هرتلة طازجة و بنار الفرن

عزيزى الوقت ....
مش يفرق معايه فاضل قد إيه؟؟
المهم فى وقت بسيط هقدر أعمل إيه ..
او المهم اقدر أنجز إيه فى الوقت اللى باقى
دايما فى صوت بيوشوشنى فجاة يقولى باقى من الزمن كذا
لما بكون معاها وخايف الوقت يمر لا تمشى ونسيب بعض
لما بكون بكلمها وخايف متفهمش كلامى وتمشى وانا بفكر هكمل كلامى امتى
لما بكون حاسس ان فاضل شوية وقت على مناسبة مهمة فى حياتى
لما يكون فى شوية ايام قبل الامتحانات
لما يكون فى شوية وقت محددين عشان تخلص الكورس فى وقت قياسى
لما يكون فى شوية وقت صغيرين أوى فاضلين عالعمر اللى كنت بتتمنى تعيشه
يعنى مثلا
بعد تفكير عميق
فى فترة من الفترات قررت ان السن المناسب اللى الواحد ينتهى حياته فيه
هوا سن ال 35
اهوه يكون شاف الشباب كله وقدر يتجوز ويفرح بالعيال ويربيهم ويموت مستريح بقى
اه
اول ما تلاقى انك بدات تحب الحياة والدنيا تبتسم ليك وانك فى حاجة بتخاف عليها فى الدنيا
ساعتها لازم تستنى الموت وتعمل حسابه
لانه جاى جاى
ومينفعش حد يقول بعد الشر
المهم ان فاضل كام سنة على ما اوصل سن ال 35
ولا اتنيلت اتجوزت ولا فرحت بالعيال ولا اتفرمت فى الحياة
بس النهارده مش عارف ليه حسيت انه يوم تاريخى
خرجت من البيت ونزلت
وقررت اروح اجيب السيديهات الاصلية
اول مرة ادفع فلوس فى سوفت وير من يوم ما قعدت عالنت
يمكن كنت بدفع كل شهر عشان خاطر سوفت وير معين للسيرفر
بس اقصد انى بدفع حاليا عشان سوفت وير لجهازى
والكارثة رايح اشترى ويندوز
طيب على ايه ياعم
ايه النيلة دى
هتعمل بيه ايه وهوا كله عيوب ومشاكل
بس قلت نو بروبلم
اشتريت كام سوفت وير جامدين جدا من انتاج ميكروسوفت ولسه مفعلتش اى حاجة منهم ولا عملت لوج ان عالموقع
بس مبسوط
اهوه شوية حاجات تنفع برده لما شهر واحد يفوت
مكنتش متخيل ان دا هيبقى أبطأ شهر فى حياتى
حاسس إنه بطيييييييييييييييييء أوى أوى أوى
بس المهم انى حاسس بالشهر دا
ودى فى حد ذاتها حاجة كويسة
ياتري شهر واحد بيمثل لى إيه ؟؟؟
اكيد طبعا بدايه السنة
طيب ما هوا كدا عند كل الناس
لاء عندى انا بدايه سنة جديدة فى حياتى
لانى من مواليد شهر واحد يوم اربعة وعشرين فى سنة من السنين
والسنة دى شهر واحد جاى عليه بمليون حاجة
مش هقول ولا حاجة منهم
لانهم كتير اوى اوى اوى
اوى بجد مش مبالغه
ياترى هتعمل ايه فى 2010
او ايه اول امنيه ليك
انا قلت امنيتى من كام يوم برغم انها مستحيلة
وكان الرد طبعا انى مجنون
الامنية كانت عالصعيد الشخصى
بس ربنا قادر على كل شىء
المهم انى السنة دى
مش هعرف احتفل بعيد ميلادى دا كما ينبغى
انا اساسا مش بحتفل بيه
بس بستقبل هدايا والحمد لله عمرى ما جت لى هدية
غير صورتين وفيديو وشوكلاته الاسبوع اللى فات
بس الحمد لله
كان ليهم مفعول السحر وخصوصا الشوكلاته
طول عمرى كنت بستغرب ليه الناس بتحب الشوكلاته
يمكن عشان طعمها حلو
انا عن نفسى باكلها بس مش بعشقها
بس بدات احبها وافهم فى ايه
صحيح
انا نسيت اقول انى خرجت النهارده
مش عارف فى ايه
البلد بقت زحمة اوى اوى اوى بشكل يغيظ
والحمد لله النهارده مشميتش ريحة السجاير وصدرى بخير
لكن رجعت لى نوبات الصداع من جديد
زمان اما كان بييجى لى الصداع كنت بعتبره امر مسلم بيه وعادى وعشت بيه سنتين
لحد اما عملت عمليه قضت عالصداع
او على السبب
انما دلوقتى مفيش سبب غير انى عايز اخف من الصداع
مينفعش ارجع اقضى اوقاتى الحلوة وانا مصدع
ربنا يستر
انا عن نفسى
مش عارف
بس نو بروبلم فليستمر الصداع
بحس ان دماغى هتتفرتك
وانى خلاص الجمجمة هتنفجر من كتر الوجع
بس ربنا رحيم بينا
المشكلة انها نوبات ونبضات
بتعلى وبتقل وبتخف شوية وترجع تانى
فليكن الاختيار الاخير انى اروح للدكتور
ان شاء الله فى شهر تلاتة
اكون فضيت وروقت وخلصت اللى ورايه وظبطت الشركة
اه
لان مينفعش ابقى شغال وكل شوية اروح للدكتور
تبقى مصيبة
المهم انى خرجت ورجعت وانا على يقين
على يقين بشىء واحد بس
انى لازم ارجع افكر فى موضوع الشركة بتاعتى تانى
وانى اكمل فيها
الخروج بدون عربية وبالذات فى القاهرة يعتبر انتحار رسمى
والله انا بفكر انقل واعيش فى اسكندرية
اهوه مش زحمة اوى وابقى جمب البحر واعصابى تروق كدا
بصراحة مشتاق ليها اوى
اسكندرية طبعا
محدش يفهمنى غلط
بس كويس ان البوم اليسا نزل الواحد عايز يقضى الشهر دا على صوت حلو وكلمات جميلة واحساس عالى
ياااااااااااااااااااااااااااااااااااااااااه
فينك يا منير
الحفلة اتلغت ومكنتش هعرف احضرها لانى كنت فى سفر
بس مش مهم
انا تعبان دلوقتى
واليوم شكله خلص
او لسه هيبتدى
الايام الجايه هتبقى فرم
والسبب واضح للجميع
على فكرة
انا لفيت على مدونات الناس اللى بطلت ادخل لهم
لقيت ان البعض يائس وخايف من الحياة ... ومعلقتش
ولقيت ان البعض تعرض للقهر وقفل المدونة .... معرفتش اعلق طبعا ومشيت وانا بقول منهم لله
ولقيت ان البعض سافر بلاد الواق الواق عشان يشتغل ويلم قرشين ويعرف يتجوز ... سيبت تعليقى
ولقيت ان البعض مريض ... ربنا هوا الشافى ... علقت طبعا
ولقيت ان البعض فى امتحانات .... ربنا مع كل ابناءنا الطلبة والطالبات :D
ولقيت دلوقتى انى عندى صداع ويومى خلص
هقوم اعمل كوباية شاى وافتح فيلم رعب حقيقى
مكتوب عالغلاق ... لا تشاهده بمفردك
الفيلم لمن لا يعرفه paranormal activity
لو يا عادل قريت البوست دا ابقى الله يكرمك شوفه
هيعجبك اوى لانه حقيقى
...
البوست طويل ويتوه ونطلع منه بكام حاجة :
- عندى صداع رهيب هيفرتك دماغى
- جبت ويندوز اصلى وشوية برامج حلوين من ميكروزفت :D
-هقوم اعمل شاى
- مش بعرف ارد عالتعليقات عشان مش فى وقت لان الشهر دا مزحوم بغباء
- انى بقيت مستنى الموت لانى بحب الحياة
- ان اللى يعرف الفقرى ويقرا البوستات بتاعته ... يستاهل اللى يجرى له :D

