنا بتكلم عن شاب فقرى
جامعى ومهندس محترم فى عالم الكمبيوتر
مش بيتعلم صنعه عشان أى حاجة تخطر فى بالكم
بس عشان الوقت يفوت حرام
وأنا عندى فلوس ومكان أفتح فيه ورشة
ودى ورشة ألوميتال
أنا ليه قرايب شغالين فيهم وناس محترمة جدا جدا جدا ومتربيين ولا عمرى سمعت منهم كلمة وحشة
وحالتهم ميسرة وعندهم سلسلة محلات فى مدينة نصر

يعنى أنا صعبان عليه الوقت وخصوصا إنى كمان عاجبنى المجال لأن لا بتعامل فيه مع صنيعيه ولا بتاع
وكمان بيفكرنى بأكتر حاجة بعشقها بالتركيبات الهندسية
أنا بسميها كدا
يعنى الحاجة دى عاملة إزاى وقايمة على إيه ومن جوا تصميمها عامل إزاى
فمش نازل أعمل اجة غلط ولا أتعامل مع صنيعيه فى موقع عمل ولا مع اى طائفة صنايعية
فقط العدة والخامات

وحشتينى (( جارى دك الحصون ))

شاب فقرى

--
* تحديث:
أنا تعبان جدا جدا ومش قادر أتحرك
وعندى ظروف قهرية جدا
أنا قايم أنام
انا مش رايح اللقاء يا شباب
ولما أصحى هبقى أرد عالتعليقات وأنشر كل التعليقات وأرد عليها

أنا كنت جهزت الشنطة ولبست ومقدرتش أتحرك

لنا عودة

فقررررررررررررررى

إليكى أكتب فى عيد الحب :)

السلام عليكم ورحمة الله وبركاته
النهارده إكتشفت بالصدفه إنه عيد الحب
واحد رخم جاى يقولى كل سنة وإنته طيب
جاى يغيظنى يعنى عشان هوا خاطب وأنا لاء :((
وكمان فى تدوينات كتير إتكتبت رومانسية بتتكلم عن عيد الحب
فقلت ليه مش أكتب أنا كمان :$
أهوه اكتب لها
واحكى عن ذكرياتى فى عيد الحب دا

وأخد رأيكم فى كام موضوع شاغلين بالى أوووووووووى:

الموضوع الأول :

الكلام هنا للبنات بس
أو للشباب كمان اللى عايز يقول رأيه نو بروبلم
أنا فكرت إن عندى وقت كبير فراغ
أيون فراغ
أنا متعود إن يومى بيكون عادة 120 ساعة
يعنى شغل بنسبة 100 %
لكن حاليا صراحة الشغل قل أوى
مش معنى كدا إنى هبطل
لاء
لكن بفكر فى حاجة تانية مهمة
إن الواحد يتعلم صنعه
أيوه يتعلم أى صنعه فى الدنيا
ممكن بعدها يفتح ورشة أو مصنع
وكما قال النبى عليه الصلاة والسلام ( رحم الله رجلا بات كالا من عمل يده )
فأنا إنطلاقا من هذا الحديث الشريف ومن إنى لقيت نفسى فاضى فكرت فى حكاية الصنعه دى
بغض النظر عن الاستمرار فيها

ولكن السؤال هنا للبنات لو إتقدم لك واحد فى يوم من الأيام صنايعى
يعنى بيعمل شغلانه معينه أيا تكن
والراجل دا متعلم والحمد لله وخبير كمبيوتر ومهندس عما قريب
زى حالاتى كدا تعملى إيه ؟؟؟؟

أنا مش بكتب البوست عشان عايز رأى واحدة بعينها ,,,, لاء لاء مش تفهمونى غلط
أنا عايز أعرف تفكير البنات فى النقطة دى بالذات لأنى مش سألت فيها ولا فكرت فيها قبل كدا ولسه فى طور التفكير
فلو إتقدم لك صنايعى وكسيب وكمان معاه ورشة ولا حاجة
هتقولى إيه ؟؟؟

الموضوع التانى :

لا أذكر لنفسى بتاتا أى ذكريات عن عيد الحب
لا عمرى جبت لواحدة هديه ولا حتى باكو لبان
ومحدش يستغرب
ولا عمرى أخدت الموزة بتاعتى وطلعت عالكورنيش
وجبت إتنين كانز ووقفنا كدا زى العيال الأمامير اللى ماليين الكورنيش
لكن فى مرة كنت بحب واحدة وكانت رافضة موقف الحب
دا لحد ما اتقدمت لها بس إتقدمت متأخر ورفضت وإتخطبت دلوقتى
والحمد لله الموضوع إتنسى وربنا كان جمبى
قبل ما يحصل دا كله أنا فكرت أجيب لها إيه فى عيد الحب
طبعا إتصلت بيها قلت لها هابى فلانتين
قالت لى وانته طيب يا خويا ,,, صمت الوقفه ياواد ولا مصمتهاش :D
قلت لها فاتتنى الصراحة قالت لى يلا معلش السنة الجاية بقى تلحقها
المهم فكرت اجيبلها وردة وأقف فى مكان مخفى
أستناها لحد ما تيجى وأطلعها الورده مفاجأة كدا زى الساحر وأفاجئها بيها
بس قلت لاء حاجة تقليديه أوى
فكرت وهدانى تفكيرى إلى بما إنها بتعشق الفاكهة
إنى اجيب لها فاكهة حلوة بتحبها
فكرت فى كل أنواع الفاكهة اللى كانت دايما بتطلعها من شنطتها
(( أيون صدق كانت ممكن تطلع من الشنطة أى حاجة تتخيلها او لا تخطر على بالك ))
قلت فاكهة إيه بقى ؟؟
قلت مفيش غير اليوسفى لا بيتفعص ولا بيبوظ ولا بيبقى مر ولا معفن
وقلت أجيبلها حباية يوسفى وأحطها فى شيكارة (( أيون شيكارة ))
وأحط الشيكارة فى شنطة هدايا محترمة وأقدمها لها تعبيرا عن الحب الرهيب اللى ما بينا
وبدأت فى التجهيز فعلا
ولكن فات العيد وفات أسبوع ومش شفتها
ولما قابلتها بعدها مصدقتش اللى كنت بعمله
بس حلفت لها إنى كنت هعمله فعلا
غير ذلك لا أذكر إنى فى يوم جبت لأى بنت أى هدية
غير أختى جبت لها فى مرة آيس كريم ودفعتها حسابه كمان :D

----

إليكى أكتب فى عيد الحب :)

الآن ..
قد علمتى كل ما تريدين عنى
قد أدركتى الحقيقة
عرفتى من أنا وكيف أفكر ومن اكون
فتحت لك أبواب مدنى
فهل تدخلين :$
تحياتى

