وأعدي بلاد

 سفر ورا سفر ورا سفر 

ومواعيد 

وأعدي بلاد 

وأسافر لآخر الدنيا 

وأجيب من كل بلد هدية

وأجيلك

المسافة تهد الحيل 

بس تهون 

وعلي رأي اسمه إيه : ولو صعبة عليكي السكة شاوري لي وانا اجيلك

واسافر 

وبلاد في بلاد في بلاد في بلاد ومواعيد 

وبرده جاي

محدش بيهرب من قدره

وكله بميعاد

توكلنا علي الله

هسافر 

إنها ال …

 الأجازة

مخططات كتير واهداف ومواعيد وروقان ونوم وطبخ ومزاج واكبر اجازة خدتها في حياتي وسنة بتخلص مش هنحكي عنها دلوقتي 

انها بدأت من دلوقتي 😀

عايز احتفل بجنون والله 

الف حمد وشكر لك يارب 

اخيرا اجازة بجد بحق وحقيق 

يارب ❤️

كله هيتعمل بروقان ومزاج عالي 

ننزل نشتري شوية حاجات ونرتب الدنيا ❤️

ونقعد نفكر في الهدايا اللي جاية والحاجات الحلوة اللي ورانا 

ومواعيدنا الرايقة

اجازة 😀😀😀😀😀😀😀😀😀😀😀😀😀😀😀😀😀😀😀

رايح جاي

 الطريق كان حلو وسهل وبسيط والعيد ميلاد كان تحفة ، اللمة حلوة والعيلة حلوة يا ولاد ، اخيرااصبح عندي عيلة هنا ، او يمكن دا الميعاد اللي ربنا حدده عشان نقرب من بعض ، بقينا اربعه ولاد خالة في نفس البلد وتلاته في نفس الولاية ، كرم ربنا لما بييجي بيغطي علي اي حاجة تانية ، مش مهم الوقت ومش مهم السنين ، تقريبا كنت فاهم الحياة قبل كدا وتعاملي مع الوقت كله غلط ، كنت مستعجل ألحق اعيش وبقعد افكر ليه الوقت يعدي واحنا في غربه او بعيد عن حبايبنا كل واحد في بلد ، كنت فاكر ليه يعدي الوقت واحنا في عزله وحزن لكن اتضح ان العزلة بتتفك بأمر الله والوحدة بتضيع برده بأمره 

التفكير الغلط بتاع الوقت ونظرتي له للاسف كان له دوافع كتير نفسية ورغبة من الهروب من حاجات كتير ، لكن بعد ما كل دا إتحل وجدت بكل بساطة ان الحياة حلوة في حد ذاتها  وزي ما حد كان بيقولي ، هتتعود علي الوحدة والونس الشديد مع نفسك والتفاصيل الصغيره ليومك ، نعم لا تعد ولا تحصي ، الاولاد رزق زي ما الفلوس والشغل رزق ويمكن انا اكتر واحد عارف ان دول لهم وقت وميعاد ، الاستعجال مش هيغير حاجة الرزق جاي في ميعاد حتي الذرية ، جايه بالميعاد  في توقيتها ، محدش يقدر ينطق في دا  حتي لو الواحد حاليا او من سنه متجوز ما كان برده ممكن ربنا ميكرموش ، المواضيع دي ببساطة بتاعة ربنا واحنا مجرد بننتظر عطية ربنا والهبة بتاعته 

لكن حتي الحنية والحضن والدفاء والامان ربنا قادر يمنحه لك من علي بعد بلاد بينك وبين اللي بتحبه وفي نفس الوقت قادر يسهلك كل حاجة في لحظة ، كل جريك وتنطيطك وسعيك ممكن ميكونش في محله ، كل ما عليك هو الصبر والدعاء بصلاح الحال والاحوال وان ربنا يجمع الشمل ودا ان شاء الله سهل ما قلنا كل حاجة بميعاد ، يفوت يوم شهر سنة معادش بيشغل بالي زي زمان ، معادش هوا دا المحرك ، 

