تيجي نتجنن ؟؟

هما فاكرين لما يحبطوني هبطل أحلم 
وفاكرين لما يقولولي فكر فى اللى قدامك وبطل طموحاتك دي هبطل جنان وهبطل محاولات 
فاكرين إني ممكن إنكسر أو أقف فى محلي أو أبطل أفكر 
النهارده معرفتش أرد عليكي 
بس حصل حاجات كتير أوي خلت كل حاجة زفت ولكني زي الفل وجه فى بالي مليون حاجة حلوة وإفتكرتك وبرده لسه أنا هوا أنا :P
بقولك إيه ... ما تيجي نتجنن :) :) :)

 جربت قبل كدا أرقص فى الشارع 
وياما غنيت فى الشارع 
يمكن كانت أروع لحظات حياتي اللى مثلت فيها فى الشارع 
واللى غنيت ورقصت 
ما تيجي نرقص سوا 
ما تيجي نطير بعيد عن هذا العالم الأهبل اللى مش قادر يستوعب أحلامنا ولا يستوعب كل الجنان بتاعنا 
ما تيجي ندعي ربنا يبعت لنا جناحات ونطير 
حكيت لك أنا عن اللقطة اللى إتخيلتها لما الفراشات شالت بطلة الفيلم بتاعى وطارت بيها للسما عشان تعيش فى وسط السحاب وتلمس النجوم وتنام فى حضن القمر كل ليلة 
لسه مصورتش الفيلم ولسه فى إمكانيات كتيرة أوي مش فى إيدي بس عادي 
مسيري هعمل كل دا حتي لو إضطريت أعمل الفراشات فوتوشوب 
هوا في فيلم قصير بيتعمل فيه مشهدين وبيخلص بس بيقول كل حاجة ؟؟؟
أيون الفيلم بتاعي :D
ما تيجي نتجنن يا حبيبتي ؟

***

 أيون بطلت سجاير 
عشرين يوم تقريبا ورا بعض وبقيت بشرب سجارتين كل يوم وأحيانا مبشربش :D
بس برغم انى بطلت إلا إني بحب السجاير 
ما تيجي نشد نفس ونخرج بيه كل شىء أسود جوانا 
أيون السجاير بتطلع السواد اللى جوا القلوب 
النار 
بتسيب بدالها سواد حقيقى فى صدرك والرئة 
بس إشطة بتضيع الوجع اللى جوا :D
آه وربنا 
أمال فكرك بحبها ليه 
وليه قبل كدا شربت ست علب سجاير فى يوم واحد :D
تقريبا كنت بولع سيجارة من سيجارة 
أيون مش حكيت لك عن التلات شهور دول ولا عن جناني دا 
بس فى حاجات كتير لسه جاية فى الطريق 
إستعدي إنتي بس :P

ما تيجي نسمع مزيكا سوا 
ولا أقولك نعزف سوا 
هوا ممكن الإندماج بين إتنين يخلي إيد تعزف وإيد تانية علي الأوتار ؟؟؟
أيون تصدقي 
أنا مؤمن بإن فى ناس تقدر تكون شخص واحد 
هوا إنتي برده مش جاية من ضلعي الشمال ؟؟؟
هوا إنتي مش النور اللى هربان من روحي وحتة مني ؟؟؟
أيون تصدقي فعلا :D
يبقى نقدر نعزف سوا 
أقولك 
لو معرفناش هنبقى نتصرف ونقعد نمارس الهبل بتاعنا ونعمل أصوات بايظة وبرده هنغني وهنفرح 
الفكرة مش فى أي حاجة 
غير إننا سوا وهنا 
ما تيجي نغني بصوت عالي :D
أو نجيب دي جي ونشتغل بتوع دي جي :D
أنا عن نفسي بشجع هذه الفكرة 
وإن شاء الله لما أسافر هتعاقد مع نايط كلاب :P و أبقى بتاع دي جي وأجيبك تشتغلي معايه :D
 

