نفس

محتاج أتنفس

....


إنتهي يوم الجمعة .

وبكره راجع من تاني أكتوبر


كريم

مدينة السقيع

اليوم كان بادىء بداية غلط خالص
المترو عطلان وانا رايح شغلي والمكان اللى هركب منه أروح أكتوبر مزحوم كأنه يوم الحشر
والناس كتير وزحمة يا دنيا زحمة , مشيت بالعربية مسافة قليلة اوي فى ساعة الا ربع
طلعت بعدها على اكتوبر
والجو هناك شتا بجد وبرد بجد بسرعة مليون رعشة فى الثانية
انا مبسوط بالناس الجديدة اللي إتعرفت عليهم واللي واضح إنهم جدعان جدا ومحترمين



برب نكمل بكره

وآدي بكره جه

عارف لما تصحي الصبح وتروح الشغل أول يوم ليك فى مكان جديد وإنته مبسوط ونفسك تكتشف الكون وفجأة تلاقى ان المترو عطلان ومع إنك مش هتركب مترو ومش فارق معاك فى حاجة تلاقى الطريق منيل خالص ومليان ناس وتمشي بالعربية مسافة 500متر فى ساعة الا ربع ؟؟؟
شلل ...صح ؟؟؟
بس مفرقش معايه
عارف بقي لما العربية بنت الحلال تقف بيك عند جهينة برا اكتوبر وتقول مش هندخل جوا وتقعد فى العربية وتتخانق وتتكلم بقلب أسد و تمشي كلامك فى الآخر وتوصل الحصري بالسلامة وتطلع من هناك علي الشركة والمصنع
قفلة لليوم صح
بس مفرقش معايه
عارف لما تبقى متعود كل يومك حركة وفجأة تلاقى يومك بقي هادي وعادي وبسيط وسهل ؟؟؟
وتلاقى نفسك فى الآخر حابب المكان والشغل ؟؟
بس برده مفرقش معايه
عارف بقي لما تفتح عيونك علي عالم جديد
أهوه دا بقي اللي فرق معايه

كلمتين : الحلم بيكبر
***
خلونا نتكلم فى حاجة تانية :

هي جميلة جدا ورائعة وتفاصيلها فى منتهي الدقة وكل جزء من التفاصيل فى منتهي الروعة
بس متنساش إن نفس ذات الوصف ينطبق علي القنبلة الذرية أو علي القنابل العنقودية أو علي ذرة اليورانيوم أثناء التخصيب

















الموضوع مش محتاج , هوا بس عايز

وعايز تفرق كتير أوي عن محتاج 


***
البراح

الواحد بيمنح الناس البراح اللي محتاجينه حتي لو عارف إن دا هيخلق بعد وفراق لن ينتهي بس دا حقهم فى الحياة إنهم يقدروا يقرروا بدون ضغوط
ناس بتقول إني زنان وإني بارع فى الضغط
ولكن أنا بقول إني مهتم بزيادة
وحياتي بحاول أخليها تمشي زي ما أنا عايز
الموضوع صعب
بس ربك بييسر الأمور
فاهمني إنته ؟؟؟

