صباح النور

 عزيزتي وحبيبتي 

تقديس النور طول عمري كان حاجة متعود عليها وملتزم بيها إلتزام تام ، لاشيء آخر بالنسبة لي كان مهم او ذو قدسية زي النور ، يمكن عشان زيه زي الحق كدا والعدل إسم من أسماء ربنا ، ويمكن هو زيه زيهم من أهم الحاجات في الحياة اللي تستاهل إتباعها ، وتستاهل الدفاع عنها بكل شكل من الأشكال ، عشان مش من السهل تلاقيها او تبقي موجودة في حياتك ، عارف الفلسفة الكتير بتاعتي بتتعبك ، يمكن فعلا بتتعبك ويمكن زي زمان بتحبيها زي افلامي او زي حاجات معينة في حياتي مهمة بالنسبة لك ، معدتش عارف بصراحة وبصراحة تاني معادش هيفرق اي حاجة وانتي مش موجودة ، مهما كانت الحاجات اللي بحكي فيها هنا او بتكلم عنها الا انك واقفة مكانك ، بتلفي الدنيا مكملة في حياة علي وضع الثبات ، معرفش إيه الممتع في كدا ، لسه مظهرش الحقايق ؟ لسه معرفتيش انا بحبك قد ايه ؟ او وحشتيني قد ايه؟ ولسه مخدتيش بالك مين من اللي حواليكي حلو او وحش ؟ يمكن انا اللي حاسبها غلط ومش شايف الحقيقة اني زي ما ناسركتير بتوسوس ليا كنت مجرد وسيلة او حاجة ملهاش لزمة في حياتك ؟ يمكن الإستغناء عنها ، مش عارف ومش مهم ومش هيفرق في حاجة دلوقتي خالص، اللي بيفرق يا حبيبتي هو الفعل والتصرف والتعب واللي اتعمل عشانك ، هوا دا الاثبات لكن ياتري الحب محتاج اثبات ؟ وعود ؟ اي حاجة باي شكل ؟ الحب مش محتاج كل دا ، سنين العمر بتجري وبتقع زي ورق الشجر واحنا بعيد ومفيش جديد 

اليومين اللي فاتوا خدت قرار اني ابقي مليونير في خلال سنة ، عرفت الطريق وابتديت احط بلان واشتغل علي المخطط ، بس مش حاسس برده ان دي البلان اللي لازم امشي عليها ، الحاجات دي مش بتدوم ، معروف طبعا ، كل الفلوس في الدنيا مش بتدوم بتضيع في لحظة ، انا عملت مستحيلات قبل كدا كتير وقدرت بتوفيق ربنا اغير امور كتير وابني اكتر من حياة وءاسس لها اساس حلو ودلوقتي بقالي شهور من غير بلان ، كانت البلان الوحيدة اني اوفرلنا ولاولادنا حياة سعيدة ومستقرة و اجهزلك الدنيا كلها ، ودلوقتي بعد ما حققت كل دا بقي تفكيري مش عارف يروح فين ، بقي كل حاجة تانية بالنسبة لي سهلة ولكني رافض المشي فيها ومن كرم ربنا عليا اني قدرت اجهز كل حقوقك بكل شكل وشايلها سواء النفقة او غيره مستنيه التسليم والمحامي بيتهرب ومحدش بياخد حاجة ولا يستلم حاجة ومش عارف ليه ودا ملوش اي تفسير واضح بس مش قصتنا برده مش دا الجواب المناسب لصباح العيد ميلاد وانا عارف اني هكتبلك النهارده كتير 

انتي بتخليني التزم اكتر واتبع النور بدون صبر عليه بدون خوف منه بدون ما اضيع في اي حاجة تانية ، وجودك بيطمني ويريح قلبي ويرويني يخليني عايز حاجات كتير ، كان نفسي اكلمك امبارح وكافحت نفسي ، كان نفسي اكلمك واقولك انتي فين واجي اخدك وافسحك وابسطك واوريكي حتت جديدة ومدن جديدة ودنيا جديدة ، كان نفسي اعملك عيد ميلاد حلو ، كان نفسي تعرفي وتفهمي ان اي فرصة لقربنا من حد بيحبنا بجد تساوي الدنيا وما فيها واكتر شوية ، كان نفسي والله 