 ***

 الحكاية كلها إيمان قوي إتثبت بيكي 
إيمان بروحك اللى بتهفهف حواليا دايما وبتحسسني إنك هنا وبتطمني إنك فى نفس اللحظة أكيد بتفكري فيا وواخدة بالك مننا كويس أوي 
هوا فى حد بيشوفني ؟؟؟
هوا أنا بعرف أحكي حاجة لأي حد ؟
هوا أنا بحكي لك إزاي للدرجة دي ؟
وإزاي أصلا بتستحملي أفكاري اللى تعتبر بنت ستين فى تلاتين :D
أيون عصبي 
ما عشان كدا مرضيتش أرد النهارده 
من شدة العصبية والجنان وبعدها من شدة الشوق 
ما تيجي نطير سوا ؟
ما تيجي نروح نشتري ترمبولين ونتنطط عليه لحد ما نوصل للسما 
مش هنقع متخافيش أنا برده هخطط واخد احتياطاتي 
ممكن اعمل المستحيل بدون ما يقع أي ضرر 

***

 مش ببطل أحلم 
ولا هبطل أحلم بيكي ولا ليكي 
ولا هبطل أقول إني بحبك
مش أنا اللى بهرب من المعارك ولا بهرب أصلا 
أيون هنحارب وهنوصل وهنحقق اللى بنتمناه 
أيون الوقت طويل أوي والمعركة طويلة أوي 
بس زي ما حكيت لك عن فارس الظلمة 
البطل دايما لازم يصبر ويتحمل لآخر لحظة ويشوف هيتحرك إمتي وإزاي ومش يبقى يائس
ومهما جري من حواليه يفضل فااكر هدفه 
مينفعش حلمنا يقع مننا 
عارفة حتي لو العالم كله قال لاء 
عارفة لو فشلنا فأنا واثق إني مش هبقى لوحدي 
لأن برده هتبقى هنا وهنشد بعض عشان نقف ونكمل المعركة ونحارب تاني 
الفكرة كلها إننا هنا 
مهما طال الوقت أو بعدت المسافة أو حتي إتكسرنا فتافيت 
هنرجع نكمل بعض ونقوم من جديد نحارب ونقف علي رجلينا 
حتي لو جري إيه عندي إيمان قوي بيكي 
توقيت كلامي دا له معني 
إن حتي لو حصل أي حاجة عندي ثقة إنك هنا 
وإنتي واثقة وعارفة إني هفضل هنا مهما جري 
هنحلم ونرتب ونخطط ونصبر مهما طال الطريق ومهما ضعفت قوتنا ونحقق 
بقولك إيه 
بحبك

ما تيجي نتجنن ؟؟

P.S :باقى من الزمن من شهر إلي شهرين وهجيبلك هدية كبيرة أوي , هدية عن نفسي بحلم بيها بقالي سنين , بقالي فترة طويلة بدور علي حاجة أعملهالك أو أجيبهالك , بيتهيألي لقيت الحاجة اللى هتجننك وتبهرك وتطيرك لفوق , عارفة ... ولا بلاش أحرقها , ربنا يكرم بس وعن قريب أوي ... هتلاقيني جاي لك بيها :D

وبس خلاص كدا يا بت 
بيس بقى 

بوست من وحي حاجات كتير 

مكتوب ليكي طبعا 

أوعدك راح أخدك المكان اللى تعرفي تدوقي فيه طعم السحاب وأوعدك نطير سوا بجد مش هزار ....