شاب فقرى

بوم بوم بوم

بسم الله توكلت على الله ربى ورب العالمين

الأيام دى هعمل حاجة بحبها أوى

السفر

بعشق السفر

والأكتر لو رايح أقابل حد أول مرة أشوفه وعارفه كويس

عندى مشوارين

الأول بكره الخميس

فرح أخت واحد صحبى فى طنطا

وطبعا لازم أروح وإلا هيقام عليه الحد وصحابى هيرمونى فى الترعة :D

الموضوع مفيهوش هزار وهما فعلا مجانين ويعملوها

وأنا مجنون بما فيه الكفاية إنى أسيبهم أما أشوف هيقدروا ولا لاء :)

بس هروح عشان أتجنب الموضوع بتاع الترعة لأنى صراحة لا بعرف أعوم ولا نيلة

ولا حتى بعرف أسوق

ومحدش يقولى إيه اللى جاب دى لدى

هوا كدا :)

تانى حاجة :

يا جماعة أنا خلاص قررت وعقدت النية والنية لله

إنى هروح لقاء المدونين :)

يوم الجمعة إن شاء الله

محدش يقولى هتسافر إزاى وإنته هتبقى راجع من طنطا متأخر وأكيد شغلك كله واقف والحركات دى

القلق مش من إنى ممكن أكون تعبان وأكسل أسافر

لاء لاء لاء أبدا

ولا القلق عالشغل إنه يبوظ فى غيابى والعملاء تلطم

لاء لاء لاء أبدا

ولا القلق عالحاجة إنها ممكن تزعل لو عرفت إنى مسافر يومين ورا بعض وهقضى اكتر من أربع ساعات عالطريق فى السفرية الاولى او التانية

لاء لاء لاء أبدا

القلق كله من إنى ممكن أقوم من بيتنا وأنزل وأركب المواصلات وأوصل المنصورة

وتلاقينى نسيت اللقاء ونسيت كل حاجة وعمال ألف هنا وهناك :D

والناس تتصل

ولا حياة لمن تنادى :D

عادى بقى

بالإضافة لأن فقرى سبق وعمل الموضوع دا قبل كدا :)

فلو روحتوا ومش لاقيتونى تأكدوا إنى بلف فى مكان ما حول المنصورة

اللى كان حلمى من زمان إنى أسافرها

سمعت عنها كتير أوى أوى أوى

طبعا عمرها ما هتكون زى القاهرة حبيبتى

اللى كلها زحمة وموتسيكلات وعساكر مرور وكماين وشباب واقفين عالرصيف بيبيعوا حشيش وكأنه عيش مدعم :D

لاء لاء لاء أبدا

أنا راسم لها صورة تانية خالص

المحمر والمشمر بقى والخرفان اللى هتدبح فى تحية للمعلم فقرى لقدومه أرض المنصورة

وكمان بقى الرمل اللى هيفرش الطريق من أول عبود لحد بوابة المنصورة

صحيح

عايز أحكى لكم موقف

أول مرة سافرت فيها إسماعيلية

أنا صراحة بحبها أوى أوى أوى

هناك عساكر المرور بنات على فكرة :D

يعنى وإنته سايق خليك رايق هتلاقى دايما حد مبتسم فى وشك

والمدينة جميلة أوى

لكن وأنا داخل إسماعيلية فى اليوم دا

لقيت يافطة كبيرة موت مكتوب عليها

مرحبا بكم فى عروس القناة الإسماعيلية

وشميت ريحة صرف صحى رهيبة

كنت همووووووووووووووت

لأن أنا منخيرى حساسة أوى ممكن أشم أى ريحة حتى لو خفيفة جدا

وممكن أعرف الأكل مسكر ولا حادق ولا دلع من ريحته بس :D

يعنى يا شيما لو فى أكل أرجو يكون متظبط :)

تحياتى أول وتانى

وندعوكم للقدوم للقاء المدونين

إلى كل مدون وخاصة مدونى الشرقية وكل واحد عارف انا موجه الكلام لمين :D

بس خلاص

هوافيكم بكره بملخص الفرح اللى هيكون جامد آخر حاجة

وبعده هوافيكم بملخص اللقاء التدوينى


والآن أترككم مع الأغنيه اللى بهديها لأى حد بحبه أو حبيته
والله زمان يا سلاحى لعبد الحليم حافظ :D
(( بجد حقيقة بسمعها للى بحبهم بس ))
خالص تحياتى
كان معكم
فقرى عبده فقرى
كرمللة

جبهة الجدعان الشعبية (( أنا جدع )) بيان التأسيس

أولا وقبل أو أبدأ كلامى وأقول أنا جدع
تحياتى إلى كل مدون وكل شخص وحيد
لا يجد من يسانده سوى نفسه
لا يجد من يقف بجواره وينصحه فيناقش نفسه ويفكر فى صمت
وإلى كل حزين وإلى كل إنسان خذله كل من حوله
ووجد منهم بدلا من المسانده صد ومشاكل وهم ما يتلم

شاب فقرى

بسم الله نبدأ

هنا جبهة الجدعان الشعبية نعلن بيان التأسيس
وكل ما فيه يعتبر قانونا لا جدال فيه ولا مناقشه ولا حد يقدر يفتح بقه
غير عشان ينضم معانا ويقول أنا جدع :D
جملة أنا جدع هى جملة إعتبرها المصريين جملة يقولها الفاشلين فى حياتهم
اللى بيشربوا ويسكروا ويمشوا بليل فى الشارع يقولوا أنا جدع
تحت شعار إنهم كدا تخلصوا من كل الهموم
هنا وبإختصار شديد نتعاطى أفخم أنواع الخمر
وهوا الحلم والطموح والحب للطرف الآخر والعشق للوصول لما نحب
فهذا من وجهة نظرى ما ينسينى همومى وينسى بقية أعضاء الجبهة همومهم
وينسيهم أى ظروف زى الزفت ومشاكل زى الهباب
ومن الآخر أنا جدع :D

تنص جبهة الجدعان الشعبية على اللوائح والقوانين التالية إقرأها بعنايه :

أولا :