كان نفسي اسمع صوتك ، كان نفسي اصحي النهارده الاقيكي جنبي واطمنك وافرحك واجيبلك ورد ونفطر برا وننبسط للماكسيمم، كان نفسي في ونسك في حنيتك ، كان نفسي تهدي وتفكري لحظة بالعقل وتبقي هنا ،  دا صعب ومستحيل بالنسبة لي يحصل عشان القرار في ايدك ، الاختيار كل حاجة في الدنيا بالنسبة لي ، لو مخترتنيش فملوش لزمة اجري وافرض نفسي عليكي علي مكالمة تليفون او علي مسنجر او واتس او ايميل او حتي قدام بيتك او قدام شغلك ، كل دا ملوش اي قيمة طالما انتي مش مختاراني ومش عايزاني ، لكن والله ربنا يعلم لو كان دا ممكن او ينفع يتعمل والله كنت عملته عشانك بكل نفس راضية ، لو كان في طريق كنت مشيت فيه انما مقدرش ابقي البني ادم اللزقة اللي تاعبك في حياتك ، واللي واقفلك في كل حتة ، لا روحي انتي وشوفي الدنيا واكتشفي حقيقتها وفي الاخر انا مش موجود في كل اللي حواليكي لو دا يريحك ويسعدك فدا كل همي واللي يرضيني انك سعيدة وراضية ، انما كريم مش وحش ولا رخيص ولا قليل عشان يفرض نفسه علي حد او يادي حد للدرجة دي ويبقي مسببله ضرر  بانه طول الوقت بيجري وراه ، ربنا يطمن قلبك ويسعدك ويراضيكي ويهديكي ويردك علي خير ويجعل فيكي الخير 

زمان لما افترقنا كان عندي قناعة ان ربنا كاتب عنده مين هيتخلق وعارف هيتخلق امتي ومن انهي اب وام ، وان معجزة الخلق دي وعلم الغيب بتخلي موضوع الجواز والخلفة سهل وبسيط وممكن لو ربنا كاتبلك زرية من واحدة برده تتجوزها وتخلف منها غصب عن الدنيا كلها ، عشان كدا اتطمنت وهديت وعرفت انك لو مكتوبالي هتبقي هنا تاني ، مازال عندي نفس القناعة بس بسؤال واحد اضافي : ليه عمرنا يضيع في بعد وفراق وزعل وخناق ؟  نفسي في لحظة من اللحظات تفتحي عينيكي وتشوفي الحقيقة ، نفسي والله ، كان كل دا هيتغير وكان زماننا سوا دلوقتي ، وبنقضي احلي عيد ميلاد وبدلعك بكل شكل ، يارب يجمعنا علي خير 