شاب فقرقر فقرى :)

إنتهى هذا الزمان

سيدتى الجميلة

مولاتى

عشيقتى

حبيبتى

كل ما حلمت به يوما

وداع

فليكن اليوم يوم وداعنا

يوم ما ترحلين

وتكفين عن التفكير

وتغمضى عيناك

وتنسين من أنا

وأن تعامليننى مثلهم

أن تنسى عشقى لك

حبى لك

أحلامى معك

لحظات عشقنا

تنسين كيف أحببتك

تنسين كيف أرعاك

فلا أطلب منك سوى الرحيل

حتى لو كان قلبى معك

ولو كانت روحى بين يديك

فلتهلك روحى

وليدفن قلبى بداخلك

ولترحلين

فما عاد لقدميك أن تطأ مدنى

أن تستيقظين تحت دفء شمسى

وتعيشين بين أنوار روحى

وتنامين بين أحضانى

إنتهى هذا الزمان

كف قلبى عن العشق والهيام

رحلت أشواقى

طارت أوراقى

وتكسرت أقلامى

لم يبقى سوى فكرة

لم تعودى تريدين فهمها

أو حتى فهم حبيبك

فلترحلى رحمك الله

أحلام ضائعة

شاب فقرى

رياح الشك والحرمان

دعنى ...

