إحذر مما تتمناه

And this is real talk
I feel like the Incredible Hulk
My back has been broke, and I can still walk


So be careful what you wish for
'Cause you just might get it
And if you get it then you just might not know
What to do wit' it, 'cause it might just
Come back on you ten-fold

دى أغنيه ل EMINEM
إسمها careful what you wish for
إحذر مما تتمناه

أنا خلاص تعبت جدا
الكحه والدم مش بيبطلوا
خلاص قررت أخرج وأروح لدكتور
هقوم أفتح دليل الأطباء اللى عندى بتاع الوالد الله يرحمه
بصعوبة هحاول ألاقى إستشارى أمراض صدرية فى القاهرة
وهروح له
هروح لوحدى لأنى مش عايز حد معايه وبكره يكون حد معايه
يمكن حاجة مؤلمة فى المعنى ولكنها بتريحنى وفى نفس الوقت بتتعبنى
بكون بتمنى حد ييجى يغلس عليه ويقولى
(( إنته عبيط يابنى أنا جاى معاك ياض إنته ))
لكنى معرفش الضعف ومعنديش أصدقاء ومش هطيق أمشى مع حد من البيت هنا
بدون تطويل
إحساسى زى ما كتبت فوق
And this is real talk
I feel like the Incredible Hulk
My back has been broke, and I can still walk
أنا قايم ألبس وخارج
لا أسألكم شيئا

شاب فقرى

يشرفنى لو بتفكر تعرفنى

فى ناس كتير فاكرة أن التاج هوا مشرط الجراح اللى هيشرح المدون ويقول هوا مين ويفك الطلاسم كلها ولكن من وجهة نظرى مع إحترامى ..فأنا مش كدا ومتاكد من دا لأن أفكارى وشخصيتى بتظهر فى البوستات وكل كلمة بكتبها هنا أو هناك أو فى أى مكان ولو حتى فى المسنجر أو الفيس بوك أو حتى فى ردى عالتليفون ,,, فى ناس كتير لما بتكلمنى بتقولى إنته بتفكر كتير أوى قبل ما ترد يعنى مش بتجعجع وخلاص أو تتهور فى الرد ودا شىء طبيعى فى شخصيتى ومشكلتى هى إنى بكون سعيد لما بكون لوحدى وبفكر ومبحبش أجرح أى حد بكلمه إلا لو كان قصد يجرحنى بكلامه ,,,, و يمكن جت عليه فترة كان معايه صحاب كتير قوى وكلهم يعتبروا الأنتيم بتاعى ولكن خلاص الوقت دا فات وحتى الأن لم يعد لى أصدقاء سواكم ولهذا فإن كان التاج هيسعدكم وهيساعدكم فى التعرف علي كريم ( شاب فقرى ) فأنا موافق وسأرد بكل سعادة ورضا
همسك الميكروفون بهدوء وإبتسامة سعيدة :)
لأنه خلاص
لازم أرد
نبتدى بسم الله بالتاجين بتوع شيما
***


اسمك؟


شاب فقرى / كريم

والناس أحيانا بتقول الجنرال لأنى شخصية قوية بتعرف تتحكم فى الأخرين بدون أى ضغوط وبخيوط زى عرايس المسرح بالظبط


اسم مدونتك؟


يوميات شاب فقرى



مجال دراستك؟


كلية التجارة وإدارة الأعمال جامعة القاهرة


RHCE = RedHat Certified Engineer

يعنى دراسة فى اللينوكس والسيستم أدمن عشان أقدر أشتغل مهندس it

وكمان شغال فى النت بعمل مواقع ودعم فنى للمواقع وحماية وبعمل شغل سيكيورتى للسيرفرات وبحجز سيرفرات وعندى شركة زوغيرة كدا

هل فكرت في اغلاق مدونتك؟ والسبب؟


فكرت والسبق السابق كان :

إن الناس تعرفنى فعلا وتحدد كل حاجة من خلال معلوماتها عنى مش من خلال أفكارى

والسبب الحالى :

