كل حاجة

- عايز ايه ؟

- كل حاجة حرفيا كل حاجة 

تصبح علي خير يا كيمو احلام سعيدة 

قالب

عارف ايه مشكلة القوالب ؟ 

انها بتعميك 

انت كانسان بتبذل مجهود او كلنا يعني جبار جدا عشان نصنف الناس عشان عقلنا يقوم بعملياته اليومية عالمستريح بدون اي ستريس او ضغط 

يعني مثلا تعالي نفكر 

انت ساكن بين محطتين مترو وقريب من واحدة فيهم وبعيد عن التانية

فانت حاطط في دماغك ان الطريق الفلاني اسهل او اقصر او مريح في حين ان انت حمار ومش عارف ان لو اتقاست السكة بالزمن او المتر هتلاقي ان الطريق التاني اقصر 

او مثلا انت صنفت كريم علي انه مثلا وليكن كائن بيضة او شخصية بخيلة 

حتي لو هوا مش كدا بس انت صنفته بناء علي مجنوعه من التصرفات 

بتعمل دا ليه ؟ عشان ببساطة لما تيجي تتعامل او تفسر تصرفات كريم بكل سهوله بترجع للقاعده الاساسية في معرفتك بيه انه هوا بيض او بخيل وبالتالي 

اي موقف بيعمله يبقي عشان بخيل 

كريم مش عايز يخرج معانا عشان الفلوس 

او مش عايز يشترك معانا فالدليفري عشان بخيل 

بس هنا بقي بتظهر نقطة انك اتعميت 

تيجي تبص للحقيقة ما يمكن هوا مشغول او مكسل او منامش امبارح او ممعهوش فلوس او مديون او يا اخي مش طايق خلقتك اساسا

لكن انت بتصنف دا بناء علي القالب اللي حطيته فيه

نيجي بقي نبص لنقطة انك ممكن تبقي ظالمه اساسا

لان هوا مش دا المحرك الاساسي لشخصيته 

لكن انت كل فعل بيصدر من كريم بتشوفه كدا 

والعكس صحيح

لما تيجي تقول كريم جدع ورجولة وكفاءة

بس جه في موقف بيتخير فيه بين انه يساعدك  يعمل مصلحة بيعمل مصلحة ويفكه منك خالص 

طيب ياسطا فوق لنفسك  هوا مش كويس اساسا هوا شخص وحش 

لكن طبقا للقالب اللي بيعميك او لنضارتك اللي خلاص حكمت بشيء علي كريم فانت مش شايف وعمال تتعامل وانت اساسا بتتحرق بالنار كل يوم 

انا بكره القوالب ولما بتعامل مع كل شخص بحط نفسي مكانه وبدي لنفسي الحق الكامل في اني اسامح او اني مسامحش ان التصرف اذاني او دايقني وبحاول افهم الدواع واعرف الكدبة فين 

مفيش قوالب 

في محبة وجدعنه واخلاص وكل ما تحب 

لكن 

مفيش قوالب 

مش هحكم عليك واقول عليك وسخ او حلو لمجرد ان انا عايز اريح دماغي لكني هفهم واستفسر في كل خطوة كل شوية لحد ما يبان النور وافهم ياعم 

لحد ما يتحقق قدامي ان انسان بمحبه وعيوب ولا انسان براس كلب 

لان في الاول والاخر كلنا بشر وبنغلط 

وزي ما لك الحق انك تتسامح انا ليا الحق اني اخد حذري 

لكن متحطنيش في قالب عشان متخسرنيش لان منتهي الغباء انك تفتكر ان مشكلة او شيء بيحرك انسان بالكامل 

انا عيني بتحرقني ونفسيتي داون شوية النهارده يمكن السبب اني قررت ابص للدنيا وافهم هي عايزه تضحي بايه والوقت بيجري ورايا