إسقنى يا صديقى الخمر وإشرب معى

لعلها آخر ليالينا

ليس معنا اليوم راع ولا كلب ليحمينا

ولا حب يرعانا ويقوينا

لم تعد ذنوبنا فقط تغطينا

صارت كجبال فوقنا

وقعنا فى أخطاء الأولين

والسابقين السابقين

دعنى أثمل حتى أنسى من أنا

حتى أمحو من بين أفكارى الندم والعار

دعنى اخطو خطوة نحو الشيطان

دعنى يا صديقى

فليس هناك أحد ليحمينا من الكبائر

ولا حتى من صغائر الصغائر

فلتشرب معى

وتسقنى من الكأس

وتزرع فى طيات نفسى بذور اليأس

وتسقى بخمرك الشك والحرمان

دعها تصبح نارا لم ير قبلها الزمان

إشرب معى ... فما لنا اليوم غير كأس

دعنى أنسى مولاتى

وحبيبة أحلامى

فاليوم أمحو من العمر لحظات

وأزرع مكانها خمرا

نشرب منه أياما ودهور

وحتى نلقى خالقنا

أمازال هناك من يسمعنا

أم أن نداؤنا حجبته السماء

وغطته رياح الشك والحرمان ؟؟

وكيف يرد من عليه تنادى

إذا كنت مخمورا

وواقعا فى الضلال

فلتقطف ثمرة يـأسك

ولتثمل عمرا

فليس لدينا يا صديقى اليوم

سوى يأس مقيم

...

التائهون
شاب فقرى

عودة شاب فقرى

السلام عليكم
إزيكم يا مدونين
يا أخوة الكفاح
إزيكم ويارب سنة سعيدة عليكم كلكم يارب
ويارب يسعد أيامكم ويهنيكم ويرضيكم ويوصلكم لاحلامكم الجميلة ويهديكم للخير يارب
كنت مختفى الفترة اللى فاتت
بالظبط من يوم ما قالوا لقاء المدونين يوم الجمعة وانا مختفى
من الجمعة اللى فاتت لحد النهارده
طبعا بقى كل واحد تخيل حاجة شكل
فى اللى قال إن الفقرى خاف ان الناس تعرفه وراح للمطاريد فى الجبل
وفى اللى قال ان الفقري دخل السجن عشان هوا فقرى وبدون تهمة ومؤبد كمان
وفى اللى قال ان الفقرى دخل مستشفى المجانين لانهم ملقوش فقرى غيره فى البلد دى يحبسوه هناك

بس يا جماعة انا كنت من يوم الجمعة الساعة تسعة بليل كنت فى الجنة
طبعا يوم الجمعة دا كان موسم الدوران حول أفريقيا الشهير بتاعى
لفيت مليون مكان وسافرت أكتر من مرة
بس الحمد لله فى الآخر وصلت الجنة
وقعدت هناك أسبوع
طبعا الأسبوع دا مينفعش أحكى منه أى حاجة غير إحساس الإنبساط والإنشكاح والسعادة والخناق :P
اصل انا اتخانقت فيهم وعملت كام مشكلة حلوين
والحمد لله كلها كانت بتتحل بسرعة
قبل البلاطة وبعد البلاطة :D كنا بنحل كل حاجة
انا ملقتش صورة تعبر عن حالتى قبل وبعد الأسبوع غير دى
اللى قبل هوا الجمب اليمين
واللى بعد الاسبوع هوا الصورة اللى عالشمال
ملاحظة : الاتنين شخص واحد
مش هحاول أشرح... مش مهم تتفهم

بعد طول الغياب بقى عايز أوجه كلمة كدا :

إلى الناس اللى سألت عليه :
بجد أنا مبسوط بسؤالكم وسعيد جدا جدا جدا بالتعليقات دى
سواء فى المدونة او فى الفيس بوك :)
بجد انا بحترمكم جميعا ويشرفنى تعليقاتكم

إلى أختى الطيبة بنت الحلال (( حدوتة )) اللى سيطتنى لما سافرت وقالت إنها أختى ونشرت اللينك :
مسيرنا نتحاسب :D

إلى اى حد شفته الأسبوع اللى فات وأصبح جزء من حياتى :
بحبكم كلكم كدا على بعضكم :) وبلا استثناء
بحبكم نفر نفر بجد وصحيح صدق اللى قال

