متجمعناش لقعدة الجمعة

 عارفة النهارده كان يوم طويل 

الشاور والصلاه والفطار وبعدها زي الشاطر عملت فطار وقعدت فالبيت وبعدين خرجت لصاحبي روحتله قعدت معاه وكان وقت لطيف بس الدنيا كانت ساقعة وبعدين روحت عملت عشا 

وبعدين  بكل سلاسة 

عملت الغدا او العشا بقي 

وبعدين بقي لأهم حاجة

قاعد بشوف مسلسل اشغال شقة 🤣🤣🤣

المسلسل حلو اوي 

بيعجبني اوي علاقة حمدي و ياسمين 

مضحكين اوي والشغالات دمهم خفيف 

كان نفسي اشوفه معاكي 

مش عايز اقولك مواقف كتير بحس فيها ان كنا احنا وبشوف فيها كتير 

نفسي اكلمك اقولك كان عندك حق في ايه ومين

بس النهارده حصلت مصيبة جديدة واحتمال اخسر برده مبلغ قد اللي فات تقريبا تلات مرات 

بس بقول يارب يستر 

مش عارف اعمل ايه والله

بس هي غلطتي يعني 

المهم انك وحشتيني وكنتي علي بالي طول الوقت والله حتي وانا عند صاحبي ومعايا ناس كتير 

والنهارده قعدة الجمعه محصلتش 

وبالتالي متجمعناش 

بس عايز اقولك انك وحشتيني وانك لو معايا هيفرق كتير واني بحلم بوجودك 

وانك بالنسبة لي من زمان قيمة وقامة كبيرة اوي اوي اوي 

وأكبر مما تتخيلي 

بس عادي 

متشغليش بالك عشان عارف مش هيفرق معاكي

المسلسل حلو اوي يا طمطم 

كان نفسي تكوني في بيتي قبل ما رمضان ييجي واجيبلك علب بلح عليها اسمك يا فطومة

بس معلش 

ربنا يجعل الأمر كله خير 

يناير حلو بس ناقصه وجودك وحشني اوي 

خير 

روقي روقي 

وحشني اشوفك اوي 

وحشني اسمع صوتك واطمن بيكي 

وحشني محيش اني غريب وانك قاسية عليا 

والله وحشني اوي 

سيبك كل دا مش هيشغل بالك ومتخليهوش يشغل بالك 

أنا مستني حاجات مهمة اوي الفتره دي 

نفسي تكوني موجودة عشان تحضريها ونفسي اقعد احكيلك إنجازاتي 

عارفة 

وحشتيني

انتي علي بالي والله

اقولك ايه تاني ؟ 

اممممممنمنننننممم 

اما انتي جميلة وسكرة وعلي قلبي حلوة ووحشني دفاكي ووجودك اوي 

يارب يطمن قلبي بيكي في اقرب وقت يارب 

بس والله مبقاش عندي امل  في كل حاجة من ناحيتك 

كل دي احلام 

فاكرة زمان لما كنت بقعد اقرالك كتب واقولك الاحلام هي الحقيقة الوحيدة ؟ حلوة وزي العسل الاحلام 

بس لازم اكون متقبل الواقع انك مش بتحبيني ولا بتقري حتي الكلام دا ولا حتي هييجي علي بالك تقولي يا كريم او تكتبي لي كلمة في يوم او تسالي عني في يوم ويمكن تكوني شفتي حياتك وكملتي من غيري ، عادي هفضل احبك دي الحاجة اللي محدش يقدر ياخذها مني .. احساسي ومشاعري وبس وعشان كدا متشاله جوايا زي روحي كدا بايد اللي خالقها ومشاعري برده

لو ليا نصيب فيكي هشوفك وهتبقي جنبي ونبني حياة 

ولو مليش نصيب مش هيبقي له فايدة الجري والتنطيط المهم تبقي كويسة وبخير ومبسوطة وسعيدة في كل الاحوال وانا عن نفسي مش عايز حاجة أنا بحلم وكله علي الله

خدي بالك من نفسك عشان وحشتيني اوي 

تصبحي علي خير يا طمطم 

الجمعة وتجهيزاتها

 نزلت صليت الجمعة ولسه عندي حاجات تتعمل ، لسه هفوت علي صاحبي ولسه هقعد ارتب مواضيع الكريبتو ولسه هرتب برده مواضيع مصر ولسه مستني اشوف شلة دوسلدورف جايين النهارده ولا لا عشان نسهر ولسه هشوف البيت ومفطرتش وورانا حاجات بالكوم 