عايز انام كويس واصحي فايق عشان بكرم يوم جديد 

تصبح علي خير واحلام سعيدة يا كيمو  

ثواني الأبدية كما وصفها

مع شخص بيحب المبالغة في مشاعره زي حالتي بيكون كل شيء عظيم وبيدي باور اكتر من الطبيعي ، الحب ممكن ينور كون بالكامل زي الف شمس بتتحرق في نفس اللحظة والحنية بيبقي ملهاش حدود كانها طاقة بتنور لانسان كل لحظة في حياته وبتهديه والغضب بيكون حالة قادرة تغير مصاير البشر وتواريخهم وحياتهم بالكامل وتبدل حتي كل  جزء ف ال دي ان ايه الخاص بانسان زي حالاتي وتمحي اشياء وتضيف اشياء اخري
يمكن دا من الحاجات اللي بتميزني زي ما بتعيبني ،
لاني طاقتي اكبر من اي شيء يمكن حد يتخيله لاني انا ذات نفسي معرفلهاش حدود
بس مش دا هدف البوست
هدف البوست احكي قصة بسيطة
حكاية قبل النوم اللي استمرت اربعه ونص مليار سنة
يحكي ان قديما كان هناك ملك بيسأل سؤال لرعيته ومحدش يملك الرد لحد ما صبي بسيط راعي اغنام طلب مقابله الملك عشان يدر عالسؤال : السؤال كان ، ياتري في كام ثانية في الأبدية ؟
الشاب الصغير وقف قدام الملك وقاله بكل بساطة
تخيل معايا جبل من الماس
بيحتاج ساعه عشان تطلع لقمته وساعه عشان تلف حواليه
الجبل كل ميت سنة بييجي طائر صغير  يشحذ او يسن منقاره عليه
ويطير من تاني ويرجع كل ميت سنة
تخيل لما الجبل دا يخلص
هيكون فات أول ثانية في الأبدية
خلصت الحدوتة
الجبل من الماس ودا من اصلد المعادن ان لم يكن من المستحيل حرفيا خدشه وبيتقطع بالليزر ويقدر يقطع اي معدن تاني
عشان كدا في معامل تقطيع الفولاذ والبلاتينيوم بيكون موجود قاطع من الماس عشان هوا بس اللي يقدر يقطعهم وميجرالوش حاجة
تخيل بقي الجبل هيحتاج كام مره من زياره الطير عشان يفقد ذره واحدة
وبين كل زياره والتانية ميت سنة
انا مبسوط عشان رجعت اسمع حاجة بحبها وافتكر تفاصيلها واشوف حلقاتها الجديدة بعد سنين مش بتفرج ليها
القصة من مسلسلي المفضل doctor who
بس خلاص
احلام سعيدة يا كوكو
نسيت اهم حاجة صحيح
لو انت شايف ان الجبل كبير وعظيم
فياعزيزي انا شايف انه طير عظيم
باللي عمله في كل زياراته دي
الحلو في الحدوتة
انها بتخليك تتخيل مش بتديك معلومة وحكاية وبس
ويمكن دا اللي بيميز خيالي وحواديتي انها بتبقي اعظم من الخيال وبتسرح كتير واكتر مما الواحد ممكن يشوف
بس خلاص كدا سجلت الفكرة
احلام سعيدة من تاني يا حبيبي ❤️
تعديل تاني في نقطة في الحدوتة
انت متخيل اول ثانية من الابديه عدت  بعد قد ايه ؟
احيه
لسه منمتش واحلام سعيدة يا كيمو ❤️

تواريخ وحاجات جنب بعض

بفكر كتير بيني وبين نفسي هل بيفرق التاريخ في حاجة ؟ يعني لو كتبت اني مثلا يوم خمستاشر تاته حققت انجاز عظيم هل لما ييجي خمستاشر تلاته تاني هحس بحاجة ؟ مش عارف بصراحة لكن مفيش حاجة بتحصل ، خمستاشر تلاته مجرد يوم وانا اللي بديله اهميه زي ما كان في مفكر مشهور قبل كدا بيقول ان كل حاجة زي بعض وان احنا اللي بندي اهميه بتخيلاتنا وربطنا للتفاصيل 

احلامي مبقتش كوابيش ولكن بقي فيها تفاصيل كتير ودي حاجة تدعو للاستياء برغم انها مسلية، لاني مضطر اقعد افكر واشوف بيني وبين نفسي كل تفصيله واحاول افسر وافهم ومش بوصل لحاجة تقريبا لاني مش عايز اوصل ، زي العلاقه بين البليله والترماي والقلعه اللي جنب البحر 

مبقتش مصدق بصراحة في المفاجات والهدايا ويمكن كمان مبقتش بستناها ، برغم ان فاطمة عملت لي مفاجاة حلوة وهدية حلوة اخر مره في تركيا في اخر يناير واول فبراير  والحمد لله ربنا فاجئني بكرم كبير في اول تلاته وفي تلاته واربعه لكني واقف مكاني مستني حاجات اعمق او اقوي مش عارف تحديدا يمكن انا عبيط مثلا او يمكن مستني مفاجات متحضره احلي ، الواد اسلام حتي بطل يعمل مفاجات ودا شيء يدعو للبؤس ، اه والله ، كان عليه مفاجات حلوة من كام يوم بعتتله قلتله عمو اشتريلنا كذا وبتريق بس هوا قرد براس حمار بسديري ومفهمش 

النهارده تحديدا لاول مره من وقت طويل ينتابني قلق من حاجات انا مخططلها كويس ومرتبلها ويمكن حجز الطيران والكورونا عاملي صداع ويمكن عدد الحالات ويمكن القعدة فالبيت ، لكن خلينا صرحا انا مبسوط فشخ بالعزل وبحب قعده البيت وياريت الحال يدوم كمان شوية بسمنع الطيران عاملي وش في دماغي وعمال ارتب هنزل مصر امتي واروح تركيا امتي وهروح زيورخ تاني امتي ، جميلة زيورخ كانها قطعه من ،،،، لا ويت مش زيورخ لكن سويسرا عموما لان زيورخ ملفتش فيها كما يجب مكانش في وقت كافي ، عارف مثلا لو اروح سويسرا تاني او اسافر تركيا والف في رحلات وانزل البحر تاني يمكن هبقي مبسوط برده ولكن اكيد اول ما اوصل واشوف فاطمة هبقي سعيد اكتر .

