مش هنسيب الميدان وهنكمل المشوار

فى الأول قالوا علينا أغبياء ومفيش ثورة بيتحدد ميعادها وإن الكلام اللى بنعمله دا مش هينفع وإننا هناخد على دماغنا والأمن هيدينا بالجزمة ونرجع تانى بيوتنا
وبعدين بعد يوم الجمعة 28 يناير : قالوا علينا ثوار ورجالة بصحيح وإن اللى عملناه دا يعتبر إنجاز قوى جدا وإننا بجد رجالة
وبعدين لما ظهر التنظيم فى دخول ميدان التحرير والتفتيش وإظهار البطاقة الشخصية والبيات فى الميدان والمستشفى الميدانى : قالك دول معاهم أجندات أجنبية وخونة وعملاء
وبعدين لما البلطجية بهدلونا وبهدلوا المتظاهرين : قالوا لاء مينفعش كدا ... النظام فعلا فاسد ولابد من إستئصال الورم بس كفاية عليكم لحد كدا وسيبوا الشرعية والدستورية وسيبوا النظام فى حاله وروحوا بقى كفاية كدا
وكل الحاجات دى عصبتنى وحرقت دمى :
أولا : لما إنته شايف إن مفيش ثورة ينفع يتحدد ميعادها ... معملتش ليه حضرتك تحرك أو ثورة أو حتى مظاهرة على غير ميعاد ... أبسط حاجة كان هيتقبض عليك وتتهم بالخيانة العظمى والعمالة ...إنما اللى حصل هى ثورة تحرك فيها كل فئات الشعب ....
ثانيا : لما إنته شايفهم رجالة كدا وثوار منزلتش معاهم ليه ؟؟؟
ثالثا : إتهام الأجندات الفاكس وشبح الأخوان اللى النظام بيلعب بيه ... تفتكر الناس هتبلع الظعم بالسهولة دى ... ما كل الناس نازلة الميدان ... كل اللى أعرفهم مفيش فيهم ولا واحد أخوانى وحتى اللى ماسك الميدان هما الشباب مش تقولى أخوان وبتنجان ... وعلى فكرة لو الثورة إنطفت نارها ... أبسط حاجة هيعملها النظام هيوجه السكينه تجاه الأخوان ويتهمهم بالعمالة ويسجنهم ويخوف بيهم الغرب والدول الأجنبية اللى بتعادى نظام مبارك وهيبقوا عبرة لبقية فئات الشعب
ثالثا : شرعية مين ودستورية مين يا قمر الدين .... فاكر لما حاولوا يغيروا الدستور كان فى إستفتاء نزيه .؟؟؟ ولا أصلا المجلس دا إتعمل فى إنتخابات نزيهة ؟؟؟ متجيش تطالب بشرعية فى وسط نظام فاسد من أوله لأخره
طيب لو إحنا كنا سمعنا الخطاب الأول وقولنا آمين ولازم نسمع كلام الريس ... هل ياترى الحكومة كانت إتغيرت أصلا ؟؟؟
هل ياترى كان فى حد عبرنا بعدها ؟
كان زمان البلد لسه تحت حكومة نظيف أو الحكومة الجديدة والحزب الوطنى قوى ومسيطر عالبلد وعلى كل حاجة واللى بيسرق بيسرق واللى بينهب بينهب وكان زمان الناس دى كلها إتلمت فى المعتقلات
