عادات

 من الصعب التوقف عن عادة زي الكتابة لمدة طويلة ، تقريبا انا بكتب من زمان من الطفوله في ورق وبعدها لقيت المدونات وابتديت اكتب واسجل من الفين وسبعه ، تخيل ، سبعتاشر سنة تقريبا ، وقت طويل جدا عمر كامل ، كتابة كل الاحداث والتفاصيل والاصرار علي الحلم والعلاقات والحب والتعب والالام والفرحة والمغامرة والشوق والكسر ، عمر كامل ، تدوين حياة بالشكل دا ، اوقات كنت بتخيل نفسي بكتب للبنت اللي بحبها او حبيتها او قابلتها او هقابلها واوقات تانية رسايل لناس واوقات تالته بكلم نفسي واوقات رابعه من الوحدة واحيان كتير فضفضة وكمان حب وشوق ومحاولات للحياة ، اني اوقف حاجة زي كدا خلاني اكتب واصفي ذهني في ورق كتير وكشاكيل كتير ، تقريبا مليت كشكولين ، الفكرة اني هنا مش بقرا تاني اللي قريته او يمكن بمر عليه مرور الكرام بدون تمعن ، اوقات احساسي بالحياة بيكون محتاج سيرش هنا او حتي قراية بسيطة لعالمي الجميل اللي بنيته باحلامي وافكاري وبمراقبتي للحياة ، المدونة هنا لها فضل كبير عليا ويمكن كلها من بنات افكاري ، التوقف عن عادة زي الكتابة عامل زي دخولك في معركة مع نفسك ، بتمسك نفسك اكبر قدر ممكن من الوقت عشان تمنع نفسك عن حاجة بتحبها لكن لحد امتي ؟ ايه يستاهل تمنع نفسك كدا ؟ مفيش سبب يخليك تتخلي عن اكتر حاجة بتحبها في الدنيا وهي الكتابة، مهما كان الكتابة دي هتوديك فين او هتخليك تتشاف ازاي ، زمان كنت قريت ان الكتابة فعل خلود ، والفترة دي رجعت اقرا تاني ، تقريبا القراية زي الكتابة كدا بتشدك لآخر العالم وتوريك جوانب وتفاصيل مستحيل تشوفها في العادي من حياتك ، الحياة حلوة وجميلة بس محتاجة تاخد بعضك وتخرج وتقابل الواقع يمكن دا السبب الرئيسي اللي خلاني اوقف كتابة فترة ، احتياجي للحياة ، معنديش تفسيرات معنديش اعذار ولا حجج ولا توسلات ولا طلبات ولا حتي اي حاجة سوي اني اعيش ، الخيارات بالنسبة لي ضاقت شوية ، بس الحمد لله وقفنا في لحظة وقررنا ننقذ الموقف ونغوص في التجربة ، نسيب ايدينا ، نحاول نداري علي كل حاجة وحشة واي حاجة معطلانا ، عزلة حلوة عن العالم الرقمي واكتشاف للعالم الحقيقي ومستالنيش اكتشفت ايه لاني تقريبا قلت فوق 

سعيد اني رجعت اكتب من جديد وربنا ما يقطعها عادة ، سعيد اني فتحت باب المدونة بعد فترة هدوء وقبلها فترة كلها رسايل وخطابات ومحاولات ، اللي فهمته كويس اوي ان اللي متغيرش بكل اللي فات مستحيل يتغير ، اللي كل الكتابات والخطابات والحب والشوق والمحاولات والشوق والحاجات الحلوة واثباتات بمواقف وتفاصيل وحياة مليانةحب وحنان واهتمام وتضحية مش هيتغير دلوقتي ، الحرية سهلة بس اللي عايز يشوفها بس هو اللي بيشوفها ، قبول العديد من الاشياء قبول الواقع قبول الرفض قبول المشاكل قبول ان العالم مش هيتشكل علي احلامي وقبول ان مفيش طريق تاني غير انك تعيش وتمشي وتكمل وتستعيد مجدك الخاص وتدوس ، اللي متغيرش بكل اللي فات مش هيتغير دلوقتي ، فقدان الامل في ان ابوك يصحي من الموت او ان الغايب يرجع بيخليك تسيب المكان اللي واقف فيهعشان الطفل الصغير دا محدش هييجي له ولازم يكمل في الطريق لوحده ويفتش في نواحي الحياة في عالم جديد وواقع جديد بيخلقه في احلامه ، ايوا هيمشي وهوا بيتألم بس هيمشي ، المكسب الحقيقي ان الطفل دا فقد الامل وسمح لكل حاجة بالرحيل ، مش متخيل لحد دلوقتي ان جاتلي القوة اقوم بعمل كل الحاجات دي ، حاجة خرافية و مستحيلة ومتخيلش بشر يقدر يعملها او يستحمل دا كله ، بس بعد فقدان الامل بييجي عالم جديد 

