حتطلع حتنزل حجيبلك جمال

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدوخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك واذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمال

شعر : أحمد فؤاد نجم
غناء : سامح هاشم

كسر حاجز الصمت

بعد طول سكوت قررت أكتب وأمرى لله
زهقت من الصمت ومن إنى مش عارف أرد عالشخصية الوحيدة اللى بتسأل عليه
حتى الآن
لكن بحاول ألاقى لنفسى سبب للكتابة غير التعلق بالناس وإنى أكتب لحد أو أكتب عشان خاطر صحابى مثلا اللى بيزورونى ويعلقوا
ملقتش
زمان كنت بكتب لإحساس الوحدة وإنى مش مهم حد يكون جمبى ولا أى حاجة مهمة غير إنى أكتب
وكنت الحمد لله بنزل فى اليوم اكتر من بوست
حاليا بقى
بعد ما بدأ كل الناس اللى عرفتهم من خلال البلوجر وعرفونى بدأوا يختفوا
مش هقول أسامى كتير أوى لأنهم عارفين هما مين
لكن المهم إن نفس السبب اللى خلانى أكتب هوا اللى خلانى أقف شوية وأفكر
يارتى إنته بتكتب لمين ؟
وياترى اللى بيقرا هيفهم المقصود ؟؟؟
وياترى الناس اللى بتعلق وبيبقوا صحابنا هيختفوا تانى فى أحد الأيام زى ما غيرهم إختفى ؟؟؟
حالة من الزهق والملل والتعب والغصب على النفس عشان أكتب
مواضيع وأفكار كتير بتيجى فى دماغى وبكسل أكتب
بقيت عامل زى
ولا بلاش
هحاول أطلع كل مخازين الأفكار اللى مرت عليه الفترة اللى فاتت
وأشكر الشخصية الوحدية الطيبة اللى اعرفها اللى سألت عليه فى عز الغياب دا
واللى سابت إهذاءات عالبوست السابق :)