كريم 

شاب فقري 

نفسي أنام

عندى رغبة واحتياج لا نهائي للنوم
والصورة تقول انى محتاج امان ومحتاج اتدفى واغمض عيونى وانام
والبوست خلص 
يبقي نشغل ديكستر 
ونستعد لسفر بكره وننام بقي :)
تصبحى على خير 
ياحتة منى 

هحصلك كمان دقايق 
ومن قبل مالصبح ييجي اقولك صباحك سكر :)

شاب فقري
كريم 

قبل بكره ما ييجي جواب بسيط وشوية كلام كدا

الصمت حرام شرعاً فى يوم زي دا :D

ولذلك حاجات بسيطة نقولها ونكتبها سوا كدا

قبل ما أفتح النوت بوك بكره

وأطلع كل حاجة 

وأتكلم وأقول :D

***

  

 موحشتنيش القاهرة ولا إسكندرية علي قد ما وحشتني فكرة إني أكون معاكي فى نفس العالم 

فى نفس الشارع 

فى نفس المنطقة او المجمع السكني 

إفتقدت فكرة حضورك ((عيل بيفتح دراعه عالآخر ويقول :   قااااااااااااااااااااااااد كدهوه :D  ))

فكرة إفتقاد حضرتك بقى لا يمكن تخيل قدرها :D

أنا فاكر آخر مرة شفتك فيها بالتفصيل 

وفاكر كل حاجة 

أنا فعلا ذهني مرهق وإتخذلت كتير وسافرت كتير فى الدنيا لحد ما لقيتك جاية هنا 

إيه اللى جابك هنا ؟

ليه جيتي القاهرة ؟

ليه ظهرتي فى الوقت دا بالذات ؟

ليه حبيتك ؟

إحنا مبنختارش بنحب مين لكن ممكن نختار بنعيش مع مين ونختار نعامل اللى بنحبهم إزاي ونختار نمشي فى أنهي طريق من طرق حياتنا 

فى إرادة حرة يابابا :)

ومن لحظة كتابة هذه السطور 

فعمر إختياري ما هيكون غيرك 

وهذا مؤكد 

***

هوا أنا قلت لك إني بحب الصورة دي ؟؟

فكرة الحضن والرقص بعد طول بعاد 

الأفكار بنت المجنونة دي بنسبة تسعة وتسعين فى المية بتخلي للحياة طعم 

بصي معايه كدا ركزى فى ملامح وشها 

أيون 

مبسوطة أو مشتاقة أو مبهورة أو يمكن مليون حاجة فى بعض

شايفة بقى القفشة دي كأنها قافشة حرامي 

:D

فاكرة (( عريس يابوي ؟ طخه بس متعوروش يابوي ؟؟ ))

أيون :D

بس يمكن هي هنا واصلة بيه ومش محتاجه حد يطخه 

ولا حتي محتاجه تتجوزه 

لأنها عندها ثقة 

وإيماااااااااااااااااااااااااااااان 

إن مهما جري هيبقي ليها 

ما هوا برده مش معقول يبقي أهبل ويروح حتة تانية 

نسيت أقولك بقى 

كل شىء فى وقته 

الجملة الشهيرة بتاعتي 

دا بالنسبة للرقصة والحضن 

و

بالنسبة لبكره 

أو 

ل 

لنا يعني 

فإنتي وحشتيني ويمكن إنتي اللى خليتي السنة اللى فاتت يبقي ليها قيمة 

نقطة النور بتاعتي 

حبيبتي 

أحبك 

علي كل قد وقد 

وقد اللي مقدوش قد 

:)

ومن هذه اللحظة تبدأ الإحتفالات بعيد ميلادي ولمدة ثلاثة أشهر :D

قوموا بينا نقف دقيقة حداد علي خمسة وعشرين سنة فاتوا :D

ونحتفل بإن باقي من الزمن عشر سنين قبل ما أنتحر 

دا لو يعني ربنا قدر ومنتحرتش قبلها 

ومش تقلقي 

مش هنتحر وأسيبك يعني :P

أكيد هاخدك معايه :)

هنغمض عينينا ونصحي فى حتة تانية 

وحتي لو الموت ممل 

وجودك هيخلي له معني 

:P

مفيش مجال للهرب :D

بس خلاص 

وهذا وقد إنتهي شاب فقري من هذا البوست وقرر يكتب بكره حاجة جبارة 

وليكن هذا البوست منعا للصمت اللى طال فى المدونة 

بيس علي كدا :)

أول مرة أعملها

صوت فيروز فى الخلفية 

 مش عارف ليه كل حاجة متلخبطة فجأة وبالذات فى اللحظات اللى زي دي ؟؟؟

هي إيه اللحظات دي ؟؟

مش ضروري تتعرف :(

حالة اللخبطة 

البلاد البعيدة 

علامات عالطريق عن بلاد قريبة والمسافة مش كبيرة بس الناس فى آخر حتة فى الدنيا 

البعد كبير 

وأنا متلخبط

 حاجات عايز أخليها ليا ...

