وسطى بيوجعنى

فاكرين زمان كان فى أغنية كدا بتيجى فى مسرحية
شوية بنات بيقولوا : وسطى بيوجعنى
وشباب يردوا عليهم : من إيه
ويقولوا تانى : وسطى بيوجعنى
الشباب يردوا : من إيه ؟
يقوم البنات يقولوا : من كتر النوم ليلة إمبارح ... وياللى عالترعة حود عالمالح :D

فاكرين
أنا بقى كمان وسطى بيوجعنى
بس مش من كتر النوم
النوم بقى سلعة غالية لا يمكن الوصول إليها
وعلى رأى المثل : النوم أحلى من اللحمة الضانى
المهم إنى وسطى بيوجعنى
والسبب هوا الأتوبيس
ربنا كرمنى بمشوار كل يومين لمكان
أحلى مواصلة وأسرع مواصلة هى الأتوبيس
طبعا أول يومين كنت بنزل بدرى وألحق الأتوبيس فاضى
وأهيص بقى عالكرسى لوحدى
ولما أخلص أروح للموقف الرئيسى وأخد الأتوبيس من أول الخط فاضى
لحد اللى جرى لى إمبارح
غلطت ونزلت فى رمسيس
:(
وكانت المشكلة
الأول : الطلوع من المترو
كام مطلع من هنا وهناك ووجع دماغ وبلا توشيح ولا خريطة عالجمب للناس الغلابة
ومفيش غير عساكر المرور اللى ميعرفوش أساميهم أساسا
وبعد ما طلعت ربنا كرمنى بإنى طلعت قدام جامع الفتح
ولمن لا يعرف ولمن ليسوا من أهل القاهرة
عندنا فى القاهرة عشان يمنعوا الناس تمشى فى الشارع وتعطل العربيات
بيعملوا سور عالرصيف
أنا طبعا طلعت من سلم المترو لقيت السور اللطيف دا والعساكر ممنوع انك تقف تستنى الاتوبيس غير من ورا السور
طبعا مر من قدامى اربع اتوبيسات بالصلاة عالنبى وأنا واقف زى الباشا بسمع كلام الحكومة وواقف ورا السور
ولا عارف أركب ولا عارف أتشعبط
ولا عارف أعمل أى حاجة
فقط قاعد أشتم عساكر المرور فى سرى وادعى عليهم وعلى اللى جابوهم (( عينوهم يعنى مش خلفوهم ))
المهم قررت انى انط من عالسور
نطيت والحمد لله ووقفت استنى الاتوبيس
إن أتوبيس فيهم يقف ويراعى ضميره فى الناس الغلبانة اللى واقفة فى الشارع دى
أبدااااااااااااااا
فقلت أتمشى
عرفت إن ممنوع تمشى من وسط الشارع ولازم تخش تانى جوا السور
يعنى لو قدامك طريق وعايزو توصل لمكان
فانته لازم تلف حوالين افريقيا
قصدى حوالين السور
نفسى أعرف مين المهندس الغبى اللى عمل الأسوار وبدل ما يعمل جناين عمل أماكن كلها سراميك وقرف
أدعى عليه بإيه
ربنا كرمنى ووصلت لمكان الاتوبيس بيمر فيه
وقفت فى تحفز
لقيت الاتوبيس المقصود
فى وسط الطريق
معدى بسرعة
قررت أعيش دور المواطن المصرى الكحيان الغلبان وأتشعبط
ولأنها أول مرة أتشعبط
فكانت النتيجة السودا
إنى مسكت بإيدى ووقعت عالسلم
الاتوبيس الله يحفظه كان هيجرنى
وعشان كدا وسطى بيوجعنى
من الرغى دا كله بقى نطلع بالتالى

ليه الحكومة بتعاملنا زى البقر وبتعملنا أسوار عشان نقعد نلف حواليها :( على ما نطلع منها ؟؟
ليه ميدان رمسيس واقف فيه عساكر تمنع الناس تمشى فى الشارع ؟
ليه سواقين الاتوبيس معنجهمش ضمير ومش بيقفوا للناس الغلابة ويسيبوهم لإستغلال وخطر الميكروباصات ؟

