ليلة السفر

 اكل كتير النهارده في كل حاجة بحبها ، روقان مبالغ فيه ، مكالمات هادية ، حل مشكلات كتير 

رمي الزباله وتنضيف الشقة وشوية غسيل ينشفوا عالصبح وعالهادي ناخد بعضنا ونطير 

بكره اول يوم هخرج واسافر واخلص اللي ورايا 

سفرية مهمة هتساعدني كتير  ، صحيح هسيب بيتي وشقتي ومكاني ودي حاجة توجعني لكني خلاص البيت صبح جوايا 

مبقتش بحلم بوطن وانا اساس الوطن اساسا والبيوت 

الوطن هو المكان اللي بتستريح فيه وبتنتمي له وبنتنتهي كل محاولاتك للهرب 

الحمد لله بكره سفرية جميلة وخروجات جامدة وهيصة واجتماعات ودنيا 

قد ايه كنت محتاج دا ، ربنا يسهل ويعدي الفترة دي علي كل خير واحسن مما اتمني كمان 

وساعتها هيبقي كل شيء اسهل بكتير مليون مرة 

ساعتها هنحقق حلمنا في فيللا زايد بجنينة ، المبلغ مش كبير وسهل ان شاء الله 

وغير كدا هنحقق حلم تاني في الانتقال لبيت بجنينه هنا 

ونخلص الدنيا وممكن نشتري البيت هنا كمان ، دا يبقي فضل وعدل من ربنا اسنعم هياخد وقت بس ربنا هيسهل انا متاكد 

ونقعد فالجنينة بهدوء في ركن حلو بتجهيزات جميلة نشرب الشاي ونبص عالسما بليل والاولاد حوالينا ونبني الاسرة اللي بنتمناها 

كله جاي في وقته 

الامان والطمأنينة والراحة والحب والدفا اهم حاجة الدفا 

دلوقتي كله ماشي مظبوط بس عايز اتدفي اكتر 

ربنا يسهل 

المهم ان بكره نلحق مواصلاتنا ونلحق مواعيدنا ونقضي احلي وقت هناك 

يلا هنصحي بري لازم نلحق ننام 😀😀

مفيش ابديت مفيش اي حاجة غير اني ابقي مبسوط وفي رضا ربنا ومن بكره سيستم جديد لكل حاجة 

يارب اشملني برعايتك ونجيني واحميني من كل شر وارزقني ما اتمني ولاتذرني فردا وانت خير الوارثين 

يارب 

قبل السفر بشوية + تحديث

 اخر يومين النهارده وبكره وبعدها سفر 

قررت اطبخ حاجات حلوة وعزمت صاحبي بمناسبة عيد ميلاده 

كبده وموزه ضاني وصينيه بطاطس وقلب ورئة ضاني ورز وسلطة وكانت هيصة

انا بحب الطبخ جدا ، النهارده كنت سعيد بنفسي وانا بشتري الحاجات دي كلها 

مفكرتش في اسعارولا في اي حاجة غير اني اكون سعيد 

وقعدت اطبخ خلصت كل حاجة في ساعه مش عارف بقيت سريع كدا امتي 

برافو عليك يا كيمو 

ودلوقتي في تعب في معدتي من امبارح ومرهق جدا ، اليوم عدي حلو 

رتبت الشقة وكنستها ومسحتها وبكره يوم المكوي العالمي هكوي كل هدومي واجهز الشنط وصاحبتي هتساعدني ودي حاجة عظيمة

وغير كدا بفكر الاسبوعين الجايين اسافر سفرية حلوة غير بتاعة الشغل 

اينعم الفندق هيبقي حلو جدا واليوم هيبقي لطيف 

كلمت كارير كوتش عشان اظبط نفسي ودي حاجة حلوة 

طالما بتحلم حلم كبير لازم تدي العيش لخبازه 

 انا شاطر في التخطيط والبنت الكارير كوتش كانت مبهورة بيا حرفيا من كتر الاستعدادات والترتيبات والحاجات اللي مجهزها ومخططاتي 

فخور جدا جدا جدا بنفسي 

جرعة العلاج عمالة تقل وصلت دلوقتي لاربعين في الميه من الجرعة اللي بدات بيها 

فجاة بقيت حاسس ان عقلي رهوان ملوش حدود عمال يجرب ويسبق المكل في المذاكرة والشغل والعلاقات 

وصديقتي بتقولي كريم انت عبقري وما شاء الله عليك ، طبعا عشان انجازات كتير عظيمة بلا حصر 

بقي عندي القوة دلوقتي وعقلي فايق مكنتش متخيل اني ممكن ابقي كويس كدا ، سبحان الله علي عظمة ربنا والطب والدوا ، اقدر اقول اني في طريقي عشان اتماثل للشفاء تماما 