بعد كل خطاب بيطلع فى تصريحات أهم وكلام من النظام وقرارات فاكرها منحة على ناس غلابة ... فى حين إن دى أصلا حقوق الغلابة
إهمدوا بقى وبطلوا شعار إخلاء الميدان ووحدوا الصف
وبعدين اللى بيقولى دا خراب لمصر .... هوا فى خراب أكتر من اللى وصلنا له ؟؟؟ فى دم راح أكتر من اللى راح واللى إتدفن فى الدويقة واللى غرق فى العبارة واللى إتحرق فى قطر واللى مات فى قسم شرطة من التعذيب أو إتسرقت لقمة عيشه منه .... هوا فى خراب أو عار أكثر من تصدير الغاز ؟؟؟ وهوا فى عار أكثر من إطلاق الرصاص الحى على المتظاهرين والبلطجية يقطعوا فيهم ؟؟؟؟
وهوا الناس اللى بتتهمنا بالعمالة والخيانة والأجندات والناس اللى شغالة باليومية ... عاجبها حالها وحال البلد ؟؟؟ هوا مين اللى رماهم فى الفقر ؟؟؟
هوا مش كفاية اللى شوفتوه من كروت الإرهاب من النظام : مرة بالشرطة السرية والمباحث والمساعدين وهما بيسرقوا البيوت والجيش قبض عليهم ومرة تانية من بلطجية فى التحرير ومرة تالتة من المكالمات الزائفة عالتلفزيون المصرى ووساخة الإعلام ...
إعرفوا قيمة حريتكم وإعرفوا تمنها .... إخلاء الميدان والتنازل فجأة يعتبر تصرف غبى .... كلنا هنكمل وكلنا هنفضل ننزل
وسمعت الفترة اللى فاتت ناس بتقول شباب 25 يناير بطلوا ينزلوا ووافقوا على اللى بيانات الريس
شباب مين يا قمر الدين ..... دا شعب ... مفيش حد من حقه يقول وافقنا عالمطالب غير الشعب اللى يرضى بيها بشكل كامل ... ولنفترض إن البرادعى أو الإخوان أو حتى الوفد أو سته برميل زى ما بحب أسميهم قالوا إحنا وافقنا على إنجازات النظام ... هل دا خلاص هيخلى الناس تفوق وتقول بابا مبارك حبيبنا ونمشى وراه ؟؟؟؟
الناس اللى نازلة دى من كل فئات الشعب لاهى فى تيار ولا فى حزب ولا حتى فى جماعة ... واللى هيحاول يصنفهم تحت رابطة أو حاجة يبقى يتكلم ويقول مصريين .... فقط
الناس اللى فى الميدان واللى بيحاولوا يوهموكوا إن عددهم بيقل وإنهم خلاص زهقوا ... الناس دى وقفت فى المكان دا بدمها ... راح منهم ومننا جرحى وشهدا وناس إتكسرت على إيدين البلطجية ونازل إتبهدلت على إيد الأمن .... مش عايز حد يحلم ويقول محدش هيعبرهم ...
النظام بيتهاوى ويتداعى وإنما النصر صبر ساعة ... ولا تنسوا إن الساعات الأكثر ظلمة هى التى تسبق الفجر
وحدوا الصفوف .... كونوا معا بصوت واحد ورأى واحد وقوة واحدة