إنتهى الكلام

شاب فقرى

يااااااااااه

السلام عليكم جميعا

ياااااااااااااااااه

بقالى كتير اوى مكتبتش

حاسس إنى عمرى ما مسكت كيبورد وكتبت بوست ونشرته

إحساسى بالتدوين كأنه شىء جديد فى حد ذاته تغيير أحسن

الفترة اللى فاتت الحمد لله كانت فترة ربنا لوحده اللى يعلم بيها

الحمد لله على كل حال جدتى عملت العملية

وطلعت من المستشفى وبقت بخير وتمام التمام

وإن شاء الله ربنا يتم شفاءها على خير والجرح مكان العمليه يخف وتبقى بخير يارب

وللأسف أخت جدتى اللى هى جدتى برده ماتت

الله يرحمها ويسكنها فسيح جناته يارب

ولسه مش قلنا لها عشان مش تتعب أكتر وأكتر

-----

عالصعيد الشخصى

الحمد لله ربنا كرمنى جدا جدا جدا

وفشلت فشل لم أفشل مثله لا من قبل ولا من قبل برده

مش هقول من بعد

ياعالم القدر فيه إيه للواحد

والحمد لله

حققت نجاح فى مجالات تانية بشكل غير مسبوق :D

يعنى ربنا سبحانه وتعالى مش بينسى عبيده

----

من الفترة اللى فاتت خرجت إنسان جديد

لا أنا شاب ولا أنا فقرى ولا أنا ناجح ولا أنا فاشل

ولا أنا اللى بمشى منفض وبسمع راب فى الهيدفون

ولا انا اللى بقضى اليوم كله فى أودتى لوحدى

ولا أنا اللى بسافر وبروح هنا وهناك

ولا أنا الحساس الطيب اللى ممكن أى حاجة بسيطة تجرحه

ولا أنا الإنسان القاسى اللى مش بيهمه حاجة وعمر ما عينه بتدمع

الحمد لله على كل حال

الازمات تصنع الرجال

وأنا لما بمر بفشل أو بمرحلة صعبة

بحاول أخليها على قد ما أقدر تبنى فيه أوى

تبقى دافع قوى لبكره

تبقى دافع قوى إنى أكمل

تبقى نقطة تحول فى حياتى للاحسن

مش هحكى عن الفشل والنجاح

ولكن

هقول إنى يارب راضى

والحمد لله على كل حال

وأى حاجة تحصل

يارب مش هقول غير إنى بحبك

اللهم إرزقنا حبك وحب عمل يقربنا إليك

----

رسائل وملاحظات عالجمب كدا :

-سمسم : مبروك مبروك مبروك مبروك ...آسف لعدم الرد بس الظروف زى ما قريتى فى البوست

ملعبكة تماما ... وبرده هقول مبروك مبروك مبروك مبروك ... مش عارف أقول إيه تانى :)

بس عايز نسخة وهدية كبيرة أوى بالمناسبة الحلوة دا (( أنا بلطجى هدايا ))

كان نفسى أقول يا خسارة بس مش وقته

أحبك فى الله .

- عم فشكول : والله الظروف واضحة وأنا مكنتش عارف أدخل عند أى حد تقريبا كنت مقاطع التدوين لإهتمامى بحاجات تانية فى الحياة

- كل اللى سأل عليه ودعى لجدتى ... ربنا يرضى عليكم وشكرا جدا ليكم :)

-شكرا ل (( سارة )) اللى نشرت بوست من المدونة فى مجلة بحلقه :)... شكرا يا سارة ويارب توصلينى للعالمية :D ودا رابط البوست اللى إتنشر فى المجلة هناااااااااا رغم إنها أخدت بوست قديم من البوستات الفلسفية المعقدة اللى مكانش حد بيفهمها بس إشطة نو بروبلم

- فى سبب منعنى من الكتابة إن كل اللى بكتبه هنا أو أى حد بيكتبه هيتخلد أو يمكن فى ناس تستخدمه فى حياتها كمبدأ أو دافع أو فكرة تحتفظ بيها وتعلمها لأولادها مين عارف :)

يعنى كل كتاباتك هتتحفظ

زى ما الفراعنه كانوا بيكتبوا ومش داريين إننا ممكن نقرا وتوصل لحد كام ألف سنة

فإنا هنا بكتب وكنت لازم أخد وقت أنا بكتب ليه ولمين وعشان إيه ؟؟؟

عشان مش ييجى وقت وأبطل أكتب لأن غايتى من الكتابة خلاص إنتهت

لكن أنا مكمل برغم كل شىء :) وهفضل أفكر فى كل حرف قبل ما اكتبه

لأنى بجد إستغربت من الناس الكتير اللى بتقولى إنها بتقرا المدونة سواء عالفيس أو فى عالميل

ولا أطلب منهم سوى إنهم يقولوا رأيهم فى كل حاجة لأنى فاتح الرد للغير معرف عشان خاطرهم بس :)