" But I, being poor, have only my dreams; I have spread my dreams under your feet; Tread softly because you tread on my dreams." - William Butler Yeats

بجد نفسي أنام :D

الله :(

 حالة خطرة إن ريحتك سكناني 

شىء مرعب بيني وبينك 

حاجة كدا مينفعش تتقال 

ومينفعش الواحد يتصرف معاها 

والحالة زي الزفت صراحة بقى 

***

قلم رصاص بيرسم رسمة بسيطة وبيكتب عليها أول مرة أعملها ...

أفكار ورموز لحاجات عظيمة 

كهربا ساكنة بتفضل فى الأشياء اللى بتحمل الذكرى وأول ما بنلمسها بنتكهرب وحالتنا بتبقى زي الزفت 

فى حاجات متتقالش وحاجات مبتتكسرش وصداع مقيم ومشاكل قائمة بشكل مجنون 

أنا تعبت ...

فى مشكلة كبيرة إتخلقت 

فى عزلة بعيد 

فى وقت 

هوا مفيش طريقة سريعة وسهلة ومضمونة عشان نصحي بيها الميتين ؟؟؟
 

بس مش كل الناس المهمة جدا ميتين 

***

هوا الصوت بينتقل فى الأبعاد حتي لو خرج بصوت ضعيف ورعشة برد وليلة كلها نجوم وقمر ؟؟؟

هوا الحيطة لما بتتناقش معاها بتعرف تدير دفة الحوار وتتناقش بحيادية وموضوعية 

هوا الصداع له علاقة بفكرة معينة ولا كله فى بعضه سايح ؟

***

قعدت بالظبط سنة ونص منزل حلقة مسلسل هاوس وراكنها علي جنب ومش عايز أتفرج عليها 

بكره حاجات معينة 

مبحبش الفراق 

هتقولي بقى بتعمل إيه مع الناس وياتري فكرت فى موضوع وفاة جدتك ولا لسه هقولك لسه معملتش أى حاجة من الكلام دا وليا طريقة لطيفة مع الرحيل أو نهاية الشىء 

Out of control

أنا صنعتك 

منحت أحلام 

قدرتي تلاقى نفسك فى حاجة من المليون حاجة 

ودنيا 

وألف عمر فى لحظات 

ورعشة قلبي لما بشوفك 

هتفضلي للأبد حتة مني 

للأبد

out of control 

لسه عايش 

خارج السيطرة 

حر زي الطير 

بتمني كون براح برغم إنه جوايا 

مش هحرق البيانو جوايا 

ولا حتي الكمان 

هعزف حتي الموت 

مش معني إن محدش بيسمع إن العزف يقف 

ممكن الأغنية تخلص لكن الحكاية مبتخلصش والكون هيغني أغنية أخيرة قبل النوم فيها إسمك وفيها حرف منك 

نقطة ضعف فى حرف وكلمة وموقف وصوت ولحظة واحدة بيتغير الوجود بالكامل وبيصحي كل الموتي من جديد 