الحياة ياعزيزي بنت تيت بتوهمك ان خلاص كدا بخ فنش مفيش حلو تاني وعلي الدوام بتتصدم لما بتفرح تاني او تتفاجيء او لما تشوف حد بتحبه بس الاكيد ان وحشني امي اوي وقلقان عليها وكذلك برده وحشتني فاطمة جدا 

بفكر كتير في الناس اللي محتفظ لسه بصداقتهم عالفيس برغم خوازيقهم او انهم اوساخ وفعليا ابتديت افلتر وفعليا مسحت واحد أرار وبضان ووسخ ولكن مش دي النهاية لسه في كتير ، طول الوقت بسيب ناس تانيه عشان افكر نفسي مبقاش زيهم لكن خلاص بيتهيالي اتعلمت الدرس ومش عايز حد يفكرني مبقاش زيه 

الحذر حلو لكن العقل والمنطق احلي ويمكن هما رفاق دربي في قرارات كتير ولولاهم كنت روحت في داهيه ويمكن مين عارف كان زماني مليونير 

من فتره كنت بقول لنفسي محتاج حوالي ست شهور اقعد فيهم لوحدي بدون اي اعباء مقطوعين من الزمن وبالي مش مشغول باي حاجة وبسيط ومبسوط وبذاكر وبس دلوقتي معايا الوقت ومشوبعمل حاجة ، عايش وبس وفي المانيا فهوا سجن والله حرفيا 

ختام القول انا سعيد برغم خوفي من تواريخ معينه محددها بيني وب نفسي لكن كله هيبقي كويس انا عارف وربنا هيساعدني ويوفقني ، يمكن احساسي بالزمن ابتدي يختفي يمكن عشان مبسوط فالسكن اللي غيرته اكتر من مره لحد ما لقيت بيت استقر فيه ويمكن مبسوط بشغل جديد عطلان ومش راضي يمشي بسبب الكورونا او لاسباب تانيه لكني الحمد لك يارب حاليا هادي ومستقر نفسيا اكتر من قبل كدا ويمكن اكتر اوقات الاستقرار النفسي ، تيك كير يا كيمو ليلتك سعيدة ياحبيبي 

ريكورد فور مي

تعديل : بيتهيالي خلاص كدا مش شايف سبب يخليني اكتب هنا تاني


بس خلاص 

كابوس :
كانت رؤية لان اي حاجة حلمتها فيها اتحققت يا اما قبل كدا او اليومين دول وكان فيها ناس مبتكدبش بوجودها زي ابويا
لكنه كان اسوأ كابوس شفته في حياتي
هل عشان التفاصيل المرعبة؟ هل عشان الحاجات اللي مهما خيالي كان يشطح ميوصلهاش في تخيل المستقبل اللي بحذر منه؟
هل عشان انا خايف ؟
لا عشان الموضوع صادم دا اولا وثانيا انا متمناش غير الخير وعشان صدمني فعلا
كان نفسي اكتب بوست من يومين وبالاخص عن كورونا والوضع حواليا
بس الكابوس قفلني ولسه صاحي ومش عارف انام تاني
خير
تمنياتي بالشفاء العاجل لكل محاربين المرض  النفسي قبل كورونا
تمنياتي بالامان والمحبة لكل حد بيطلعلي في الكوابيس ومش بعرف اقوله قد ايه انا بحبه مهما جري
تمنياتي بالنجاح والبعد عن الجنان والتخلف لكل الناس اللي بحبهم
واتمني ان زي ما ما الكوابيس بتوريني كل حاجة وبتعرفني الدنيا فيها ايه برغم اني مش موجود ولا حتي في مصر ولا في الدنيا اتمني ان كوابيسي ومخاوفي متتحققش
واتمني ميتنسيش ابدا اني كنت ومازلت خايف من المستقبل
ودا مش عشان خاطر بخاف
لكن عشان اسباب اغبي تانية
منها ما يتعلق بامنياتي اللي فوق وان الكابوس دا يطلع وهم مش حقيقة
بس نرجع ونقول انا من زمان في حاجات بشوفها في احلامي قبلها بزمن وفعلا بتتحقق فاتمني المرة دي يطلع كابوس وبس