ليه دايما بنظن أن الموت هوا نهاية كل شىء ؟؟
مستحيل يكون الموت هوا كل شىء
يعنى حتى فى وفاة والدى إ
فتكرت إنه لما مات كل حاجة خلصت
لكن فوجئت بأن من التراب وإلى التراب نعود
وفوجئت بقوى خارقة جوايا بتحركنى وبتقوينى وبتقولى فى هدوء
إشتغل ,,,, إتعب ,,, إتعب كمان وكمان ,,, هتوصل يا عبيط ,,, إيه يعنى سابوك ولسه لوحدك
طز فيهم بالعربى وبالإنجليزى والتركى والهندى والعبرى وكل لغات الكون
هوا يعنى لما أصاحب واحد تلات سنين
وفجأة يبطل يعبرنى ولو حتى بميسد كول خلاص يعنى هموت؟؟؟
ولا لو والدى مات خلاص هروح أبات هناك قدام القبر وأبكى فى صمت
وأقعد هناك لحد ما أموت أنا كمان
ياترى دا هيعجبه؟؟؟؟ طبعا لاء
ياترى لما أحكى ذكرياتى لأولادى الحلوين المسكرين أقصد بناتى طبعا لأنى بحب البنات أكتر من الصبيان :D
هل هقعد أقولهم أنا مريت بلحظات ضعف ووحدة وعزله وخوف وبتنجان ؟؟؟
هعقدهم فى حياتهم وأخليهم يلعنوا اليوم اللى بقيت فيه أبوهم ليه ؟؟؟
لازم يكون فى حاجة خاصة ومهمة وخطيرة
لازم يكون الماضى ما هوا إلا دفعة للأمام
لازم يكون كل واحد فينا أقوى من بكره ومن الظروف
إيه يعنى معكش فلوس ولا قعدت أربع شهور ميدخلش جيبك جنيه
لحد ما صرفت كل مليم معاك وكمان إستلفت وعمال تظبط فى كل حاجة عشان المركب تستمر
إيه يا كرمللة ؟؟؟ وإيه ياعم الجدع ؟؟ و إيه يا أختى الجدعه ؟؟؟
ما هى دى الحياة يا معلم ....
إيه يعنى صاحبت واحد ودخلته بيتى وكان معايه حوالى تلات سنين
وبعدين إختفى
أو صاحبت واحد وقعدت معاه سنة ونص وساعدته بكل اللى تقدر عليه
وقلت له قدام الدنيا كلها إنته أخويا
وفجأة
فى يوم جه قالك أخوك مين ياعم روح إلعب فى الطين :D
إيه يعنى يا جماعة ؟؟؟ ياترى هى دى نهاية الكون ؟؟؟
ولا هوا ربنا خلقنا عشان نحط إيدينا على خدنا طيب نبدأ من البدايه براحة كدا ؟؟؟
هوا ربنا أصلا خلقنا ليه ؟؟؟؟ ليه أوجدنا فى الأرض وأوجد كل السبل عشان نقدر نعيش ؟؟؟
العبادة وعمارة الأرض
أنا سامع صوت واحد بيقولى أنا بصلى ياعم مش كفاية صلاة إيه بس ؟؟
الصلاة ما هى إلا تواصل بين العبد وربه
لكن الدين معاملة يعنى إيه ؟؟؟
يعنى تعامل الناس حلوين أو وحشين أو حتى ولاد ستين تيت
وتعاملهم كويس حتى اللى عايز منك مصلحة أو اللى فاكر إنه بيخدعك
شوف العبيط تخيل إنه بيخدعك لفترة وإنه هوا اللى بيحركك
ياعم إستمر يا بنتى فوقى إستمرى رغم كل شىء
هوا أنا لو خانى واحد صحبى ولا حتى إنضربت بالنار خلاص ؟؟
خلصت الحياة يعنى ؟؟؟
فى ستين داهية يا معلم أنا عن نفسى ماشى بمبدأ (( اللى ميقدرنيش ... ميلزمنيش ))
يعنى لو مش قدرتنى
وعرفت إنته بتتعامل مع مين وعرفت إنى بنى ادم مش شاشة بتكلمك فى المسنجر وقاعدة بتضحك معاك وتهزر
يبقى ساعتها مش هحترمك ولا هعبرك ومفيش غير الشوز
لكن لما تقدرنى يا عمى هشيلك على راسى
لكن إن بقى تفتكر إن إنته نهاية الكون لاء يبقى إنته لا مؤاخذة عندك عته وكمان تخلف عقلى
دا ملخص أول نقطة لو صاحبك إكتشفت إنه خانك أو مش بيقدرك
طز إيه يعنى ,,, لينا رب هنتحاسب قدامه كلنا يوم القيامة
وساعتها هتترجانى عشان أسامحك ويمكن ساعتها ربنا يخلينى أسامحك
وتكون سبب فى دخولى الجنه
لكن حاليا ,,,, إنته متلزمنيش
خلاص قفلنا الباب روح شوف حد تانى تضحك عليه
خلاص أنا فقستك يا معلم
يلا طير بقى

ثانيا :

لو بتحب واحدة ومعبرتكش أو مفهمتكش بالقدر الكافى أو بالنسبة لها إنته مجرد إستبن
أو لو بتحبى واحد ومستمرة معاه رغم كل القرف اللى شايفاه منه فى المعاملة وإنك مجرد كنبه
يبقى خلاص الحب مش موجود ...
وإنته أديتنى كل العوامل اللى تخلينى أسيبك ومش أعبرك
يعنى تبهدلنى وأسكت لك ؟؟
أبقى فى حضنك وبتفكرى فى غيرى أو مش عارفة قيمتى
أو بتفكرى وبتقارنى بينى وبين حماصة
لاء معلش أنا بنى آدم مليش مثيل آه وربنا مليش مثيل
يعنى إذا مكنتش يابن الحلال أو يا بنت الناس هتحافظى عليه وتعاملينى كأن أنا مركز الكون
وإنى بعد ربنا
وإنى حبيبة القلب اللى فوق أى إعتبار
يبقى خلاص لازم نفترق يعنى من الآخر
لو مفيش حب صادق يبقى ليه نكمل سوا ؟؟؟؟
غاويين وقف حال ؟؟؟؟؟

وخليك فاكر مبدأ شاب فقرى (( صدقنى اللى يفرط فيه دايما هوا الخسران.... حيران أزعل عليه ولا أنفض مش فارقه يا مان كله بتنجان ))

ثالثا :