مبقاش يهمني حاجة في الدنيا غير مستقبلي وبيتي واسرتي اللي هبنيها قريب ان شاء الله 

هانت 

عمال ءاجل في كل حاجة وماشي براحة ومباخدش قرارات حاليا وعايش بمزاجي وبراحتي 

عندي التقدير والاحترام لفلوس والشغل والمزاج والروقان الجامد جدا اللي ملوش زي 

للدرجة دي ربنا كريم ورحمته عظيمة 

الفترة الجاية هركز في الصلاه عشان التحدي كبير في وظيفتي الجديدة كلها بنات صغيره في الجامعه والدنيا هتبقي كلها عرض ازياء كل يوم وانا مبحبش دا فهركز في الصلاة واقرب من ربنا وصديقتي واقفة جنبي بتدعمني بقوة ودي حاجة فخور بيها جدا والله

هبقي اكتب تاني او اكمل البوست النهارده 

لازم اشرب حاجة سخنة عشان برد المعدة 

مش هقول تصبح علي خير ولا ليلة سعيدة عشان هكمل كتابة هنا تاني قبل ما انام 

هيييه يلا 

#تحديث##

الليلة كانت طويلة رغي كتير ونقاشات كتير كتير 

مش عارف ليه الناس بتصاب بالعبط بليل 

بس النقاشات كانت لطيفة وهادية 

الحمد لله الليلة هادية ورايقة 

مكانش له لزمة التحديث لكن النقاشات كانت كبيرة ومعناها ان في ناس متعرفش حاجات كتير وان التوهة شديدة

والحمد لله ان ربنا منور عقلي 

تصبح علي خير يا كيمو ياحبيبي ❤️

فقررت أحلم

 

أما إنتي جميلة

ولا أحلي من عينيكي ولا حتي نور الشمس 

يا حتة سكر 

يا مسك وعنبر 

يا ريحة الأمان

وفرحة أيامي 

ياللي أنتي ملكيش زي 

يمكن تشبهيني 

بس محدش غيرنا في الدنيا 

في ملامحنا 

ولوننا 

وصبرك

ودلعك 

وجديتك حتي 

وروقانك

في اشعارك 

واغانيكي 

و حتي الصبر في مسكة ايدك

والامل في ضمتك في حضن خاطف  ملي روحي فرحة وامان

ياللي انتي تشرحي قلبي 

ياللي انتي بتحبيني اكتر ما تحبي المستقبل والايام 

ياللي بتضحي بفرح

وبتقبلي خطر 

وبتصبري عالوجع 

وبتنوري روحي 

يا سمرا يا ام كحل في عيونك

ياللي انتي ملكيش زي 

تقريبا نسيت ازاي اعترف لبنت بحبي 

تقريبا توهت للدرجة

عارفك مش هتقري كلامي 

لانك متعرفيش المكان دا 

تسمعي عنه بس عمري ما شاركته معاكي

اظن دلوقتي هتقبلي الوردة

والبوسة

والفرحة 

لما تشوفي حنيتي 

وفرحي بيكي

ياللي انتي امان

يا ام عيون كحيلة

تصبحي علي احلي ايام 

واصبح عليكي زي كل يوم 

بكلمة حلوة واماني جميلة

صباحك سكر 

وورد ومسك وعنبر 

يا نور وبنور 

يا حتة سكر 

 خلي كلامي هنا سر  لحد ما الاقي طريقة اعرف اقوله واصرح بيه

احلام سعيدة

علي قدم وساق

 استعدادات للسفرية والفترة الجاية وافكار كتير ، عمال اجهز الشنط والحاجات اللي ممكن احتاجها وكل حاجة تخصني بكل شكل عشان خاطر اروح رايق وبمزاج ومظبوط ، كل حاجة بيتم تجهيزها ، الهدم لازم تتكوي عشان المنظر ، الشنط اللي تاخدها ، الحاجات الخاصة وبرفان سوفاج و الورق والماك بوك والشنطة الجديدة هحط فيها ايه عشان كل يوم ابقي جاهز في مكاني ومحتاجش حاجة ، كتير كتير كتير ، كالعادة عمال افكر ممكن احتاج ايه عشان اقدر اسند نفسي هناك سواء اكل او شرب او قهوة ، بخلص المخزون بتاعي كله في التلاجة ، كلت لحمة استيك من يومين وامبارح عملت نص بطة وملوخية وبجهز حالي 