كل سنة وانتي طيبة يا حبيبتي 

في انتظارك 

وحشتيني وهتوحشيني 

المخلص دوما 

كريم 

هابي عيد ميلاد

حبيبتي وعزيزتي ونور عيني 

مفيش مجال لأي حاجة تتقال في وقت زي دا ، كل سنة وانت طيب يا جميل ياللي بتحلي حياتي ، كل سنة وكل ذكرياتنا حلوة وكل أيامك جميلة وانا في ضهرك وجنبك وبحبك وفي عينيا ، كل سنة وانتي الفرحة اللي بتمناها وبحافظ عليها ، كل سنة وانتي اغلي عليا من بنتي وحبيبتي وكل ما بحبه في الدنيا ، كل سنة ونظرتي في وشك بتفرحني وصوت قلبك بيطمني ، كل سنة وانتي منورة ورايقة وسعيدة وبتحققي احلامك وكل اللي نفسك فيه ، اتمني كل الشر يبعد عنك ، اتمني تبقي بكل خير واتمني تبقي اسعد واسعد وانجح وانجح واتمني تحاوطك عناية ربنا ورعايته ، اتمني تبقي بكل خير وفي رضا ربنا ومحبته ، اتمني لك اللي اتمناه لنفسي واكتر شوية ، ولو كل عيد ميلاد تبقي جنبي تبقي هدية من ربنا ، اتمني لك الفرح والرضا والقبول في كل حتة والمحبة في كل مكان ، اتمني لك  قوة البصر والبصيرة والحكمة والقوة اللي تخليكي احسن تاخدي بالك من نفسك ، اتمني لك من كل نبضة من نبض قلبي تنوري كمان وكمان وتحققي امنياتك ، اتمني لك كل الخير بكل شكل في كل وقت وأوان 

بيبقي صعب علي الواحد يكتب امنياته وتفاصيل مشاعره ويمكن من رحمة ربنا بيا اني بعرف اكتب شوية ، اتمني لك تشوفيني علي حقيقتي مش بكلام الناس اتمني لك تحسي ولو للحظة واحدة بحبي ليكي واتمني تفهمي وتقدري وتستوعبي ان الواحد مش رخيص ومش قليل وانه غالي ويستاهل ، اتمني تفتحي عيونك علي حياة حلوة تشرح قلبك ، اتمني لك سواء كنتي معايا او لا قدر الله بعيد الدنيا كلها تضحك في وشك وتراضيكي وتملي حياتك وقلبك شعادة ، اتمني لك الفرح بكل شكل وطريقة وبكل تفصيلة ، اتمني لك تحسي بقلبي وتبصي في اللي فات وتحكمي بالعدل وتتفهمي موقفي وتصرفي وكل ما مريت بيه ، اتمني تشوفيني يا حبيبتي علي الحقيقة ، الحقيقة الشيء الوحيد اللي يقدر يبني مستقبل ، اتمني كل مشاكلنا تخلص واتمني تصدقي وتفهمي محبتي ، اتمني بس تاخدي فرصة تتكلمي فيها معايا يمكن في حاجة تنور بصيرتك ، اتمني تسمعيني واتمني واتمني واتمني 

كل سنة وانتي طيبة يا حبيبتي 

ويارب كل سنة وانتي بكل خير 

اتمني لك اعظم واحلي حاجة في الوجود ، رضا ربنا وتوفيقه وعنايته ومحبته 

اتمني لك واتمني واتمني 

عيد مسلادك اللي فات حولت اتصل بيكي من رقمي لقيته لسه معموله بلوك فقلت يمكن ظهر عندها لكن بعدها اكتشفت ان البلوك مبيخليش الشخص يعرف حتي انك اتصلت بيه ، خير لعله خير اكيد ربنا كاتب الخير ، شوية ثقة ويقين في الله هتنور حياتنا والله ،مش هقول ياريت ولا أفتح في اي حاجة بس بعد ما كتبت النهارده عن بلان الاجازه عايز اقولك حتي لو مكنتش قدرت اعمل دا وارتبه اي سبب دلوقتي ، كنت هحضرلك تورتة حلوة وهدية احلي واراضيكي واطمنك واشيلك زي بنتي واحتويكي بمحبتي 

يارب كل مشاكلنا تخلص ، يارب تنوري دنيتي وحياتي قريب يارب يجمع شملنا ويطمن قلوبنا ويهديها كان نفسي والله يكون في بيني وبينك باب او طريقة في يوم نتكلم بيها ونتفاهم ونحل كل المشاكل دي ، كان نفسي يكون في اي حاجة في الدنيا تجمعنا ونتفاهم ، ياريت والله ياريت