-----------

حدث فى سته إبريل

طبعا لازم تتكتب سته إبريل
لإن اللى شفته كان شىء يقهر البنى أدم
بدأ يوم ستة إبريل كأى يوم عادى فى حياتى
صحيت الصبح وشفت ايه اللى ورايه ومبصيتش عالتاريخ إعتبارا على إن كل الأيام زى بعضها
لقيت إن فى مشاكل فى البنكين اللى بتعامل معاهم
أخدت بعضى وبدون فطار ولا حتى كوباية شاى ونزلت الدقى
وقلت أمرس هوايتى المحببه فى المشى
مشيت لحد البنك
حليت أول مشكلة وإتبقى إنى أفطر وأروح للبنك التانى
فطرت فى الشارع (( هواية محببة نمبر تو ))
وقررت أرجع الذكريات وعالأقل أمشى من الدقى لميدان التحرير عند المجمع مرورا بمتحف الفنان محمود مختار ودار الأوبرا
وأهوه كله توفير فى الزمن ال....
جبت كمية لب محترمة جدا حوالى تمن كيلو لب سورى وإنطلقت
أقزقز وأنا بسمع مزيكا ومنسجمن
لحد دلوقتى كل الكلام اللى فات سخيف وممل
وصلت لمحطة مترو الأوبرا
وماشى بدندن زى الأمير وبتفتف قشر اللب زى البرنس فى الشارع
وإذا بيه ألاقى سبعة تمانية واقفين زى ال بلطجية على الرصيف
حاولت أعدى وأمشى ومليش دعوة بحد
ولكن اللى ربنا ي... قالولى ممنوع العبور يا أستاذ إنته ياريح فين
طبعا كويس إنه قال يا أستاذ ولكنى رديت بسخافة : رايح البنك اللى جمب المجمع .. وليه ممنوع العبور يعنى ؟
فكان الرد السخيف أكتر : كدا هنا مقفول مينفعش تمر من على كوبرى قصر النيل لو عايز تروح لف وروح من ناحية الجيزة
بصراحة كنت بفكر أسكعه على قفاه أو أقوله إنته غبى ياض ؟
لمن لا يعلم فإنى لو رجعت تانى من الطريق دا هبقى كأنى بلف على شكل حرف U والهدف بين قطبى المغاطيس وانا بلف فى الاتجاه المعاكس عشان أوصل على رأى المثل حاورينى يا تيتا
قلت مش مشكلة جنية مترو يا كرملة
وركبت المترو محطة واحدة لأول مرة فى حياتى
وهنا مكنتش لسه عرفت إن دا سته إبريل
قلت لنفسى ياترى فى إيه فوق ؟
فى وزير بيعدى مثلا ؟
طيب ليه الوزير يبقى أحسن مننا يعنى ؟
هوا أبوه وأمه ملوك مصر وإحنا اللى ولاد كلب ؟
وبعدين مادام جنابه معدى يعنى ليه نوقف الطريق ؟
هوا الناس هتدايقه فى حاجة ؟؟
الناس هتقتله يعنى ؟
طيب وبعدين ؟ والنتيجة إيه ؟
ياترى إحنا اللى منحنا لهم القوة المفرطة دى عشان يوقفوا لنا بلطجية لا يختلفوا عن البلطجية اللى فى أى حكر أو عزية ويقفرفوا فى خلق الله ؟
ياترى لما حسسنا الحكومة إنها أمنا ومهما عملت لازم نحبها ونسامحها ساعتها هوننا عليها وبقينا ولاد حرام ولابد من إخضاعنا وإزلالنا سواء فى طوابير العيش أو من خلال بلطجى يمارس عليك أساليب البلطجة فى الشارع ويمنعك من إنك تمشى من هنا وهنا ؟
فى الموقف اللى أنا فيه دا قدامك حل من تلاتة
والتلاتة أحقر من بعض
1 ياتعمل فيها كرومبو وتقولهم لازم أعدى من هنا دا حق دستورى وإنته مين يعنى وإنته متعرفش أنا ممكن أوديك فى داهية
2 يا تعمل فيها إمعة ( إن لم تكون كذلك ) وتبقى غنماية فى وسط القطيع وتسمع اللكلام وتنزل تركب المترو .( زى حالاتى كدا )
3 يا اما بقى إمعانا فى الغلاسة تسمع كلامهم وترجع عشرة متر بقى بضهرك كدا وتوقف تاكس وتديله عشرة جنيه وتعدى من الطريق وإنته مطلع لهم لسانك قال يعنى يا ولاد الكلب أنا محدش بيقدر يكسرنى وأنا راجل محترم غ2صبن عن اللى خلفوكوا
وفى الحالة الاخيرة هيشتبه فيك وتخش القسم