لكن في وسط كل دا مغيبتيش عن بالي و في وسط كل دا وحشتيني وفي وسط كل دا مش لاقي حلول ولا عارف ربنا هيحلها ازاي 

بس افتكرت ان اللي رزقي فيه مش هيغيب وهييجي ولو ليا نصيب فيكي هييجي 

نسيت اقولك في بوست امبارح اني اشتريت علبه بلح مخصوص عشان عليها اسمك تخيلي ؟

اللي في رزقك مش هيهرب منك 

واللي مكتوب لك هتشوفه 

ولو ليا نصيب معاكي هتكوني هنا 

ولو مليش فانا كفايه عليا الحب اللي حاسه والسنين اللي عشناها 

وفوق كدا مش بتمني لك اي شر 

يمكن مواجهتي ليكي بمليون خطاب ولاهلك وكتاباتي والجري وراكي هيخليني في يوم من الايام اتحرر ومش خايف ومش بكتم اي حاجة خالص وبقولك كل حاجة بصراحة وبحاول 

لكن الكتمان والهروب عمره ما كان حل او مفتاح عشان بيفرقع في يوم ويجدد الجرح والإنسان بيصحي يلاقي نفسه مجروح وفجاة كل حاجة صعبه فعشان كذا المواجهة بالنسبة لي والجري مهما كان متعب بس متاكد انه هوا الحل مسيري في يوم هبقي احسن واخف وأصلح وكل يوم بصلح في نفسي عشان اعيش كويس وابني بيت وأراعي ربنا لكن مهربتش ولا استخسرت اي حاجة

أنا هقوم اعمل فطار بقي 

دا الحل الوحيد المواجهة 

لكن الهروب مش الحل 

يارب يكتب لنا اللي يرضيه ويراضينا بيه

وزي ما قلتلك بقيت متسامح من فكره الوحدة وان ممكن متكونيش بتحبيني وان ممكن يكون خلاص فعليا وحقيقة كل حاجة انته ويكون في حد تأني تسامحت وتصالحت خلاص ومبقاش كل دا بيوجع والحمد لله راضي بقضاء ربنا 

ربنا يصلح الحال 

يارب خير 

يومك حلو ويناير سعيد وكل عيد جواز وانتي بخير يارب 

نحارب

 تيجي نحارب ؟ 

عشان ايه معرفش بس يمكن في بيننا حلو كتير ويمكن عندنا حلو كتير 

يمكن عشان بحبك

بس صحيح دي مشكلتي مش مشكلتك زي ما قالوا 

بقيت متسامح مع فكرة ان معلش يعني عادي تكوني محبتنيش او مش بتحبيني او مش اي حاجة

بقيت اوكي مع فكره ان مفيش امل 

تقريبا النار اللي وصلتني منك مش نار الحب والشوق لكن نار الهجر والزعل والقسوة 

يمكن نار الحب والشوق عندي أسطورية وبقدر اعمل الحلو كله واعدي بلاد وانجح في حاجات واعمل المستحيل بس كل دا عشانك 

لو دا بيرضي نفسيتك ويرضيكي معنديش مشكلة 

اسمي معاني الحب هو الحب من غير امل ولا فايدة ولا اي ثمرة 

بتخيل اني ممكن كان زماني معاكي وعندنا اكتر من طفل وعايشين حلو 

بتخيل احيانا ايام الشغل والشغل والميتنجز والحاجات اللي بعملها وانا شغال وانتي بتلفي فالشقة 

وبتيجي تقعدي في حضني وبخلص الميتنج وبحضنك انتي والاولاد 

تخيلي للحظة اللي كان ممكن نحققه لو كنا احتوينا بعض 

شيء خرافي حلم عظيم 

يمكن حبيتك بجنون كانك بنتي أنا من دمي ولحمي 

ودمي سكن جواكي بس قدر ربنا ومشيئته الرزق بميعاد 

يمكن غلطنا اني كل الوقت بحبك زي بنتي وبعاملك كدا وانتي بتعامليني زي ما انتي عايزه تربي ابنك 