مش عارف أقولك ايه تاني 

بس انا بحبك

ووحشتيني وهتوحشيني 

وروحي لسه ساكناكي 

يارب يارب يارب 

كل سنة وانتي طيبة يا حبيبتي 

كريم 

رحلة عيد الميلاد

 ليلة عيد الميلاد 

عزيزتي وحبيبتي 

كل سنة وانتي طيبة وبخير ، بدون مقدمات كتير وتفاصيل أكتر ولغة فصحي وكلام كتير ، المفروض اني مرتب حاجات لعيد الميلاد دا من كام شهر ، اولا واخد الجمعة اجازة والخميس اصلا عيد قومي وفايرتاج وعندنا السبت والاحد فمجهز حرفيا اربع ايام عشان عيد الميلاد دا من ناحية الشغل والاجازات ، ومن ناحية تانية مجهز بادجت حلوة وبروجرام حلو كان المفروض يبتدي يوم الاربع بليل ، نخلص شغل وتكون الشنط مترتبة ، كنت ناوي اخدك من البيت واطلع بيكي علي المطار ونسافر سوا بدون ما تعرفي الحجز فين ، نوصل الاربع بليل الفندق في ميلانو وننزل نتمشي ونتعشي بليل وبعدها نطلع نلحق ننام بدري عشان عندنا يوم طويل ، نقضي اول يوم في ميلانو وهوا الخميس وبعدها بليل نطلع علي البندقية زي ما بيقولوا فينيسيا ونقضي اليوم نتفسح ونعمل شوبينج ونبيت في البندقية والجمعة النهارده نسافر علي روما ، نقضي اليوم ونتفسح وننبسط واحضنك قدام الدوم ، وبعدها نتوكل علي الله نقضي بقية اليوم في روما و ليلة عيد ميلادك الساعة اتناشر تحديدا أكون مجهزلك ظرف حلو فيه جواب وفلوس و معاه علبه قطيفة فيها هدية قيمة تستاهلك وتستاهليها بس مش احلي منك واديهملك واحنا قاعدين في مطعم شيك بفستان وبدلة من الشوبينج الجميل اللي عملناه  وادلعك ونرقص سلو واقولك قد ايه انا محظوظ وسعيد بيكي في حياتي وانك كل حاجة حلوة فيها واني بحبك ونروح نقضي بقية الليل في الفندق ، ويوم السبت يوم عيد ميلادك الصبح هخيرك ما بين اسطنبول الحبيبة وباريس واسبانيا وانا تقريبا عارف انك هتختاري اسطنبول ، هنطلع المطار ونسافر اسطنبول بعد حجز سريع ونقضي يوم السبت والاحد هناك ، هنشوف اسطنبول ونجربها زي ما محصلش قبل كدا ، شنطنا كتير ، فنادق شيك ، دنيا جميلة ورايقة وهادية وذات مزاج عادي وروقان ، ممكن احجز بدل اسطنبول فتحية او اي مكان تاني ، بس احنا بنحب اسطنبول انتي عارفة قد ايه ، عشان كدا هنروح نتدلع ، والويك ايند اللي بعده نشوف موضوع اسبانيا او باريس  وبعد ما نخلص اليومين بتوعنا في اسطنبول نرجع علي بيتنا اكون محضرلك هدية وتورتة اشيك واحلي 

انا حرفيا مرتب كل حاجة عشان السفرية دي والاحتفال دا وعشان كدا خدت النهارده أجازة والكلام دا من اكتر من اربع شهور ، عشان قلت ابقي فاضي ومشتعد ورايق البال عشان ادلعك ، الموضوع حلو انا عارف وكان ممكن اخلي البلان دي علي شرم الشيخ او مرسي علم ، بس عارفك بتحبي تجربي حاجات مطرقعه وجديدة ونخلي مرسي علم وشرم لاجازتنا الجاية في مصر وهدلعك برده ، انتي احلي بنت عيني وقعت عليها ومش بس حلاوة الشكل ولكن الروح نفسها ومن يوم ما شوفتك وانا بحبك وروحي متعلقة بيكي ودا شيء زي ما بقول دايما كدا حدث كوني واجب الاهتمام بيه والعمل الدايم علي الاحتفاظ بيه 