يلا بينا نصنع العالم بتاعنا كالعادة زي ما نحب وزي ما نتمني ، الحرية حلوة والكتابة حلوة والمحبة قوية كالموت وفي لسه ياما 

مش نهاية العالم

عدنا من جديد ياصاحبي 

يسعد ايامك ❤️

بسم الله

 يكفي من آدم أنه قال أن الحمد لله رب العالمين

حاجات ما

عزيزتي 

في حاجات مهمة عايز اقولهالك 

اثرها علي الارض واضح وقوي وشديد وهتفرقع في وشنا قريب وجدا كمان 

مقدرش احكيها هنا 

بيس

يمكن

 عارفة 

عارفة ان مفيش حاجة خلقها ربنا قدرت انها تضرني قد علاقتي بيكي ومحبتي ليكي ؟

مفيش مش موجود ، مفيش اي منكر ولا اي حاجة ممنوعة قدرت تضرني قد حبي ليكي 

دا اللي بيسموه ال 

Self destructing button 

زرار احمر كبير كدا بتدوس عليه وكل حاجة بتخرب في لحظتها 

مفيش بنت مفيش علاقة مفيش مع فة مفيش حاجةنهائي خلقها ربنا او شخص قدر يضرني للدرجة دي 

مش بتكلم عن الحكم بالسجن ولا القضايا كل دي حاجات حتي لو نفذت الحكم وحتي لو حصل ايه كلهيعدي عادي ، ست شهور ويخلصوا وابقي حر نفسي وحتي الفلوس ذات نفسها برده شوية فلوس بتندفع وشكرا مهما تاخد من وقت عشان اسددها بتخلص زي ما سددت ديون زمان 

حتي لو ملايين حتي لو ايه لها وقت بتخلص فيه ، حتي السجن ذات نفسه وقت وبيخلص حتي الحلول اللي قدامي نفسها وقت وهتعدي وابقي حر تفسي عادي تخيلي ؟ 

انما مفيش حاجة في كل دا ضرتني ولا  حتي واحد في الميه ، في اخر نقاش دخلته مع اهلي قلتلهم هي مضرتنيش هي كويسة هي بنت حلال وكل اللي بيحصل حبر علي ورق ، تصدقي بطلت اقول بتحبني ؟

انا مش زعلان ولا متضرر ولا مش واكل كويسة ففي اتاك قلق ولا اي حاجة ، انا الحمد لله كويس 

ولكن بشوية تفكير في حالي وفي اللي بيحصل في حياتي ، والله ما فارق معايا حاجةحرفيا فعليا ولا حتي بعد الف سنة حرفيا انا قد كل كلمة بقولها 

لكني في ضرر وبلاء عظيم لاني بحبك لان الحب دا بيجري في عروقي وبيبوظ كل حاجة في حياتي بيسممها حرفيا بيتعبني وبيضيع عليا سنين وبيضيع عليا الف حياة ممكن تتولد في الوقت دا ، بيخليني واقف مستني ، تفتكري انا صح ولا غلط ، تفتكري كل الانتظار دا اللي عامل زي النار بتاكل فيا انتي تستاهليه ؟ تستاهلي استني دا كله ؟ 

لو بتسعي لانتقام ف هوا حصل خلاص  فمحصلش في حياتي ان حد قدر يبهدلني او ياذيني او يذلني للدرجة دي 

مكنتش السبب في كل دا ولا الاساس ، مش انا اللي وافقت علي حد مش مناسبني انا كنت متخيل ان اللي قدامي مناسبني جدا

عارفة 

انا مش بدور علي اسباب وا تفسيرات لكني بحلم بالخلاص ، مش بس من الانتظار وان الواحد ياخد قرار او انك تاخدي قرار لكني عايز انا ذات نفسي يا الحب دا يبقي له قيمة  يا اما كل دا يروح 

انا عديت دا قبل كدا

لكني لسه بقدر العيشة والحب والحياة والحاجات الحلوة والذكريات والسنين ،تصدقي اني فاكر كل حاجة حلوة وبأدق التفاصيل 

