شماعة الخطايا

**********************

**********************

**********************

**********************

**********************

**********************

**********************

**********************

ليه دايما الناس بتدور علي شماعة تعلق عليها كل الخطايا : يعنى اللى بيدخن يقول انا بدخن عشان عباس اداني سجارة واللى بيسرق بيقول عشان الشيطان شاطر واللى بيقتل يقول الشيطان سيطر علي عقلي بالغضب واللى بيزني بيقول هي اللى خلتني أنام معاها 

الشيطان وهي وعباس براءة منكم والله العظيم ...

 

إنتوا هتشلوني يا ولاد المرة 

واجهوا نفسكوا مرة بقى 

ليه الناس بتقول : أصل فلان خلاني اعمل ؟؟؟

هوا انته بتعمل غصب عنك ؟؟

لما إتكلمت ولا لما خرجت ولا لما حسيت كان العيب فى الطرف التاني اللى خلاك تعمل كل دا ؟؟؟

لما رتبت حياتك علي واحد واتعودت علي دفاه وحنيته وقربه كان العيب من الحد التاني ولا حضرتك اللي عملت كدا ؟؟

طيب لما روحت خونت أو بعت او مشيت مش كان برده انته اللى عملت كدا ولا هتقول اصل الطرف التاني عمل وسوي , أمال انته كنت فين وليه مش ساعدته مش يوجعك ؟؟؟ ليه مش ساعدته يقف علي رجليه وحميته من نفسه ومنك ؟؟؟

متقولش اصل انا عملت الغلط لان فلان هوا اللى شدني للنقطة دى ؟ طيب وحضرتك كنت فين ؟؟؟ شربت حاجة أصفره ؟؟؟

متقولش اصل انا حياتي بتبقى غلط وفلان فيها ؟؟؟ ومعلش يعني هي دي برده مش حياتك ؟؟ هي دي مش مصيرك وانته اللى بتحدده ؟؟ وانته اللى بتعدل الغلط فيه وتقومه وتحاول تخليه مش يتكرر ولا ايه ؟؟؟ ولا هوا حضرتك فالح تاخد وبس ومتديش ؟؟؟ فالح تفكر فى اللى يبسطك وترميه فى الاخر علي فلان وفلان يطلع فى نظرك إبن كلب وحش ؟؟؟

 للاسف مش عارف ليه كل بني آدم محتاج شماعة للخطايا أو حتي لو عارف فانا مستغرب من غباء البعض فى التعامل مع الموقف 

والمشكلة العظمي لما تبقى بتساعد كل الناس او موجود جنب كل الناس وكل الناس بتيجي ترمي عليك اى خطيئة وانته على طول الوحش 

ساعتها مبيبقاش قدامك غير حل واحد بس ...

تبقى وحش زي ما بيقولوا عشان عالأقل اللى بيتقال عليك يبقى كلام تستاهله 

ولا ايه ؟

فى حل تاني 

بس الزمن دا ميستاهلوش 

بس كدا 

كريم 

فص ياقوت

مرة حقيقة ومرة خيال ...

مرة البحر معذب فينا 

مرة بياخد أغلي ما لينا 

كريم

أكتر جملة وجعتك

************************

************************

************************

*************************

فاكر أكتر جملة قلتهالك ووجعتك 

(( أنا بفكر نفسي دايما كل ما أفتكرك إن لو مكنتش انا كان هيبقى حد تاني فى مكاني ))

وساعتها حسيت بغضبها كافي بحرق الوجود 

(( يعني إنته شايف كدا ))

قلت 

(( آه ))

قالت 

(( مستحيل كان يبقي أي حد غيرك ))

قلت 

(( أصل أنا حبيتك أوي ))

قالت 

(( وأنا كان مستحيل أحب غيرك ولسه بحبك ))

وبس كدا ...

ودلوقتي 

(( عرفت إن محدش حبني فى حياتي كلها غيرك إنتي وبس

والباقي كله 

مبهور وبيتفرج وبيجرب وخلاص

وأدفع عمري كله إلا تلات شهور بس 

عشان تبقى معايه

وأوعدك هخليهم أجمل تلات شهور خلقهم ربنا فى الزمن كله

 ))

كريم

أقفال زمنية

***********************

***********************

***********************

***********************

***********************

***********************

الأحلام شىء رائع وجميل وحلو وعليه سكر كمان 

ولكنه أسلوب قديم وفاكس وغير كافي وبيتطلب وجود شخصين 

والشخصين متفاهمين وبينهم ود كافي للحلم 

ومن هنا تطلب الأمر فكرة جديدة خارقة للطبيعة وللعادة ولكل حاجة 

الفكرة بتتلخص فى شىء واحد فقط 

قفل زمني علي فترة معينة 

يعني إيه ؟؟؟

تخيل معايه كدا لو إنته عشت موقف أياً يكن إن شاء الله يكون حتي مشيت عالبحر أو رديت علي حد بينده عليك أو روحت سينما مع حد بتحبه أو إتعزمت فى سينابون أو برازيلي أو مشيت عالبحر مع فتاة أحلامك أو ركبت معاها عربية أو شفتها بتضحك أو إتصلت بيها فى عز وقت الامتحانات تقولها بحبك يا خيبتك يلا روحي ذاكري أو ندهت لها فى خيالك ولقيتها بتتصل بيك وبتقولك وحشتني يا إسمك إيه أو إتصلت بيها لقيتها بتقولك مين حضرتك ؟ وبعدين بتتعرف عليها من جديد بالرغم من إنكم عارفين بعض لمدة تقريبا تتجاوز النص ساعة أو بتقعد معاها فى محل حلويات حلو أوي تقولها فيه إنها وحشتك وتحكي لها عن حياتك وهي بتهرب بعيونها بعيد 

