.jpg)
الشوربة كانت حلوة اوي اوي اوي اوي شوربة الجمبري ، جبناه طازه وعملنا رز حلو وطبعا أنا معملتش لا الشوربة ولا الرز بس الاكل كان تحفة تجربة اول مرة اعيشها في حياتي وخلصت في نص ساعه إلا ما هذا ، تقريبا الاكل كان مسحور
معرفش بقي
بس صحيت بدري عن كل يوم وفطرت حلو وقعدت حللت دانا النهارده بعمري ووصلت لسر خطير وفكرة مجنونة هتخليني انطلق بعنف الفترة الجاية ويارب تطلع سليمة ، تحليل الأسواق طلع عذاب فعليا لانك بتقرا داتا ملهاش اي علاقة ببعض وفي غياب الاسباب والأخبار وفي ظل تقلبات مجنونة
بس استمتعت جدا بالفتره دي تقريبا قضيت لحد الساعه خمسة قاعد اقرا في شاربات مجنونة واحد دلوقتي كل توقعاتي صح ، الفكره بقي اكسب من ورا كل دا ازاي وفي انهي لحظة ونقط الدخول والخروج باقي كام يوم حرفيا والوضع مخليني مش علي بعضي احلامي بتاخدني وتطير وربنا كرمه واسع وفضله كبير ورحمته تشمل كل العالمين زي ما قال وانا طمعان في شوية من الخير دا يارب
الاكل كان تحفة بشكل مجنون وعملت عصير بليل لوحدي كيوي بقي علي افوكادو علي نور علي بلح علي معلقة معجون لوز وكل دا مع لبن واضرب يا معلم ، بعد العصير دا حرفيا بنور وكمان مع شوربة الجمبري كمان وكمية الجمبري دي كلها كان الواحد بيطبطب علي جسمه وصحته بحنيه مبالغ فيها
خرجت اتمشيت وزورت واحد صاحبي علي اساس اروح الجيم بعدها بس للاسف الدنيا كانت بتمطر تلج وانا متكيف تماما ومنطلق وجسمي كالعادة سخن زي النار في الساقعه وفي حضور التاج وابديت كالعادة برده سخنة نار مشيت اغني وانا مبسوط ومرضيتش اروح الجيم ، الفولت النهارده عادي لو روحت هتصاب
أنا جريت كتير عديت بلاد وكذا قارة ومسكت احلامي ومسكت الشمس وعمري ما بطلت احلم ، النهارده بحلم من جديد بحياة هادية وقلب دافي و امان يساع عقلي واحلامي ، بحلم بكل ما بتمناه وعيوني طاله علي السما ياتري امتي يارب ، الوحدة بقت خير رفيق وحققت كتير ، محتاج ارتاح راحة المطمن واخد استقرار بتمناه ، مفيش حاجة بعيدة عليك يارب
أنا يمكن حالم بس هما مواليد يناير كدا العادي يعني مش جديد بس الحلم معادش تقيل علي قلبي ولا عاد مستحيل
خلينا نعيش وندعي الدعوة المفضلة ليا
ربنا هب لنا من لدنك رحمة وهييء لنا من امرنا رشدا واكتبلنا اللي يرضيك و إرضينا
سهله وبسيطة ومفيهاش اي اختلاف عن احلام قلبي البسيطة في الحياة سواء العملية او الشخصية
بس ختام اليوم عايز اسجل الأكلة الحلوة دي واسجل هدوئي ورضايا وفرحتي بالتلج وفرحتي بان ايديا دافية وجسمي سخن وقلبي مطمن
فالحمد لله رب العالمين