أنا فعلا بنى آدم مفيش ليه مثيل
مين قال كدا ؟؟؟؟ أنا بقولك أهوه آه والنعمة عندى حق
أفتكر مدرس كان عندنا فى الثانوى
كتبنا مرة لوحة عليها إسمه غلط بالقصد
وبدل ما نكتب عبد الخالق السباعى .... كتبنا عب الخالق ثروت :D
طبعا الراجل شاف اللوحة قال الكلمتين دول قال:
يا ولاد عبد الخالق ثروت أحسن منى فى حاجات
هوا كان رئيس وزارة وراجل ميه ميه وعمل كتير لمصر ولا معملش
لكن مش هوا عبد الخالق السباعى
أنا ربنا مخلقش منى إتنين
وكمان أنا قد أكون متميز عليه فى اخلاق أو فى حاجات تانية
ربنا أعلم بيها أنا منفرد ومتميز ومفيش منى تانى فى الدنيا
يعنى أنا ربنا لما خلقنى مفيش حد زيى والكلام دا ينطبق على كل الناس
من أول عم عبده البقال وتامر الزبال لحد عبد الجبار رئيس شركة زعبولة للإعمار :D
كل واحد فيهم مميز بحاجة ربنا خلقها فيه هوا وبس
ممكن يكون إحساس او أخلاق أو طبع أو شكل
أو حتى نظرة عين
عارفين حتى نظرة العين بتفرق
أنا مثلا ممكن أبص لحبيبتى نظرة واحدة بس
تحسسها إنها ملكة الكون و إن مفيش منها مثال وإنها عشقى الأول والأخير
وإنها حبيبتى وروحى وإنى مقدرش أعيش من غيرها
كل دا فى نظرة
ممكن واحد يبص نظرة
أو يقول كلمة تغير ملايين
وهنروح بعيد ليه فى ناس غيرت مسار ومجرى التاريخ بكلمه
الناس دى مفيش منها إتنين
أكيد إنته كويس ومفيش منك إتنين
متحاولش تقنع نفسك إنك معفن بأى شكل كان
لأن أكيد أنا عارف قيمتك وعارف إنته مين
ومتحاولش تقنعنى إنى شخص عادى وإنك هتلاقى حد تانى زيى
أنا مفيش منى إتنين أنا شخص خلقه الله وأبدع فى خلقه :) فلك الحمد يارب العالمين

رابعا :

الناس الحلوين اللى زى حالاتى اللى عايشين فى وحدة
اللى ملوش صحاب ولا بيخرج حتى ولا بيصاحب حد ولا ليه أى حاجة فى الدنيا غير نفسه
هل فاكر إن دا هيأثر فى مسيرتك
يا عمى إنته هتكمل وهتكملى برغم كل شىء
لازم توصل للى إنته عايزه
حتى لو مفيش عوامل مساعدة وإنته خريج معهد البتنجان لفن الأشكال والألوان
ومفيش فلوس وإنته مكحرت وعيشتك آخر ضنك ومش لاقى تجيب كانز تشربه فى البلكونة فى الهواء الطلق وتحس إنك زعيم الدنيا
ياعم لو حتى مفيش بلكونة
هل هتسكت وتقف وتقول أنا لوحدى وانا لازم ألاقى بنت الحلال ومش هبدأ غير من غيرها ؟؟؟
ومش هعمل أى حاجة غير عشان حبيبى لما ألاقيه هلبس الحجاب وهحفظ قرآن وهظبط حياتى وهبطل أى حاجة غلط
طيب وبعدين ؟؟؟؟
ياترى لما هى تلاقيك معفن كدا هتقرب منك من الأول
ولا ياترى لو هوا لاقاكى بالضعف دا هيقتنع بيكى إن أنتى اللى هتربى عياله وهتسهرى على حاله ومحتاله
؟؟؟
لازم تكون أحسن واحد فى الدنيا فى نظر نفسك عالأقل وتقتنع بدا وتحاول تضنع المستحيل حتى لو معندكش مكنة تصنعه إعملها على إيدك وطير يا معلم

متحاولش تقف أبدا أيا كان السبب الحياة لا تنتظر والوقت كالسيف وتأكد إنك فى الدنيا عابر سبيل
يعنى شوية وهتسيبها
هتقول لربنا أنا كنت بصلى يارب وبعامل الناس كويس وراجل سكرة
طيب والهدف التانى يا معلم
هتقوله أنا معمرتش الأرض أصلى كنت لوحدى
وملقتش حد يساعدنى
فوق كدا وظبط وإنسى أى ظروف منيلة وتقبل الواقع فى محاولة لتغييره
بس مش تتف عليه وتقولى بلد بنت كلب عشان مزعلش منك.

خامسا :

أنا مكتئب وحالتى زفت
طيب وبعدين لما إنته مكتئب الحياة هتتدمر الزمن هيقف والقيامة هتقوم ؟؟؟ أبدا
الناس هتسيبك زى الجزمة لحد ما ينصلح حالك واللى بيحبوك هيحاولوا يفوقوك
يبقى من الأول تقوم وتقف على رجليك يا معلم وعلى رأى شيما
(( قوم نفض هدومك ))
يعنى لازم تقوم وتقف على رجليك
ومش تسمح للإكتئاب يخش حياتك
هتقولى كل يوم بصحى بروح الزفت الكلية أو الشغل أو أعمل نفس الحاجات ؟؟؟
ما أنا عندك أهوه قاعد على قدام النت بقالى كام سنة وشغال وماسك أعصابى
ومش بخرج ولا بروح ولا بآجى وحالتى ميه ميه ومحبوس فى أودتى صحيح
بنزل كتير وبخرج وبتفسح
بس عشان تطلع من أى مود ممكن يسبب لك كآبة
من الأخر لو بتصحى بدرى عشان تروح الشغل نام بدرى أو نام متأخر
وإعمل أى تغيير
إن شاء الله تقوم الصبح بدل ما تغسل وشك وتفوق
تخرج كدا معفن آه والله ليها طعم مميز (( أصلى جربتها ))
إمشى من طريق تانى وغير الطريق اللى بتمشى فيه
بدل ما تركب للشغل كل يوم عربيتك دا لو ربنا كارمك ومعاك عربية
إمشى يا معلم وإوصل متأخر وخد جزاء
أهوه أى تغيير ولو حتى زفت بس تغيير فى اليوم الحلو بتاعك
عشان مش تزهق
مش تتخيل أنا بغير أودتى اللى بشتغل فيها بقالى كام سنة إزاى
كل يوم اجيب كرسى وأقول هوا دا اللى هشتغل وأنا قاعد عليه
ويوم تانى أقول لاء الكرسى دا وحش وإبن تيت
وأقوم أجيب غيره كسرت لحد دلوقتى تقريبا ست كراسى
مبقاش غير كراسى الأنتريه بس الحاجة قافشه ومش عايز أجيب واحد منهم أشتغل من عليه :D
كمان بدل ما الأودة مرتبه ومنظمة غير المود وغير النظام
بعتر كل حاجة
دعوة للبعترة والتغيير
حتى البعتره والتغيير ليها طعم
قوم هات ورقة وقلم وإقعد شخبط شوية
عمرك جربت تشخبط
وإنته عندك كامل الثقة إنك مبتعرفش ترسم وحمار فى الرسم زى حالاتى ؟؟؟:D
إقعد أكتب خواطر
هتقولى مبعرفش
أقولك والنعمة ولا أنا بس بعك
جرب تكتب شعر
وتحكى عن حبيبتك وحلمك والشغل وعم عبده بتاع الطعميه اللى حطلك طرشى زيادة النهارده
أهوه أى نوع من التغيير
يطلعك من مود القرف والإكتئاب
لو تعرف أنا بعمل إيه ؟؟ هتنبهر
أحيانا ممكن أنزل أدور على أى حاجة أشتريها ولو حتى باكو لبان أو علبه ( أم على ) أو كريم كراميل
وجرى عالمطبخ
أينعم المطبخ بيبقى عامل زى أما يكون حصل فيه الحرب العالمية الستين بعد ما بخلص
بس بعمل تغيير جرب حاجة جديدة
جرب تأكل من إيدك
أقولك على حاجة أجمد
إنزل وحاول تساعد الناس وخليك حشرى
تعرف إنى فى سنة من السنين كنت بركب المترو وأكلم نفسى لحد أما ألاقى حد يعبرنى ويكلمنى :D
آه وربنا حصلت وفى السنة دى إتعرفت على ناس بالهبل
واحد إسمه صفيان من العراق وجاى يدرس فى مصر وواحد تانى شغال فى مكافحة المخدرات :D
وغيرهم كتير
إعمل أى حاجة متبقاش برطة وتقول أنا مكتئب
أو أنا قرفانه أصل وبعد ما تكتئب مفيش فايدة ولا حل
ولا أى حاجة هتعود عليك من الإكتئاب الرائع وكمان لما تقرر تقفل المدونة
أو تقرر تقفل الميل وتبطل تخش تكلم حد هتستفيد إيه يا عبيط :D ؟؟؟؟
هتعيش لوحدك ؟؟
طيب ما إنته حواليك ناس زى الفل إتعامل معاهم ومش تخسرهم ولا تبعد عنهم
لأن يابنى الصحاب دول زى الرزق فى الدنيا ممكن يكون نصيبك فى حياتك كلها إتنين بس وتصاحبهم تلات تيام ويختفوا بعدها من حياتك والباقى كله يبقى سيس
فحافظ على صحابك وقدرهم وخليهم يعرفوا قيمتك