تخيل لو جيت علي حدث مفرد من دول وحفظته بكل تفاصيله اللى تقريبا لو قعدت أكتب موقف واحد منها هيتجاوز الوقت الساعة ونص  ومش هخلص من كتر التفاصيل , وبما إني مينفعش أفكر فى كم التفاصيل دا كله فى ذات الوقت لأني لو عملت كدا هتجنن أكتر ما أنا مجنون , فبحفظ كل دا فى فقاعة زمنية , حاجة يتحبس فيها الموقف بكل تفاصيله بكل مشاعره وأحاسيسه حتي لو الشخص دا بقاله سنين مش هنا , وتحفظ الموقف فى عقلك فى ركن خاص وتسيب علامات عشان تقدر تستدعي بيها الفقاعة وتفتحها وتعيش فيها وتعيش نفس الإحساس 

بالظبط 

هوا دا مبدأ الفقاعة الزمنية أو القفل الزمني ...

مفيش حاجة وحشة تقدر تخرج منها تأثر علي يومك أو علي حياتك أو علي إحساسك بالحياة

ومفيش حاجة برده تقدر تدخل تبوظ الموقف أو تخليه ذكري وحشة أو تسىء للاحساس الجميل اللى جوا حتي لو إكتشفت بعد كدا إن كان بيتلعب بيك أو إن مش انته اللى فى النية أو لو الشخص اللى فى الموقف كله قطر أو علي راي كريم عبد العزيز مترو الخلفاوي شاله

الفقاعة الزمنية إحساس بالحياة والحلم والفرحة والحب والروعة واللذة والمتعة فى وقت بيقف فيه كل شىء والوجود كله بيتوقف عن التواجد وكل شىء بيسكت وبتعيش فى حالة واحدة بس 

هي الحالة اللى فى الفقاعة لا أكثر ولا أقل 

بكل التفاصيل والنظرات والتفاصيل اللى مش ينفع أقولها لأن هيبقى كريم قبيح أو قليل الأدب لو ذكرها لأني ببساطة بفتكر أتفه التفاصيل ووالله لو قلت لكم بفتكر تفاصيل لحد إيه هلاقى حد بيقولي إنته مجنون أو انا عمري ما هقعد أتكلم معاك ولا أقابلك 

القفل الزمني سبب وجوده هوا كل الناس اللى بتمشي 

القفل الزمني سحره فى إنه مستحيل ينسرق أو يضيع أو حد يخطفه 

القفل الزمني نتيجته حالة من السعادة قد تصبح أقوي من كل عواصف الكون 

القفل الزمني مش زي الصناديق اللى بحفظ فيها الحكايات وأخد فيها باك آب من مشاعري تجاه شخصية معينة وأفكاري تجاهها لأن الصندوق مليان أقفال زمنية ومكون من مليون حاجز 

القفل الزمني وقته هوا دلوقتى 

وأنا راجع من السفر 

وخسران أهم حلم فى حياتي وفى الوجود كله 

ووأنا قاعد لوحدي وقافل كل موبايلاتي وقافل الفيس بوك وكمان بكتب فى المدونة وأنا قافلها 

ومخاصم الحيطة بقالي مدة طويلة أوي ومش متوقع إنها ترد عليا بسهولة كدا بعد كل البعد دا 

وعايش فى عالمي الخاص برتب أوراقي 

والدتي مازالت مريضة جدا 

لكني مش هفكر فى النقطة دي وهقول ربنا يستر وهقول اللى فيه الخير هييجي لوحده 

وهرتب أولوياتي 

وههدي وبراحة أوي 

هفتح قفل زمني حلو اوي كافي بإنه يعيشني فى حالة من السعادة تشبه العصف

وأغمض عيوني بعدها وأنام ...