(( الأحلام ممكن تتحقق ))

إلى ال(( غير معرف )) فى بوست إلى كل مدونى الأرض :
أرجو الإلتزام بأدب الحوار واللى يكتب تعليق يكون قد اللى كتبه وينسب التعليق لشخصيته الكريمة وبلاش إتهامات وكلام مش محترم لانى والحمد لله عارف نفسى واكيد اللى بيعلق دا ميعرفنيش

إلى (( غير معرف )) اللى قالت انها تعرفنى وبتتصل وانا بقولها مش انا :
ياريت متجيش هنا تانى ولا تعلقى بالرغم من انى شاكك انى اعرف الشخصية دى
وحلمت انى شفتها
بس واثق انها حد غلطان ومش يعرفنى
لانى عمرى ما طلبت انى اقرب من حد نهائى
ولا اديت لحد رقم موبايلى حتى
بس حلمت بشخصية تانية مش مشكلة

بالمناسبة انا منعت الغير معرف من التعليق وحتى إشعار آخر

عاد شاب فقرى من جديد
سنستمر وبلا نهاية بعون الله
كل سنة وانتم بالف هنا وخير وسعادة
انتهى الكلام
شاب فقرى

عذرا ... فهنا أصنع التاريخ

السلام عليكم ورحمة الله وبركاته
لاحظت كتير إن كل أما مدون أو غير مدون يتكلم عن مصر أو عن وطنه بيقول مساوىء كتير أوى وبيلبس النضارة السودا ويحاول يقنع نفسه بكافة الأشكال إن الحكومة بنت تيت وإن البلد دى عايزة الحرق عشان تنضف وإن فى أمل وضى بعيد أوى فى تيار ناشىء
صراحة وعن نفسى فأنا زهقت من كتر الحركات وصباح الإشتغالات والحاجات اللى بتطلع بدون إذن ومش هقول زى إيه ولكن ....
الأول قبل ما نتكلم لازم نسأل نفسنا سؤال واحد بس...
إحنا مين ؟؟؟
لازم كل واحد يعرف هوا مين بالظبط
مش بقصد الإسم والعنوان
ولا بقصد المكانة السياسية والإجتماعية والنفوذ والسلطة
أنا مين فى التاريخ ...
هسألكم سؤال هيوضح رأيى
ياترى حد فيكم يعرف ناصر ؟؟؟
ناصر دا عامل فى ورشة خراطة
متزوج ويعول طفلين أو تلاتة مش عارف بالظبط والراجل الطيب دا لما ورشته بطلت تشتغل وييجى لها شغل قرر إنه
يكرس حياته ومجهوده لهدف سامى جدا جدا جدا .... إنه يمسح العربيات فى الشارع
عايز أعرف مين الراجل دا بقى وإيه موقع إعرابه فى التاريخ ؟؟؟
سيبوكوا من إن دا رمز للمواطن المكافح الغلبان وإنه راجل مظلوم اجتماعيا وإنه الفقر اللى أجبره على كدا وإنه ياعينى