سادسا وليس عاشرا :

أنا عارف إنكم زهقتوا من البوست والقرايه
بس برده لازم تكمل لأن الموضوع يستاهل
وحياتك دى مش لعبة ومش ينفع تمر بالساهل كدا
وإنته قاعد زى العبيط مكتئب أو عايش فى صدمة
أو حزين على رحيل حد أو زعلان على فراق أى شخص بالموت
إنتم عارفين إيه هى أصعب حالات الفراق ؟؟؟
إن الناس تفارقك وهى عايشة مش تموت
يعنى انا بتخيل لو أبويا دا الله يرحمه
كان سابنى وبطل يعبرنى وقالى خلاص أنا مش عايز أعرفك تانى
والله دا أنا ممكن كنت أدفن نفسى فيها
إنما لما مات أرحم لى وأحسن لى
صحيح مريت بألف موقف العن من بعض وتعبت وكافحت وزهقت وإشتغلت وحبيت وخاصمت وصالحت
بس الحمد لله عايش وراضى وباخد نفسى

سابعا :

إنته تعرف ربنا انعم عليك بكام نعمه
أنا مش هقولك كام نعمة ولا هقولك كام حاجة مميزة فى حياتك
هقولك لما بتبتسم أو بتضحك
تخيل إن عضلات الوش مش عارف كام عضلة كتير أوى
تخيل لو عضلة واحدة بسسسسسسسس وقفت هتعرف تضحك ؟؟؟
فما بالك بقى بوالدك ووالدتك وأهلك وصحابك والبنت اللى بتحبها
وعينيك وشفايفك ونفسك وإيديك وغيره كتير
لو قعدنا نعد مش هنخلص ليوم الدين
دا عشان بس تأخد نفسك بيحصل فيها جوا جسمك ألف مليون حاجة لحد ما النفس بيخرج
كل دا فى لحظة وإنته ولا دارى
ياريت تعرف نعم ربنا كويس وتؤدى شكرها
وتتدبر وتقول يارب أنا بحبك
ونفسى أكون جمبك وقبل دا كله أرضيك
رغم كل الظروف الطين برده هرضيك
رغم كل الناس اللى ماتت وكانوا غاليين عليه دا قضاءك يارب وأنا راضى بيه وبرده هرضيك
رغم كل صحابى اللى خانونى هرضيك
رغم إنى واقع فى مشاكل ملهاش حصر والكدب والنفاق والغش هيطلعونى منها بس هفضل فيها وأقول الحق وهرضيك يارب أنا بحبك

ثامنا :

إنته من الآخر إتظلمت ,,إتفحتت ,, إنضحك عليك ... وكمان أخدت على قفاك
حد بهدلك وطلع عينك وخانك وباعك ومرمطك وخلاك متسواش نكلة قدام نفسك
حسسك إنك عبيط وإن إنته معرفتش تختار لا صحاب
ولا حتى عرفت تختار حد يحبك
خلاص سيبه لصاحب نصيبه
فى حالتى يا صاحبى مش بسيبه ممكن أخليه يندم عاليوم اللى إتخلق فيه
أو يندم عاليوم اللى فكر فيه إنى عبيط
وممكن برده أسامحه والحياة تستمر
عارفين لو الواحد فكر فى السماح والتسامح بشكل عام
هيلاقى غنه لما بيسامح الناس بيكسب هيطلع واحد يقولى كسبت إيه يا عبيط
هقوله كسبت إحترامى لنفسى عالأقل
لو هوا محترمش التسامح دا أو هوا مفهمش اللى عملته عشان خاطره يبقوا هوا اللى عبيط
وساعتها أقدر أقول انا إنسان هوا اللى جوايا دا الإنسان اللى ربنا خلقه الكائن الجميل النضيف الطاهر الحلو اللى بيسامح وبيعمل كل حاجة حلوة

تاسعا :

لازم عشان تبقى جدع وتكمل مسيرتك وتبقى شاطر وناجح فى حياتك
مش تدوس على حد ولا تهين حد ولا تهزق حد
ولا تبيع حد عشان خاطر مصلحة أو مكسب حتى لو هتبقى فيها رئيس جمهورية
لأن ساعتها هتفتكر الراجل اللى أنا دوست عليه عشان خاطر مصلحتك
وتحس إن نجاحك كله غلط وحرام فى حرام
وإنك عبيط لإنك جرحت الشخص دا وأهنته
وكان ممكن تكمل مسيرتك من غير ما تدوسه أو تهينه
كمل مسيرتك وإنته حافظ مركزك وعارف مقامك وعارف مكانك فين
من غير ما تبهدل حد أ تظلم حد
لأن الظلم ظلماااااااااااااات يوم القيامة
ربنا يستر علينا منه