لو توجه تفكيرى وفلسفتى للأفكار الإلحادية وبقيت بضيع الناس وساعتها مستحيل أستمر فى المدونة

ايه رد فعلك لو حد قل ادبه عليك في المدونه؟


ماشى بمنطق (( إتفو على أم رأيك اللى هيخليك تشتمنى ))

ممكن أرد عليه وأحرجه أو أنفض له وكأنه سيس ومقالش حاجة

أسوا مدونه دخلتها؟

مجموعة مدونات كتيرررررررررر

هجص وهلث ودماغ فاضية ورومانسية تافهة بلا هدف

ناس بتعشق الشات وداخله منه للتدوين ومش فاهمين معنى التدوين حتى
وممكن تعلق عندك بإسمها وبعدين تخش تشتمك بغير معرف بعلا إسلوب قذر

هيحصل ايه لايميلك بعد ماتموت؟

عادى مش هفتحه تانى أكيد


اديت الباسورد لحد قبل كده؟


طبعا لاء :)
بس كنت ناوى طبعا أديها لحد بقدره فى عالم التدوين

السفر بالنسبه لك؟

بعشق السفر والترحال وممكن أسافر مكان معرفش فيه أى حد ولا حتى فيه أى شارع اعرفه وألف وأتوه هناك

المود بتاعك ايه؟

فقرى دايما

وحاليا مريض جدا جدا جدا

بتعمل ايه وقت فراغك؟

الانترنت وبعدين شرب الشاى فى البلكونة والتأمل فى ربنا والتفكير فى خلق الله


الاكلات المفضله؟

الفاصوليا الخصرا والرز وجمبهم حته فرخة أو شوية لحمة حلوين


الصفات التي اخدتها عن والدك؟

القوة الرهيبة

الشجاعة

القدرة عالتصرف فى أحلك المواقف والظروف

التفكير بعقلانية

الإبتكار والإبداع


الصفات التي اخدتها عن والدتك؟

الطيبة

الحنان


اكتر 6 حاجات بتحبهم؟


سلمى بنت بنت خالتى بعشقها

أختى

أمى

أخويا

البيت الجديد اللى بنيته وطلع عينى فيه

دراستى

شغلى عالنت

الحقيقة والواقع والصراحة


اكتر 6 حاجات بتكرهم؟


الكدب أساسى واللى بيكدب ولو مرة واحدة بيسقط من نظرى وبطرده من حياتى تماما

الخيابه والخيانة

الفشل

المعيلة

البنات السيس والتفاهة

الناس اللى تفكيرها غلط


شخصيتك نوعها ايه؟

قوية إلى حد لايمكن تخيله

بس مليانة تناقضات وصباح الحاجات اللى ملهاش علاقة ببعض


لماذا دخلت عالم التدوين من الاساس؟


من تلات سنين تقريا كنت داخل أكتب وأتكلم عن حياتى

من مدة لما فتحت يوميات شاب فقرى كنت عايز بس أقرب من حد بيفكر ويكون ليه ناس بتفهم وبتحكى وبتعبر عن اللى جواها بدون قيود وبتفهم بعضها بدون حدود


اهميه التعليقات بالنسبه لك؟


مهمة جدا بس مش معنى كدا إنى ألاقى واحد كاتب تعليق تافه أو فيه كلمة جارحة أو بيهزقنى فيه
أو كاتب تعليق سد خانه ودا بيغيظنى
لازم عشان تعلق تبقى فهمت اللى قريته مش بتعلق وخلاص


احلي بوست كتبته مع ذكر السبب؟

أى بوست يحمل كلمة فلسفة والسلسلة الفقرية



افضل مدونه قريتها؟

تقصد قريت المدونة كلها

يبقى إنته هنا تقصد إتنين بس

شيما ...الشعب لابد له من حكومة تشكمه

ميرام ,,,ميراميات ...إسكت يابنى...!

ponpona منى سلامة شوية ورق (( بنبهر من أسلوب الحكى ))