الطريق طويل والموضوع هيبقي حلو وممتع ورايق ، احساس الانجاز والثقة بالنفس والتعامل بالالماني واني المهندس الجديد اللي جاي يحل اي ازمة في المكان ، المدير لطيف ولسه تحضيرات المذاكرة كمان هرتبها مع ماتياس وجوليان والشهادات والامتحانات وغيره ، تقريبا انا ببذل مجهود في كل حاجة عشان ابقي مستريح ، بعد تخفيض جرعة الدوا وخلاص قربت اقفل وانهي موضوع المرض وخلاص بخف ، عقلي فايق وقلبي رايق ، انا كنت مستعجل علي اليوم دا بشكل كبير جدا للدرجة اللي خليتني مش مركز احيانا في العلاج ومش مركز في حاجات كتير ، دلوقتي الحمد لله خلاص قربنا ، امبارح قابلت شلتي الجميلة وقعدنا نضحك وصوت الضحك كان عامل هيصة في الكافيه ، بقالي زمن مضحكتش بالشدة دي ، واحد منهم قالي انه رجع لمراته وعايش سعيد والحمد لله وشايفه مبسوط ورايق ومزاجه عالي قعدت ادعيله واتمني له كل خير ، ، ، مفيش احلي من لم الشمل مع الحبايب قعدت اقوله خد بالك واهتم بكل حاجة وراعي بيتك ، كنت سعيد عشانه جدا لاني عارف هو تعب قد ايه وقد ايه مشاكل اتحط فيها وتعب ازاي وكان كله قدامي ، ربنا يسعده ويوفقه

الحياة ابسط بكتير من كل التعقيدات اللي الناس بتعملها ، وجهة نظر كيليان ميرفي في الحياة وانه قافل علي نفسه ومريح اعصابه وعايش مع زوجته واولاده بالدنيا ، الحياة بسيطة ، اذا احببت شخصا قوله انك بتحبه واذا تعبت من شيء اعتزله واذا لم تجد نفسك في مكانك او مضغوط وتعبان امشي بكل شياكة و ذوق ، متحاولش تضر او تأذي حد ، سعيد ان فلسفتي في الحياة حلوة وجايبة نتيجة والفترة الجاية هتطبق بشكل اعمق ، امبارح قعدت احكي في تفاصيل لصديقتي ، قالتلي انت ازاي فاكر كل دا يا كريم ؟ هي تقريبا زي ما هي لعنة ان الواحد مبينساش الا انها رحمة بتخلي الواحد يحس ان حياته نراحتش هدر ، كنت بحكي لها عن تفاصيل حياة عشتها في اربع ايام وتفاصيل غاية في الدقة والمصيبة انها بتقولي مش فاكرة حاجة ، هو الناس بتنسي ليه ؟ هما مش مهتمين بحياتهم واعمارهم وسنينهم ؟ ياتري هل الموقف مش غالي وقيم عشان تفتكره ؟ معرفش لكني مهتم جدا بكل التفاصيل عشان كدا بشيلها في صناديق جوايا وبفتحها في وقت الاحتياج  ليها ، امبارح كنت مشتريح جدا بعد قعدتي مع صحابي وكلامي معاها ، احسانا معني الوطن بيكون عبارة عن كام يوم عشتهم محدش يقدر يلمسهم او يوصلهم ولو اتنسوا انت فاكرهم ، ايام حلوة جدا السنة دي ساعدتني ابقي احسن واحتفظت بيهم جوايا عشان كدا 

الحياة بدون تعقيد مع اللي بنحبهم اسمي من اي حاجة خلقها ربنا ، الرحمة والحنية والمودة والاحترام والتقدير والطيبة والراحة والامان كل دي حاجات لا تقدر بثمن ويجب الحفاظ عليها ، طبيعي مفيش حياة تخلو من المشاكل ودي حاجة اكيده لكن دورنا كبشر هو اننا نعدي المشكلات ونبص قدامنا ، لو فضلنا متعلقين بالمشكلات كبشر عمرنا ما هنحقق حاجة ، عشان كدا مش بخوض صراعات ومعارك تجرحني او تضرني او بلا فايدة ، بقول كلمتي مرة واحدة وبس ، حددت موقفي فخلاص مش هحارب في اراء او معتقدات الاخرين ، يمكن عشان كدا صحابي قلوا وبقوا ناس عاقلة ومتزنة وعارفين يعني ايه حياة وواقفين جنبي بكل شجاعة لانهم عارفين موقفي ، انا بحمد ربنا علي اللي وصلت له كانسان هادي متزن سعيد ، بعيد عن الدوا واي حاجة بقيت قادر اشوف نفسي واشوف علاقاتي بهدوء واخد قرارات بدون ضغط وقادر اتجنب الضغط في الحياة من خلال اني بقول موقفي وبحل مشاكلي بهدوء وراحة وطيبة وسعادة مع منح الامان لكل الاطراف وعدم تضييع وقت في محاولات بلا داعي ، النهارده صاحي سعيد برغم ان جسمي مكسر من السفر اليومين اللي فاتوا وقلة النوم بسبب المواعيد بس جسمي بيدلعني كل شوية ، وزني مثالي ، كرش اصغر ، شعر منسق ، لبس حلو ، برفانات جميلة ، شغل حلو ، مرتب حلو ،وطبعا حققت هدف من اهم اهدافي اني مبصش علي سعر اي حاجة قبل ما اشتريها ، بشتري علي طول ، ودا مش غباء ولكنه راحة بال، اليورو مش هيغير وضع الوجود ببساطة ،فبقيت بشتري ومش مهم ، بعمل الاكل اللي بحبه ، بكلم اللي بحبهم وبكلم صديقتي وببعت رسايل لاصحابي واتطمن عليهم ودي حاجة فشيخة 