وطبعا سالوني : كريم مش هتتجوز بقي 😀 ، وكل واحد باقتراح واللي بيحكي عن صديقة زوجته الايرانية الاصل المسلمة و المانية المولد وقد ايه هي كويسة واهلها محترمين وزي القمر وصاحبة زوجته من الطفولة ( بس الحمد لله فضلت بعيد عنها طول عيد الميلاد ) واللي بيحكي عن زمايله في الشغل واللي بيقدم اقتراحات بجوازة من العيله 😂😂😂 مسكت نفسي ومحكيتش حاجة علي وعدي و منطقتش في موضوع المواعيد اللي حددتها واكتفيت بان الرزق له ميعاد وادعولي يا وقعدت احكي في فكره المواعيد والخلق وان كل روح ربنا كاتب هتتخلق من صلب مين ومين وان الحمد لله ربنا محددلي زوجة جايه فالطريق هتجوزها حتي لو غصب عن عيني ، 😎

بس وضحت اكتر و قلت لهم ايه فايده قرار الجواز بغير فلوس وشغل مريح ومزاج رايق ؟ قلتلهم الحاجات دي بتاخد وقت وانا بستغل وقتي في تحضير الحاجات دي او فلوسها بحيث اي وقت ربنا يأذن فيه اكون مستعد في لحظتها ابتدي وقت ما احب ، لان الجوازات بتعطل علي الفلوس ، ما في الف مليون واحدة حتي البنوتة زي القمر اللي هناك دي ،😂😂 بس الناس بتستني تكون نفسها وتعمل الظروف المناسبة لبناء بيت 

بعيدا عن كلامي معاهم معادش فارق توقيت او مواعيد والايام بتعدي بهدوء وبمزاج رايق ، انجازات حلوه ومزاج عالي و شغل وتحويش  ، معادش فاارق الحاجة جت امتي او ازاي ، اللي بقي فارق هوا الطريق السالك اللي ربنا بيقويني امشي فيه وبيبعتلي ناس تفهمه وتمشي معايا فيه وناس تراعي ربنا والحق والعدل ، و ويمسكوا العقل والدين عشان نعيش احلي ايام  

العيد ميلاد كان تحفة والبيت تحفة فكرت حرفيا انقل فرانكفورت لما اخلص كل اللي ورايا واسكن جنب ابن خالتي هناك 

وعالاقل هشوف البنوتة السكر الصغنونة دي ❤️ عرفت ساعتها الدم بيحن 

لكن في الأول والآخر معنديش غير ان من كرم ربنا عليا اني قدرت انسي عامل الوقت وانبسط بالحياة زي ما هي مش مربوط بحاجة او حد ، ويمكن دي كانت اكبر حاجة غلط عملتها في حياتي ويمكن ربنا بعدها بيكرمني ويساعدني وينورني ويبعت رزقه ورزقه بميعاد ❤️

انا كان واحشني اوي اقعد اتكلم مع ناس بيحبوني بجد ويسمعوني ، لمعت زي النجوم في الزياره ، عيوني كانت بتنور و قلبي كان بيتنطط من الفرحة زي الاطفال ، وفرحت اوي بالبنوتة الصغننه ، يمكن من احلي الحاجات اللي شفتها في حياتي كلها ، ودعيت ربنا والناس مكانش مصدقين ان كريم بقي هادي كدا ومستقر و عارف يرتب افكاره وبيتكلم بتركيز وقادر يساعد غيره و يمنح غيره السلام والدفاء وفوق كل دا عارف كل المعلومات دي 

***

يارب يطهرلي قلبك يا كيمو ويحلي زادك 

تصبح علي خير يا كيمو واحلامك حلوة زي نور عيونك وانت بتبتسم ومشتاق و حنية قلبك  وانت بتسمع وتحكي وتطبطب ودفا ايديك في الشتا وانت بتتمشي فالشارع ونور عينيك وانت بتقول وحشتيني وبتهدي التايهين بكلمة ❤️❤️❤️