زمان قلتلك اني بطلت إني أتعود علي النعمة واني بحافظ وبقدر قيمة كل حاجة ، صدر مني تصرات كتير كان هدفها اني اخلي حياتنا تستقيم واننا نبقي قادرين نستحمل مسئولية اطفال بس دا مش موضوعنا دلوقتي  خلنيا في المهم ، انا كنت مجهز كل دا لدرجة اني حاجز حفلة لينا احنا الاتنين باسامينا من كام شهر برده ، للدرجة دي حتي لو مش ضامن انك ترجعي ولا عاد عندي امل ولا مستني وببني دنيا جديدة الا اني مش ناسيكي وعلي بالي وبتمني قلبي يفرح بيكي زي زمان

كنت هجيبلك بطيخ وفاكهة حلوة في الحر دا وكنت هصحيكي ببوكيه ورد ووردة كل يوم في العيد ميلاد ، احلام بريئة زي احلام الصبا بس دي الحقيقة والله ، زمان كان كل ما افكر في اي خروجة كنتي ايما مشغوله يا كورس يا شغل يا شيفت هتلحقيه ومكانش عندنا غير خروجات الناس التوكسيك اللي خربوا حياتنا واللي فعليا اذوني واذوكي واللي واللي بدون ذكر تفاصيل 

هل البوست والجواب دا وعد يا كريم ؟ اه عادي جدا ، مهما كان في ايه فانا يهمني وجودك ومحبتك ويهمني سعادتك سواء هنا او مش هنا ويهمني اديكي كل اللي يخليكي مرتاحة معايا وسعيدة عشان انا كمان اعيش سعيد معاكي امال هعيش مبسوط ازاي وانتي مكشرة او زعلانه او نفسك في حاجة 

اينعم ترتيباتي كلها نزلت عالفاضي واحنا مش سوا وكل واحد لوحده ، بس اديني عملت اللي عليا وفضيت نفسي الاربع تيام وحاولت مع اهلك ومع المحامي و بذلت كل اللي اقدر عليه عشان تبقي موجودة ، لكن للاسف بلا فايده، مش زعلان اكيد ، بالعكس مبسوط اني عملت اللي عليا وكنت بحاول للدرجة دي ورتبت للدرجة دي حتي لو مفيش حاجة مضمونة 

تصدقي والله عارف ان كل دي احلام طفولية وعبيطة واني اهبل وعبيط وان ترتيبي دا كله جنان ، وان ليه اخدت اجازه من تلات اربع شهور وليه فكرت في كل دا وليه حاولت وليه وليه وليه واصلا مفيش فايدة ولا امل ، لكن الاهم من كدا النور اللي في قلبي ، انا مقدرش اتحكم في الدنيا والعالم والناس ، مش ضروري اي حاجة غير اني عندي النية والتجهيز واني بفتح الباب وبستعد قدام ربنا ، ونتيجة السعي والمحاولات والتجهيز والحب والشوق والمقالات والجوابات والحاجات دي كلها بتاع ربنا مش بتاعتي 

انتي عارفاني بعشق التفاصيل وفي مليون تفصيلة في كل حاجة وصفتها لليوم اكيد لو بنعمله هتعرفيها واكيد في مفاجات تانية مستخبية واكيد في مليون فكره تانية متعرفيهاش ولا كتبتها عشان شايلها ليكي ولعيونك ، كلامي خلص لحد لحظة نص الليل ، كل سنة وانتي طيبة يا حبيبتي وروح القلب ونور عيني و روحي انا ، يارب ميحرمنيش منك ولا من وجودك ولا يبعدك عني ابدا ويهديكي ويردك علي خير ويجعل فيكي الخير يا زوجتي الحبيبة ، هابي بيرث داي ❤️