وإحنا مكملين وثابتين على موقفنا... ومش هنسيب الميدان وهنكمل المشوار .... كلنا على قلب راجل واحد
قلب مصرى

شاب فقرى

الأخوة المحترمين اللى مش عاجبهم الكلام يتفضلوا يشوفوا المطالب الدستورية للشعب ممكنة ولا لاء ويشوف السيناريوهات المطروحة فى شرح مبسط هنا ....إضغط ربنا يهديك وتعقل وتركز كدا ...
وأنا جايبلكم الفيديو هنا كمان ...

أما اللى مش عاجبهم الكلام خالص : فيحسم المشكلة بيننا إنتخابات تشريعية أو رئاسية نزيهة أو إستفتاء نزيه وقاضى على كل صندوق .... غير كدا مفيش غير الإحترام والنقاش الجاد المحترم.... وشكرا

خطاب شكر لرئيس الجمهورية

أولا وقبل أى حاجة لازم أقولها بصراحة : شكرا ياريس
بجد شكرا
إنته بكل اللى عملته بجهاز الشرطة يوم التلات والاربع والخميس والجمعة ( 25 - 26 -27 -28 ) قدرت تصحى فى المصريين معانى الرجولة ...قدرت تخلى حتى الناس الغلابة اللى ملهاش فيها تنزل وتقول لاء وتنزل وتتضرب وتكمل برده ...قدرت ياريس تخلى المصريين ينزلوا بالسلاح يحموا بيوتهم فى لجان شعبية وقدرت تصحى الرجولة جوا شباب الوطن ... بقوا واقفين فى الشارع بيتعاملوا بإحترام أو فى مظاهرة بيهتفوا بإسم مصر اللى مكانوش بيفتكروه غير فى كاس الأمم ... بجد ياريس اللى عملته خلانى ألعن أبو اليوم اللى كرهتك فيه ... إنته اللى قدرت توحد المصريين بإنك تجعل نفسك العدو المشترك للجميع ... إنته قدرت على مدار تلاتين سنة توعد ملايين الوعود ومنلاقيش منها أى حاجة فى أى حاجة ... قدرت بعون الله تصنع نوع من الصمت للقادة العرب علمتهم إزاى يسكتوا وميعبروش الشعب ويعملوا نفسهم كأنهم مفيش ...قدرت ياريس والحمد لله تلعب على عواطفنا بحرب أكتوبر وثورة يوليو أكتر من تلاتين سنة ... قدرت تقنعنا إنك البطل العظيم اللى نزل لنا من السما عشان ينجدنا ويعيشنا فى حب وأمان وإن إنته نبى ومرسل من المرسلين جاى تطهر البلد وتحميها ... بجد ياريس مش عارف أقولك إيه عاللى شفته فى المظاهرات ...هما دول المصريين ؟؟؟ بجد هما دول ؟؟؟ أمال مين اللى كان بيتحرش ؟؟؟ ومين اللى كان بيسرق ؟؟؟ ومين اللى كان بيعمل جماعات مسلحة ؟ وفين القلة المندسة ياريس ؟؟؟ أنا حتى الآن مش مصدق اللى شفته فى الناس اللى بتحافظ على الأمن فى الميدان ومن الناس اللى بتلم الزبالة ومن الناس اللى بتملى ميه وتسقى اللى واقفين فى الحر ومن اللى بيساندوا بعض فى كل حاجة ....أنا مش متخيل بجد اللى حصل ... دا لو كان حصل حرب مكانش الناس هتتحرك بالشكل دا ...أنا دلوقتى ياريس بفتخر بجد إنى مصرى ...حسيت إنى مصرى بجد والناس بترج الميدان بكلمة تحيا مصر أو بتقول النشيد الوطنى ...حسيت بكيان واحد للمصريين ... حسيت بوحدة ونوع من العيلة وفين ؟؟ فى الشارع وغلاوتك ياريس .
ياريس الشرطة السرية والمخبرين والبلطجية اللى نزلتهم مش خوفوا الشعب وشعبك قدر يكون لجان شعبية تقف فى وش الكلاب دول وتصدهم والجيش كمان ياريس قدر يعتقلهم ...أنا مشوفتش الجيش الصراحة بيحمى المنشآت عندنا هنا لا فى القسم ولا فى مجلس المدينة ولا فى البوسطة ولا فى أى حاجة تانية بس الحمد لله قدرنا ندافع عن بلدنا كلنا ...
عارف ياريس كلاب العادلى اللى كانت بترش الميه عالناس وهى بتصلى فى المظاهرات أو بتضرب الناس بالرصاص الحى أو بالقنابل المسيلة للدموع ... صدقنى ياريس مخوفناش للأسف وخيبنا ظنك وطلعنا رجالة

