الخط المستقيم

 أقصر طريق بين نقطتين هو الخط المستقيم 

النهارده افتكرت دا وانا بلف علي السوق وبكره هلف تاني عشان اخلص شوية حاجات واركز في اللي المفروض اعرفه وأعمله 

النهارده مشيت شوية حلوين وامبارح بليل اكتشفت تنميل في نص دماغي اليمين لما حاولت اسرح شعري وكان الموضوع مزعج ويخوف شوية 

الحمد لله كله تمام وبخير واليوم عدس حلو ووصلت البيت ساعه الا ربع قبل الفطار وعملت صينيه بطاطس باللحمة و العصير والرز وبابا غنوج

سريع بس كفاءة والاكل كان هايل 

بكره ناوي اطبق القاعدة دي في يومي وربنا يسهل 

الحياة حلوة ربنا يحليها كمان وكمان ويقصر المسافات وينور الطرق ويوصلنا لاهدافنا يارب ويعدي الفترة دي علي كل خير وباعلي نجاح

تعليم الحاجات دي مش بالساهل 

بس اللي معاه ربنا يمشي علي الميه 

احلام سعيدة يا كيمو 

تصبح علي خير يا حبيبي 

اول يوم

 للأسف متسحرتش امبارح وكنت راجع تعبان جدا من مشاوير كتير مع صاحبي وفي المحل وميت حوار وكنت مش شايف قدامي لولا واحد صاحبي تاني فات عليا بعد التراويح وقعد معايا مكنتش كلت ، كنت بصراحة تعبت اوي ولما جالي قمت كلت وشربت وجربت كيك البرتقان ونمت فجاة 

ملحقتش اتسحر 

المهم بقي النهارده صحيت رايق والصيام هادي وروحت قابلت صاحبي وروحت المحل اطمن علي الدنيا هناك وبعدها روحت افطر عند حد معزوم عنده 

يمكن اللي فطرت عنده دا اكتر شخص بيديني امل في الحياه وبيعتبرني من اهل بيته 

فطرت مع اهل بيته ومعاه وحسيت فعليا اني ليا بيت واهل 

وبعدها قعدنا قعده لطيفة وروحت تاني اطمن علي صاحبي في المحل وبعدها روحت 

اليوم كان حلو وخفيف اوي ولطيف 

وكنت جايب اناناس في برطمان حطيت منه علي الزبادي وكمان عسل نحل وبعدها شوية موز جنب الفول والبيض بالسجق 

خدت فيتاميناتي 

روقت بالي وسهرت حبه حلوين اهوه 

وشوية وانام 

عندي امل لما يشوف الأطفال 

عندي امل لما ببص علي الحياه الهاديه المستقره 

عندي امل كبير بكل شكل والله

ودعيت كتير علي الفطار كتير اوي 

دعيت لكل حبايبي وكل اللي بتمناه 

وفوق كدا بقي 

كان عظمة الموضوع اني معايا ونس ناس بتحبني بجد 

كلمت امي واخواتي  واطمنت علي كله 

اليوم حلو يارب يخلي بقية الشهر خفيف 

وعملت مكالمات تانية مهمه 

والحمد لله

امي وحشتني وحاجات كتير في مصر بس لعله خير 

وفوق كدا في حاجات كتير اوي وحشتني من اول فطار لينا في رمضان والذكريات الحلوة كلها 

الحمد لله ربنا يقدرني علي الحياة وعلي الفرح ومسير الفرح جاي 

ليلتك سعيدة يا كيمو يا حبيبي 

تصبح علي خير 

مسير الغايب

رمضان وكدا وايام حلوة والغربة حلوة بس لوحدك

الجنة من غير ناس ما تنداس 

الحياة والحمد لله حلوة والواحد بيخطط وبيجري وبيتصرف وبيعمل كل اللي في طاقته والواحد تعب والله 

من بين كل الحاجات اللي بتوجع ان الواحد بقي محروم يشوف اهله او يفطر معاهم ، مش كان السجن ست شهور اكرم من العيشه دي ؟ 