أنا الصراحة إتفرست
إزاى البنى آدم اللى ربنا كرمه فى يوم من الأيام يبقى غنمه تحت إيد حكومتنا تقوله يمشى من هنا ومش يمشى من هناك ؟؟؟
إزاى ؟
إزااااااااااااااااااااى ؟
إزاى ننسى آدميتنا ؟
بقيت ماشى بقول ملعون أبو البلطجى اللى فوق دا ...
ولكن
البلطجى دا أب وعنده عيال وعنده أسره ومواطن زيه زيك لكن هوا متأكد من إنه بيقوم بعمل الواجب وإن دا هوا الصح
بصيت للشاويش الفلاح اللى فى القسم و رجال المباحث المتنتورين فى كل حته فى فى الميدان
مادول بنى آدمين زيهم زيك
ليه يقيدوك ؟؟؟
ليه يظلموك ؟
وهنا إفتكرت أوسخ مبدأ مترسب فى العقل المصرى
(( سامحنى يا بيه .أصل أنا عبد المأمور ))
من عيشتنا فى بلدنا للحياة العسكرية التى لا تنتهى سواء فى الجيش اللى كل الشعب بيدخله أو فى أى داهيه
أو حتى فى الشغل اللى كاسر منخير كل مواطن وعايز يربى العيال
الواحد تعب
بقيت ماشى بلعن كل عبد للمأمور
كل إنسان فى مصر لغى عبوديته لله ونسى إن ربنا هوا العدل والحق وبقى هوا مجرد عبد للمأمور
الكارثة كلها فى المبدأ دا من وجهة نظرى
المهم إن ربنا كرمنى ووصلت لحد ميدان التحرير من خلال المترو
طلعت ومشيت وروحت البنك التانى وحليت المشكلة
وحاولت أرجع من نفس الطريق من الشارع اللى فيه مجلس الشورى والشعب اللى مش ...
وجيت أعدى
بعا بقى هنا كنت خلاص عرفتإن النهاردجه سته إبريل وأنا بكلم الموظفة فى البنك
وإفتكرت ليه كردونات الأمن اللى فى كل حته
وليه عساكر الامن المركزى اللى واقفين فى كل حته
وليه عساكر القوات الخاصة اللى واقفين فى الشوارع الجانبية
وليه الناس اللى لابسين بدل وواقفين يقولوا روح من هنا وروح من هناك
وإتمنعت من إنى أمشى فى الشارع اللى لسه ماشى فيه من دقيقتين
طبعا دى جريمة فى حقى كمواطن والمفروض أروح أرفع قضية
ما أنا لو كنت أعرف إنها هترسى على اللف والبرم دا كله مكنتش هسكت
المهم خلونى أخش من شارع السفارة البريطانية
وفضلت ماشى ماشى ماشى
مكنتش أعرف إن السفارة دى كبيرة بالشكل الرهيب دا
بالمرة ليه سؤال ...
هى انجلترا دى مش كانت محتله مصر فى فترة من الفترات ؟؟؟؟
إزاى بقى نعملها سفارة بالشكل اللى شفته دا
أو حتى نسمح لها بكل دى
ولا وسائل الدفاع والأمن قدامها
تحسسك إنك داخل عالملكة ذات نفسها مش مجرد حته سفارة
طلعت على الكورنيش
ومشيت كتير اوى
ولسه موصلتش الموقف
سألت عسكرى من إياهم وإديته شوية لب
للأسف مكانش كعايه سجاير فى اليوم دا
كنت إديتهاله كإنتقام أو ضرر للحكومة :D
بس نرجع ونقول ملوش ذنب الغلبان
وكمان اللب كان إنتقام أكبر لأنه كان سورى ووحش أوى
المهم
عاندت ولفيت من بين سميراميس وشبرد عشان أشوف الوقفة لشباب سته إبريل والعربيات الحكومية
واللى ببيحصل هناك
وأخيرا إتنكدت وروحت وشفت الفيديوهات عالنت باليل إتنكدت أكتر وأكتر
وإفتكرت شعار تيت راديو وهما بيقولوا إنهم الجالية المصرية فى مصر
دلوقتى بس فهمت معنى الشعار دا
بالرغم من إنى مش بحبهم وبتعارض معاهم فى مواقف كتير خدوها
بس عندهم حق
دى مش مصر المصريين
دى مصر الحكومة
اللى فيها حكومة عايزة تمشينا زى الغنم
وفيها شعب عبد المأمور
وقلة قليلة من اللى بيفكروا ونايمين برده
وكتيررررررررررررر برا بيفكروا وبيخدموا غيرها
إنتهى
------------------