؟

مفيش حاجة قدرت تأذيني او تضرني قد حبي ليكي ولا حتي شوية المثالية اللي بجري وراهم وا رغبتي واحلامي وقراراتي العاطفية اللي خلتني امسك في شوية صحاب رعاع ولا اي حاجة من دي 

مفيش غيرك وغير محبتي ليكي 

محبة وقلق وخوف وتوتر ، انا مختارك ومختار ابقي هنا ومش فارق معايا في الدنيا كلها غيرك 

معرفش ايه يفرق معاكي ، معرفش ليه مفيش نهاية ؟ المطلوب اني اموت ؟ اختفي وانتهي ؟ دا الطلب ؟ دي الرغبة ؟ ما مفيش اي داعي لاي حاجة بتحصل غير ان يكون نهايته موت ، عايزاك متكتف بتعاني الابدية في حبي عشان سيبتني ، طيب ما ندمت ، وكفرت عن ذنبي وحاولت وعملت كل حاجة ، هل لازم اموت ؟ دا السؤال الاهم ، اموت عشان حبيتك للدرجة دي ؟ 

لا مش هينفع للاسف 

هل من العقل ان الواحد يسمح لنفسه ولعناده وافكاره تأذي حد للدرجة دي ؟ تضر حد للدرجة دي ؟ ومين بقي ، اكتر حد حبه ووقف جنبه في حياتي 

انا واثق ان مفيش خسارة ممكن تخسريها في الدنيا قدي ومفيش نجاة ممكن اوصلها قد ان ربنا يرعاني واتحرر من الحب دا اللي حرفيا خلاني بالشكل دا دلوقتي ووصلني للنقطة دي 

تخيلي انتي مش شايفه ايه

ليه نسمح بكل دا ؟ ليه كل دا ؟ ومع مين ؟ معايا انا اللي حبيتك ؟

لو الموضوع فلوس فانا هتصرف كالعادة

ولو الموضوع سجن برده هتصرف 

ولو الموضوع اعتذار فانا اسف 

ولو الموضوع عناد فانا حقي برقبتي وشكرا لحد كدا واسف جدا 

ولو علي كلمة اتقالت فربنا يسامحني 

بس انا خلاص 

انا مش قادر اكتب تاني النهارده 

وخايف اصلا انام حد يتصل بيا زي امبارح يكهربني ، ربنا يستر 

تصبحي علي خير 

نسيت اقولك اني نشرت نهاية الفيلم بتاع كلمنتين وجويل علي الفيس ، وهي بتقوله اوكي وبيرجعوا لبعض 

حتي لما نسيوا بعض فضلوا يحبوا بعض 

وعارفين هيحصل ايه بس مصممين يكملوا الموضوع 

تخيلي ؟

دي اصلا نهاية الفيلم 

انا حبيتك جدا والله اكتر من بنتي واكتر من الحياة نفسها 

بس خير 

سلام دلوقتي  عشان معدتش شايف قدامي 

النهارده وكدا

 عزيزتي وحبيبتي 

عشان منساش حاجة بس دا اللي ناوي اتكلم فيه ( سعدني - مكالمات الفجر - الصورم والتعلق والمرض  - الطريق ما بيننا - وصلوا لايه- وحشتي كل حاجة ) بس كدا عشان اصلا وانا بكتبهم نسيت 😂

اليوم كان طويل ابتدي منين الحكي مش عارف بس هبتدي وخلاص ، الشغل كان حلو ورايق الاوفيس حلو ونس كدا بيبسط القلب والبلكونة تجنن بتطل علي الميدان فمنظرها خطير ، اتمني في يوم نقف سوا هناك ، للاسف الشديد منفعش اكمل القعدة بعد الشغل في الباربكيو عشان كان كله لحوم مش كويسة فخدت بعضي وروحت ، البلد ناقصها كتير مش عارف حاسس ان بعد ما كنت مستني اشوفك في اي شارع زي ما حصل صدفة حاسس ان دا مش هيحصل مش عارف ليه ، بس بتمني والله عشان وحشتيني اوي 