المدونتين دول تقريبا قضيت فيهم حوالى شهر ونص مبهور بمحتواهم وطريقة الكتابة والتفكير والأسلوب وحاجات كتير أوى

قلبت فى القديم والجديد


اهميه الانترنت بالنسبالك؟

بزنس وعلم وترفيه وصحاب

***********************


اسمك واسم مدونتك؟

قولنا فووووووووووووووووووق



احب الالوان؟ الايام؟ الارقام؟
الأحمر ... يوم الخميس والجمعة ... الأرقام رقم تلاتة

برجك وتاريخ ميلادك؟

الدلو شهر واحد

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : قوى بقدر أقف جمب أى حد والباقى معرفوش

العيوب:البعض بيقول مغرور والبعض بيقول رخم وغلس بس أنا مش عارف وربنا

الصفه اللى بتمنى وجودها: القدرة عالنسيان والتسامح والمغفرة

ماهو مكانك المفضل؟

كذا مكان وبالترتيب هما :

بيتنا القديم فى بركة السبع

بلدنا والغيط لما الواحد ينام هناك ساعة العصر

إسكندرية وبالذات عند القلعة

كورنيش النيل بالكامل وأقصد بكلمة الكامل الكامل فعلا


ايه هى هوايتك المفضله؟

النت والسفر والمشى والقراءة مع إنى بطلتها

ما المقوله اللى تؤمن بها؟
مقولة خاصة بيه أنا :
(( اليوم اللى يمر عليك من ما تتعلم جديد تبقى حمار
واليوم اللى يمر عليك بدون ما تحتفظ بمعلوماتك السابقة تبقى أهبل
واليوم اللى يمر عليك بدون شغل تبقى عندك تخلف عقلى ))

(( قرب .... تتكهرب ))

لأنى مش بحب الناس تقرب منى خوفا عليهم

(( اللى ميقدرنيش ميلزمنيش ))

(( عيش وحيد تعيش سعيد ))

اجمل هديه قدمت لك من مين؟
عمر ما فى حد جابلى هدية أيون صدق ولا حتى كيلو برتقان
أفتكر فى حد جابلى نص كيلو كنافة فى عيد ميلادى من حوالى عشر سنين بالظبط
غير كدا محدش عبرنى
ولا فى حد جابلى هدية كويسة محتفظ بيها حتى

اسعد يوم فى حياتك؟ واتعس يوم فى حياتك؟

أسعد يوم : يوم ما خلصت بناء البيت الجديد ووقفت قدامه أصوره وأنا سعيد بإنجازى فى الحياة وإنى خلاص عملت بيتى اللى هسكن فيه بالرغم من إنى لسه مبنتش شقتى ولسه مقررتش هسكن فيه ولا لاء لانى عندى شقتى الخاصة

أتعس يوم : يوم وفاة والدى

موقف طريف لا ينسى من ذاكرتك؟

لما كنت داخل المترو ونسيت التذكرة تقدروا تقروا بوست المسحور وإنتوا هتفهموا انا كنت عامل إزاى ساعتها

مسحوووووووووووووووووووووور

معاك ثلاث وردات لمين تهديهم ؟

أول وردة :طبعا للى جرحنى اول وردة وأقوله وأعرفه يابنى أنا أحسن منك لأنى كنت أقدر أكسرك وأدمرك بس أنا معملهاش

تانى وردة للعيلة الخاصة بيه : أختى وأخويا وأمى

تالت وردة : لأى حد حاسس ناحيتى بشعور الحب وشايف إنى كويس ودا فعلا حاجة مش بحسها كتير ولو حسيتها بقول فى نفس الناس دى هبلة بتحبنى على إيه ؟؟؟

معاك ثلاث رصاصات على من تطلقهم؟
-أى حد قبيح
- أى حد فاكر نفسه حاجة وهوا حمار فى الأساس
- أى حد مغرور