شكرا ياريس لأنك خليت الشعب يبقى رجالة تقدر تقول لاء بكل العناد والجبروت اللى أبديته لينا ورفضك لترك منصبك ومحاولتك للكدب علينا إمبارح وعدم تعديل المادة 88 من الدستور اللى بتنص على اشراف القضاء اللى حضرتك شيلته .... ومحاولتك إستعطاف الجماهير العريضة إمبارح بإنك هتموت على أرض مصر ...بجد حركت قلوبنا كلنا ...لكن ياترى لما ييجى لنا سرطان بسبب القمح والاغذية والمبيدات اللى بيأكلها لنا كلابك هل هنتعالج بالحب والعطف ؟؟؟ ياترى اللى بيقبضوا 250 جنيه فى الشهر هيقدروا يصرفوا لما مرتبهم يخلص ويصرفوا شوية قيادة أو بطولة من بتوعك ؟؟؟ ياترى ياريس كرامتك هتأكل المصريين وتعالجهم ؟؟؟
ياترى ياريس هتقدر تنفذ أى وعد من اللى قلته ؟؟؟ ياترى هتقدر ياريس تلتزم لآخر مرة ...؟؟
على كل حال مش هتفرق لأن الشعب مش هيسكت وكلنا عايزين نيجى نشرب معاك الشاى فى القصر يوم الجمعة العصر ؟؟؟ ولا دا مش من حق المواطنين الغلابة طبقا للدستور ؟؟؟ لو مش من حقنا فحاول تغيره ياريس وإنته الكبير برده
وفى النهاية أحب أقولك هتوحشنى من هنا ليوم الجمعة ....
والبلطجية اللى نزلوا ميدان التحرير دول ... أنا شفتهم قصاد ماسبيرو إمبارح ومش فرقت معايه وهما بيهتفوا بإسمك ... مش هيقدروا على ناس مش لاقية تاكل وجعانة ووقفت فى وش الرصاص الحى ومش هنسكت لهم ياريس .... لو حضرتك وصلت لك الرسالة أحب أقولك ياريت يعنى لو تكرمت ولو تعطفت تحل الخلاف بيننا وبينهم فى إنتخابات نزيهة تحت إشراف قضائى محترم ونزيه ...


ما نشرته صباحاً تعليقا على ما رأيته أمام مبنى ماسبيرو :
إمبارح راجعين من ميدان التحرير وماشيين عالكورنيش نلقى نظرة ونعرف من أين يقوم التلفزيون المصرى بتصوير بنقل الشوارع الفارغة ومن أين تصور العربية ...إستمر سيرنا حتى ماسبيرو ووزارة الإعلام لنجد مظاهرة قوامها 300 متظاهر تنادى : يوم الجمعة العصر هنروح كلنا عالقصر ..
قوات الجيش تحاصر مبنى ماسبيرو وتمنع المتظاهرين من أى شىء سوى أن يرحلوا أو يقفوا فى صمت
إستمر سيرنا لنعبر حتى وزارة الخارجية ونرى مؤيدين مبارك .. محموعة من البلطجية والنساء غريبات المنظر وبعض العجزة ... تشكيلة مختلفة .... وبدأنا نسمع بقى العبارات القبيحة اللى بتأيد الريس
- العيال السيس اللى بتعارض الريس بتروح فين ؟؟؟
- العيال اللى بتت**** واقفين يعارضوا فين ؟؟
- كلنا بنحب الريس ويلعن تلاتة *** ** المعارضين
- وتوجه احدهم لأحد ضباط الجيش قائلا : إنته فاكر إن الشوية دول ميقدروش على اللى فى ميدان التحرير ... اللى فى الميدان دول عيال م***
وفى وسط الزحام شاب يرتدى زيا منمقا (( بدلة سودا ))ويمسك هاتفه الجوال ويتكلم لمن على الطرف الآخر :
- أيون يا دكتور كلهم من الحزب
دا قبل الخطاب بثلاث ساعات على الأقل
وضحت اللعبة من قبل الخطاب اللى قاله الريس
من قبل أى شىء فأنا ضد الهتافات التى تحمل سبابا وأهانة على أحد جنود مصر
وضد طرد أى مواطن مصرى خارج البلاد ....كلنا مصريين ...إترك الحكم وإعتزل العمل السياسى وإرحمنا
إترك لنا شيئا أجمل لنتذكرك به ...
إرحمنا الله يرحمك