وحشتيني وهتوحشيني 

المخلص دوما 

كريم 

حتي لو نسيت

بوست عادي كفاية جوابات دلوقتي عشان مرهق شوية

محدش عايزك مرتاح يمكن عشان الناس بتحب الكلام ونقل الكلام 

قليل اللي بيقول الحق وبينصح فيه وبيه وبيتمني لك الخير 

قليل اللي قلبه عليك وعايزك مبسوط 

زي ما يكون حرام تعيش مبسوط زينا او اكتر مننا او حتي واحد في المليون ، هنيجي لك نعكر مزاجك ونفتح لك مواضيع غم وننكد عليك بتفاصيل تلميح من بعيد عن خطوبة او ارتباط او اي حاجة تقلقك وتخليك في حالة توتر وخوف علي اللي بتحبهم ومهما كانت ثقتك في نفسك واستقرار اوضاعك فاحنا بس جايين نفكرك انك عبيط من راينا وانضحك عليك وتم استغلالك وانك مش فارق ومنسي 

طيب يا جماعة والله كل دا مش فارق ، هل انتم متخيلين للحظة اني فاكر ان في حاجة هتتغير ؟ لو في حاجة هتتغير كانت اتغيرت هل متخيلين اني عايش علي أمل الرجوع ؟ مكنتش هاخد خطوات في حياتي زي اللي خدتها وبجهز للي بجهزله

انا من زمان واخد قرار اني مش هسمح للعالم يغيرني ويدمرني ويخليني مسخ ، هصون العيش والملح والتزم بوعودي وفوق كل دا الاهم بالنسبة لي هو اني متحولش مسخ 

في ناس بتعيش عمرها كله عشان تحس احساس حب زي اللي عايشه وحاسس بيه ليل نهار ودا علي قلبي زي العسل ، اهون عليا مليون مرة مما ابقي غدار او انسي او ابقي بياع او اخون او ءاذي حد او حتي اعيش بقلب حجر 

ربنا ادالك قوة وقلب طيب وحب صافي ، حافظ عليه ، مع الوقت وجعك هيروح وهتعرف تبني البيت اللي بتحلم بيه وتختار بنت تريحك وتعيش معاها مبسوط وراضي والحمد لله حققت من دا كتير 

يمكن اعظم واحلي حاجة في الحب هو اللي انا عايشه ، نار بتنور ومش بتحرق ولا في غل ولا حثد ولا كره وا رغبة في انتقام ولا غضب 

مش فارق معايا غير قلبي واني اكون حقيقي ومش بزيف حاجة وصريح وواضح جدا كل دا علي قلبي زي العسل 

زمان كان في حد بيقولي الحب من غير امل دا اسمي انواع الحب 

دلوقتي فهمت القيمة دي والحمد لله

لو اللي فات كله ضاع واتحرق مخسرتش حاجة وسعيد ولو اللي فات رجع انا بردهمخسرتش حاجة وسعيد ولو بنيت من جديد برده هبقي مخشرتش حاجة وسعيد  

لان مينفعش تخسر حاجة بتاعتك اساسا ، الموضوع في الحب دا عامل زي ما يكون الشخص قطعه منك 

وانت يا طيب ياعسلية يا مانجه عامل زي واحد وساكن جواه قلبه ، هل ينفع تخسر قلبك بشكل فيزيكال ؟ اكيد لا 

يبقي عيش بقي وانبسط واللي فاتك مش بتاعك ،نفسي اشرح دا للناس كلها بس معنديش طاقة بصراحة 

ايوا يا جماعة بحبها وببني حياة جديدة وبرتب دنيا كاملة وفي نفس الوقت مش عايش في عذاب ولا الم وبثبت كل مرة حسن نيتي وصدق نوايايا و محبتي وعشقي 

لو احساسي بالحب اللي حاسه مزعلكم معنديش حل ليكم للاسف 

لو احساسي وفرحتي بقلبي مدايقاكم فربنا يكون في عونكم 

انا اتخلقت عشان اكون بني ادم مش إله ولازم اقبل غلطات الناس مهما تكررت لكن نصاحب بعض بالمعروف لاني مش إله ، دا الناس بتغلط في حق ربنا وبتذنب ، هتيجي عليا انا مستني محدش يغلط ؟ 