ايه رايك فى الحب؟ ولمن تقول اجمل كلمه حب؟

والله ما بكدب ولا بشتغل حد بس أنا قلبى حاليا متوقف لا بحب ولا بتاع

وكمان بالنسبة للحب راح معناه ومش قادر أفتكره خالص من كتر الجراح اللى جوايا واللى بشوفه


هل من السهل ان تمثل الحب لشخص يحبك لعدم جرح مشاعره؟

دا بقى بتنجان صرف ... لأنى ببساطة صريح جدا مبقدرش أكدب على حد مع إنى ممكن اكدب وشاطر أوى فى الكدب بس مبعملهاش

المراه فى نظر الرجل .......... أكمل ؟

الحنان والحب وبتعوض عن تعب السنين كله بكلمه

الرجل فى نظر المراه.............أكمل؟

راجل البيت

ماهو اسعد خبر سمعته هذا العام؟ وماهو اتعس خبر؟
وربنا ما فى حاجة حلوة تقريبا سمعتها السنة دى
أيون عايش فى نكد
********************
شوية أسئلة من ريمان
هواياتك؟
النت والقراءة والنقاش مع حد بيفهم وبيفكر

ايه اكتر شىء بتحبه فى الطبيعه؟
اللون الأخضر والطيور والغيط والفاكهة والخضرة
بعشق كل دا وكمان نهر النيل

ايه اكتر شىء دايما بتحن ليه؟
أرضنا فى البلد
وحبيبتى اللى لسه مش قابلتها ومعرفش هى مين ولا فين
بحر إسكندرية

ايه شاغل دماغك الايام دى؟
تحقيق ذاتى
الوصول لأهدافى


احلام حلمت بيها ومقدرتش تحقهها؟
الحب الحقيقى مقدرتش ألاقيه حتى الأن
غير كدا اى شىء حطيته كهدف وصلت له

احلام حلمت بيها وحققتها؟
تقدرى تقولى كل حاجة
بداية من بناء البيت من كام سنة على إيدى
لحد الشغل عالنت
وكمان الإحترام المتبادل مع الناس
عدم الإبتعاد عن التدوين
وكل حاجة فى حياتى

********************
خلونا بقى نجاوب عالتاج بتاع دموع القمر :

روحت مدونتها مش لقيته نو بروبلم
هحاول أتظاهر بأن كان فيه تاج هناك وكان نفسى أرد عليه لأنى حسيت إنه جميل قوى بس خلاص كدا
بس هسأل نفسى كام سؤال يمكن تقدروا تعرفوا أنا مين

مين جنابك ؟؟؟
فقرى فقط

حلمك لبكره ؟؟؟
بنوتة زوغيره بتجرى عليه وتحضنى وتقول بابا

بتحلم بإيه ؟؟؟
بحلم بتحقيق ذاتى

تعرف الخوف ؟؟؟
لا أعرفه ولا يعرفنى

يهمك رأى الناس ؟؟؟
من الأخر طز ,, أنا عايش براحتى ومش يفرق معايه حد ومطبق مبدأ عيش وحيد تعيش سعيد

إنته مغرور؟
لاء بس ثقتى فى نفسى بلا حدود

نفسك فى إيه ؟؟؟
بنوتة عسولة أو خمسة يبقوا بناتى مفيش مشاكل
شغل محترم
بيت فى مكان بحبه أوى

بتحب مصر ؟؟؟
اه والله

مدى عشقك للحياة ؟؟
ملوش حدود

هل أنت مجنون ؟؟
طبعا

ليك صحاب ؟؟
لاء
بس حاليا فى ناس قربت منى وأقدر أقول صديقة واحدة بس

بتكره الحب ؟؟؟
بعشقه لدرجة الجنون

يعنى إيه نت ؟
نت يعنى علاقات وشغل وتعليم وسياحة وسفر وحب وجواز كمان

الطب فى نظرك ؟؟؟
pure Freaking magic
ومش بلجأ له خالص غير لو بدأ جسمى ينهار

البنات فى وجهة نظرك ؟؟
مخلوقات لطيفة بتجلب السعادة
لو سمعت منك كلمة وحشة بتبقى لعنه وبتبقى ليها كيد عظيم