فى أمان الله

المواطن المتظاهر المصرى :
شاب فقرى

ماحدث لنا فى الخامس والعشرين من يناير

السلام عليكم ورحمة الله وبركاته
وجاء يوم 25 يناير أخيرا بعد طول إنتظار ...حتى فى نفس اليوم الصبح كنت حاسس إنه بعيد أوى وكان عندى إحساس رهيب إنى هكون واقف لوحدى وبهتف ... ومش عارف ليه ... الصراحة مصدوم من اللى حصل ومكنتش متخيل
مظاهرة قوامها 50 ألف متظاهر .....
سمعت إنها محصلتش فى مصر من السبعينات وأغلب الظن أن يوم الجمعة هيكون زى يوم وفاة جمال عبد الناصر ... مصر كلها هتخرج
نبدأ الأحداث من الأول زى ما حدث معايه
بداية اليوم أمام جامعة القاهرة ...صمت رهيب أمام الجامعة حوالى 16 عربية أمن مركزى بخلاف سيارات المطافى ...شىء لا يشجع إطلاقا بالإضافة لعدم وجود أى تجمع ... ويمر الوقت وأنا مستنى ومش شايف حاجة إلى أن إتصلت بزمايلى ... يا جماعة فى إيه ...لقيت إن كل الأماكن اللى إتحددت هى اماكن وهمييييييييييييييييييييييييييييية ...طيب وإزاى يا شباب ؟ لقيت الرد إن دا هوا مجرد إرهاق للى بيحاولوا يسجننونا ... يعنى يوم عيد الشرطة هتنزل الشرطة كلها الساعة السادسة صباحا فى أماكن معينة فى إنتظار المتظاهرين لحد الساعة إتنين ...إديناهم ميعاد ومروحناش :D... والأحلى من كدا هوا مجرد التفكير فى مرور سيارات الأمن المركزى فى القاهرة الساعة الثانية ظهرا هيكون مستحيل ...
وصلنا لمكان المظاهرة سيرا على الأقدام فى شارع جامعة الدول العربية ... ذهلت من العدد ومن العزيمة والحماسة وحب مصر ...
متخيلتش فى يوم إن يكون فى روح وحدة جوا مصر بالشكل دا ... من أول ثانية فى المظاهرة وكلنا كيان واحد ... وروح واحدة
قوات الأمن المركزى بتحاول تحاصرنا ولكن على مين ؟؟؟؟
الناس دى جعانة ... الناس دى مش لاقية شغل ... الناس دى صابرة على الفقر ... الناس دى عاطلين .... الناس دى عندها عيال خايفة على مستقبلهم ... الناس دى فى منها اللى عايز يشتغل هنا ومش عايز يسيبلكم البلد
هل هيقدر الأمن على شعب بيتجرع الفقر والجوع والبطالة و غذاؤه هوا حب مصر ؟؟؟
مستحيل ...
حواجز كتير فى الطريق حتى ميدان التحرير ... حواجز أمنية نردد أمامها كلمة واحدة كلما نراها ...( سلمية ) ... ونعبر فى سلام وأحيانا لا يحترموا هذا ونلاقى الضرب والدفع من قوات الأمن المركزى
وصلنا ميدان التحرير فى مظاهرة بالآلاف ... وكان أول حدث فى الفيديو التالى :

سيارة تابعة للأمن تحاول تفريق المتظاهرين بالمياه ويصعد إليها شاب يحاول إيقاف مدفع المياه ... ويصعد ظابط مباحث أو مخبر خلفه لتوقيفه ويقع الإثنان من سرعة السيارة ....
شجاعة وجرأة ووحدة وإحساس بالمسؤلية من هذا الشخص ... لك منا كل التحية ...( حافظت على أخواتك واللى معاك من الإلتهاب الرئوى والميه البارده فى الوقت دا والله لسه بدعيلك حتى الآن )

