كانت هناك ...

ببساطة رأيتها
كانت تجلس هناك
فى أحد الأركان
هادئة كعادتها
رقيقة
تخشى عليها من كلماتك خوفا من إزعاجها
كانت تجلس هناك
لا أدرى
ماحدث لحظتها
ولكن
توقف الزمن
مرت لحظات
عشناها مثل سنين
أحببنا وعشقنا وتحدثنا و سهرنا شهورا من نار الشوق
وحلمنا معا بتفاصيل عشنا الصغير
حقا مرت سنون فى تلك اللحظات الصغيرة
أدركت انى أعشقها منذ سنين
أدركت فقط تلك اللحظة أن لم يكن لها فى حياتى مثيلا من قبل
كانت جميلة
ليست شديدة الجمال
فقط جميلة
تسحرك كعطر وردة برية
لا تفكر وأنته تنظر إليها
فقط تغرق فى عينيها
هناك
حيث بحورا بلا شطئان
حيث شربت وشربت ولم أرتوى بعد
حقا هى
إنها حلم السنين
لم أدرى متى قابلتها ؟
هل كان منذ يوم
أو شهر؟
أم سنين مرت منذ ذلك اللقاء
حقا وصدقا
وحشتينى


منها سمعت كلمات الحب
سمعت حبيبى وأحبك
لم تكن تقصدنى
ولم تكن تحدثنى
كانت تتناقش فى صمت
وتشجب و تناقش فى رقة
يومها ادركت فقط ان عمرى قصير
وان عشقى لكى سيدفعنى للجنون
وربما للمستحيل
فأن ألقاكى فهى حقا صدفة
ولكن أن اكون معك يوما
فهذا هوا المستحيل
سأنسى أننا إلتقينا
سأمحو تلك اللحظات والسنين
وأنتظر إلى لقاء جديد
أراكى وأعود للحياة من جديد
قريبا

فقرى

تحياتى

أيتها الملكة الجميلة
الساحرة الصغيرة
الطفلة الرقيقة
تحياتى إلى من ملكت قلبى
إلى من أعطيتها حبى وأحلامى وحياتى
إلى من ذكرت معها أسماء أبنائى
إلى من وضعت فيها القوة
إلى من بنيتها إلى من صنعت كبرياؤها
تحياتى
إليكى يا مولاتى
يا جميلى الهادئة
لم أقوى أن أقول أنكى سبب تحطيم أحلامى
وخسارتى كل ما فقدت فى أيامى
لن أنسى
أن أقول أنكى حلم ليالى
وسنين وعشق وشوق وحنين
يأخذنى إلى ما بعد كل البحور
إلى ما أعلى من الأفق
إلى ما أعمق من فوهات البراكين
حيث إندلعت نيران أشواقى
حيث عذبت بنار حبى
حيث كان هلاكى
وأولا وأخيرا تحياتى يا جميلتى
يا وردتى الرقيقة
وحلم حياتى
يا من تعودت الفراق وقت ما أحتاجها
يا من تصنعت الضعف لأبقى جوارها
يا من دمرتى فؤادى
إليكى كل تحياتى ودعواتى
يا سبب شقائى ويأسى

خلاص إنتهى المشوار
حتى لو رجعتى
ورجع كل شىء
صعب أفتكر أى لحظة حب
صعب أقدر أعيش كل اللى فات من تانى
أكتب لنفسى وذاتى
ولأطوى صفحة و أفتح أخرى
وأحيى جروح ودموع الماضى
وبهدوء أخرجك من حياتى
يانور القمر
لأودعك وداعا أبديا

فقرى

---
(( لا هوا شعر ولا خواطر ولا مقال هوا بإختصار عك ))

المسحور

لعلكم بخير
الموقف دا حصل معايه من حوالى ساعة إلا ربع

كان يوم طويل
خلص اليوم وجاى أروح مع واحد زميلى
دخلنا المترو وقالى إستنى يا جنرال عيب أنا هقطع التذاكر
قلت غريبة حركات الجدعنه دى مع انى مش بطيق الحوار دا بس سكتت
قام صاحبنا قطع تذكرتين
ناولنى تذكرة وعدى هوا
وأنا عديت بعده
جاى ببص عالمكن بتاع المترو
لقيت تذكرة
فبقول للناس بتاعت مين وافتكرتها بتاعت بنت ماشيه قدام
روحت أديهالها قالت لى لاء مش بتاعتى
المهم لقيت عيل صغير مش قاطع تذكرة وعايز يعدى إديتهاله
وعدى الطفل من الحرس بتوع المترو فى سلام
ونزلنا إستنينا المترو لحد ما جه
وركبنا
وبعد كام محطة
بحط إيدى فى جيبى
إيه دا
أنا ممعييش تذكرة
قام صاحبى اللى معايه قعد يضحك بشكل هيستيرى ويقولى :
(( إيه دا يابنى أنته مسطول ؟؟؟ ولا شكلك بتحب جديد؟؟))
رديت وقلت فى هدوء
أنا مش بحب يابن الحلال ...إنته إتجننت ؟؟
عشان لما أقولك أقطع لنفسى التذكرة
تبقى تتنيل تسمع كلامى
وطبعا أنا زى الشاطر زى الشاطر إديت تذكرتى للواد الصغير الغلبان
وكل مترو وإنتم طيبين :)
ومن هنا أخاطب كل شاب وكل فتاة
بأن الحب هيولع فى الدرة وكمان هيخليك تنسى تذكرة المترو
وربنا يستر عالجاى