كل حاجة تم العفو عنها ومغفرتها 

خدت وقت عشان ابقي كدا وسعيد بجوهري اللي بيلمع وسعيد بحالي وبحياتي الجديدة وبالحب اللي ساكن قلبي حتي لو لحبيبة قاسية عليا او مش موجودة ، المهم انها بخير ربنا يوفقها ويسعدها 

والحمد لله انا عزلت نفسي عن صحاب كتير كانوا شر 

وقدرت ابعد عن ناس كتير كان كل هدفها من يوم ما اتجوزت الدنيا تولع نار او تقوم خناقة او تشربني حشيش او تتدخل في بيتي 

ربنا كبير وبيساعد ومحبته مغرقاني معرفش بقي عشان نيتي ولا قلبي ولا عشان كدا وخلاص 

مش مهم عندي اي حاجة 

لا في حاجة ممكن اعملها ترجع اللي فات من خير او شر ولا في تصرف ولا فعل ولا توجه ولا اي اكشن باي شكل قادر يعمل دا ، ببساطة عشان عملت كل حاجة خلاص في ايه تاني في ايدي ؟ مفيش غير القبول واني انبسط واعيش وخلاص 

دايما الفترة دي بفكر ارجع بالزمن عشر سنين وارجع الشاب الطايش اللي كان خاربها بس كل مره بتراجع علي اخر لحظة

خلينا كدا رايقين وعلي الهادي 

الحياة حلوة 

والحب مخلي طعمها احلي 

عالاقل عندنا حاجة حلوة نحلم بيها بليل 

وفي ارض الواقع ببني حياة جديدة مستقره هادية وبرتب لدنيا جميلة ومسيرها تتحس واسكن فيها بكل الحب دا واكتر شوية 

 لو كان في شيء هيتغير كان زمانه اتغير انا مش عبيط قاعد مستني لكني فعليا عملت كل حاجة للاخر ومش مستني اي تغيير ولا اي حاجة مجرد احساسي بالحب كفاية ودا عند ربنا قادر يسعد قلبي ويريحني كله في ايده 

ربنا يسهلها من عنده في الجاي 

معنديش حاجة تتقال غير كدا ، اروح اكمل في جواباتي بقي اللي بكتبها ونطلع احلي مشاعر واحلي احساس وبكل حب الدنيا كمان، في ايه احلي من كدا ؟ الحياة ؟ طيب ما انا ببنيها دلوقتي اهوه 

ليلتك سعيدة يا كرملة ياعسلية

ربما حين تتوقف

 لإثنيين ٢٧-٥-٢٠٢٤

عزيزتي وحبيبتي 

بعد التحية والشوق والمحبة

أعود اليوم للعمل وأبدأ الصباح بقهوتي وصلاة الصبح وقليلا من الهدوء ، عدت أخيراً و حقاً كنت أفنقتد جلستي ومكتبي و عويناتي الطبية و رسائل الإستغاثة علي بريدي الإلكتروني ، الكثير والكثير من الرسائل، قبل مطالعة أي شيء قررت اليوم أن أكتب لك فربما لن أستطع في نهاية اليوم فكما يبدو سيكون الضغط عظيما وهنالك الكثير من الإجتماعات ، لا علك لا داعي للقلق أنا لها ، لكن سينتهي اليوم بكثير من الصداع و جلسة هادئة لتناول طعام الغداء ، دعيني أحدثك عن آخر التطورات وذكري مرت بخاطري فجراً 