النهارده يوم لطيف ورايق وجميل زي عيون نفرتيتي ، امبارح قلت لصديقتي انها نسخة طبق الاصل من نفرتيتي ودي حقيقة فعلا واللي يقول غير كدا يبقي اعمي ، ملامح مريحة تليق بملكة ، عيون هادية تحمل الحب والطيبة والسعادة ، لون بشرة برونزي اسمر يخطف الروح ، كل حاجة حلوة فقلت كدا بكل سلاسة وقالت ميرسي وبس ، احيانا التقدير والاحترام والكلمة الحلوة بتفتح اصعب ابواب في الوجود وبتحل كل مشاكل الدنيا ، الموضوع سهل بس محتاج حد شجاع

هتوحشني شقتي اوي وهيوحشني الشارع والطبخ والحاجات الحلوة  كلها اللي بتفرح قلبي ودي هيكون لها شوق يسعدني ويفكرني اني عندي بيت ووطن ولو حتي بعيد عني 

والحمد لله رب العالمين ربنا يطمن قلبي ويسعدني ويكمل كل الحاجات الحلوة علي خير ويكتب لي اللي يرضيه ويراضيني بيه ويرزقني كل ما اتمني قريبا 

زيارة اليوم

الصحيان بدري متعب والحمد لله ان شغلي وحياتي ماشية من غيره ، النهارده كان لازم اصحي بدري  بس مش زي امبارح ، امبارح كان القطر عشان اروح هيسن والنهارده عشان الدكتور بس مش بدري اوي ، سبعه ونص كان كافي جدا ، في العادي اصلا بصحي قبل كدا لوحدي لما ابقي نايم كويس وهي معايا عالخط بتطمني او بتذاكر او بتحكي لي حاجة او بعترفلها بسر خطير محكيتوش لحد قبل كدا ، المهم اني بصحي رايق ودي اهم حاجة ، تقريبا عمري ما لقيت حد في حياتي اعرف اكلمه او احكيله بالشكل دا او نسمع بعض ونتناقش ونحل اي مشكلة بالطريقة دي ، التفاهم معاها حلو احلي حتي من اني اجيب احلي بنت في العالم وانام معاها ، كون انك تبقي علي تناسق مع حد في التفكير وفاهمين بعض وفوق كل دا مصدقين بعض وبتآمنوا لبعض فدا فعليا اكثر متعة ولطف من الجنس 

روحت وزرت الدكتور وجالي اخبار كويسة ونظام جديد وان شاء الله هتماقل للتعافي قريب جدا وهبقي قادر اخد القرارات اللي نفسي فيها ، هقدر  الاقي اللي بتمناه ومش هيبقي في ضغط ومشاكل تانية في المكالمات بسبب اي حد ، ان شاء الله هتعافي قريب وشكل طبقا للجدول الزمني فاحنا علي قريب اوي هنفوق ، زياره النهارده اديتني الامل وفوق كدا زياره امبارح للشغل واللوكيشن خليتني سعيد من كمية البنات اللي هناك ، انا كدا كدا بحاول اطيع ربنا وامشي كويس ومش بعمل حاجة غلط عشان اخبي ولا بعمل حاجة اتكسف منها قدام ربنا بس احساس حلو اني اعيش في وسط ناس محترمة وشكلها لطيف وبتضحك ودي اكثر الاماني وكمان مش مهم الشكل 

البنت السمرا اللي مجنناني الحمد لله شجعتني علي  مشوار النهارده بالرغم من تعبي وارهاقي وقلة نومي لكنها شجعتني وروقت اعصابي وبالي جامد جدا ودا اللس بتمناه مش اكتر وهو السند 

الحمد لله حمدا كثيرا طيبا والله 

مفيش حاجة تفتح نفسي قد اخبار حلوة لصحتي وعقلي وقراراتي و انا الحمد لله سعيد بكل دا وراضي جدا 

صباح الورد يا كيمو