شفت حلقة لواحد بيتكلم عن الوحدة وكان تفسيره في الاخر هوا مش غياب الناس ولا غياب الحبايب لكن غياب الصحبة اللي يكون فيها تفاعل حقيقي ، وحميمية حقيقية في الكلام ، ناس بتحبك بجد عايزينك كويس انت محتاجلهم وهما محتاجين لك ، الموضوع بصي صعب شوية وملخبط بس من الاخر الصحبة مهما كان في ناس بتجري حوالينا بيبقوا ملهمش لزمة بيبقوا لقطة حلوة ، لكن مش حقيقية مش بتروح الروح زي كلمة حلوة من حد بنحبه او فعليا حد حاسين وعايشين معاه بحب وصدق وندفع عمرنا كله عشان ينبسط ويبقي سعيد ، الحياة ابسط من كدا يا عزيزتي ، اه والله ، المهم يعني الحلقة عجبتي جدا وفكرت ابعتهالك بس افتكرت ان مفيش طريق فقلت نبقي نشوفها سوا بتقدير ربنا بقي 

حصل امبارح الفجر حاجة غريبة وانا نايم ، مكالمات كتير كتير كتير من رقم غير معروف ، صحيت مخضوض وانتي عارفة الموبايل صامت ، والله افتكرته انتي وقلت يا سلام وقمت مفزوع ، بعد عشر ميسدات قمت ، فتحت الخط لقيت صمت ، وبعدها صوت مبحوح بيقول الو ، اترعبت معرفش مين دا ولامين دي ولا انتي ولا مين ، قفلت وحسيت نفسي مرعوب بصراحة ، كان نفسي يكون انتي ، الصمت دام لما رديت حوالي نص دقيقة ، وبعدها الو الو ، ياتري كان انتي ؟ ياتري هسمع صوتك تاني في يوم ؟ معرفش  بس ربنا قادر علي كل شيء ، قادر يعمر ويصلح

الصورم : تفتكري لو حد صورمه ناقح منك هييجي يقولك ؟ هيعرفك ؟ هيكون صريح ويقولك انا بحقد عليكي عشان وعشان وعشان ؟ طيب تفتكري الناس اللي بصورم دول هيقولوا ايه ؟ هيقولوا عايزينك كويس وبخير وبنحب مصلحتك صح ؟ ويبعدوك عن اي خير ليك صح ؟ هيشجعوك باي شكل تمشي في اي طريق غلط او مش هيوصلك لحاجة عشان متبقاش احسن منهم ؟ دي قواعد الصورم يا حبيبتي مفيهاش جديد صح ؟ يعني ممكن يبقي في حد بصورم حوالينا وبيمثل  ويكون مش بس بيمنعنا عن الخير لكن كمان بيذكر في سيئاته وبيحكي عنه اي تاليف وبيقلب اي موقف خير لشر عشان يبعدك عن الخير ويقولك شايف هو وحش ازاي ؟ صح ولا انا غلطان ؟ لان ابو صورم لو اتكشف مش هيقدر يضرك ومش هيقدر يستنفع منك ومش هيقدر ياخد منك حاجة فاحسن حاجة يقدر يعملها هي ايه ؟ هي التنكر وانه يعمل بيحبك، وعشان احنا ملناش دعوة بنوايا الناس بنحكم بقلوبنا وعقلنا ، لما حد ييجي يقولي حاجة او يشجعني علي حاجة بفكر هو عايزلي الخير ولا الشر بفكر الحاجة اللي بيمنعني عنها دي كانت في حياتي خير ولا شر ، ساعدتني وخلتني احسن ولا خسفت بيا الارض ، ولو بيكلمني عن شخص بشوف الشخص اللي بيحكي عنه دا ساعدني ؟ كان بيحبني ؟ ضحي عشاني بالقول والفعل ؟ بشوف الشخص دا بيشتريني ولا بيبيعني ؟ بشوف وجود الشخص دا في حياتي هيحللي مشاكل ؟ طيب هل هيخليني احقق انجاز ؟ طيب هل هاخد بيه حاجة مش عند ابو او ام صورم ؟ الناس بتخش تبارك علي الطلاق وتخبب الزواج علي بعض وتفرق حتي بين الصحاب وتوقع بينهم وبين بعض ، والتساؤل هنا ، دا ينفع ؟ هل ينفع اسمح بوجود حد زي دا في حياتي ، تخيل مثلا قبل انفصالك وطلاقك عن حد بتحبه باسبوع لو ابو صورم جه يقولك دا وحش دا فيه وعليه او يباركلك علي الانفصال او يدعيلك بيه ، هتقوله ايه ؟ اكيد هتديله بالجزمة ، طيب ايه الفرق دلوقتي ؟ ليه بتسيب اي حد بيصورم يمنعك عن الحياة مع حد بيحبك بجد وكان في بينكم سنين من اول لحظة في الشباب ، ليه سايب كلام الناس وآراءهم و تشجيعهم ومعتقداتهم تمنعك عن حاجة فعليا هتسعدك ، ايوا الحاجة دي كان فيها عيوب مفيش حد مبيغلطش بس معلش يعني كان في حلو برده ، مش اللي بيحبك هيتمني لك بيت سعيد ؟ مش هيتمني لك اولاد حلوين وحياه مستقره ؟ مش هيتمني لك شغل حلو واستقرار ، في حاجات الفلوس مبتشتريهاش  ودي اللي اي شخص بصورم بيحاول يبعدك عنها ،اظن كلامي واضح كدا ، اللي عايزلك الخير بجد مش هيمنعك عنه ولا يخلي شكله وحش في عينك 