أنا بحاول بكل شكل ممكن أمشي صح
بس الطريق مكعبل ومليان حجارة وفيه مليون توك توك كل شوية يحاول يخبطك وكمان الموتسيكلات والحرامية وقطاع الطرق
بس دا كله مش فارق معايه
لأني قبل أي حاجة كريم
من كام واحد بيقولي عملت إيه مع السواق اللي دايقك
قلت له هوا صحيح سواق ميكروباص
بس فى الأول والآخر أنا كريم وفيا عرق شبراوي
وطبيعي جدا إني يجري فى دمي طبع إني انا اللي أعلم عالناس مش الناس اللي تعلم عليا
وطبيعي برده يطلع وشي التاني الشرير فى الشغل لما أبقى شغال بكلم عملاء وبتابع تسليم شغل وبنزل بنفسي أتنقل بالعربية وشوية أخد الموتوسيكل وشوية أروح أستلم من فلان وشوية أنزل المصنع الرئيسي لأن الناس دي محتاجاني هناك وشوية وألاقي نفسي فى المكان الجديد وشوية عالقهوة مع نسايبي وشوية بييجي لي رسايل وشوية بتعامل فى الشغل تاني مع شخصيات جديدة وبسستم الناس صح وشوية والحسابات فيها مشاكل وشوية وفى شغل متأخر وشوية وفى شغل خلص بدري ولازم يطلع قبل ميعاده وشوية وفى ناس عشمانة وشوية وفجأة بقيت مسؤل عن كام شخص شغالين معايه فى المصنع الجديد والقديم وشوية وبرد علي تليفونات ناس عايزة مشاكل وبتتخانق بس بعرف أتعامل وشوية وواحد من الشركاء فى الشركة بيتصل يبلغني إني فى نعيم لأنه بيتمني مجلس الإدارة يسمحله بالمكان اللي أنا شغال فيه وشوية فى خناقة وشوية وبتعلم السواقة وشوية وبطبق القاعدة الذهبية بتاعتي
إبتسم فى وش الموت
وشوية وبفتكر قاعدة أهم : لا تخف من صوت الرصاص فالرصاصة التي ستقتلك لن تسمع صوتها
وشوية وبفكر فى النقط اللى هتبقى متواجدة بعد الإنهيار الحاد اللي أنا فيه
وشوية وبكتشف إن زمايلي أصغر مني ومتجوزين والحمد لله وربنا يكرمهم كمان وكمان
وشوية وبجري وبجري وبجري وبجري وبعافر فى عز ما طاقتي مستنفذة ومنتهية وبعاااااااااافر
وشوية وبهتم وبركز فى كل شىء وبيتضاف بعد جديد ليا فى نظرتي لكل شىء
وشوية و سيد الزمن بيتكلم ...

***
سيد الزمن :
أنا أخدت وقت طويل جدا لكن فى الآخر عرفت وإتأكدت إن القواعد ملكي وبتاعتي وأنا المسؤل وإني أقدر أغيرها أو أبدلها
سيد الزمن مينفعش حاجة توقفه
لأنه قانونه الأساسي دايما فى طريق ودايما فى حل ودايما فى حاجة بتكتشفها لما بتفكر مع نفسك بشكل سليم أو بتنظر من كذا بعد فى نفس الوقت وبتحسبها صح بطريقتك وبطرق الآخرين
***
النهارده الخميس بقي روحت المصنع القديم والناس خدتني بالحضن ووحشتهم مع إني سايبهم من يومين
حاجة غريبة بس كنت مشتاق لهم جدا
الأروع إن فى ناس كتير قالت لي إن الشغل محتاجني جدا جدا جدا
بس مجلس الإدارة قرر والقرار صدر وإنتهي الأمر بإني إترقيت ومش هرجع المصنع القديم تاني
بس أنا من خوفي بروح المكانين فى نفس الوقت
بخلص المصنع الجديد آخر النهار وبطلع عالقديم أقعد هناك ساعتين أقدر فيهم أظبط الحياة وأطلع عالبيت
صحيح داخل البيت إتنين بليل
وفى وقت أنا نفسيا فيه مش مستعد ومينفعش كل دا
بس هعتبر إني حاليا مش ماشي بطاقتي كلها وإني بجد بجد بجد لسه متعبتش بل بالعكس مرتاح
***
اللي تعبني النهارده أوي الجرح اللي إكتشفته وجلدي اللي إكتشفت فيه مشكلة خليتني طول اليوم رجليا الشمال متعطلة
واللي تعبني أكتر سناني وجعتني اوي
مش لاقى وقت لدكتور السنان بس هخلق وقت إذا لزم الأمر
الموضوع صعب بس عمره ما هيبقى مستحيل لأني أنا المستحيل
حاسس إني فى وسط كل الإنهيار دا فى قوة
بس مش عايز إستغلها , عايزها تضيع عشان النقط الجديدة هتبقي أقوي بكتير
أنا ككريم إتخلقت عشان أبقي أقوي كل يوم وأفتكر كل ما أبقي أقوي إن دايما فى قوة خارجية أعلي مني وأقوي مني
وأفتكر إني مهما تعبت فأحيانا لازم أتعب أكتر
قابلت ناس كتير ووحشني توفيق ونفسي أنزل إسكندرية
بس مفيش مشاكل أنا عارف أنا هتعامل إزاي
كريم عارف هيمشي إزاي
النهارده ستاشر حداشر
مشكلة يمكن بس مش معايه
***
تعبت من كتر الرغي والكلام لكن النهارده إتعلمت كتير أوي وإستفدت كتير وكشرت عن أنيابي وظهرت المخالب بس هستعملها من أول يوم السبت فى الشغل
بس حالتي النفسية والفكرية مازالت كما هي
إنهيار تام ومطلق وكامل وشامل وبس خلاص
وبس كدا ..