علي راي الشاعر : كيف يشكو من الظمأ من له مثل هذه العيون

امبارح والنهارده

 امبارح كان يوم عظيم نزلت روحت الاوفيس عشان عزومة التيم وكنت تعبان جدا بس مكانش ينفع محضرش عشاء التيم وزياره المدير وزمايلي جايين من كل حته فندلت وانا سخن ومرهق برغم تطعيم البرد الا ان التعب اللي كان عندي كان اقوي بكتير ، مش عارف مصدره ايه تحديدا بس وجع الصدر وهده الحيل ، اتخضيت في وسط اليوم وقلت اعمل كورونا تيست وعملت تلاته واتاكدت ان معنديش حاجة ،اليوم عدي وواتعشينا سوا ، كنت شخن جدا معظم الوقت والاكل مكانش عظيم عشان طبعا مطعم الماني غريب الشكل ، اكلهم مش حلو علي قلبي لكنه مقبول وماله وعدي اليوم وتحديدا في اليوم دا ربنا كرمني آخر كرم 

يمكن دا اهم حاجة في حياتي الشخصية والمهنية والعلمية وعلي كل مستوي ، ربنا كرمني من وسع باعظم مما اتمني اخيرا نتيجة التعب والسهر والمذاكره والكورسات والشهادات و حصيلة تعب الخمس شهور اللي فاتوا ، الحمد لله رب العالمين ، اخيرا غرقان في نعم وفضل الله بكل شكل ، الخبر كان صادم للدرجة اللي خلتني بكل بساطة متنح وسعيد والمدير زي كل مره بيسالني كريم هوا انت مش مبسوط ، بقوله مصدوم شوية مش عارف اعبر عن سعادتي 😂😂😂

الحمد لله علي الامان اللي بنتمناه و الراحة والاحساس الطيب والناس الكويسة والزمايل الرايقين والسعاده الفشيخة في كل اطار و الاستقرار اللي كنت بحلم بيه ، بصراحة فوق طاقتي استيعاب كل دا ، كدا متبقاش حاجة تانيه في الجانب العملي والمادي نحلم بيها ، كدا ربنا وهبنا كل حاجة عشان نبني بيت ونأسس حياة مستقره سعيده هادية رايقة بكل شكل 

قبل ما اقوم من العشا امبارح بلغتهم اني هاخد النهارده مرضي عشان السخونية وروحت استريحت ساعتين قبل ما اقوم اعمل شوربة ومشاريب سخنة واحضر نفسي للعنايه بنفسي بكل شكل ، الموضوع صعب شوية بس الحمد لله كانت ليلة صعبه جدا بس ربنا كرمني والحمد لله النهارده احسن ومستعد لمشوار فرانكفورت بكره وتجمع العيله ، مش عارف كل الناس دي جت امتي بس تقريبا خلاص فتحنا فرع جديد للعيله هنا ، معدتش لوحدي ❤️

المهم ااني وصلت في شغلي وحياتي للمرحلة اللي كان نفسي فيها والتقدير الاوفر اللي باخده بناء علي تعبي وشغلي ومجهودي تقريبا كدا طبقا لكلامهم فانا استحقه عشان مكافح واستاهل كدا وزياده

الحمد لله رب العالمين 

ربي إني لما أنزلت إلي من خير فقير 

الحمد لله رب العالمين الف حمد وشكر لك يارب 

والله يارب مهما قلت مفيش حاجة تكفي وقفتك جنبي ولا كرمك وعطاءك ولطفك اللامحدود 

الحمد لله رب العالمين الف مليون مره 

الحمد لله الحمد لله الحمد لله الحمد لله الحمد لله

دلوقتي مستعد للاجازه متبقاش غير كورس البزنس واخر شهاده مخططلها السنه دي همتحنهم ان شاء الله قريب 

وبكدا يبقي خلصت السنة اللي نقلت فيها من شخص عادي بيحلم لشخص بيحقق احلامه وفي ظل ربنا وايد ربنا بتساعده وبترفعه لاعلي المراتب 