عاشرا :
لازم عشان تنضم لجبهة الجدعان الشعبية
تقوم ناو وتغسل وشك وتشرب كوباية ميه ساقعه فى عز التلج دا
وتقول بأعلى صوتك أنا جدع
وتوعد نفسك تكمل مسيرتك وتوصل لهدفك أيا كان
سواء كان بنوتة بتحبها توعد نفسك إنك هتحافظ عليها وهتحطها فى عنيك ومش هتخونها وهتقدرها
سواء كان شاب حليوة بتحبيه تقومى توعدى نفسك وتقولى يارب أنا مش هعصيك أبدا وهحافظ عليه وهحبه وأحترمه وعمرى ما هعيشه فى نكد (( بليز يابنات عشان الرجاله متطلعش من هدومها وتلبس حلل فى دماغها ))
سواء كان شهادة أو وظيفة يبقى تقوم تذاكر إيه اللى مقعدك معانا ياض :D
وتجتهد على قد ما تقدر وتبهدل نفسك إجتهاد وتتعب نفسك أكتر من المعقول
ومش تسيب فرصة للظروف إنها توقفك سواء كان حلمك كبير أو حقير
توعد نفسك على طاعة ورضا ربنا وإنك هتفضل طول عمرك فقرى .. قصدى جدع
إنتهى بيان التأسيس
هل من منضمين للجبهة ؟؟؟؟
خالص تحياتى

مؤسس وزعيم جبهة الجدعان الشعبية
شاب فقرى
كرمللة :D

السلسلة الفقرية الحلقة الثالثة (( أنا يتيم ))

السلام عليكم ورحمة الله وبركاته
اليوم بعون الله سأكتب عن أهم مراحل حياتى فى السلسلة الفقرية كلها حين بدأت كتابتها ظننت أنها ستلقى صدى واسعا لأننى لم أن أحكى أشياءا مهمة عن من قبل ربما ذكرت أننى عملت فى كلية الإعلام جامعةا لقاهرة من قبل وتساءل البعض عن عدم كتابتى للمرحلة التى تليها الآن أضعها بين يديكم تنقسم قسمين مختلفين قلبا وقالبا وموضوعا ومضمونا ,,سأدع الحكم لكم أشعر بأن رأسى يكاد ينفجر من الأفكار وتتملكنى رغبة فى الكتابة إلى أن أفقد أحد أصابعى أو تنكسر يدى أريد أن أكتب وأكتب وأحكى وأستمر فى القص عليكم حتى تخرج روحى إلى بارئها هذه المرة لن أحاول أن تكون هذه الحلقة قصيرة ولن أحاول أن ألفت إنتباهكم بأى أسلوب أدبى أو بأى شىء أثناء القص فقط سأروى الحقيقة ولا شىء غيرها لعل هذا يريح قلبى وتهدأ روحى قليلا وأرتاح
قبل أن تقرأ إذا كنت تبحث عن سطورا هزلية أو مقال يخرجك من حالة من الحزن فكن على ثقة تامة بأن هذه ليست الحلقة المناسبة للقراءة
فهذه حلقة من التاريخ الفقرى تحمل كل الحزن والفقر واليتم

تحياتى لكم

شاب فقرى

***

بسم الله نبدأ
كانت حياتى حقا تسير كالساعة أو ربما أكثر إنتظاما
فترة الثانوية العامة فى حياة كل طالب مصرى تمثل له وهم تحديد المصير و الوصول للمستحيل كما يصفونه لنا
إنسان غير عادى وحياة غير عادية وتفكير لا يمكن أن يكون عاديا
ببساطة طالب فى مدرسة الريس الثانوية بنين
مدرسة تبعد عن مقر سكنى حوالى عشرة دقائق بالسيارة و 25 دقيقة ماشيا
لا هى بعيدة ولا هى قريبة
دخلت المدرسة كانت كلها إنتظام ما شاء الله وكان يحكمها ناظره أبسط ما يقال عليها لواء من الجيش متقاعد
بس أنا كنت شقى لدرجة إنى فى مرة بنط (( قفزت )) من مكانى وخبطت فى السقف ودماغى إتفتحت ونزلت تانى زى الفل
ولا حسيت بأى حاجة ونزلت يادوب غسلت راسى فى هدوء وطلعت ماسك منديل واليوم خلص
روحت البيت نمت بالمنظر دا لحد بليل ودماغى مفتوحة أربع غرز
تقدروا تقولوا كان فيه صحة رهيبة
تهد جبل
لحد ما الوالد عرف بليل ومصدقش إنى نطيت كدا عادى زى أى بنى آدم خلقه ربنا وخبطت فى السقف :D
فين وفين على ما إقتنع وروحت خيطت دماغى وإشطة خلص الحوار
لمع نجمى فى المدرسى الثانوية فى العام التانى
طالب مجتهد وبيعشق المشاكل
مستحيل كنت أسمع كلمة من حد وأسكت
أو أسكت عن ظلم من أى شخص كان
ببساطة كنت بالرغم من التفوق إلا إنى ممكن أشتم الباشا لو فكر يبص لى بصه وحشة
ببساطة طالب مجتهد لكنه واعى بحقوقه وواجباته وعارف هوا عايز إيه وعايز يوصل لإيه
طبعا كنت علمى
ومحدش يقولى ليه طبعا
بالرغم من إنى لو كنت دخلت أدبى كان مجموعى هيبقى أكبر
إلا أنى حبيت العلمى
يعنى عندك إمكانيات مهولة تفوق الخيال فى عقلك وإنته عارف كدا كويس
ليه بقى تسيب المجال اللى إنته بتحبه
ودا بالظبط اللى حصل
دخلت علمى ورياضة
طبعا أنا لسه فى سنة تانية لا كنت حددت لا رياضة ولا احياء
ولازم يكون فى حياة كل منا حب أول
حبى الأول على ما أعتقد
كانت هى
بنوتة هادية تسكن فى نفس الشارع
طبعا مش ساكنه قدامى مش لازم أقع زى كل شاب فى حب بنت الجيران ولو حبيت بنت الجيران كانت هتبقى مشكلة
الشارع واسع أوى أوى فمكنتش هعرف أكلمها إلا لو الشارع كله دخل معانا فى المناقشة
المهم إنى كنت بحبها
مش بحبها وبس
بعشقها عشق
لدرجة غن اليوم اللى كان بيمر عليه من غير ما أشوفها مكنتش بكتبه فى مذكراتى ومكنتش بحسب إنى عشته أصلا
كانت لنا أياما كل أسبوع نلتقى فيها
لا نلتقى بالمعنى الحرفى للكلمة
ولكنى أراها من بعيد وتبتسم فى هدوء وتمر مرور الكرام
حقا كانت أعظم أمانى حياتى أن أظل أنظر لعينيها فقط
فقط
لا حديث ولا حتى إتصال بليل ولا إنى أخرج معاها ولا بتاع
كنت فى السن دا ببساطة شايف إن الشاب المحترم مينفعش يكلم بنات ولا يقابل دى ودى ويعط هنا وهناك
كانت تمر من أمام منزلى يوميا
كنت أنتظرها مش فى الشباك ,,,, لاء لاء لاء ... البلكونة :D
طبعا مش هقف فى البلكونة عالفاضى كدا
أخد الكتب والورق والكراريس والمذكرات اللى عاملها بإيديه والقلم بتاعى اللى بذاكر بيه
وأطلع أفرش فى البلكونة
وهات يا مذاكرة
وعينى عالطريق
لحد ما هى تفوت
مش عارف أقولكم كنت بعشق إبتسامتها إزاى
كنت بعشق مجرد مرورها من قدامى كدا
طبعا كنت بدخل كل يومين من البلكونة
مخلص قلم من الأقلام اللى معايه
كنت بفحت فى الكشكول ,,,, وكان عندى يوم الخميس هوا الموسم الأسبوعى
أفضل أذاكر طول النهار لازم أخلص كتاب الكيميا اللى أنا أساسا كنت ملخصه على جمب وكمان لازم أحفظ لى كام صفحة كلمات
مش بقولكم كنت دحيح كبير جدا
والحمد لله مرت السنة بكل مشاكلها بكل فواجعها
وجبت كام ياترى ؟؟؟؟؟؟
92 %
كنت الأول فى المنطقة اللى أنا ساكن فيها
تخيلوا
مفيش حد فكر يعدينى لا من قريب ولا من بعيد
معرفتش ليه غير لما خلصت سنة تالتة
طبعا أنا مكنتش باخد درس ولا نيلة
كله self study
يعنى كنت مجتهد على حق ربنا
ومر العام
وفى الأجازة حاولت البنت دى إنها تكلمنى
تخيلوا
من كتر الخجل اللى أنا كنت فيه ومن كتر عشقى ليها
وفهمى للحب بأنه شىء عظيم ومقدس وفهمى للبنت على إنها من ملائكة الدنيا
ورفضت إنها تزعل أهلها عشان خاطرى
أو تكلمنى من وراهم ولو حتى فى التليفون
رفضت الموقف أكتر من مرة ومكنتش بحاول أتقرب
يا دوبك أشوفها من بعيد كفاية عليه أوى أوى أوى أوى