تحديث تاني بعد النشر بربع دقيقة
نسيت أقول الصورة ومعناها
واللي حاسه
مقطع من أغنية لعمار الشريعي فى فيلم البرىء

(( فى العتمة بتشعلق , حتي علي الدخان ))

ستة أكتوبر

فى وقت قليل أوي
مش هحكي كتير
ومش عارف إيه اللي هيجري
لكني واثق إن بكره هيكون أول يوم أترقي فيه فى حياتي من وظيفة مدير لمصنع محلي لمدير لمصنع أكبر
بصفتي محاسب ومدير للمكان الحالي
فأنا مستغرب جدا من طريقة توديع الناس ليا , ناس كتير قعدت تحضني وتسلم عليا وتاخد رقمي
ناس كتير قالت لى خد بالك من نفسك وإبقى إسأل وفى ناس أكتر قالت لي إنته مش هتنساني
أنا كنت دايما بتصل بالناس أقولهم كل سنة وإنتوا طيبين فى اوقات مفيهاش أعياد يقولوا لي بمناسبة إيه أقولهم بمناسبة ستة أكتوبر أو بطريقتي إياها ( السادس من أكتوبر ) دلوقتي بقى فعلا بقى فى مناسبة حلوة فى حياتي إسمها ستة إكتوبر وهي إسم المناسبة ومش تاريخها
مش عارف أقولكم إيه عن إحساسي لأني ببساطة حلمي مكمل وماشي فيه وخطوة الترقية حلوة وجميلة لكني برده مصر علي الحلم
كريم هيفضل هوا كريم
صحيح
أنا فى أقل من شهرين قدرت أكتسب ثقة صاحب المكان وأصاحب الناس كلها وأتعامل مع كل الناس بثقة وأنا عارف أنا بعمل إيه والشغل حبني وأصحاب الشغل والعمال والمصنع كله كان بيهتف بإسمي وأنا ماشي والبعض مكانش مصدق إني رايح المصنع الرئيسي فى ستة أكتوبر
النهارده أول ترقية فى حياتي بعد ما الكل عرف إن أى مكان عايز تنجز فيه مصلحة أو تعمل فيه شغل لازم تبعت كريم
كأن كريم هوا العفريت اللي يقدر يعمل أي حاجة ويحل أي مشكلة ويقف فى أي موقف ويتصرف مع أى حد
الحمد لله أنا راضي جدا عن اللي وصلت له
ولكن
كريم هيفضل هوا كريم
أنا داخل أقولكم إني إترقيت وإن اللحظة التاريخية دي لن تنسي وإني داخل علي تحدي أعظم
واجهت صعوبة فى النار الصبح بصراحة
لكن كريم هيفضل كريم وبرده هيقدرو يتصرف فى أي موقف ويحل أي مشكلة مهما كانت
ودا الفكرة اللي وصلت للكل عني
إنك تكون محاسب ومدير علي العمال ومسؤل عن العملاء ومسؤل عن المقابلات الشخصية وعن كل حاجة
تحس إن فى مليون حاجة بتجري حواليك وفى دماغك حتي فى عز الهدوء
بيتهيألي هما عرفوا مين كريم
وكريم مبسوط بدا
من بكره هبتدي أركب كل يوم لطريق المصنع فى أكتوبر
خايف من الدائري وقلقان منه ومن الطريق وانا اصلا بكره المواصلات بس لما ربنا يكرمني هعرف أتصرف فى الطريق
دلوقتى أنا أقوم أكل البيتزا والحلويات وأعمل لنفسي احلي كوباية شاي فى التاريخ
ومنساش طبعا عود الكبريت والعلامة
ومنساش طبعا حاجات أهم بكتير