إستمرت المظاهرة رغم غباء الأمن المركزى والتعامل اللى أبسط ما يقال عليه همجى من قوات الأمن والقصف بالقنابل المسيلة للدموع ورفض الأمن ومحاربته للمتظاهرين بالأمس حتى لا يبات أحد فى ميدان التحرير .
أنا سعيد باليوم دا برغم المساوىء اللى حصلت فيه والأحداث اللى عكرته
مكنتش متخيل إن الناس ممكن تستجيب وتنطق وتتحرك وبالأعداد دى كلها ... خمسين ألف متظاهر وكيان واحد مش خايف بيهتف بإسم مصر ... ولكن الأمل فى ربنا كبير ...
شكرا لصديقى اللى رافقنى طول اليوم ...شكرا يا ضياء :)
وسنستكمل ما بدأنا ... ولنا ولمصر الله
فيديو خاص بالسحل اللى حصل فى ميدان التحرير بليل عند فض المظاهرة ...
شاهد للضرورة وتذكر أن الحرية أغلى من كل شىء ... فالحياة بدونها لا معنى لها ...الفيديو من شبكة رصد

دعواتكم لنا ولمصر ....
ونداء لكل شخص قرر إنه أجبن من إنه يقول كلمة حق أو يشارك ... ذنب أى حد إتضرب أو إتهان أو بكى فى اليوم دا من القنابل المسيلة للدموع فى رقبتك ...لأن عدم وجودك أضعف كيان التظاهر وعدم وجودك كان سبب فى إن الناس دى إنضربت ومخدتش حقها لحد دلوقتى ... خليك راجل وإنزل ... العمر واحد والرب واحد
ملاحظة : صور اليوم اللى صورتها فى أكونت الفيس بوك ... تحياتى

شاب فقرى

أربعة وعشرين يناير ... ميعادنا بكرة

السلام عليكم ورحمة الله وبركاته
بكره 25 يناير
آخر وقت تقدر تقرر فيه نازل ولا لاء هوا النهارده ....
كل المصريين نازلين ...
متبقاش غير طوب الأرض إنه يصدر بيان يقول فيه إنه نازل بكره ...
ياترى هتستنى طوب الأرض إنته كمان عشان تنزل ؟؟؟؟
بكره وإحنا نازلين لو حصلنا أى حاجة ...إفتكر إن دا فى رقبتك كمصرى
لأن كل دول نازلين عشانك وعشان خاطر مصر
لو حصلنا أى حاجة لو إتضربنا ولا إتبهدلنا ولا حتى إتسرقنا أو منجحناش ...إعرف إن دا فى رقبتك لأن إنته قررت تسيب أخواتك ينزلوا يدافعوا عنك وعن حقك وحق بلدك وإنته قضيتها فى البيت
ويمكن صمتك وسكوتك وحتى خوفك من كتابة رأيك او تعليقك ولو حتى فى المدونة أو فى موقعك أو فى صفحتك الشخصية ...دا هوا أكبر جبن ...إنته حتى خايف تنطق وتساند ولو بكلمه ....
متشيلش ذنب حد وإتحرك
قول لاء لأى حاجة تمنعك من النزول

.... ونراكم على خير غدا فى شوارع مصر ....
.... ربنا ينصرنا وينصر مصر ....

شاب فقرى

أنا هغير الواقع .... هام جدا

السلام عليكم ورحمة الله وبركاته
النهارده تلاتة وعشرين يناير ...
عارفين يعنى إيه ؟؟؟
يعنى خلاص مبقاش فى وقت تقول هنزل ولا مش هنزل يوم خمسة وعشرين ...
لازم تأخد قرارك ... تشوف دورك هيكون إيه فى كل دا
خايف تنزل ؟؟؟
أهل تونس مقدروش يثوروا غير لما تغلبوا على خوفهم .... ياترى لسه خايف ؟؟
طيب شوفوا معانا الخبر دا كدا ...هنا

أعلنت سلطات مطار القاهرة اليوم حالة الطوارئ لاعادة فحص 59 طرد ذهب وعملات أجنبية بعد اكتشاف تمزيق بعض أكياسها قبل شحنها إلى هولندا.
وكان عمال الشحن على الطائرة الهولندية المتجهة إلى أمستردام قد فوجئوا بتمزيق كيسين ضمن 59 طرداً تحتوى على كميات كبيرة من الذهب وعملات أجنبية قيمتها عشرات الملايين فتم إبلاغ المسئولين.
وتم تشكيل لجنة برئاسة مسئول أحد البنوك المصرية التابعة له الطرود وتم إعادة فحص الطرود والتأكد من عدم نقصها والإشراف على شحنها على الطائرة.