وياليلى وإنه يمثل الهزيمة اللى مصر فيها والحاجات الطين دى كلها
الراجل دا جاى الدنيا يعمل إيه ؟؟؟
إيه موقع إعرابه من التاريخ ؟؟؟
عمل إيه يفيد بيه نفسه ووطنه ؟؟؟؟
حقق إيه يقدر يقول فى يوم من الأيام أنا بحب بلدى وحققت ؟؟؟
ولا حاجة
هسمع واحد بيقولى بيصلى ويصوم وبيعبد ربنا ودا الهدف من الحياة وهوا العبادة وشغال صنايعى وبيعمر الأرض
هقول طيب حلو جدا
معنى كدا إن كل واحد فينا يشوف حاجة يعملها وياكل منها عيش ولا حتى جبنه ويكمل فيها ويتجوز ويجيب عيلين ويموت
أنا فى مرة من المرات قريت عن النمل
إنه النمل يقدر يشيل كرسى
تخيلوا
زى ما بيشيل صرصار ميت بالظبط ويوديه لحد الجحر بتاعه
أهوه لو كل نمله فكرت فى هى هتشيل ليه وتروح تتجوز نملة تانية حلوة وبنت حلال وبتكسب وبتاكل من عرق جبينها
فهما هيموتوا قريب أوى
أقصد إن فكرة الإتحاد لازم تكون موجودة فى العمل
لازم أكون ماشى فى منظومة شاملة ومتكاملة
لازم يكون ليه هدف
نرجع للسؤال الملح .... إحنا مين ؟؟؟
إحنا مدونين
طيب ماشى أهلا وسهلا
فى فترة من فترات الشعر العربى كانت فى العصر العباسى تقريبا
كان كل اما شاعر ييجى يكتب حاجة بقى بيستخدم ألفاظ زائفة و متكلفة أوى او بيكتر من المحسنات فى الشعر بدون داعى
وبيتكلم فى موضعات تافهة جدا فقد تجد هناك شاعر قاعد وتاعب أعصابه وبيوصف فى فرخة أو بيوصف فى سكينه وقد
إيه هى حامية وغدارة وشرانيه وبتقطع
نرجع للسؤال تانى ....
إنته مين ؟؟؟
إيه موقعك فى التاريخ ؟؟؟
هل فى فرق بين وبين شعراء العصر العباسى اللى بهدلوا الشعر وفشلوا فيه وكانوا بيتكلموا فى مواضيع سطحية وبينك؟
إنته كنت مدون وكان معاك القدرة عالكلام والتأريخ...ياترى هتكتب إيه فى التاريخ ؟؟؟
يوم ما تقابل ربنا هتقوله يارب أنا كنت مدون ومكنتش بفيد حد ولا بهتم بأمر أمتى ولا المجتمع اللى عايش فيه وكنت لابس نضارة سودا وبلعن أبو بلدى وبلعن الأخلاق الوحشة ؟؟؟
هتحاول تغير إيه وتوصل لحد فين ؟؟؟؟
بتعمل إيه لأمتك ولبلدك وللمنظومة اللى إنته عايش فيها ؟؟؟؟
ياترى لما يمر الزمان وإنته تموت وناس تدخل مدونتك تقرا ...هتقول إيه ؟؟؟؟
هل هتدعى لك على الإفادة ولا هتدعى عليك ؟؟؟
هل الناس لما تقرا مدونتك هتحب بلدها ؟؟؟ وهل الناس دى هتحب أمتها وتدافع عن قضاياها ؟؟؟
هل إنته زى شعراء العصر العباسى ؟؟؟
هل أنت قدرت تغير حاجة وتقول رأى صادق وصريح وتتحرك ولو حتى تنمى نفسك عشان البلد دى تنمو ؟؟؟ والأمة دى
تعلى كمان وكمان ؟؟؟
هل نقلت التاريخ بصدق وإتكلمت بحيادية وناقشت بموضوعية وساندت قضايا خير تستحق المساندة ؟؟؟
طيب
كمان خمسين سنة متخيل نفسك حققت إيه ؟؟؟
عملت إيه ؟؟؟
بلاش خمسين سنة
خليهم عشر سنين ....
عملت إيه بقى ؟
راجع آخر عشر سنين فى حياتك
شوف عملت إيه ...
شوف كل لحظة فى عمرك صرفتها وقضيتها فى إيه ؟؟؟
حاول بعد ما تقرى تسأل نفسك سؤال واحد

أنا مين ؟؟؟؟

و لو لقيت رد للسؤال

و لو لقيت إنك تقدر تفيد نفسك وأمتك ووطنك
يبقى ساعتها إرفع رأسك بكل فخر وإبدأ إخطو خطوة نحو هدفك ونحو حلمك
لحد كدا إنتهى الكلام ....
عن إذنكم مشغول
عذرا .... فهنا أصنع و أكتب التاريخ لأحفادى

شاب فقرى

ملحوظة .. حاولت أوضح كويس للجميع فكرة يارب تكون وصلت وهوا إن كلامك اللى بتكتبه فأنته تعتبر مؤرخ وإن كنت هاوى فأنته مؤوخ ياريتت تأخد بالك من اللى بتكتبه عن بلدك ونفسك وعن قوتك وضعفك وعن أحلامك وحياتك
حاول توجد لنفسك مكان فى عالم لا يوجد فيه أماكن للضعفاء والتائهين .
وذكرت مثال النمل للتوضيح إن دا نمل... فما بالك بنفسك كإنسان ومدون وسلاحك هى كلمتك ؟؟؟
الدوافع لكتابة البوست دا كتيرأوى
لكن أهمهم بالتأكيد هوا إنى شايف اليهود بيحاولوا يغيروا التاريخ وبيدخلوا نفسهم فى كل حادثة تاريخية أيا كانت ومهما كانت تافهة أو خطيرة وبيحاولوا يعملوا لنفسهم تاريخ وبيلعبوا فى كل الحوادث براحتهم وبمزاجهم بيكتبوا اللى يريح أعصابهم وبيكدبوا الكدبة ويصدقوها ويدافعوا عنها .