لو حلمك [ بقلم الباشا ]

قصيدة لو حلمك بقلم صديقى المدون : شريف الباشا

لو حلمك
كنتي حافظتي معايا عليا
كنتي فضلتي ماسكة إيديا
وما بعدتيش !
كنت باموت
حتى الأهة
كنت حابسها وأبان مبسوط
علشان بس ما تتغميش !
حبيتك
وما حبيتنيش !
إلا حتى ما حاولتيش !
متكلبشة رجليكي فِ خوفك
فشل الماضي ساكن جوفك
وانتي مكانك ما خرجتيش !
فالحة تقولي :

إنـِك ليا .. وماليش غيرك
ما تسيبنيش ؟

إزاااااااااي ؟

بتلاعبيني ؟

ولا إكمني كنت عليكي رايح جاي ؟

جايز طيب

بس الطيبة ما تعيبنيش !

بس !

خلاااااااااااص !

ما ترديش !

***
اتطمنتي إني حبيبك ؟
وإني فِ جيبك ؟
وإنك لو سيبتيني هاضيع
وابقى ما فيش !
دايماً فاكره إنك أذكى
وإنك مالكه
طب بالذمة ؟
حد يشد ولا يرخيش ؟
كوني صريحة فِ مرة وحيدة

وما تغشيش !

هل فعلاً

كنت أنا حلمك ؟

ابنك ؟ راجلك ؟ سندك ؟ كلك ؟

حضن لهمك ؟ قدر احتلك ؟

ولا ده كله جبر خواطر ؟

ما تجاوبيش !

ده مش إجباري

وما تعتذريش !

إذا كان قلبي

اتداس بالجزمه

وما وقفتيش !

***

الحُــب

عطــــاء

مش ضمة فِ ضلمة

ورسالة ناعمة

وشغل نفاق !

الحُــب
أرزاق
وأنا مش شحات
ولا غاوي إواء
وما باشكيش !
الحُــب
خِنـــــاق
فِ الروح
بيعلم
مش تهويش !
***
خلليـــــــــكي
غبية
عنيدة
تاخدي تمللي
ولا تديش !
خلليـــــــــكي

محلك سِر

بتنزفي عمر

وما بتمشيش !

ماشيه بضهرك

معجبه إنك

ما بتقعيش !

خلليـــــــــكي
تايهه ما بين أحلامك
ولا تصحيش !
خلليـــــــــكي

عايشه فِ كدبه كبيـــــرة

اسمها : انتي

وانتي ؟؟

ما فيش !

زي الأغنيـــــــــة

بكلام ثابت

بعد شوية

بيصبح بايت

ما بيغويش !

أغنيـــــــــة

مهمــــا كانت

حلوة

شجية

ما تشـَبعش

ولا ترويش !

أغنيـــــــــة

مهمــــا نحسها

مش بتحس !

تاخد مننا

ولا تنقصش !

وما بتسمعش ..

غير لشيطانها

وما بتهديش !

***

الله يسامحك
وأنا ....
لو كنت ظلمتك
سامحي ....
أو
ما تسامحيش !
دي حاجة تخصك وحدك

ما تفيدنيش !

أنا من غيرك بيكي هاعيش !

قلبي أنا واخد ع التلطيش !

عاااااااااااااااااااادي

ما تدقيش !

إفرحي ياللا ما تتكسفيش !
سيبي الحزن بحاله عليا
هايكفيني ما تهتميش !
هايغطيني فوقي وتحتي
وهاينحَر من دمي وراحتي
ما فيش حزن ما بيقضيش !
إمشــي بسررررررعة
ما تلتفتيش !
***
بكره الدنيا تفضى عليكي

واللي معاكي .. هايبقى عليكي

تشحتي حد يحن عليكي

ولا تلقيش !

ما أنت "نفسك" ما رحمتيش !
***
فاكره ؟
لما سألتك
- وأنا قدامك -
عايزه إيه ؟
وما عرفتيش ؟
أديني خلصتك مني يا ستي !
عرفتي الوقتي ؟؟
............
ما تبكيش !
***
- ملحوظة :

مهما تحاولي إنك تنسيني

ما هاتنسيش !

***

شريف بعشق القصيدة دى وبالذات الأجزاء اللى علمت عليها كدا وكدا ...
تحياتى ليك ودامت إبداعاتك ..

شاب فقرى

يحكى أن

سمعينى حكايتنا ...
إحكى لى ...
نفسى مرة حد يحكى لى وأنام ..

[ يحكى أن - بساطة ]

شاب فقرى

بما إنى مبسوط للدرجة هكتب كذا مرة ...

إبتسامة

لأول مرة فى حياتى أحس بكدا ...
إبتسامة فرح تتسلل إلى روحى ...
مهما حبيت أو كلمت أو جربت أو عشت
فأنا مفيش مرة فرحت كدا ...
والفرح المرة دى لسبب غير كدا ...
أحمدك يارب ...
يارب فرحنى كمان وكمان ...

***

عنيد ..
حظك كدا ...
وأعملك إيه يعنى ؟؟؟

***

مش محتاجة أكتب لك ولا أحكى لك ولا أفهمك ...
هتفهمى لوحدك ...

***

جمعتى جثمانى من مملكة أوزوريس
(الجملة من قصيدة إيزيس لهشام الجخ )

***

مشتاق ...
والشوق ملوش حدود ...
عدى كل الكلام والرسايل والحروف ...
مش هقول ...
لو فهمتى إنتى إحكى وإنطقى وإتكلمى ...
مش تخبى ...
مش تدارى بالحروف ...
مش تقولى وحشنى جدا ..
سيبى روحك مرة تيجى مرة
سيبى نفسك للى حبك
للى بيحس بمشاعرك
واللى فاهمك
واللى شارى بجد جدا
إشترينى ...
قدرى العمر اللى باقى ...
بكفايانا من التعب ...
عشنا عمر فى قلب منه ...
متهربيش ...
بصى مرة وركزى ...
هتلاقى إسمك بين السطور ...
تعالى جنبى مرة واحدة
قولى ولوو مرة بعلو صوتك
عاندى جدا
و أنا مستنى ...
على وعدى ...

شاب فقرى

والقهوة متحوجة

إذا دخلت الجنة ولا النار
هشتاق إلي ضحكتك
وقعدتي في الدار
والقهوة متحوجة من طيبة العطار

[ جمال بخيب - مش باقى منى ]

شاب فقرى

حلم

منمتش ...
وبرده حلمت بيكى ...

شاب فقرى