*

شايفه دا فيك من اول يوم وشايفه انك تستاهل احسن واعظم واحلي من كدا كمان

شايفه انك قدها ويارب عن قريب تعلي كمان وكمان وتحقق كل اللي نفسك فيه 

شايفاك راجل محترم 

شايفاك في بيت دافي وجودك بيطمن ويريح ويسعد كل اللي حواليه

شايفاك هتبقي احسن أب في الدنيا 

تصبح علي يوم زي القمر حلو ومسكر وحلو زي عيونك وقلبك الطيب 

احلام سعيده يا كرمللة

مواعيد وقمر

 مواعيد بتقرب 

والقمر مستخبي ورا السحاب زي عيون بتضحك وتنور سعيدة ورا شاشة بتقرا كلمة وحشتيني 

بس المدن والدول والبلاد والمسافات عامله زي سحابة بتخفي كل حاجة 

والكلمة نورها في قلبي بينور زي الف شمس وشمس بتتحرق وبتحرق وتدفي عمر كامل 

لا المسافة بتقصر ولا السكة بتخلص حتي وانا واقف مستني لحظة ما اسمع صوت الصفاره ويبتدي الجري 

والسباق شغال وكل حاجة بتجري وصوت الصفارة لسه مجاش 

لسه في شغل ولسه في مشوار بكره للمكتب ولسه في وقت علي الاجازة 

والكلمة بترن في وداني زي جرس الكنيسة يوم الاحد والحياة عاملة زي  مزيكا صوتها عالي مش قادر يخفي صوت الكلمة في وداني 

ومش بجري ولكن مفيش نار للجري ولا في ارض بترتوي بالوهم 

خناقات كتير والمواعيد بتقرب والمفاجات اكتر ومفيش خوف 

 كل حاجة دلوقتي عامله زي معادلة حسابيه منطقية بسيطة واحد زائد واحد بتساوي اتنين والباقي بيتمسح من السطر عشان المعادلة تتزن مينفعش يبقي فيها اكتر من اتنين

نور الشمس لوحده هو اللي يقدر ينور العتمة وهوا لوحده اللي يقدر يخليك تتأكد من الوهم والحقيقة 

والمواعيد بتقرب والف سؤال بيتكرر في وداني بسال نفسي وبس : راضي ؟ رايحين في الطريق اللي نفسنا فيه اهوه والعقل والقلب والروح راضية عنه

وبقول الحمد لله وبرضي وببتسم وبتبسط وبسعد وبعيش الحياة وبتنفس من الهوا الساقع والهوا غشيم حاد زي حد السيف بيخش يقطع وصدري معادش مستحمل …

بغير سجايري وبغير الروتين وبغير السيستم وبرده مبسوط وراضي اكيد دا مش وهم دي الحقيقة اللي بحبها ، الف مليون حاجة ملهاش لزمة لو لقينا نور الشمس يدفي الروح والقلب ويمحي سنين البرد والغربة والعزلة والنور يشع من فكره في دماغي وبنوته صغيره بتجري عليا وبتقول بابا

هوا احنا هنعمل ايه في الدنيا ؟ هنشتري اللي عايزينه ؟ هتبقي الحياة حلوة وسعيدة وفي كل الاحوال هنفرح ونسعد ، عشان راضيين وعشان عملنا كل الحلو كله يمكن عشان كدا نجدة ربنا والبركة بتيجي تزورني كل يوم بدون توقف 

وبكمل في كل الطرق ورجليا ثابته وعقلي شغال بقوة جبارة واي حاجة جنبه بتختفي ولو حتي احساس 

وايه ممكن يوصف اللي لسه مجاش وهوا متلمسش ، خدود بنت رقيقة بتبوس خدود باباها وبتحضنه وتستخبي فيه

والطرد وصل والحمد لله لكن غريبة لما وصل نور عيني علي حقيقة كنت مش واخد بالي منها 

ورحمة ربنا برده مصاحباني 

احلي صحوبية واحلي عيون بتغفل وتنام فجاة زي الاطفال وكأن حد شد الفيشة عنك يا كريم وتقعد تهلوس زي الاطفال وتقول بعقلك الباطن اللي مبتقدرش تقوله وانت فايق ، روحك طيبة وبحلم بيك بتغفل وتنام مستريح في حضني كل يوم ، كل حاجة منك حلوة وهوا في احلي منك ؟ 

مهما زعلت منك بتفضل في عيوني طيب وهادي وحنين وراضي وقلبك ابيض وحنين زي ندي الفجر 

يا حبيبي