قمت بتجهيز كافة الأموال لدفع النفقة و عدت من مصر علي أمل أن تنتهي كل المشكلات وينال كل شخص ما يتمناه حقا، لا أتمني شيئاً سوي وجودك ، وليفة العيش و أنيسة الروح وصاحبة السفر ورفيقة الدرب ، تمنيت لو كان بوسعي العودة إلي المنزل لأجدك تنتظريني ، هذا الخيال الأحمق بداخلي الذي لا يعير للظروف ولا لشيء بالاً ويركز فقط علي وجودك والشوق إليك ، لا أخفيكي سراً فأحد الحمقي نصحني أن أتوقف عن عشقك وربنا حينهارفقط ستتواجدين ولم أرفض إقتراحاته لأنه لا يوجد داعي أن نخبر الأحمق بأنه أحمق ، أغلقت المكالمة ببطريقة ' طبعا اومال ' ولم يتوقف قلبي عن عشقك ، أدرك أن لديكي مثل هذا الأحمق كثير من الأصدقاء ولا أدري ما تفعلين ولكني علي موقفي ثابتاً منذ اليوم الأول ، ، لن يفهم أحد مقدار عشقي لك أو قدر محبتي أو حتي حكايتنا ، شيء صعب الفهم علي عقولهم ولذلك أكتفي بإخفاء المحبة والشوق ، اليوم يا عزيزتي تركت كل شيء جاهزاً لتستلميه كاملاًمكملاً في مصر لأنهي كافة المشكلات 

اليوم تذكرت سيرنا في وسط البلد وفي أوائل المرات وتحديداً في شارع شريف كنا نسير علي غير هدي حتي توقفتي للحظة وقلتي أن رباط حذاءك يحتاج للربط ، توقفت فجأة وكأنما راودني الإحساس ككل مرة أنك إبنتي ، لم نكن نعرف بعضنا منذ زمن طويل ولكن هذا ما شعرت به حينها وهبطت علي الأرض لأصلح لك رباط حذاءك ، كنتي في حالة دهشة وعيونك تنطق بكل الحب في الدنيا ، والحمد لله علي هذا الموقف الذي جمعنا ذلك اليوم 

ليس هنالك شيء أهم من وجودنا سوياً ، أدرك أنه قد يطالني الأذي وبعض التقلبات المزاجية والفهم الخاطيء منك قد تحطم عالمي لكني علي أتم الإستعداد بالمحاولة والبناء من جديد ، أدرك أنك من نفسي وروحي تسكنك كما كنت أخبرك دوماً ، بعض الناس مثلك يا عزيزتي يحتاجون من أحبتهم إلي الكثير من الصبر والعشق ولا مشكلة عندي في هذا .

عزيزتي فاق الشوق المدي وإستحالة الكلمات في إيصال مبتغاي وغرضي ، أشعر أحياناً وكأنه لا فائدة من أي شيء وبأنه لابد لي أن أبدأ حياة أخري في أسرع وقت ، أشعر بالأسي كثيرا لوجود إختيار كهذا فأنا لا أريد سواك وإختياري لك لم يكن يوماً شيئا قال للإستبدال ، يطعن البعض في وفي شخصيتي بل وفي مستقبلي ورجولتي ولكني تصدقت بعرضي علي الناس ، أكتفي بهز رأسي والإبتسام في هدوء والبعد عنهم ، لا شيء يستحق في هذي الحياة ، ولا شيء يدوم حتي الموناليزا تبلي يا عزيزتي ، في هذه الدنيا لن يبقي شيء في النهاية سوي تلك السنون التي عشناها سوياً ونلقي الله عليها دون أي شيء آخر ، يكفي كل هذا السرد صباحاً فلا أريد إصابتك بالصداع في مفتتح اليوم ، يكفي هذا القدر من الشوق والحب والذكري اللطيفة والعشق وكان الله في عوننا وفي تحقيق أمانينا قادراً وقادراً أن يضعها بين الكافن والنون ويقول للأمر كن فيكون ، بلا مسببات ولا حتي ملابسات أو ظروف ولا أي شيء .

وحشتيني و هتوحشيني 

المخلص دوماً 

كريم