كنت عايز أكتب بوست بإسم خطير

بس قلته خليه لبعد أول يوم ليا فى أكتوبر

كلمة أكتوبر بتفكرني بفيلم سويت نوفمبر
ربنا يستر ومقابلش البطلة هناك
أصلي عارف نفسي
فقري
مينفعش أشوف البطلة بتاعة فيلم حياتي غير فى الوقت الغير مناسب
مش هتكلم كتير
انا هروح أنهار وأجهز النور عشان يبقى أقوي الليلة دي
ويوصل لكل الوجود
وأجهز للنار عشان بكره تبقى علي آخرها

صحيح : من اللحظة دي أنا لبعض الناس إنسان مختلف

وبس كدا
مش هقول أكتر
هما سمعوا بما فيه الكفاية مني
ومش محتاجين أكتر

تصبحوا علي خير

ولو فى تحديث هبقي أقولكم

نفسي أبقى مبسوط زي السطور
أو أكتر منها حبتين
بس دي مجرد أمنية
وزي ما ديكستر قال : الأماني طبعا للأطفال وبس

هكمل إنهياري بقي

تصبحوا علي خير 

الأرواح والنور

لأن الأرواح جنود مجندة
فأنا لأول مرة فى حياتي
فى عمري كله
هطفي النار اللى بتزيد طاقتي واللي بتخليني أكمل فى طريقي واللي عمرها ما إنطفت جوايا
هطفي النار اللى بتخليني أجري وبتخليني أبقي أقوي واللي بتزيد من حركتي وحماستي
هطفي النار اللى جوايا واللى بتخوف ناس كتير أوي
وفي وسط كل الإنهيار دا
جوهري بس اللي هيظهر
أتمني يطلع منه قبس بسيط من النور تشوفيه مع إنه هينور كألف ألف شمس
بدون خطط
بدون توقعات
بدون أماني
بدون ترتيبات
بدون أساليب
بدون طرق
بدون إستراتيجية
بدون معادلات
هسيب روحي
ومش هستني النتيجة
برغم إني حاسس بالفشل التام فى التعامل مع البشر
وإني مختل فى نقطة التعامل إجتماعيا أو التعرف علي أي حد
وبرغم كل حاجة
حتي التلات مشاهد اللي كل ما أفتكرهم حرارتي بتعلي واللى حصلولي النهارده وإمبارح
هطفي النار كل ليلة جوايا وأسيب النور يضوي وينور الدنيا كلها فى عز برد الشتاء
هطفي النار إزاي دي بتاعتي
أما عن نقطة هتعامل إزاي
فدي بقي مش عارف حتي اللحظة اللي بكتب فيها السطور دي هتعامل إزاي ...
بس عندي أمل إن روحي تقدر تتعامل
وأنا الحمد لله أخدت قرار
(( أنا هنزل من البيت بعيد عن الشغل وهآخد أجازتين ))