يمكن دا غلطنا نسينا اننا اقرب ناس لبعض 

مش عارف حاسس ان كل حاجة عشناها بقت حلم بعيد اوي مش قادر المسه ولا اطوله 

الحياة صعبة اوي يا طمطم والواحد لوحده 

بس حتي دا اتعودت عليه ، اتعودت علي الغربة والوحدة وصدقت خلاص ان دا قدري 

وصدقت كلام كتير قلتيه وكلام كتير مقلتيهوش

مش عارف اقولك ايه ولا ايه

انتي عارفة اني بحبك

عارفة ان 

جوايا قلبي شجر مقطوع بعطش اليكي واحنّ وأجوع 

فاكره لما قلتلك اني خلقت من الحنين ؟

تقريبا فاكر كل حاجة بادق التفاصيل و وحشتيني وفاكر كل كل كل حاجة 

مش عايز اكتبلك رسايل فصحي عالفاضي بقول اللي علي بالي وفي قلبي وبس 

عندي حاجات كتير اوي شايلهالك

عارفه ان في حاجات ياما شيلتهالك ؟ 

ياما. قبل ما تيجي او اعرفك حتي 

يب عارفه ان في حاجات كتير اوي في حياتي معملتهاش عشان مستني تيجي نعملها سوا 

ملهاش طعم من غيرك 

ما تيجي نحارب 

عندي كل ما تتمني والف الف الف الف زياده والله

ليه كل دا ؟ عشان حاجة حصلت ؟ طيب ما اللي بيحب بيسامح وحتي لو مش بيحب بيسامح وبيدي فرصة 

ياتري لو مكناش نعرف بعض وقابلتك كان هيبقي ليا معاكي فرصة ؟ 

معرفش 

بس فعليا النهارده رجعت من برا وافتكرت لما بدخل اناديلك واحضنك 

كان في حاجات كتير اوي حلوه اوي اوي اوي 

بس للاسف نسيت ان الشاري دايما بيعاني 

بس خير 

أنا متأقلم مع وحدتي وبعمل حاجات كتير ومريح اعصابي ودماغي  وبتعب شوية حلوين وبخسر كتير 

واليومين دول خسرت جامد اوي بس والله ما زعلت علي الفلوس 

زعلت علي الثقة بس 

عايز اقولك اني بقيت شاطر فشخ في حاجات كتير 

قريب ناوي افتح كذا مشروع 

عارفه ان كل خطوه خطيتها وانتي مش هنا احتفظت لك بيها بصور وفوق كدا كان نفسي تبقي معايا فيها 

يارب يقدرني واحبك واديكي عمري 

يمكن دا غلطي اني بحب بشكل ابدّي 

والله يافاطمة اسمك علي قلبي زي البلسم

نسيت اقولك دا 

المهم يعني اني والله فعليا شايلك كتير اوي وهعمل حاجات كتير اوي تسعدك قريب 

ويارب يجمعني بيكي 

الرساله دي ننزلها بعد ما انزل بوست عالفيس نشكر فيه الاستاذ احمد سعد علي الاغنية الحلوة 

انتي  وحشتيني اوي 

كان نفسي تبقي معايا

كان نفسي نعيش والله

حقك عليا وانا اسف 

بس والله غصب عني وحشتيني 

تصبحي علي خير يا طمطم

اتفاق لاغي وخطاب جديد

 كتبتلك خطاب جديد يارب يوصل  عن سورة العصر علي الفيس

ان الحب ميبنفعش يغيب فيه الحق ولو الحق مش موجود بقي الحب مليان ظلم للمحبوب  وافتراء و طرف بيعطي وبيتظلم 

ايه اللي حصل ؟ عشان الاتفاق يتلغي 

هيفرق ؟ حد هيصدق ؟ حد هيسمع اساسا ؟ ، حد هيستوعب ؟ 

كدا كدا هفضل في نفس الصورة الوحش الكذاب المخادع اللي اللي اللي الي آخر التهم اللي مش بتنتهي

هيفرق كلامي وحكي اللي حصل ايه ؟ 

هتقري اساسا ؟ طيب هتقدري الموقف ؟ 

كنتي قريتي اللي فات أنا كتبت لحد ما ايدي وجعتني وشرحت لحد ما بقيت بكرر كلامي 

هتقدري الموقف ؟ كنتي قدرتي اي لحظة حلوة ؟ كنتي قدرتي العيش والملح وسمعتي او حتي اديتي فرصة ؟ 