إلغاء الدعم

مش عارف ليه كل ما حد ييجى يتكلم يقولك السكان بتزيد وبتتنيل ولازم نلغى الدعم
دا الصين لغت الدعم إلا عن المولود الأول بس
صراحة لما بسمع الكلام دا ببص عالتلفزيون وأقول كلمة واحدة قبيحة شوية ومينفعش تعرفوها
ليه كل شوية يقارنوا بينا وبين الصين
الصين أسطورة بل معجزة قدرت تستفيد من السكان فى ظل إدارة حكيمة وتوجههم وتبقى دولة عظمى
وكمان مفيش أى وجه مقارنة بينك وبين الصين ؟
ليه تفكر كدا ؟
الصين عدد سكانها تلت سكان العالم
وإنته مجرد نقطة فى بحر
والكارثة إن فى ناس مقتنعين بالحكاية دى وبيقولوا هوا الناس تخلف زى الأرانب والبلد تربى لهم عيالهم
ما هوا لو فى إهتمام بالجودة بجد فى التعليم وفى كل حاجة تانية كان زمانى مبوافقك الرأى
لكن الخدمات زى الزفت من الأساس
يبقى ليه تفكر تلغى الدعم
؟؟؟؟؟؟؟
دا لا مؤاخذه
غبااااااااااااء
دا بدل ما تستفيد من الأيد العاملة الرهيبة وتعمل فرص عمل ومصانع وتحاول تزود إنتاجك عشان حتى تحقق ولو نسبة بسيطة من الإكتفاء الذاتى ...رايح ترمى المشكلة عالزيادة السكانية وكأنها سد الحنك اللى بيتقال عشان الناس تتكتم وكل واحد يحس إن عياله عبء عالبلد

حسبى الله ونعم الوكيل

=========

لما إتكلمت من كام بوست عن إرتفاع أسعار الحشيش الناس إستغربت

اللى يقولى إنته مالك

واللى يقول الواد دا شكله حشاش

واللى يقول أحسن خلى الناس تبطل

أنا مش بتكلم فى إرتفاع السعر وبس

أنا بتكلم فى غلاء الأسعار بشكل عام

بتكلم عن شريحة من المصريين أصبح الحشيش عندهم زى الشاى والسكر وضرورة فى البيت

ولو بطلنا نشوف مشاكلنا ونواجهها

هنبقى زى النعامة اللى بتدفن راسها فى النمل

وهنبقى إمعة بجد

وهننسى إننا بنى آدمين من خلق ربنا اللى كرمنا بالعقل

شاب فقرى

وزير أنتى فيرس

أعجبنى جدا اللى حصل من يومين بالظبط من زيارة مفاجئة لوزير التربية والتعليم ( أحمد زكى بدر )
زمان لما كنا بنسمع إسم زيارة مفاجئة كانت المدرسة بتخطط لها شهرين وتنضف المدرسة ويدهنوها ويبيضوها
دلوقتى ما شاء الله عليه الوزير بينزل فعلا مفاجئة للمدارس
لدرجة إن المدير وصل بعد ما الوزير وصل بنص ساعة بحالها
يا نهار أبيض يا جدعان
أنا الصراحة مصدقتش اللى اتقال ولا اللى اتعمل فى وسائل الإعلام والبرامج الإخبارية
مكنتش مصدق لأنها حاجة لا تصدق ببساطة
وزير التعليم إكتشف إن النجاح لأى مؤسسة بيقوم على أصغر وحدة فيها
وأصغر وحدة فى العملية التعليمية فى مصر
هوا المدرس والتلميذ
المدرس هوا الوحيد اللى يقدر يقوم بالتربية والتعليم للطلبة
يقدر يربيهم ويقدر يعلمهم ويطلع جيل واعى وفاهم يفيد البلد بجد ويرفع من شأنها
أنا سعيد بالحمى اللى أكيد إنتابت مدارس كتير وبقوا مرعوبين من زيارة السيد الوزير
رفد 13 مدرس بعقود ونقل 89 مدرس ونقل إدارة المدرستين بالكامل
شىء لا يصدق
ولكن يستحقوا هذا حقا
المشكلة فى العملية التعليمية
إن القائمين عليها أصبح الإهمال والتسيب والتربح من الوظيفة صفات مميزة لعملهم
وبالتالى أصبح دا العادى بتاعهم
فخلاص
بقى المدرس بيدخل كل همه إزاى يزود مرتبه أضعاف عشان يقدر يعيش حياة كريمة
والطالب بيروح المدرسة عشان الغياب
والأهل بيفكروا إزاى يحوشوا عشان الدروس والواد يروح المدرسة يتعلم إيه مش يهمهم
بقى حتى التعليم عبارة عن حضور وإنصراف
الكلام دا أنا شفته بعينى لما كنت طالب فى مدرسة مصرية
دا خلاصة كل سنين التعليم اللى درستها
الوزير ربنا يكرمه بقيت حاسس إنه زى الأنتى فيرس اللى بيطحن السيستم
ويكشف الأكواد الخبيئة ويطهره
أنا مقتنع بالوزير دا من أول يوم
مش خوف والله من غنى أكتب رأيى فى المدونة
ولكن دى الحقيقة
اللى سمعته إن الوزير دا كان رئيس جامعة عين شمس
وشايف طلبة الجامعات عاملين إزاى
أكيد هيحاول يصلح المراحل اللى خلتهم بالمنظر اللى هما فيه دا
تحياتى للوزير اللى أصاب كل المدارس بحمى الإنضباط شكلا وموضعا
تحياتى لأى أنتى فيرس فى مصر