كل اللى جوايا بيتحرك من الصندوق ومن تحت التراب 

حسنات كتير فى ملامحك 

 كل ليلة سهرنا فيها ونمنا بدون سابق إنذار 

مواقف 

أفكار 

كلام 

عمر فات فى كام لحظة وكام سنة 

أنا دايما عارف بعمل إيه 

بس فى لحظات بتفوت 

بتبقى زي سنين 

بسأل نفسي ليه 

بتمر السنين اللى سكنت فى قلب اللحظة 

بقدر ألاقى جواب ؟ معرفش لأن فى اللحظة دي الجواب عمره ما بيكون مهم 

هتستفيد إيه من الجواب فى حين إن الحالة تيت ؟ وإن الأثر صعب يتمحي وإني مبنساش 

إس قالت هدعي عليك تنسي لأنك بتفتكر كل حاجة 

:(

ياتري هنسي يا إس ؟؟؟

بيتهيألي العقاب اللى عايش بيه من ربنا علي حاجات كتير أوي هوا إني دايما فاكر 

إدعي لي يا إس :(

P.S :فى مشاعر بتبقى صادقة صدق مطلق وبتتحول لحقايق علي أرض الواقع بدون ما حد يحس وبتستمر للأبد كحقايق زي كاليبسو وديفي جونز

فى يوم ما قديما لما كان هوا بكامل قواه العقلية وكانت هي تلقائية إتكلموا ...

هو : سهرانة ليه بقى ؟؟؟
هو : ايه شاغل بالك ؟
هي : ده الطبيعي خلاص اتعودت على كده
هو :  برده السؤال قائم
هو : النهارده ايه شاغل بالك
هي : النهارده بالتحديد هنام سريعا ومش هعاني كالعادة
هو : عشان ؟
هي : عشان حسيت اني معايا حد مهما خسرت هيكون موجود
هي : احساس مريح نوعا ما

***

وهكذا كان حازم :)

أمان 

صديق 

موجود للأبد ...

 ونتكلم عني لاحقاً

***

لا أملك سوي أحلامي 
وها أنا قد نثرتهم تحت أقدامك 
إخطو برفق 
لأنك حين تخطو 
فإنك تخطو فوق أحلامك

تم النشر فى الواحدة والتسع دقائق فى التاسع والعشرون من شهر ديسمبر عام 2013

شاب فقري 

عالأقل و من الآخر

- لو فشلت أو مقدرتش تغير الكون ولقيت إنه من المستحيل تمشيه علي مزاجك وإن أفكارك مهما بلغت من العظمة والسمو مستحيل يمشي عليها الكون ومستحيل الدنيا تعبرك فعلي الأقل متخليش الدنيا تغيرك ولا تخلي المؤامرات الكونية تعطلك 

- لو معرفتش تطمنها كل لحظة وتبقى جنبها وتساندها لأي سبب كان فعلي الأقل عرفها كويس أوي إنها ساكنة جواك فى أعماق أعماقك فى مكان مش مسموح لحد إنه يشوفه ولا يقربله وإن مهما جري فهي جواك وإنته هنا 

- إذا كانت العينات الوسخة حواليك كتير لدرجة إنها خلت الصورة كلها وساخة فى وساخة فعلي الأقل خالص دقق النظر فى الصورة وإمسك التفاصيل وخد بالك من الحاجات القليلة الحلوة , لو فى مجموعة من صحابك تيت جدا أو بمعني أصح ميستاهلوش وبيخبوا عليك فعلي الأقل متبقاش زيهم وخليك دايما إنته الكبير

- تعامل الآخر معاك بقلة ذوق أو بشكل دنىء مش معناه خالص إنك تتدني لنفس المستوي وتبقى إنت والآخر فى بوتقة واحدة ووساخته تطفح عليك , خلي دايما وساخة الآخرين تطلع الحلو اللي جواك مهما جري وعالأقل خليك واثق من جواك إن كل إناء ينضح بما فيه فلما تطفح عالأخرين خلي طفحك حاجة تشرف .

- خسارتك للأشياء الضارة والغلط والناس اللى مش مناسبين والكدابين والتافهين والسطحيين يعتبر مكسب جبار ليك , لأن عمرك ما هتبقى مبسوط مع حد مش مناسب ليك أو حد مش عايزك , لازم تفهم إن أحيانا لازم نخسر حاجات عشان دا مجرد تجهيز لخسارة أكبر فى المستقبل أو يمكن إنته كدا بتخلص رصيد النكد والهموم بتاعتك وإفتكر إن ربنا عادل وإن نصيبك الوحش لما يخلص هتخش عالحلو طوااااااالي , سواء خلصت الوحش فى يوم أو شهر أو سنة أو حتي قضيت فيه حياتك فمسيرك فى الآخر تشوف الحلو ولو حتي عند ربنا .