يا هلترى على فين كل الفلوس دى ؟ وفلوس مين اللى قرر ينقلها برا ؟؟
إنزل وقول لاء للظلم ولاء للفساد ولاء لكل ظالم فى البلد دى ...
إنزل بكاميرا عالأقل وصور وسجل الحدث.... سجل الناس اللى هتقدر تقول لاء ... سجل أى إعتداء ضد أخوانك المصريين
إنزل ولو حتى خايف ...إكسر خوفك عالأقل وإنزل وقول لاء ... إفتكر إن الظلم مبينزاحش بالدعاء وإن ربنا بيعاقب المستضعفين فى الأرض والساكتين على الظلم وأن الساكت عن الحق شيطان أخرس ...
وشوف الفيديو دا كمان ....

مش هوا دا رئيس الجمهورية ولا دا واحد منعرفوش ...طبق المبادىء اللى نادى بيها فى الفيديو دا
إنزل وثور مع أخواتك المصريين
اللى نازلين مش أكرم منك ولا أجدع منك فى حاجة ولا هما ليهم فى مصر حتة زيادة عنك وخايفين عليها
ولو حتى نزلت وحصلك حاجة ... شهداء وضحايا التعذيب إنته مش أحسن منهم إلا لو قلت لاء ومرضيتش بالتعذيب والموت فى الأقسام
إنزل وقول يارب ....
مين نازل غيرك ؟؟؟
كل دول نازلين :
إللي إتزور ضدهم الإنتخابات نازلين بمؤيديهم - الجامعات الخاصة- موظفي الضرائب العقارية ومراكز المعلومات - عمال غزل المحلة و بتروتريد - أساتذه الجامعات -أطباء - محامون - مهندسون ضد الحراسة - الجمعية الوطنية -ا لإخوان المسلمون - شباب6أبريل أحزاب(الغد-الجبهه-الكرامة) - حملة دعم البرادعي -شباب التجمع - شباب الوفد - حشد - العدالة و الحرية - الإشتراكيين الثوريين - التجديد الإشتراكي - حتى الإلتراس الزمالك والأهلي والفقراء والجعانين والعاطلين و كل من تعرض للتعذيب فى سجون الداخلية والمعتقلات وكل من له حق ومش طايله يعنى كل المصريين ... وفعلا كل المصريين بكل قطاعاتهم و من كل مصر ...
يعنى مش باقى غيرك إنته تنزل معاهم وتشجعهم وتقف فى صفهم وتقول لاء ....
طيب مين نازل تانى ؟؟؟
إدخل هنا وشوف بنفسك ...
عارفين ... من شوية إفتكرت واحد إتريق على صحابه اللى نزلوا يعملوا مظاهرات فى تونس ... وقالهم موت يا حمار ومش هتغيروا وهتتبهدلوا عالفاضى ومفيش حاجة هتتغير .. لحد ما جاء يوم 14 يناير والثورة نجحت وبن على هرب على المملكة العربية السعودية والشعب أخد قراره ...ياترى هتكون إنته مين بقى ؟؟ اللى نزلوا وقاموا بالثورة ولا اللى قعد يحبط فى صحابه وفى الآخر بيغنى ظلموه لأنه إكتشف إنه إمعة وجبان وضعيف ؟؟؟ إنته مين ؟؟؟
وهنا نصايح وأماكن التجمعات بالقاهرة يوم 25 يناير...
وهنا كل حاجة عن اليوم فى هذا الرابط .. هنا ..
نراكم على خير يوم 25 يناير فى الشوارع ...

شاب فقرى

ملحوظة صغيرة لأصدقاء المدونة و أصدقائى : أنا عيد ميلادى يوم أربعة وعشرين ومبسوط جدا بإن أول يوم فى السنة الجديدة هخرج وأعمل حاجة مفيدة لبلدى ولمستقبلى ... يارب يوعدكم ... ويارب يوفقنا ويوفق كل الغلابة والفقرا والمقهورين فى الوطن دا .