شاب فقرى

محدش علمنى حاجة ...أنا علمت نفسى بنفسى

بسم الله الرحمن الرحيم
ياترى إيه الفايدة من المشى الكتير اللى كنت بمشيه دا ؟؟؟
كنت بقول لنفسى حاجة واحدة بس
إن مهما طال المشوا وكانت السكة صعبة ومرهقة
لازم تكمل مينفعش تقف تريح
مينفعش تخون ثقة الناس اللى وثقت فيك وتريح وتقف ولو حتى للحظة ولو حتى للراحة

((أى واحد فينا حياته زى السفينه ... لو مش عارف رايح فين تبقى سفينة بلا ميناء عايش حياتى لوحدى ...قاعد قدام جهازى ونتى ( النت ) مفيش حاجة فى الكون كله ممكن تغير فلسفتى ))
يعنى زى النهارده
كتر التركيز والفوقان والمداومة على الشغل
تخلى أجدع واحد يقول لاء نقف شوية
بس حتى مينفعش تقف وتنام
كان زمان فى واحد صحبى أوى قالى جملة مش فهمتها
قالى يا فقرى أنا شغال لوحدى
دلوقتى فهمت معناها
إنك لازم تعمل كل حاجة بنفسك
تشتغل لنفسك مبيعات و support وكمان تبقى الإدارة والفراشين واللى بيعمل القهوة
بتطبق يوم ورا التانى
بتواصل
عشان عندك اللى عايز تعمله
مينفعش تسيب حاجة لحد
لأن مفيش حد هيكمل سكتك أو هيساندك بالشكل اللى أنته عايزه
عملتها مرة فى سنة من السنين فى الكلية وإعتمدت على ناس كتير وسبحان الله
كلهم خذلونى
مش خانونى
لكن محدش عمل المطلوب منه بالشكل السليم
(( حاجات كتير لازم أحققها يلا غنى معايا ...أكيد هييجى يوم والصوت دا هيبقى له نهاية ))
بتحاول تفوق فى كل ثانية لازم ترتاح فيها عشان تكمل
لازم عشان تطلع شمسك وتعيش صح إنك تعمل المستحيل
ضغط .... سهر ... مواصلة أكتر من يوم سوا ... مذاكرة فى أكتر من كورس لأنه مينفعش تقف وتصبر
لأن لو وقفت هيبقى كل اللى فات من غير معنى
معنى الوقوف إنك خلاص ملكش معنى وتعبك ملوش معنى ولا اللى عملته هيفرق
لأن حالة السكون هتعود الواحد على الراحة
تحاول ترجع بالذاكرة شوية
تهدى أعصابك وتفكر فى اللى فات أول ما بدأت
محدش مد إيد المساعدة ومحدش حتى كان بيقولك تعمل إيه أو تمشى إزاى
دلوقتى لما عرفت وبقيت فت
ناقصك إيه ؟؟
الراحة ؟؟؟؟
أكيد هييجى ساعة وتقوم ترتاح
أكيد هتيجى لحظة تقف فيها
بس لما تبقى فى السليم
مينفعش السكون ولا الخضوع للراحة دلوقتى
تفتكر جملة كان المشجعين بيقولوها دايما للى بيلعب فى الماتش أيام الطفولة
(( معلش معلش إلعب ميهمكش ))
تبتدى عقلك يفصل أوتوماتيك وتبتدى دماغك تتقل
وتقرر تعمل كوباية قهوة
وتقوم تعمل القهوة وإيدك بتترعش من التعب وكتر التركيز
تتألم من اللى حالك وصله
لكن لازم تكمل ومينفعش تقف أو حتى تأخد رست صغير
تقوم تعمل القهوة وتغير منظر وتقف فى الهوا فى البلكونة
تحس إنك دايخ وهتقع
تفكر فعلا فى فكرة الوقوع
هيحصل إيه يعنى لو وقعت ؟؟
كسر ؟؟؟
بس أنته عمرك ما عرفت الكسر
تشرب القهوة فى ثبات
يبتدى عقلك توصله الرسالة
عايز أطبق كمان يوم
عايز أكمل شغلى وأكمل مسيرتى
تبتدى ترن جملة فى عقلك
(( ثق فى ربك ثق فى نفسك ... قوم عشانك قوم عشانى ))
وتقرر فعلا إنك تقوم
وترجع للجهاز وللشغل من تانى وتفكر فى إنك تكتب البوست دا وتقوم تنام
ولكن خلاص حتى لو عايز تنام فات الأوان
إنته دلوقتى فايق
كمل بقى ...