ومتأكد إن الخير إن شاء الله جاي
أصل أنا فى وسط إنهيار
وفى وسط وفى عز كل دا
لابد من تغيير
لابد من شىء يختلف حاله
دي سنة الحياة يا صديقي

أنا ..
أنا هسكت وأحاول أنام

النهارده مكلتش
والخدعة بتاعة إمبارح منفعتش
لما طلعت الاطباق مليتها شوية أكل صغيرين ومكلتهمش
أمي برده عرفت انى مكلتش
والنهارده بتصحيني تقولي
انا بقالي تلات تيام مش بشوفك , مالك يا ( **** <إسم الدلع بتاعي>)
والنهارده قلت بصراحة إني مش هاكل
أنا هسكت بقي ومش هبني أي حاجة غير لما روحي تعرف تتصرف بقي
انا خايف افرح مقدما
خايف اتشغل عن انهياري ووجعي
البرد شديد اوي الليلة دي
وانا مخفف اوى
ودا إسمه غباء
عالاقل افكر بالمنطق والعقل
بس من إمتي المنطق والعقل بيودي لأي حتة كويسة ؟؟؟
أقولكم
أنا هفرح فى سري كدا
بيني وبين نفسي سر عميق مستخبي بين خيوط الشمس اللى بتهرب من السحاب وبين النجوم بليل وبين نسمة الهوا البارده اللى بتخلي جسمي يرتعش ويحس بالحياة
هفرح فى سري في عز وجعي ولخبطتي

مش عارف ليه حاسس إن لو فى شخصية معينة قعدت تقرا المدونة دى
هتبطل تعرفني
بس الحمد لله إنها ملهاش أي علاقة بالمدونة ومبتقراهاش

النهارده نجحت فى إني أقولها كلها ( أنا مهتم بيكي )
برافو
شكلي حلو انا دلوقتى لما نجحت
مش هفكر فى الأثر والتأثير والفكرة ولا فى اى شىء
هفكر فى النجاح الصغير دا وهحاول أمسح التلات مشاهد بتوع ( الدبوس بتاع الطفل والبنوتة فى الشارع والهمجية فى التعامل )
مع إني واثق من فشلي بس فى نفس الوقت قادر إني أمسحهم

صحيح هوا انا قلت لكم انا صليت الجمعة من تلات شهور فين ؟ طيب قلت لكم صحيت يوم الجمعة من ست شهور وكتبت إيه ؟؟؟
تمام
يبقى هقولكم المرة الجاية على الفكرة المجنونة بتاعة النسيان وعلامات الطريق
تصبحوا علي خير
ويارب تصبحي حلوة
يا أحلي من الحياة

إسمحي لي أشغل مزيكتي بقى وأنهار وأنام
بكره هحط برده أغنية منير اللى بحبها 

معادلة زمنية

النهارده الشغل خلص بدري بس أنا فضلت فى المصنع
ومرضيتش أروح
وقعدت مع صاحب الشركة وسهرت مع بعض العمال
الموضوع كان لذيذ لكن المشكلة فى إن كله عمال يقولي هوا إنته مش هتروح ؟؟؟
هوا انته مش هتطلع تمشي ؟
هوا انته مش وراك حاجة يا أستاذ كريم ؟
بقيت عايز أقولهم مفيش حد أراعيه لما أروح بالإضافة لأني معنديش أدني إستعداد أتكلم مع أى شخص فى الوجود
كنت عايز أقولهم إني من إمبارح مكلتش ونمت بالعافية بعد ما إتشعلقت فى ميت خيط دخان من دخان سجايري
كنت عايز أقولهم إن اللي موقفني علي رجليا هوا شوية الشاى والسجاير والتفكير المستمر
كنت عايز أقولهم إن أنا مش عندي حد أكدب عليه وأقوله إني كويس ( أنا بقيت لوحدي وفي نفس الوقت بقيت حر )
كنت عايز أقولهم إني مقدرش أكدب عالناس اللي حواليا دلوقتي لأني بحبهم أوي وفي نفس الوقت مقدرش أكسر فرحتهم
بس إختصرت كل دا وقلت إني مكسل أروح
وفى الآخر صاحب الشركة ذات نفسه قرر يقوم يروحني بعربيته لأني مازلت مكسل أروح
مش مرتاح أو مش عارف أتكلم أو مفيش حد أكلمه أو مبقتش عارف أتعامل مع الناس زي الأول
مش عارف
لكن الأهم فى النهارده
إني قدرت أفكر فى فكرة واحدة بس فى آخر لحظات فى اليوم
من ساعة ما نزلت من عربية الراجل لحد ما روحت البيت
ماذا لو ...