- إفتكر دايما إن فى أكتر من اللى عيونك شايفاه , وإن الحياة مليانة حاجات حلوة كتير بس مش بتتشاف بسهولة , لازم تدقق النظر , وإفتكر إن يمكن فى أكتر يمكن أكتر من اللى قدامك أو برا مجالك أو حتي فى حياة أخري لناس تانيين , إتحرك وإسعي للى عايزه واللى بتحبه واللى ليك نصيب فيه هتشوفه 

- برغم إن معني السعادة كبير ومينفعش يتلخص فى سطر ولكن اللى عايز أقوله هوا السعادة مش فى الحصول علي كل شىء ولكن  السعادة فى إنك لما تبص للناس اللى معاك وللى تملكه مهما كان قليل تكون راضي من جواك ومبسوط ومش عايز أكتر من كدا , زي مفهوم الجمال المطلق أو التام أو الكمال بالظبط من وجهة نظري , الجمال مش فى إني أرسم صورة فيها كل حاجة أو أعمل شىء حاطط فيه كل حاجة لكن الجمال فى إني أبص للوحة ملاقيش تفصيلة ينفع تتشال , بحيث كل شىء فيها يكون ضروري وحيوي ومش كتير , أو بمعني آخر ( الجمال مش فى إنك تحط كل حاجة فى اللوحة ولكن فى إنك متلاقيش حاجة زيادة أو حاجة تتشال ) .

- ملكش دعوة بالشخص اللى ماشي غلط , حبيت تنصحه وهتستحمل رد فعله خلاص إتفضل مفيش مشكلة لكن لو أذاك شخص ماشي غلط أو وحش فإفتكر دايما إن أقوي إنتقام منه هوا إنك تسيبه فى حاله , لأن الوحش مسيره وحاشته تطغي عليه ويأذي نفسه بنفسه , زي النار بالظبط لما مبتلاقيش حاجة تاكلها بتفضل تاكل فى نفسها , فسيبه لنفسه الشريرة أو لأفعاله الغبية مسير السحر ينقلب عالساحر ومسير طباخ السم يدوقه 

- المشاوير الطويلة تقدر تخلصها وتنتصر فى المعارك الطويلة مش بالقوة ولكن بالصبر , فخلي نفسك طويل وإستحمل 

- التحمل قد يكون صفة غبية وهبلة ومتنفعش , مثال يعني واحد واقف قدامك وماسك كبريت وبيولع فى إيدك , تقدر تتحمل عشر ثواني وتسحب إيدك أو عشرين أو تلاتين أو حتي خمس دقايق , علي قد ما هتتحمل هتكون درجة الحرق , التحمل مش دايما حاجة بتساعدك ولكن أحيانا بيبقى شىء بيشوهك لأن فى ناس عقلها تافه وميعرفوش يشدوا الناس إمتي ولا يعرفوا يمسكوا نفسهم إزاي وإمتي , فى ناس متعرفش المقدار المسموح بيه وبيستغلوا قدرتك علي التحمل فحاول دايما تاخد بالك وتعمل تشيك علي إيدك كل شوية بدل ما حد يحرقها بشكل كامل وإنته صابر ومستحمل 

- مش لازم تحقق شىء يخلي العالم كله يفتكرك الكام ألف سنة ويبقى فى ست قوانين فيزيا بإسمك وإتناشر طريقة لعمل جراحة فى القلب علي إسم حضرتك ولا حتي لازم إن إسمك يتكتب علي عشر كتب ويغيروا مجري التاريخ , كفاية أوي عليك إنك تبقى فعال فى حياة الناس القريبين منك وسايب فيهم علامة وأثر ووجودك له نتيجة إيجابية وقربك بيحقق لهم حاجات حلوة بتستمر للأبد , مش لازم تبقى غني أو مشهور لكن كفاية أوي تبقى محبوب من أقرب الناس ليك ومحقق ذاتك بالطريقة اللى تريحك 