أنا عارف إن الجزء اللى فات دا ممل جدا جدا جدا
بس معلش إستحملوا أنا نفسى زهقت وأنا بكتبه بالرغم من إنها يومياتى الغالية

وتيجى الإجازة والبنت تزهق وتبتدى تكشر فى وشى فى الراحة والجايه
صدقونى ساعتها حسيت بإنى إنطردت من الجنه
بالظبط بالحرف كدا
الحياة قلبت أسود معايه
بالإضافة لإنى قربت من سنة تالتة
والواحد لازم يذاكر وطبعا كل زمايلى بدأوا يروحوا درس هنا وهناك وأنا منفض بإعتبار إنى شاب دحيح آخر حاجة ومينفعش أروح أخد درس
وجاء شهر تمانية
مر الشهر فى هدوء عادى جدا
طبعا من أول الشهر كنت عمال رايح جاى على دكاترة الأنف والأذن والحنجرة
مكنتش بعرف أخد نفسى
مش عارف بقى عندى لحمية ولا إيه
ودكتور تانى شاف الإشاعة قالى دى زواذد وهنشيلها لك بعمليه
طبعا انا كنت فرحان
هعمل عمليه يا رجالة وأقعد مأنتخ فى البيت ويجيبوا لى آيس كريم
وكمان بقى نايم عالسرير والأكل لحد مكان جنابى
وقعدت أفكر أعمل العملية دى فين
فكرت ومعايه الوالد والوالدة
لحد ما خلاص حددنا الدكتور اللى هيقوم بيها وروحت كشفت عنده وتمام التمام
وبكذا ومعانا الفلوس وكل حاجة وباقى يومين
والدى فى الفترة دى كان مريض جدا
من السجاير صحته تعبت وصدره مبقاش مستحمل
وكمان عنده السكر وضغطه بقى بيوطى ويدوخ وحاجات كتير كدا
والله أنا لو قعدت احكى هوا كان عند ه إيه بالظبط
تقريبا هنتكلم نص ساعة بالميت كدا
وكمان مش هعرف أوصلكم
وجه يوم الخميس 25 /8 وصحيت أنا ووالدى وروحنا جبنا المعاش من البنك وإتمشينا شوية
مش عارف بقى إحساس إيه اللى كان جوانا
بس سمعت منه كلام ونصايح وحاجات كتير وأنا كنت إبن مطيع ومحب لأبوه بالرغم من القسوة الزايدة فى التعامل
طبعا لأنى الصغير ولازم أتعامل بشدة عشان مطلعش خيبان ومتدلع
قعد ينصحنى ويقولى خد بالك من أخواتك ومن البيت وإنته راجل وكلام كتير كدا
وروحنا وجينا بليل وتعب شوية زى كل يوم
أنا قلت عادى
قعدنا جمبه كلنا وطفينا النور وقاعدين معاه فى الأودة يمكن يطلب أى شىء
وفضلت أنا قاعد فى البلكونة جمب الأودة بفكر
ياترى يا بابا لو صحيت الصبح مش لقيتك مين هيصحينى كل يوم
ومين هيضربنى لما أغلط وأتغابى زى ما بعمل على طول فى حاجة وأبوظها
ياترى مين اللى هيعمل وهيعمل وهيعمل
وعيطت
وبعدين قالنا قوموا ناموا انتوا ربنا يسترها معاكم وأنا ربنا يسهل
وصحيت تانى يوم
الجمعة 26-8
فطرت ونزلت روحت البيت اللى جمبنا بيت الحاجة جدتى
قعدت أنقل معاها شوية حاجات
وأنا واقف فجأة سمعت صوت بينده بفزع على إسمى
يا كريم يا كريم
جدتى قالت لى حد بينده
قلت لها مفيش حد عندنا بينده كدا وسكتت
وبعدين بصيت من البلكونة
لقيت والدتى واقفة بتعيط وبتقولى
(( إلحق يا كريم أبوك مات ))
مش فاكر أى حاجة غير إنى لقيت نفسى جمب أبويا فوق عالسرير وبعيط
وبحاول أحركه وبعيط
ومش مصدق إنه خلاص راح منى وإنى خلاص لوحدى فى الدنيا دى
ومش متوقع إن دا الموت وإنه بيبقى سهل كدا
ومش عارف أعمله إيه تانى عشان يقوم
ومش مصدق نظرة الموت فى عنيه
مش متوقع إن دا هوا الموت
عيطت دقيقتين وأنا بقوله أنا اللى مكنتش مصدق كلامك
وبعدين فجأة قمت من مكانى
ومسحت دموعى
وفكرت دلوقتى العمل إيه
تناسيت كل شىء
تناسيت حالة الوفاة اللى فى بيتنا ووالدى اللى مش هعرف أكلمه تانى
ونسيت ساعتها إنى طفل محتاج الحنان من أبوه بأى شكل
ومحتاج أبوه يطبطب عليه زى زمان
وخرجت من الأودة وأنا بتحرك بسرعة زى الصاروخ
طبعا الموضوع دا كان الساعة حداشر وتلت تقريبا
طبعا الوقت بيداهمنا
قبل صلاة الجمعة كان كل شىء إنتهى
إستخراج شهادة الوفاة
والغسل والكفن وكل شىء
وصلينا الجمعة وصلينا عالوالد
وأنا رايح الجامعة كنت بتقطع
لأن كل جمعة كنا بنصلى سوا وأنا اللى بسنده وبمشى جمبه
ودلوقتى انا شايله وهوا خلاص مش هيروح معايا ولا يقعد معايه تانى