شاب فقرى

إحساس حب

ظللت أحبها حتى فقدت إحساسى بالأيام بدونها

لم أعد أدرك هل حقا هى الحياة ؟

هل هى حقيقة واقعه فى حياتى ؟

لم أتخيل يوما أن قلبى قد ينبض وأن حياتى قد ترتبط بشخص تبعد بينى وبينه بضعة مئات من الكيلومترات

لم أتخيل بأن قلبى قد يدق لها فى يوم من الأيام

لكنى أدركت من اليوم الأول من الحديث معها بأنها كانت مختلفة

بها شىء يجذبنى

ربما هى كلماتها

ربما هو هدوءها وإدراكها لمعنى الصمت الذى طالما إفتقدته وبحثت عنه بين الناس

لا يعقل أن يكون جنونها وثورتها

ربما هى نظراتها وقت الغضب

حتى فى غضبها تكون أميرة آسرة ساحرة

لا أدرى

ولكننى متأكدا هذه اللحظة بأننى أعشقها

بأنها ذلك النبض الذى يدق فى عروقى

بأنها هى الحياة التى لم أستطع يوما الحصول عليها

(( بحبك ))

أدركت فى تلك اللحظة التى سمعت فيها تلك الكلمة بأن تلك هى ذكرى ميلادى وأول أيام حياتى

لم أعد أرى فى أحلامى سواها

وكأننى قد وقعت معها منذ قالت تلك الكلمة عقدا إحتكاريا لتكون أميرة أحلامى التى لا تتركنى أبدا

ولا تفارق ذاكرتى حتى فى صورتى لبنت الجيران التى أحببتها وأنا طفل صغير

أكاد أقسم الآن بأن هى إبنة الجيران ذات العشر سنوات بضفائرها الذهبية

وتأكدت بأنها هى فتاة الجامعة التى أحببتها ذات الخصلات الحائرة الطائرة

لقد كانت كل أيام حياتى

لا أدرى ما الذى دفعنى إلى الكتابة الآن عن حالتى وهيامى بها إلا حين فكرت فى الحياة بدونها

لا أريد التخيل ولا التفكير حتى فى كيف ستكون حياتى بدونها ؟

فى تلك اللحظة فقط أدركت بأن يجب للحظاتنا أن تخلد

يجب أن يتعلم منها كل العشاق والاحبة

كيف يكون الحب ؟

وكيف يكون العشق ؟

وكيف كانت اجمل فتاة أبدع المولى فى خلقها على مر العصور

يوميات عاشق

شاب فقرى

---

ملحوظة : كل ما كتب لا يعبر عن حالة كاتب هذه السطور بأى حال من الأحوال

وسطى بيوجعنى

فاكرين زمان كان فى أغنية كدا بتيجى فى مسرحية
شوية بنات بيقولوا : وسطى بيوجعنى
وشباب يردوا عليهم : من إيه
ويقولوا تانى : وسطى بيوجعنى
الشباب يردوا : من إيه ؟
يقوم البنات يقولوا : من كتر النوم ليلة إمبارح ... وياللى عالترعة حود عالمالح :D