الصداقة ؟
عطاء بلا حدود

الكدب ؟؟؟
ملوش رجلين

الحب الحقيقى ؟؟؟
معرفة وإهتمام وطاعة

الغرور ؟
لسه متخلقش اللى هيتنك عليه
بالإضافة لأنى معرفش حد عشان أتنك عليه

أمريكا ؟؟؟
بنت كلب باليهود اللى فيها

إسرائيل ؟؟؟
قذارة وسفالة بلا حدود

الموت ؟؟
مش خايف منه نهائى
ربنا يجعل موتى على أعتاب المسجد الأقصى مدافع عنه
وطبعا لو أنا خارج بودع أى حد وداع الموت وكانى مش هشوفه تانى وكذلك بعمل مع صحابى

الزمن ؟؟؟
لازم تعمل له حساب

تقول إيه لكلا من ؟؟
والدك : بجد شكرا
حبيبتك : إتأخرتى أوى
مبارك : حس بينا الله يرضى عليك ويحسن خاتمتك

تعرف الإنتقام ؟؟؟
قادر عليه تمام القدرة لكن مبعملوش

تعرف الغدر ؟؟
أنا أكبر من إنى أعمله

إدمانك فى الحياة ؟؟؟
التفكير والتفكير والتفكير
بفكر حتى وأنا نايم ومحدش يقولى إزاى


******

إنتهت الإجابات
هل حقا علمت من أنا ؟؟؟
لا أظن هذا
ولكن
إهداء التاج يكون لمين ؟؟؟
isolde
الفراغ
سلمى
قلم رصاص
ريمان
جارة القمر
ponpona منى سلامة
شيما
وطبعا مش عايز أقول إنى بوجه مش التاجين أو اللى جاوبوا عليه قبل كدا بل الأسئلة الإضافية اللى فى النص واللى حطيتها عشان تعرفونى بيها

خالص تحياتى وإحترامى الكامل لكم
ولكل من أهدى لى تاج وخاصة من جاء ذكرهم فى البوست
وكل من أراد من القرب أو إحترمنى أو قدر رأيى ووجهة نظرى

شاب فقرى
كريم

إلى السيد رئيس الجمهورية

السيد رئيس الجمهورية

صباح الخير

أرسل لسيادتك الخطاب رقم 1 وكلى أمل أن تقرؤه
أنا شاب مصرى بيحب مصر
لاء ياريس مش زى كل الناس
بحبها بجد مش كلام عالفاضى ولا طمعان من حبها فى حاجة لا عايز منصب ولا عايز فلوس ولا عايز واسطة ولا حتى عايز تشوفلى عروسة
إنته اكبر من كدا ياريس
أنا بس عايز أمشى محترم
سواء جوا أو برا مصر
أحس بإنى مواطن بلادى بتخاف عليه وبتحبنى
يوم ما يتجمع عليه الجزائريين أولاد التيت فى السودان ألاقى حد واقف جمبى
يوم ما أروح أشجع بلدى فى تصفيات التأهيل لكأس العالم ألاقى حماية من بلدى
مش عايز أنضرب عشان أنا مصرى
ولا عايز حد يهزقنى عشان أنا فى منى كتير وإنى تعليمى أى كلام
ومش عايز يطلع واحد سعودى يتهمنى إنى كنت بدى لمراته مخدرات وبخليها مدمنه إنتقاما منه ويجلدونى ألف جلدة
ومش عايز أسافر إيطاليا فى مراكب صيد مينفعش حتى إنها تنزل تصطاد لحالتها الزبالة
ومش عايز لما أروح إيطاليا أرجع مترحل لأن بلدى مش بتدى لى حقوقى
وكمان ياريس أنا مبفكرش أسافر إسرائيل زى ما شباب كتير عملوا
وأروح أقعد فى السجون هناك أو يتهمونى بتهمة ملهاش معنى وأعيش فى السجن
ولا عايز أموت فى عبارة أو طيارة ياريس الله يكرمك
ولا عايز ينضحك عليه بوهم الشقق والتسكين وفلوسى تروح منى
ولا عايز ياريس تبعتنى أمريكا وتعلمنى هناك وتخلينى دكتور مهم
ما أنا ممكن أبقى أحسن واحد فى الدنيا وفى بلدى