خلصت الصلاة وخلص كل حاجة
سافرنا البلد وتم الدفن وإنتهى كل شىء
وبدأ العزاء
وأنا فى قمة إنهيارى ثبتت أيضا وقت العزاء
لا دموع ولا ضعف ولا شىء
فقط إنى باخد العزار فى صمت
الناس على قد ما كانت بتعزينى كانت مبهورة بيه
ومبهورة باللى بعمله وإنى لوحدى فى بلد تانية وعملت كل حاجة وخلصت
وخلص اليوم وإنتهى على خير
وأنا بعد نهاية اليوم بكيت
بكيت مر البكاء
دقائق
وسكتت دموعى
وحتى الآن لم أبكى مرة أخرى
بالرغم من مرور سنوات على ما حدث
ولكن لم أستطع البكاء على أى شىء
خسرت كثيرا وودعت العديد من الأحبه ووارى التراب العديد منهم ولم يتحرك قلبى
ولم أبكى مرة أخرى
نقدر نقول إنى موتت فى اليوم دا أو قلبى مات
مبقتش بحس لا بحب ولا بحنان من أى حد
خلاص
وبعد عودتى للبيت وفى نفس الأسبوع وفى يوم الجمعة اللى يليها
عملت العملية والحمد لله
مكنتش متخيل أثر المخدر بينتشر فى الجسم بالسرعة دى
مجرد ما لمست الحقنة إيدى
كنت روحت عالم تانى
وصحيت وأنا وشى متكتف وحاسس بيتم الدنيا كله
حاسس إنى محتاج والدى فى اليوم دا
حاسس غنى محتاج حد يطبطب عليه زى ما كان بيعمل معايه بالظبط
محتاج ألف حاجة
روحت فى اليوم دا وفى خلال ساعة كنت زى الحصان
كنت صحة وجامد
ومر يوم والتانى
وجه وقت فك الشاش من على منخيرى
روحت لنفس الدكتور
وهوا بيفك الشاش كان الشاش بيقطع فى لحم منخيرى
دا اللى حصل ببساطة
فضلت منخيرى تجيب دم ساعتين ونص
ويمكن أكتر
لحد ما أخدت فى النهاية حقنه لوقف النزيف
ومشيت من العيادة الدكتور وصلنى
ووصلت البيت فى أمان
وهنا بقى نقدر نقول
تداعت صحتى تماما
روحت فى داهية
مبقاش فى صحة ولا حتى ربع زمان
مش عارف دا بقى إحساس نابع من وفاة والدى ولا من العملية ولا من النزيف ولا إيه
ولكن بقيت حاسس بكدا على طول
بحالة من الضعف
وبدأت الدراسة
على ما فقت مكنتش لا بقيت فى أى درس ولا اتفقت مع أى مدرس
فضلت شهرين بذاكر لوحدى
فاتنى كتير وحسيت إنى مش فاهم
بدات اروح درس
فيزيا ورياضة
والباقى طنشته لانى عبقرى فيه بالفطرة
طبعا كنت وصلت لدرجة إنى بحل مسائل المدرسين حبايبى بيفشلوا فى حلها
كنت عبقرى فى الرياضة بكل ما تحمله الكلمة من معنى
لحد نص السنة
وفى المدرسة بقيت هادى ووديع ولا بهش ولا بنش
هااااااااااااااادى تماما لا بكلم حد ولا بصاحب حد
ربنا كرمنى بتلاتة أصحاب وشكرا على كدا
بقيت بقول رضا وبس
وعلى النقيص بقى كنت فاشل فى الفيزيا
وإتطردت من الدرس تلات مرات
أيون تلات مرات
بس المدرس كان بيحبنى شوية
فكان بيرجعنى كل مرة
مكانش بياخد منى مبلغ يعنى عشان يرجعنى الدرس
بقى مسيطر عليه إحساس رهيب باليتم
بالرغم من إنى حاسس إنى بقيت راجل البيت وحاجة تفرح وزى الفل
بس برده مين فينا يقدر يستغنى عن أبوه ؟؟؟؟
ومرت الأيام وفى نص السنة بدلت الإهتمام بقيت بذاكر فيزيا ونفضت للرياضة
وهنا كانت المشكلة
فى عندى مواد تانية مش مذاكرها ولسه الفيزيا
بدعت فى الفيزيا وبقيت متذبذب بين دى ودى ودى
طبعا البنت اللى بحبها مبقتش حتى بتبص فى وشى
مش عارف ليه ؟؟ وليه القسوة ؟
وبقيت بتصرف تصرفات غريبة
يعنى بقيت بروح من المدرسة ماشى
ولا حد بيعرف ولا بينيل
وبقيت وحيد جدا
وبقى مليش صحاب
ولو ليه صحاب فبيستغلونى فى هدوء
بقيت حالة تقدروا تقولوا معقدة إلى أقصى درجة
وخلصت السنة الدراسية
ومجموعى فى السنتين وصل 87.8 %

وخلصت وكتبت الرغبات والحمد لله جالى كلية زى الفل

حقوق حلوان إنتساب
وأنا علمى رياضة و 88 فى المية
وطبعا لغيت فكرة إنى أروح اى معهد أو كلية خاصة
لإحساسى بالفقر
إن مفيش فلوس
بالرغم من إن الحالة ميسرة ومستوانا كويس جدا
ولكن إحساسى باليتم نبع منه كل حاجة تانية فى الدنيا دى
عالعموم
طبعا أنا رفضت وشجبت وروحت حولت ملفى لكلية تانية

حولت على فين بقى

إنها حلقة اخرى
خالص التحية والتقدير

شاب فقرى