فاكرين
أنا بقى كمان وسطى بيوجعنى
بس مش من كتر النوم
النوم بقى سلعة غالية لا يمكن الوصول إليها
وعلى رأى المثل : النوم أحلى من اللحمة الضانى
المهم إنى وسطى بيوجعنى
والسبب هوا الأتوبيس
ربنا كرمنى بمشوار كل يومين لمكان
أحلى مواصلة وأسرع مواصلة هى الأتوبيس
طبعا أول يومين كنت بنزل بدرى وألحق الأتوبيس فاضى
وأهيص بقى عالكرسى لوحدى
ولما أخلص أروح للموقف الرئيسى وأخد الأتوبيس من أول الخط فاضى
لحد اللى جرى لى إمبارح
غلطت ونزلت فى رمسيس
:(
وكانت المشكلة
الأول : الطلوع من المترو
كام مطلع من هنا وهناك ووجع دماغ وبلا توشيح ولا خريطة عالجمب للناس الغلابة
ومفيش غير عساكر المرور اللى ميعرفوش أساميهم أساسا
وبعد ما طلعت ربنا كرمنى بإنى طلعت قدام جامع الفتح
ولمن لا يعرف ولمن ليسوا من أهل القاهرة
عندنا فى القاهرة عشان يمنعوا الناس تمشى فى الشارع وتعطل العربيات
بيعملوا سور عالرصيف
أنا طبعا طلعت من سلم المترو لقيت السور اللطيف دا والعساكر ممنوع انك تقف تستنى الاتوبيس غير من ورا السور
طبعا مر من قدامى اربع اتوبيسات بالصلاة عالنبى وأنا واقف زى الباشا بسمع كلام الحكومة وواقف ورا السور
ولا عارف أركب ولا عارف أتشعبط
ولا عارف أعمل أى حاجة
فقط قاعد أشتم عساكر المرور فى سرى وادعى عليهم وعلى اللى جابوهم (( عينوهم يعنى مش خلفوهم ))
المهم قررت انى انط من عالسور
نطيت والحمد لله ووقفت استنى الاتوبيس
إن أتوبيس فيهم يقف ويراعى ضميره فى الناس الغلبانة اللى واقفة فى الشارع دى
أبدااااااااااااااا
فقلت أتمشى
عرفت إن ممنوع تمشى من وسط الشارع ولازم تخش تانى جوا السور
يعنى لو قدامك طريق وعايزو توصل لمكان
فانته لازم تلف حوالين افريقيا
قصدى حوالين السور
نفسى أعرف مين المهندس الغبى اللى عمل الأسوار وبدل ما يعمل جناين عمل أماكن كلها سراميك وقرف
أدعى عليه بإيه
ربنا كرمنى ووصلت لمكان الاتوبيس بيمر فيه
وقفت فى تحفز
لقيت الاتوبيس المقصود
فى وسط الطريق
معدى بسرعة
قررت أعيش دور المواطن المصرى الكحيان الغلبان وأتشعبط
ولأنها أول مرة أتشعبط
فكانت النتيجة السودا
إنى مسكت بإيدى ووقعت عالسلم
الاتوبيس الله يحفظه كان هيجرنى
وعشان كدا وسطى بيوجعنى
من الرغى دا كله بقى نطلع بالتالى

ليه الحكومة بتعاملنا زى البقر وبتعملنا أسوار عشان نقعد نلف حواليها :( على ما نطلع منها ؟؟
ليه ميدان رمسيس واقف فيه عساكر تمنع الناس تمشى فى الشارع ؟
ليه سواقين الاتوبيس معنجهمش ضمير ومش بيقفوا للناس الغلابة ويسيبوهم لإستغلال وخطر الميكروباصات ؟

إنتهى الكلام

شاب فقرى