شاب فقرى
فاصل ومواصل

-------
ملحوظة اللى بين الأقواس أغانى راب

بطوط زوغنطوط

السلام عليكم

النهارده كنت بدور فى ميلى الشخصى
وبشيل كل الرسايل القديمة والمزعجة
لقيت رساله حلوة كنت كتبتها لحد غالى عليه زمان
ومر عليها وعلى تاريخ إرسالها سنين

((

السلام عليكم ورحمة الله وبركاته

ازيك يا نور

عاملة ايه

معلش لو كانت الغيبة طولت شوية

بس غصب عن الواحد

انتى عارفة الفترة اللى جاية الواحد مشغول فيها شوية لان الامتحانات 21-5

تصدقى والله انا بقول فين نور الواحد مش بيشوفها ليه

وكمان صاحبى بيقولى ايه فين نور ............. تخيلى

هههههههههههههههههههههههههههههههه

المهم يا نور انتى عاملة ايه

اه غباوة منى انى اسال للمرة التانية نفس السؤال والايميل اللى انتى باعتاه بيرد على سؤال

الواضح ان فى مشكلة فى حياتك

انا كدا مش بقول اخبار جديدة طبعا لان دا اللى قلتيه فى ايميلك

لكن صدقينى مهما كان حجم المشكلة او سببها فلها الف الف الف حل

ولكن الانسان علشان يوصل لحل منهم لازم يفكر ويفكر ويفكر

الموضوع مش بالساهل

مش معنى كدا ان الحكاية دى صعبة ولكن تقدرى تحلى اى مشكلة بالتفكير والتسامح والتساهل مع الغير

فكرى لو المشكلة دى مع شخص مثلا زى أخ أو حد قريب

والشخص دا زعلان منك او متغاظ منك فى حاجة

وانتى حاولتى تسمعى كلامه وتقربى له

وكل اما تقربى له ميعبركيش

جربى وقربى له تانى وتالت والف

لحد ما فى مرة هيتكسف من نفسه ويقول البنت بتحاول تصالحنى بقالها كتير وانا مطنش بكفاية غلاسه بقى

تخيلى لو ان انتى فكرتى فى المشكلة اللى انتى فيها والتمستى الاعذار للشخص اللى مزعلك او للاشخاص اللى مزعلينك

التمسى لهم اى عذر حتى لو كان تافه وعبيط

بس حاولى مش تزعلى منهم وعامليهم بكل حب ولطف

دا بالنسبة لو كانت المشكلة زعل مع حد

معلش يانور لكن احب اقولك متعيطيش

البكاء دا ساعات بيريح الواحد

لكن انا عارف انك متالمة اوى علشان كدا بتعيطى

اسمحيلى اقولك متعيطيش واسمحى لى اقولك قومى اغسلى وشك حالا

الضحك والهزار يا نور مش وسيلة وحشة للحياة

بس ياريت متهربيش من مشاكلك وواجهيها وخليكى شجاعة

وبالنسة لموضوع انا امتى على النت

انتى تقدرى تحددى اى ميعاد فى اى وقت وصدقينى والله هحاول اقعد واكلمك

وانا تحت امرك يا نور لان انتى فعلا انسانة محترمة وجدعة

ومؤدبة

وغير كدا وكدا شبه ناس غاليين عليا اوى

اتمنى انك مش تزعلى منى لو متكلمناش قريب

بس صدقينى

استعينى بربنا كالعادة وزى ما طلعك من مشاكل قبل كدا كنتى فاكرة انها مستحيل تنتهى

هو قادر انه يخرجك من المشكلة اللى انتى فيها

وقادر انه يصبرك عليها

سلام بقى لاحسن الفجر بياذن هنا فى مصر

هههههههههههههههههههههههههههههههههههههههههه

انا اكيد ان شاء الله هكلمك قريب

سلام يا نور

امضاء

بطوط صغنطوط
))

نطلع من الإيميل اللى أنا كنت باعته دا بكذا حاجة :
1- إنى كنت بحب المراسلة البريدية أوى زمان ومازلت.
2- إن الواحد كتب الميل دا قبل مرحلة ما يبقى فقرى.
3- إنى زمان كنت طيب أوى وتقريبا عبيط.
4- إن الناس بتنسى ومش بتقدر أى حاجة.
(( تحديث تم مسح رقم خمسة عشان الناس متفهمش غلط ))
6- إن مفيش حد يستاهل إسم نور.
7- الكهربا قطعت تلات مرات وانا بكتب البوست دا ... بس برده هكتبه.
تحياتى
شاب فقرى
----(( تحديث ))-----

الكهربا وانا بكتب التحديث قطعت تانى

بركاتك يا قاهررررررررررررة

بالنسبة لعنوان البوست والامضاء اللى فيه دا عشان انا كان عندى صورة حلوة بحبها اوى

مكتوب عليها (( بطوط صغنطوط )) بس راحت وطارت خلاص

فمحدش يقول بطوط بقى عشان معورش حد وقد أعذر من أنذر :P

الفقرى الكبير