هتسمعي حتي ؟ فاكره آخر مرة سمعتيني بإنصات امتي ؟ فاكراني أصلا.  ؟ ولا أنا معدتش هنا ولا عاد ليا لزمة ؟ 

شوارع القاهره ممكن تسمعني 

الحديقة الدولية والأوبرا 

التحرير وشوارع العتبة ووسط البلد ونادي المعلمين

يمكن شوارع إسطنبول وتقسيم 

يمكن كمان المانيا وشوارعها 

يمكن محطات القطر في أيسن ومولهايم ودويسبورغ واوبرهاوزن 

يمكن حتي شوارع ومطاعم وكافيهات المانيا تسمعني 

لكن انتي 

مظنش

هتصدقي ؟ 

طيب مصدقتيش كل التوسلات والأسف والندم والحكي الكتير دا ليه ؟ 

ليه مصدقتيش كل جوابات الحب والغرام اللي تملي كتب دي ؟ 

هيفرق ؟ 

طيب كان فرق اي موقف حلو او اي يوم او اي قعدة او حتي اي لمسة او حضن

كل اللي اقدر اقوله هو ان كان عندك حق في حاجات معينه والحاجات دي فرقعت في وشي وفشختني وخسرت في مصيبة كبيرة مبلغ كبير وروحت في ستين داهيه

بس خلاص 

ودا جزائي 

عارفة 

المشكلة اني عامل نفسي ناصح وفالح وانا اساسا اهبل وعبيط وامي عارفة

ودي المصيبة 

بحط ثقتي في الناس الغلط 

وبتعشم بزيادة 

ومش بعرف اشوف قيمتي ولا نفسي صح 

وبتعب وبجري بلا هدف 

وبستني المستحيل و فاكر ان هيحصل تاني 

وكل الناس بتقولي انت كنت سلم وانت اساسا محدش حبك ولا نيلة 

ومفيش رجوع ومفيش فايدة ومفيش ومفيش ومفيش 

وانا زي الاهبل بتعشم بزيادة وبصدق نفسي وبسيبك تلعبي بيا عشان بحبك

عشان فاكر اني عندي التاريخ والقصة والحدوتة وفي حياة بعض من زمن الزمن  بس كل دا راح 

وانا زي الاهبل 

مكمل في العبط

وعارف اني هفوق علي قلم يخليني اتمني الموت زي يوم ما عرفت في يناير اللي فات بالست شهور سجن 

والله

وربنا عارف 

ياتري عندي ايمان بيكي ؟ ياتري أصلا فاكر ان كلامي هيكون له اثر وهنتكلم او حتي يتصلح حالنا ؟ 

حالنا مين احنا معدناش احنا معدناش نا من غير نا بقي في أنا وهي 

مفيش احنا 

بس معلش 

اكيد ربنا شايلي الخير 

ياريتني سمعت كلامك في حاجات كتير 

ياريتني ما عاندت ولا وثقت في ناس معينه

بس معلش خير 

حصلت المصيبة والاتفاق اتلغي  وكله راح 

يعوض عليا ربنا 

في اللي راح وفي الاتفاق وفي كل حاجة حتي في حلمي واملي في رجوعك 

يعوض ربنا في العمر والحب

وبرغم كل دا وعارف انه لا هيتحس ولا ينشاف ولا يتسمع ولا هيكون له اي اثر والله إلا اني بحبك 

ياتري هتلاقي حد يحبك قدي يشاركك نفس التاريخ والحري ؟ يكتبلك ويجري وراكي ؟ يعيش زي ما عشت ؟ يحبك زيي ؟ يعمل عشانك تعب بالسنين ؟ ياتري حد هيمضي لك علي ورقة بيضا تسجنه زيي ويحط روحه في ايدك كدا ؟ 

يمكن 

خير 

تصبحي علي خير 

بكره يوم مهم 

سلام

لله الأمر

 لله الأمر من قبل ومن بعد 

وإليه يرجع الأمر كله

لعل الله يحدث بعد ذلك أمراً

ربنا يعوضني خير 

ويسترها في اللي جاي