كل اللى فات دا أنا شفته وشفت اللى أكتر منه
وأخواتى ماتوا فيه
وأنا ليه حق فى البلد دى ياريس
مش كفاية بس إنى إبنها
أنا خالى كان معاك فى حرب أكتوبر وكان مهندس مصرى وإستشهد هناك
أنا مش عايز غير حاجة واحدة بس
أبقى محترم جوا وبرا
مش عايز أتهان من الجزائريين لما أروح أشجع بلدى وأرجع فى تابوت
مش عايز أنضرب برا بلدى وأتعذب جوا بلدى فى أقسام الشرطة
لأول مرة بنطقها ياريس
عايز أبقى محترم
ولك منى كل التحية والدعوات بطولة العمر
بس تشوفنا ياريس
مطلوب منك تشوفنا مش أكتر
وإحنا هنصعب عليك

خالص الإحترام والتحية والتقدير

شاب فقرى

الجوزة والسرير والمشنقة

قريت مقال من شوية عالنت فكرنى بكتاب كنت قريته زمان

الكتاب بعنوان الجوزة والسرير والمشنقة

ببساطة الكتاب دا بيتكلم عن أكتر الحاجات اللى كانت موجودة زمان فى مصر وحاليا برده

أول حاجة :

الجوزة

أو الشيشة والحشيش والكيف
الكتاب بيحكى عن قدوم الحشيش لمصر وإدمان الناس ليه وبداية شرب الحشيش فى مصر ومن أول واحد خد نفسين أيام ماكان الحشيش مش مغشوش ومليان بنج وبلاوى
الكتاب بيحكى عن فلسفة شرب الناس للحشيش وبرده بيحكى قصة لشخصية بتحب المخدرات عموما والحشيش خصوصا

تانى حاجة :
السرير :

السرير هنا بمعنى صناعة البغاء فى مصر أو الدعارة لا مؤاخذة يعنى
مش عايز واحد يطلع يقولى الزنا حرام وإنته بتتكلم كدا ليه
وبيحكى عن نشأتها فى مصر ووجودها من بين 1900 لحد سنة إصدار الكتاب
وبيحكى عن إنها كانت مباحة فى مصر وكانت مهنة ومكانش فى أى واحدة بتشتغل فيها وخلاص ولازم شهادة صحية عشان ضباط الجيش الإنجليز كانوا بيعطوا كتير فى مصر وكان لازم يشوف الشهادة الاول
هم يبكى وهم يضحك والله

ثالث حاجة :
المشنقة

نشأة جرائم القتل فى زمننا المعاصر وأسباب القتل اللى بتوصلك لحد باب حبل المشنقة
يعنى ليه الناس بتقتل ووجهة نظر القاتل بل والمقتول والكتاب يتضمن قضية خطيرة فى الجزئية دى قذرة لدرجة إنى مش عايز أفتكرها

أينعم الكتاب كان بجنيه ونص من عالرصيف وكان من إصدار دار كتب أول مرة أسمع عنها وكان كمان إصدار قديم

بس صراحة عجبنى أوى وكان يستاهل كل مليم دفعته فيه أيام ما كنت بحوش الربع جنيه عالربع جنيه ويبقوا خمسة وسبعين قرش (( فلوسى بقى ))