محروم من المحبة والحنان ولمة الفطار وخناقات رمضان و الجري ورا الفطار وحاجات كتير 

أنا بطلت اطبخ من شهور والحمد لله لسه بصحة جيدة وكله تمام 

بس الواحد تعب شوية عادي يعني ما العزلة والوحدة وحشة

بدور كل يوم علي حاجة تتعمل او مكان يتراح عشان الواحد يقضي وقته وينشغل باي حاجة 

بجري عشان افتح مشروع وأخلص ورق واخلص ميت حاجة 

والواحد بيقول الحمد لله 

رمضان جه والشهور عدت وفاتت الايام ، مش عارف ازاي مر كل الوقت دا بس مر بمرارة شديدة وساب علامات كتير حتي لو هديت واستريحت وبقيت كويس والحمد لله بشكل كبير في خير حال 

بس زي ما قلنا أنا بقالي سنين لا فطرت مع اهلي ولا قضيت معاهم وقت حلو 

مرهق اوي من الغربة وعايز انبسط واتفسح واعمل مليون حاجة 

قطعت كتابه البوست عشان واحد صاحبي جالي

اتغديت وكلت وحليت وهزرنا وضحكنا وانبسطنا جدا 

اليوم حلو دلوقتي 

الغربة اهدي والواقع احلي 

اكيد هي وحشتني ووجودها فارق وذكرياتنا في رمضان كتير اوي بس الحمد لله كله رضا 

أنا مبسوط وراضي والحمد لله 

نفسي في وجود ناس كتير ونفسي كل دا يتحل ويبقي كويس 

بس هي إرادة ربنا سابقة كل حاجة 

الحمد لله

رمضان كريم وكل سنة واحنا طيبين 

ويارب يسعد الجميع يارب في كل مكان وفي كل نصيب وفي كل قدر سواء معايا او من غيري 

الحياة ابسط وأسهل والله من كل دا والله 

يارب يصلح الحال والاحوال ويهديها ويهدي قلوبنا 

لسه فاكر رمضان وحلاوته 

خير 

ايام رمضان نهار وليل كانت كلها سكر والحمد لله 

ربنا يديم الفرح علي الحياة ويسعدنا في كل الاحوال 

دلوقتي ببتسم وراضي وسعيد لاني عشت كتير وسعيد والحمد لله 

وحققت وبحقق كل احلامي وأمنياتي في مليون حاجة 

رضا من ربنا 

خلينا نقول كله علي الله والباقي علي الله

هستني أتسحر واكل كيكة البرتقال بتاع ليدل بعد ما عصرت عليها برتقاله وليمونه وبقت حلوة اوي وينفع تتاكل ويتحط منها علي الزبادي 

ربنا يوسع علينا حياتنا ويسعدنا يارب 

الحمد لله رضا 

كل سنة واحنا طيبين يارب 

ومسير الغايب يعود وتلمس ايده الحيطان ♥️♥️

مسيري اشوفك تاني يا امي 

الموضوع صعب

 الموضوع صعب انك تبتدي لوحدك وتعمل كل حاجة بنفسك ولوحدك

الموضوع صعب اوي اوي اوي 

دا الهم اللي علي قلبي وبس 

الضغط من ورا النقطة دي 

لان محتاج ناس تشتغل ومحتاج ترتب الدنيا للناس  ومحتاج اوراق ومحتاج بضاعه ومحتاج مكان مميز ومحتاج دعايه ومحتاج تركز في الشغل علي قد ما تقدر 

محتاج تبذل مجهود 

أنا معنديش مشكلة في المجهود بس في نفس الوقت محتاج ناس تسد معايا في كل دا 

لحد دلوقتي بتحاصرني افكار كتير 

خوف وقلق 

بس عادي مسيطرين عليها 

محتاجين نتعلم اكتر 

لعله خير ان شاء الله 

الدعوة مقصورة

 كانوا زمان بيقولوا لنا مثل لطيف بيعبر عن حالة التعامل بين الصحاب 

في الحزن مدعيين وفي الفرح منسيين

شايف المثل دا يمكن دا بيلخص صداقات كتير في حياتنا ، قد ايه الواحد مش بيهون عليه يشوف صاحبه حزين او موجوع او في ازمة لكن صاحبه بينسي كل دا في الفرح وينسي يقوله تعالي شاركني فرحتي