- إوعي تفتكر إن الوصول لشىء أو هدف هيخليك فى الآخر زي أبطال القصص الخيالية أو الأفلام العربي القديمة لما البطل بيقف لابس الجلابية البلدي ومعلق الشال وواقف يتفرج عالمحل وعلي وشه نظرة فخر وفرحة , مهما تعبت فأروع حاجة فى الوصول للهدف مش الهدف ولكن الطريق اللى أخدته , عشان كدا روح إتفرج علي إتنين صحاب من الطفولة متلاقيهمش بيفتكروا لحظة النتيجة اللى دخلتني فى المكان الفلاني ولكن بيفتكروا الحصص اللي زوغوا فيها والدروس اللى انضربوا فيها عشان يذاكروا وحظر التجول فى الشقة بعد إتناشر بليل والموبايل اللى إتصادر عشان يذاكروا والطريق الطويل بتاع المدرسة وعمايل الواجب , الحلو بجد هوا الطريق مش الهدف , ممكن لما توصل فى الآخر تلاقى الهدف له طعم ولطيف ولكن برده ممكن لما توصل تفتكر الطريق خطوة خطوة وتفرح عشان قدرت تمشيه وإتحملته 

- متندمش عاللى معملتوش , اللى معملتوش كفيت نفسك شره واللى عملته كسبت بيه خبرة وفهمت بيه أمور كتير فمش تيجي تندم علي حاجة معملتهاش , إفتكر دايما إن الماضي ملوش علاقة بالمشاعر وإنه مجرد درس عشناه بشكل فعلي وحكاية كنا أبطالها بس دا ملوش داعي خالص وملوش أي علاقة بإنك تحيس نفسك جواه وتفضل تتألم بسببه كل يوم .

- طيبتك مش معناها إنك عبيط وبتتصرف بدون تفكير , وحدودك إنته اللى بتحطها , واللى بتتمناه من الناس إنته اللى بتوصله , اللى بيحاول دا واحد عايز يجرب مرة وإتنين وعشرة واللى بيعمل هوا الشخص اللى مبيحاولش ومن أول مرة مركز وعارف هوا عايز إيه وواخد قرار وعارف بيتصرف إزاي بناء عليه 

- أحيانا عشان تبقى متأكد إنك ماشي فى طريق مش كفاية إنك تنوي أو تجهز شنطتك ولكن لازم كمان تقطع كل الحبال اللى شداك لكل الطرق التانية وترمي كل الخرايط وتحط رجلك علي أول الطريق الخاص بيك وتمشي وتمسك فى قرارك أوي وتخطي بقوة وإرادة وثبات .

- إحذر من الناس اللى تعرف حقيقتهم ... إوعي تنسي السطر دا مهما جري 

-  إوعي تصدق .

- بقول للناس اللى جم القاهرة ومش نبهوني من قبلها بيوم عالأقل إني هولع فيهم لما أشوفهم إن شاء الله عن قريب :D , وللشخص اللى مبلغش الحقيقة كاملة برده هولع فيك :D


- مش هتعيش إلا مرة واحدة بس فخلي ليها قيمة , خلي حياتك لها لزمة وخلي كل يوم بيفوت بيعلمك حاجة أو بيعرفك شىء جديد وإلا هتبقى ميت وإنته لسه عايش وبتاخد نفسك وزيك زي ملايين فقدوا الأمل فى نفسهم 