هل انا مريض ؟ لا كنت مريض واتعالجت وكان مرضي كله نوبات قلق شديدة ، طيب هل انا عندي تعلق ؟ برده لا، الحب اكبر من كدا ، في فرق بين شخص عنده تعلق وبين شخص بيختار بناء علي حب ومشاعر ومعطيات وبيدي اعذار ويسامح ويفتح الف باب ، في فرق شاسع والله ، انا بقدر الشخص وسنينه معايا وذكرياتنا وحياتنا ومشاعري واحساسي تجاهه ، وابسط دليل علي كدا هي حرية الاختيار اللي مآمن بيها وبمنحها طول الوقت للطرف التاني 

عارفة يا حبيبتي ، كنت زمان برده بفكر واقول ان الطريق ما بيننا ايام ما كان في بينا بلاد عباره عن لمسة مش بلاد ، لمسة بصباعك علي التليفون تكلمي كريم ، لمسة تشيل البلوك وتفتح ابواب ، لمسة تعمل قلب علي صورة او تبعت رسالة فيها كلمة حب ، مكنتش شايف البلاد والفيزا والغربة والناس اللي كانوا حواليكي وكل دا مانع او حاجز بيننا اه والله ، كنت شايف ان الطريق ما بيننا لمسة، لمسة علي الموبايل بتطلع اسمي وتتصل بيه، لمسة تانية بتبعت رسالة ولو حتي خناق او لوم او عتاب ، باي شكل من الاشكال ، تخيلي ؟ كلها لمسات بسيطة ، الفرق ما بيننا دلوقتي مش عارف ايه يمنعك ، كبرياء ؟ مش هتخسريه،طيب يكون كبر مثلا ، عادي دا نخسره عشان مش هندخل الجنة بيههيمنعنا من دخول الجنة ، طيب ايه تاني ، كلام الناس ؟ كان الناس نفعوا نفسهم ، اراء الناس ؟ برده كانوا نفعوا نفسهم ، اللي كان في ايدك في يوم وملكك كان اغلي من اي حاجة تانية ودا اتقالنا بدل المره عشره وبالصريح كدا في الوش ، ايه تاني ؟ ايه ممكن يمنع ؟ الناس هتقول ايه؟ يقولوا اللي يقولوه ، بحبه وعايزاه، او حتي بيحبني وهيعمل المستحيل عشان يراضيني ومش غلط اني ابقي معاه ، ايه يمنع بقي ؟ لسه هي نفس اللمسة اللي كانت حاجز ما بيننا زمان ، القرار اللي بيحصل في لحظة اللي بيغير مستقبل بالكامل وبيبني حياة بالكامل وبيحقق سعادة ودفا وحب كل يوم ، الحياة بسيطة خالص والله ، تخيلي لمسة؟ لمسة واحدة علي شاشة النوبايل او علي اي ابليكيشن ؟ تخيلي ، اه والله للدرجة دي بسيطة ، طيب وكل المشاكل والضغط والناس والحاجات دي ، كل واحد فيهم هيبني لنفسه جنته او هيعيش فيها ويسيبك لوحدك ، كبيره اوي مكالمة حلوة مساعدة لطيفة اي حاجة في اي حاجة والسلام ، عشان يفضل في حاله مش عايز وش ووجع دماغ وحد يضغط عليه ، الحياة بسيطة اوي يا… كنت هنده باسمك والله 😂بس الحمد لله يعني قلته بلساني ، المهم يعني كل الموانع في الدنيا تدوب قدام حد شاريك بجد وبيحبك بجد ، عديت عشانك بلاد ، ولسه بقول لو صعبة عليكي السكة شاوري لي وانا اجيلك ، ولسه عندي استعداد اعدي ، بس ياتري اللمسة دي صعبة عليكي للدرجة ؟ يمكن نتفق ، يمكن نتراضي ، يمكن اصالحك ، يمكن نبقي كويسين، دا انا بحبك وانتي عارفة