الانسان كائن اجتماعي غريب واللي بيقبله في الحزن لما بيكون غريق في عرض البحر ومستني اي حد ينقذه اوو ولو يطبطب عليه او يساعده غير اللي بيقبله ساعه الفرح والفرفشة 

فكرت كتير في سبب إذا لقيت انه ان عقل الانسان بيستسهل عمل القوالب يعني بتحط فلان في قالب ومش بتحطه في اي قالب تاني والقالب دا قاسي اوي عشان بيخليك معظم الوقت تتعامل مع فلان علي انه القالب دا ومش بتعامل الشخص بحقيقته 

مثال 

نفترض شخص اسمه  شلبي ، أنا شفت شلبي لقيته شخص مكافح و بتاع شغل و مبيكدبش وجدع وكفاءة وحطيته في القالب دا ، القالب الجد جدا واللي ينفع يبقي معايا في الشغل ومبهزرش مع شلبي خالص وبتعامل معاه بشكل واحد بس 

تمر الايام وتجمعني صدفة ب شلبي علي كافتيريا ، واقعد معاه وييجي واحد صاحبه بكتشف ان شلبي شخص لطيف جدا وتقدر تضحك من قلبك وتكركر معاه ، ما كل هذا الضحك ما كل هذا المرح 

طيب هو أنا ليه مكنتش شايف شلبي بشكل كامل ؟ ليه بعامله بجدية فقط وبعتبره مجرد واحد شاطر في الشغل بس ؟ 

عشان خاطر أنا حطيت شلبي في قالب عشان عقلي عايز يستريح مش يستكشف كل شوية حاجات جديدة ودا كسل المخ والنفسية فبالتالي معنديش استعداد اتعب في استكشاف شلبي مع ان شلبي عسليه اوي ودمه خفيف 

المشكلة في القالب 

دايما بدي الناس فرصة عشان استكشف اكتر واشوف اكتر وابص اكتر واكتر واكتر واتابع واتعرف علي الناس وعلي جوانبهم 

أنا مش جاي الدنيا عشان أصنف حد ولا عشان اعمل قوالب ، أنا عايز اعيش في راحة بال بس في نفس الوقت عايز علاقاتي يبقي فيها مرونة وتكون حقيقية لأقصي قدر ممكن حتي لو قفلت علي نفسي مع صديقين فقط

الموضوع جميل وانا حبيته ولذلك ماشي بيه من زمان

ننتقل لنقطة تانية 

خلينا نحكي شوية

في عوامل كتير بتسيطر علي اي بزنس :

- دورة راس المال 

- السيولة النقدية

- معدل الربح 

- الفواتير 

- الموارد البشرية

- الدعاية والإعلان والتسويق 

أنا محتاج ادرس الموضوع اكتر واشوف طريقة لترتيب كل دا 

ممكن اشوف برنامج محاسبي او ممكن اشوف برده طريقة للسيطرة علي كل الجوانب مره واحدة ودا محتاج تركيز عالي وحسابات كتير 

المهم يعني 

لازم ابقي رايق ومركز كويس 

نقطة تانية 

أنا محتاج استقرار وبيت وأولاد ودفا وونس 

محتاج دعم حقيقي بالحب من ناس حواليا من كل اتجاه عشان الايام تعدي ومحتاج حب حقيقي ودعم مستمر عشان اعرف اوصل لمرحلة الروقان والراحة النفسية اللي تخليني قادر اركز في كل الحاجات دي. وانا بعمل البزنس 

عندي خطط  لحاجات كتير بس محتاج تركيز 

قعدت الجمعه مع صحابي وكانت سهره حلوه اوي 

والسبت كان يوم لطيف 

والنهارده عندي حاجات كتير دمها خفيف تتعمل. ربنا يسهلها ان شاء الله

الحياة محتاجة ومش حقيقي مش منظر 

مش عارف أنا عشت ازاي العمر اللي فات بس متاكد انه فات وبسرعه اوي كمان 

ربنا ينور الطريق الجاي ويكتب اللي يرضيه ويرضينا بيه 

الحمد لله