طيب أنا إفتكرت الكتاب دا ليه ؟؟؟

كنتيجة طبيعية للى شايفه
يعنى شايف الإعلام بيهيص عن الجزائر والمصريين اللى ماتوا والناس اللى إتعجنت والعك دا كله
وقريت بوست فى مدونة سياسية شهيرة بيحكى عن الحوار دا بل وقريته بالتعليقات
وأول ما قريته لاحظت إن كاتبة الموضوع مع إحترامى ليها ربطت الموضوع على طول بالسياسة
وبأن علاء مبارك وساويرس هما السبب ومش عارف مين وكلام بتنجان كدا تطلع من البوست منتش عارف وشك من قفاك
وطريقة تحوير الموضوع سياسيا خلتنى إفتكر النقطة الخاصة بالكيف
والخاصة بإن كل واحد فى البلد دى ليه حشيش خاص بيه أو مخدر بيدمنه وبيبدع فيه وبيظبطله المسائل
إزاى ؟؟؟

تعالى أفهمك

يعنى مثلا :

السياسة :

أكتر حاجة تنقطنى بقى الجماعة بتوع السياسة دول
تلاقى الواحد من دول عمال يتكلم وياما هنا ياما هناك ويرغى ويقبح عالحكومة وكل أما يشتم أكتر
الناس تحبه أكتر ...(( غباوة تلقائية متبعة فى مجتمعنا ))
صحيح الناس مش بتنضم لتفكيره السياسى بس بتبتدى تفكر زيه
وتلاقى الشخصية اللى بتتكلم فى السياسة دى
مش هقول فى حاجات متعرفهاش
ولكن هقول إنها بتتكلم بس
يعنى لا بتعمل حاجة ولا بتهش ولا بتنش
يعنى بدل ما تتكلم عن الدستور وأخطاؤه وجنابك قاعد عالمسطبه
قوم إتنحرر وخد موقف
إرفع قضية إن شاء الله على أتخن تخين فى البلد دى
إعمل حاجة تخليك لما تنطق تبقى كلمتك مسموعة وليك سلطة تقدر منها تغير فعلا
بدل ما إنته قاعد تتكلم وتحرق فى دمنا يمين وشمال وتخلينا نكره فى مبارك وساويرس وعلاء وجمال والشاذلى وكل الأندال
الناس دى بقى المخدر بتاعها هوا السياسة
هات له كتاب فى السياسة أو تابعه فى أثناء وجود حدث سياسى هام أو موضوع خطير
تلاقيه بقى لا هوا على حامى ولا بارد وشغال فى العك هنا وهناك وطالع بمتين وجهة نظر بتبقى حاسس وعايز إنك لابد من قتله شر قتله
وعايش فى عالم تانى خالص ولا بيفكر فى الجعانين ولا الفقرا ولا الشحاتين فى البلد دى
هيطلع واحد بيقولى ما هوا بيكتب عشان مستقبل الجعانين دول
أقوله وهوا الجعانين دول هيمسكوا اللى كتبته وياكلوه أو يستغطوا بيه ؟؟؟؟
لازم نفكر صح يعنى نغير فعلا مش نقعد نتكلم ومحكى وإزيك ياللى هناك
أنا بخير ياللى هنا

الحب والرومانسية والحريم

تلاقى بقى فى ناس تانية المخدر بتاعهم هوا جو الحب والرومانسية والبنات اللى مظبطينهم
وعلى طول ماسك الموبايل وبيتكلم وهيمان فى عالم تانى أو ماشى عالكورنيش بيفعص فى إيد الموزة بتاعته
يعنى صراحة .... حياته كلها بتتمحور فى النقطة دى
ولا هوا بيتجوز ولا بيتنيل ولا حتى بيحب حد بجد ويرتبط بيه وخلصت
ودوله بقى المخدر بتاعهم بيخليهم سيس شويتين ومحدش يسألنى يعنى إيه سيس

الدراسة والشهادات :