زمان كنت في اوقات كتير قبل ما اهتم براي حد او حتي اسمع رايه ( دا زمان اوي اوي يعني ) كنت اقول لنفسي بتساله ليه ؟ هوا عمل ايه في حياته اساسا ؟ وصل لايه ؟ ولا اي حاجة ، طيب معلش يعني اللي بينصحني دا انت مقوماتك ايه ؟ الموضوع دا فادني جدا لما جيت اشتغل ولما جيت اغير حياتي في حاجات كتير ، خلاني رفضت التدريب المهني وخلاني صممت ابقي مهندس وخلاني بنيت نفسي وكاريري ومهتمتش برايهم ، والله لسه فاكر راي واحد فاشل او كذا واحد فاشل كانوا بيقولوا لي مش هتفلح ومحدش هيرضي حتي يشغلك وسبحان الله ، ربنا خزاينه مبتفضاش واعطاني من وسع والحمد لله ، يقيني بالله ، عشان كدا راي الناس سواء خير او شر معادش فارق ، لحد النهارده لما حد يسالني اقول بحبها وهي بنت حلال وبنت اصول وجوهرة وفيها الخير وبميت راجل ، مينفعش اعيب في حد شال اسمي ، مينفعش اشكي ولا اقول حاجة وحشة ، مينفعش مبقاش انا ، لحد النهارده بقول بحبها عادي واقبل رجوع عشان بحبها ، حتي لو اللي قدامي حاول يسخني باي شكل ، سواء كرها او حقدا عليكي وفيكي او حتي عشان مش عايزني ابقي مستريح ، الناس ملهاش لزمة ، في وقت الجد بيجروا محدش بيكون حقيقي وبيتعب بالسنين وبيكمل الطريق لآخره غير اللي بيحبنا بجد ويسافرلنا بلاد ويتعب عشاننا بجد بالسنين مش بس موقف او زنقة شهر او كام يوم 

وعشان كدا بقول لنفسي ، هل لو سمعت دماغك وكلامك يا عزيزي ياللي بتنصحني هبقي زيك ؟ ما انا شايف اختياراتك زي الزفت شايف عاملة ايه في حياتك ومدمراها ازاي ، جاي تنصحني انا ؟ ، يعني انت موصلتش لحاجة وجاي تنصحني عشان ابقي زي حضرتك موصلتش لحاجة ؟

وحشتي كل حاجة في البيت ، وحشتيني ، كل حاجة فيا بتصرخ كل ليلة وتناديكي باسمك والله ، اوقات كتير باخد صور عشان اوريهالك بس واوقات تانية بسجل تفاصيل واكتب في بوستات عشان اطلعهالك ونقراها سوا وبستني اوريكي حاجاات كتير ، بستني احكي ليكي كتير اوي ، بستني كل حاجة منك ووالله كل حاجة بتنده ووحشتي كل حاجة والله واكيد كل حاجة هنا وحشتك ، اكيد ، اصل الشوق دا كله مش هيروح في الباي باي يعني ، اكيد واصلك والله وبتحلمي بيه كمان، وبكل حاجة بحكيهالك وانا ماشي في الشارع او بطبخ او بعمل اي حاجة ، اكيد والله 

اليوم كان طويل 

ببعتلك رسايل حب وكلام حلو ولمسات طيبة حنينة وقبلات مع كل نفس ومع الهوا والله ، عشان يعدي عليكي يحكي لك

وحشتيني اوي وهتوحشيني 

يارب يخليكي ليكي ويجمعنا علي خير ويردك علي خير ويجعل فيكي ومعاكي الخير ويارب يكتب اللي يراضينا ويرضينا بيه 

النهارده رايق وحليت مشكلة مستحيلة فالشغل ووحشاني جدا ، والمرة الجايه لو اتصلتي ابقي اتكلمي متقعديش علي الخط ساكته كدا 

هبقي اكتبلك عن تخيلاتي عن اول مكالمة بينا مره تانية عشان البوست دا طول اوي 

خدي بالك من نفسك والله قلقان عليكي جدا، 

وحشتيني وهتوحشيني 

المخلص دوما 

كريم