هسمع هدي عمار وهي بتغني لروايح الزمن الجميل 

واحتمال أغنية علي الحجار بتاع العصفور اللى كنت بسمعها معاها عالبحر وبغنيهالها 

واكيد منير يعني ... عشان مينفعش مسمعوش هوا ودرويش 

و كاميليا جبران  

وأهدي 

وأبتسم 

وأنام 

ومش هقول ملعون أبو الوجود كله يا ولاد الكلب ياللي إتخليتوا عني وخذلتوني 

ههدي 

وهعمل نفسي مش بفكر 

وأفتح القفل 

وأكون كويس وبخير 

كريم

Disconnect

عشت سنين بحاول أفسر الغضب والزهق والحزن والصمت والتفكير الشديد اللى كان فيه 
مقدرتش أوصل لأي نتيجة 
لسه فاكر أول سجارة شربتها فى حياتي كانت من نفس العلبة اللى سابها علي الكومدينو لما مات 
فاكر العلبة كان فيها كام سجارة وفاكر شربتها ليه 
فاكر احساسي ساعتها والكحة 
وملقتش متعة فى التدخين ومشربتش سجاير 
وبعدها بسنين شربت فى موقف تاني وةمن هنا بقيت بدخن ولكن دا مش موضوعنا حاليا 
موضوعنا انى مش عرفت ساعتها سر كل التعب واليأس والغضب 
كان نفسي أفهم الغضب دا نابع من إيه ؟؟؟
جاي منين ؟؟؟
ليه كل العصبية دي ؟؟؟
ومن هنا قدرت أني أبني حاجز من التحمل بين غضبي وبين كل اللى بحبهم 
ومن هنا خسرت ناس كتير اوى لانهم افتكروا انى ضعيف او انى مقدرش اغضب واخد موقف 
ودلوقتى بس عرفت لاني فى نفس الحالة ونفس الموقف ونفس الشىء اللي مر بيه 
انا كمان بمر بيه ...
***
- انا دماغي اتمسحت وحاسس انى تعبان ومش فاكر اى حاجة 
- متخافش , أنا معاك وهنا اهوه والله انته كويس 
- انا حاسس انى بموت او هموت 
- بعد الشر عليك 
- الشر جاي جاي 
يعيط وأعيط معاه ويحضني وأرمي راسي فى حضنه لاول مرة فى حياتي لدرجة انى اسمع دقات قلبه واطمن لثواني لأول مرة فى حياتي 
وبيفارق الحياة بعدها بأسابيع 
***
فاكر صاحب الشغل لما كان بيتكلم عن الفقر ويقول لنا واحنا راكبين معاه العربية اننا اتولدنا فى زمن العز ومش شفنا فقر وبيحكي عن ايام زمان لما كان بيروح المدرسة بهدوم مقطعة او معيوبة عشان اهله يقدروا يحوشوا ويعيشوهم 
مع ان الفرق بيني وبينه عشر سنين 
الا انى ضحكت اوى لدرجة اغضبته وقلت له 
حضرتك مشفتش فقر 
وسكتت 
مرضيتش اقوله ان اللى بيتكلم فيه دا هبل مسلسلات التسعينات وانه مشافش الفقر اللى بجد 
مرضيتش احكي له مواقف 
التزمت الصمت 
ومرضيتش اقوله شفت ايه فى حياتي 
بيتهيألى لأنها حاجة تخصني انا بس لوحدي 
***
فاكر اول مرة ايدي اتحرقت بالنار خبيتها قدا يه 
فاكر الحرق كان كبير لدرجة انى ايديا فضلت ترتعش طول اليوم ومكنتش حاسس بالوجع علي قد ما كنت خايف 
كنت خايف اوى اوى اوى اوى 
مع ان مفيش حاجة اقوي ولا اوجع من حرق النار 
الا انى كنت خايف 
***
فاكر قد ايه كنت لوحدي النهارده لما مشيت فى الشارع ومكانش جنبي غير ظلي عالارض 
فاكر خسرت حلمي ازاى ولحظة بلحظة وفاكر صوت اخويا بيقولي : معلش متزعلش
فاكر انى عيوني دمعت اوى وبكيت وانا بطلت ابكي من زمان اوي من ساعة وفاة والدي وانى الفترة دي ببكي كتير 
فاكر انى مشيت يمكن همومي تستخبي 
فاكر انى مرضيتش ابص للبحر لانى حاسس انه موجه كسرني المرة دى 
فاكر انى اللى وقف بيني وبين حلمي كانت صدفة غبية وان الناس اللى المفروض يشجعوني اتنازلوا عني وعن حلمي 
فاكر كويس اوى ان الحلم دا ضاع 
وانى لازم ألم المتكسر واشيل وجع الحلم اللى ضاع 
فاكر انى لازم مقعش تاني 
بس لازم أبعد
آسف ... أنا قررت أبعد 


مع دقات الساعة 12 بليل وانتهاء يوم (  الخميس الأسود  )  دا 
وانا لوحدي 
هختفي 
وتماماااااا
وربنا يستر من كل اللي هيجري ...

/////
ديفي 
When i needed you , you were not there and i was with you every minute without even asking me 
Every time you said my name even in your mind i was with you 
\\\\\\\\


بس السؤال اللى عايز اعرف له اجابة وبقلب كل ذكرياتي بقوة وعنف 
إمتي حد وقف جنبي وآمن باللي بعمله وشجعني زى ما انا بعمل مع كل اللى اعرفهم ؟؟؟
إمتي كان فى حد هنا بجد ؟؟؟

كريم