- Never Give Up جملة حلوة وتسوي وتستاهل بس الأولي إنك متستلمش ولا تفقد الأمل فى نفسك مهما جري , حياتك مهما كانت فيها مليون طريق وممكن الطريق ياخدك لأماكن فى الروعة والسوء لا يمكن تخيلها فخلي خيالك واسع ومتفقدش الأمل فى نفسك , اللى بتحسه طبيعي سواء بوجع أو يأس او زعل أو أي شىء سلبي وزفت لأنك بطبيعة الحال إنسان وبتحس لكن الغلط إنك تاخد قرار يخليك أسوأ بناء علي إحساس عابر أو حتي مستمر لفترة معينة وبالمرة إوعي تنسي ( متوعدش بحاجة وإنت فرحان ولا تاخد قرار وإنته فى حالة سيئة )

- إنت مش لعبة , إنت إنسان ليك قرار وإختيار وفرصة فى مليون شىء وممكن دايما تبقى زي ما إنت عايز ولكن اللى بيخلي الناس تتكتف وتقف مكانها ومتعرفش تعمل حاجة هوا إنها دايما بتخاف تدفع التمن أو مش بتقدر تتخيل حياتها من غير أشياء معينة أو سعيهم لحاجات ملهاش لزمة , دايما تقدر تبتدي من الصفر وتبني وتعيش وتفرح , أينعم فى حاجات هتفضل تشدك لورا وتشدك لتحت وتحاول توقعك تكسرك بس دا طبيعي لأن لكل فعل رد فعل يعني متتوقعش إنك هتحاول تطير والجاذبية هتقولك باي باي با حوبي لاء أكيد هتحاول تشدك لتحت وكل ما هتعلي لفوق كل ما هيقل العقبات لحد ما توصل للنقطة اللى تخليك فى مكانك 

- كتاب لورنس داريل رباعية الأسكندرية لازم يتقري ولازم يتجاب من قفاه حيا أو ميتا :D

- فى حاجات علي عمق كبير مستحيل حد ياخدها منك ومستحيل حد يكسرها ومستحيل تخسرها , إوعي تنسي الحاجات دي اللى عايشة جواك للأبد وإفتكر إن العلامات مش معناها إنك تختار كذا ولكنها بتديك دليل أو بتعرفك إن فى طريق لطيف علي جنب ممكن تختاره وفى طرق تانية حلوة برده لكنها صعبة 

- اللى عايز يعرفك هيعرفك حتي لو كنت لابس طاقية الاخفا ومستخبي ورا التنين الاحمر اللى قاعد جنب الفيل البمبي فى الشارع اللى ساكن فيه العفريت أبو فيونكة علي حدود المريخ فى عنوان غلط , اللى عايز يلاقيك هيلاقيك واللى عايز يكلمك هيسمعك صوته حتي لو واثق إن مفيش طريق هيخلق الطريق ويرتب للحظة اللى هتبقى موجود فيها وهيحاول يكلمك مرة وإتنين وعشرة وعشرين . بس خلاص . وحقايق الناس بتبان فى الأوقات الصعبة اللى زي دي .

أجازتي تنتهي بكره الصبح ولازم أسافر إسكندرية بدري بحيث متأخرش ...

ألقاكم علي خير إن شاء الله 

دا لو مطقتش حاجة تانية فى دماغي وكان لازم تتكتب :D

نسألكم الدعاء .

بس خلاص للوقت الحالي 

شاب فقري 

تحديث :

بمناسبة ان دا شهر ديسمبر وكدا فلسه فاكر الرواية بتاعة ( فى ديسمبر تنتهي كل الأحلام ) بتاعة أثير عبد الله النشمي وبجد بحبها الرواية دي يمكن عشان عشتها , بس ديسمبر شهر لطيف وأنا بحبه كله لحظات حلوة وعلي طول جاي فى النص أو بييجي معاه التجهيز لأمور حلوة وبييجي معاه الشتاء يرمي التماسي وبعده عيد ميلادي فى يناير وبالتالي إستعدوا بالهدايا بقى :D

زمان كنت بحب أكتب بوست يحكي اللى جري فى السنة بس شكلي مش هعمل دا تاني وأنا أصلا مبطل دا من زمان 

وأولا وأخيرا الحمد لله علي كل حال , جايلك بكره يا إسكندرية :) .