ركزت فى الخط الزمني أوي وفى كل الجمل اللي مكانش ليها معني ودلوقتى معناها ممكن يكون فكرة كبيرة اوى
فكرت فى كل الأشياء اللى حصلت
إفتكرت ( الكل أكبر من مجموع أجزاؤه )
إفتكرت إن عشان توصل لمكان معين لازم تلف حوالين الميدان وتطلع من شارع فى إتجاه عكسي
وبعدين إفتكرت إن فى سبع أشواط بتطوفهم قبل ما يتغفر لك أو تقوم بالفريضة
وبعدين إفتكرت إن فى حاجات صغيرة أوي ممكن تصنع حدث عملاق بشكل غبي
وبعدين إفتكرت كلام تلاتة ميعرفوش بعض
وبعدين إفتكرت الخطة
وفى وسط كل دا حاسس إني بنهار بس فى نفس الوقت فى أكتر من زاوية وجدار وعامود رافضين ينكسروا
بحاول أفتكر صوتها وهي بتقول : I break the rules so I don't care
***

معرفتش أقول لها حاجة
غير انى بكسر كل الانماط
وبتصرف بدون توقعات او افكار او اساليب او خطط او اى حاجة
قلت انى مهتم
وبس
قلت انى مش عايز اضيع اى فرص نهائيا
وانى
عايز استغل كل فرصة ممكنة
معاكي

وهعمل كدا فعلا

ويمكن فى عز إنهياري

انام علي ضهري علي سحابة

وابص للكون كله ولحلمي البعيد

وابتسم
وبإختصار شديد
هحس بنفس اللي كنت بحسه كل مرة كنت ببص فيها للسماء وانا نايم علي الارض واحس برغم انى ايديا ورجليا ماسكة فى الارض الا انى بقع لفوق للسماء لحلمي وبطير له بسرعة الضوء وكل المسافات ممكن انى اعديها

هاخد بالي كويس أوي وبعدين هقول ...

Geronimo

وبس

وأنفذ اللي قلته واطير لحد هناك ...

انا قلتلها انا مهتم وسكتت...

معرفتش اقول ( بيكي )

بقيت فاشل إجتماعيا ويمكن حالة الإنهيار دي مش نافع فيها إني أقول كلمة ( بيكي )

والحمد لله إنها مبتقراش هنا :)


وبس كدا

نكمل بعدين بقي

بعدين ... بقي

تصبحي حلوة

وهي حلوة ف كل صباح وكل لحظة وكل يوم وكل مرة بكلمها فيها بحسها أحلي , هي الشتا والبرد والدفاء والأمان كمان


لسه بقي حاجة أهم
لسه مقولت حاجة عن المعادلة الزمنية

فجأة إتوجعت دلوقتي ...

أنا هقوم احاول انام

هكمل الشاي وأنام

تصبحوا علي خير

ويارب تصبحي حلوة بجد

***
تحديث 1

خايف اقولك مبسوط
لاني مش مصدق
وفي نفس الوقت مش عارف أعمل إيه
أنا منعزل إجتماعيا وفى حالي ومش بتكلم مع حد
ممكن يكون بالنسبة لك دقيقة
بس بالنسبة لي اللحظات دي هي اليوم كله ...
***