----
إنتهى البيان الفقرى الأول

كريم الفقرى

الكتاب المفتوح

الآن أتخذ قرارا لا رجعة فيه
سأغلق صفحات كتابى
ستزداد الطلاسم أمامك
وتكسر الألغاز والتصرفات المبهمة
لن تستطيعى فهمى بعد الآن
لقد كنت جوارك وبين أحضانك كتابا مفتوحا
حاولت كثيرا أن أقترب منك
أن أشعرك بقيمة كيف أن اكون كتابا مفتوحا معك
أن أفتح لكى أبواب مدينتى
أن أزيل كل الحواجز من بيننا
أن أظهر لكى عقدى وطيشى وجنونى بعيدا لترين من أنا
ولكن اليوم ينتهى كل شىء
تعودين إلى نقطة البداية
وكما كنت أقول للناس دوما حين يخطئون (( نقطة ومن أول السطر ))
سأغلق صفحات كتابى
فلتذوقين بعضا مما أذقنتينى
فقلبى لا يعصى لى أمرا
ومشاعرى تتنحى جانبا بجوار صوت عقلى
وليكن فى علمك أنى حين اغلق صفحات كتابى فى وجهك يوما
لن تقتربى منى بعد اليوم
سأظل شغلك الشاغل
وحبك الأول و الأبدى الذى لا ينسى
سأظل نجما تبحثين عنه كل ليلة
حتى تفقدى عقلك
فتجديه يظهر لحظات فى أعالى السماء
سأزور أحلامك دوما
لأظل دوما لغزا
لتظلين دوما تندمين على تلك اللحظة
التى تركتينى فيها أغلق صفحات كتابى فى وجهك

تحياتى
شاب فقرى

خط أحمر

يجب عليك أحيانا أن تضع خطا أحمر .. لتشعر من ليس قريبا منك ومن كان قريبا منك فيما مضى بأنه لاشىء فى حياتك
وأنه برغم أنك محوت كل الخطوط والحواجز التى بينك وبينه فى أحد الأيام ...فإن هذا الخط الأحمر سيبقى موجودا على حدود مدينتك ... ويبقى هو خارجها لا يستطيع أن يطأها ... يجب أن يشعر بالندم لأنه طرد منها ...لأنه لم يقدر كم قد إقترب من أسرارك ...
ولم يدرى كم كان قريبا لك ..
لأنه لم يدرك أنه كان أملك الأخير فى تحقيق ما تتمناه
كان الأمل الأخير فى حل مشاكلك ومشاكلكما معا
كان الأمل الأخير فى رسم مستقبل سعيد وأسرة سعيدة
يجب أن يتذكر أنه حتى وإن كان الأمل الأخير لك
و أن الله لن يتركك وسيخلق لك أملا أخيرا آخرا لتعيش له
.يجب أن يتذكر فقط كلمة واحدة حين تدور بخلده ويتذكر أيامكما ..

( خط أحمر )

شاب فقرى

خبر عاجل : إرتفاع أسعار الحشيش

يا مهيصنا يا مشخلعنا

ليه دايما غاوى تفقعنا

يوم ما تزيد وتقرر تغلى

زيد خمسايه ... مش خمسين :@

راكب ميكروباص إمبارح لقيت مواطن بيسب ويلعن فى العيشة واللى عايشينها

قلت له مالك يابنى آدم ... مالك ؟

قالى الحشيش غلى يا فقرى ... يخرب بيت فقرك ... هشرب إيه أنا دلوقتى

صراحة ملقتش رد أرد بيه عليه

غير إنى تعايشت فى الموقف وحسيت بالفقر اللى هوا واقع فيه وقلت الكلام اللى فوق دا

عزيزى المواطن : أنتخ جمبى

وبقيت بسأل نفسى

للدرجة دى وصل الغلاء ؟؟؟

بقى صباع الحشيش بميت جنيه

وأنا أقول ليه تجار المخدرات مليونيرات ؟؟؟؟

وليه ياترى الناس ماشية تكلم نفسها ؟؟؟

أتارررررررررررررررررررى

أنا مش بشرب .... بس مستغرب أوى

حتى الكيف غلى ؟

طيب ياترى الناس هتعمل إيه ؟؟؟؟؟؟؟

هتطلع من هدومها ؟؟؟

ولو طلعوا من هدومهم ؟؟

ياترى هدومهم مش هتتسرق وهيلاقوا حاجة تانية يلبسوها ؟؟؟

ومازال السؤال يطرح نفسه ؟؟

خالص التحية

محلل إقتصادى

شاب فقرى

ملحوظة : كل شىء بكتبه بيكون ليه معنى

يعنى بوست زى دا مش هدفه السخرية والتريقة

على راي المثل ... هم يبكى وهم يضحك

قصدى ان كل حاجة كل حاجة حتى الكيف

لان الحشيش دا بقى فى ثقافة بعض الناس زى الزيت والسكر والشاى فى البيت

الناس بتشربه وكأنها بتبلبع ملبس بالظبط

الموضوع يبكى

ولا يدعو للضحك

ملحوظة تانية :مش هقدر ارد عالتعليقات لان جدتى احتمال تعمل عملية بكره ولازم اكون جمبها

ما بصدق الاقى اى وقت ادخل فيه المدونة

دعواتكم

خالص التحية والاحترام والتقدير

شاب فقرى