تلاقى برده طائفة تانية من الناس عايشين مع الشهادات وبس
يعنى عمال يدرس ويفرم ويفحت ويقطع فى نفسه فى دبلومة معهد اللاسلكى أو فى كلية مش عارف إيه
وسايب كل حاجة تانية فى الحياة وكأن الدنيا هتيجى تعيط له وتقوله والنبى يا شيخ تعالى عيشنى شوية
يعنى طول ما هوا بيذاكر هوا تمام أوى
ومن وجهة نظرى بعتبر المخدر دا قوى جدا
ومفعوله بينتهى لما بينضم صاحبنا لفئة العاطلين ويأنتخ كام شهر فى البيت

الكورة اللى ربنا يخرمها قادر يا كريم :

وفى ناس تانية بتعشق الكورة
طول ما هما ماشيين بيتكلموا عن الجون بتاع متعب وعن الشوطة التالتة بتاعت أبو تريكة من الفاول الثابت اللى شاطها وطلعت برا وعمالين يقولوا حاجات كدا مش عارف معناها إيه عن الماتشات والليلة دى وكل اللى يهمهم الماتش الساعة كام وهنتفرج فين
ولو بصيت له وهوا ماشى تلاقى معاه جورنال الرياضة وفاتح الصفحة بتاعت الأهلى
لأن الزملكاوية قليليين أوى مش هتلاقى منهم كتير وإنته ماشى
وعمال يقرا بقى ومندمج وتح إنه هيطلع له أوت من الجورنال يشوطه ويجيب جون فى نفسه ويبقى حقق حلم حياته
ومن تحت راس الهبابة دى المصريين يضربوا فى بعض ويضربوا فى الجزائر والجزائر تشتم فينا وتقول القاهرة الفاجرة
بعد ما كنا فى السما من الأخر يطلع شوية .... يقولوا علينا كدا
نستاهل والله نموت هناك وناخد بالجزمة كمان عشان إعطينا حاجة أكتر من قدرها وحولناها من مجرد لعبة وتشجيع وروح طيبة ل هوس وخناقة ولازم نتأهل ونتنيل

النت :

فى ناس بقى كل وأهم حاجة فى حياتهم هى النت
وتلاقيه طول الوقت مقضيها هنا وهناك عمال يعمل داونلود ويكلم فى البت فلانة ويثبت فى البت التانية
ويخش يعمل مدونة ويشتغل الناس هنا وهناك وحركات
وناسى خالص إن فى ناس من خلال النت دا بتكسب ملايين والموضوع دا حقيقى وشفته بعينى
وناسى إن النت مش سكس ومسخرة أو تجارة أو تعليم بس
دا نافذة ليك عالعالم تقدر توصل منها لأى شىء
تقدر تدرس وتبقى تمام وتروح تاخد الدكتوراة
أو تقدر تعرف كافة المعلومات اللى محتاجها فى مجال معين

الأغانى والمطربين :

تلاقى بقى فئة حلوة أوى كدا بتموت فى الأغانى والجرح والعذاب والهبل دا كله
ما هوا هما معتقدين إن الحياة أغنيه بس وناسيين إن الأغانى دى ما هى إلا مزيكا وكلمات أحيانا بتفيد وتحسن الحالة وكتير أوى بتضر
وغير كدا تلاقى بقى روابط لعشاق تمورة الأمورة
اللى بحس كل ما أشوفه إنه عيل مش تمام متنى كدا من اللى بيعمله فى الكليبات واللقاءات ويطلع يتنحنح ويعيط ويصعب علينا شوية
صباح التيت يا تيت يابن التيت
الكلمة دى موجهة للشاب تمورة الأمورة : حاول تفوق من اللى إنته فيه
ودى بقى موجهة لعشاق مطرب معين : طز

الدين :

ناس حلوين بقى تانيين مركزين أوى مع الدين
ومنضمين كمان للأخوان وفاكرين إنها جدعنه أو إن دا يرضى ربنا
الحمد لله أنا ليه جماعة قرايبى يعتبروا من قيادات الأخوان فى القاهرة
بل إن فى جد من عيلتى من اللى إعتقلوا فى حادثة موت السادات وفضلوا فى المعتقل كام سنة وطالع منه حاجة تانية خالص
بس أنا بكره الإخوان جدا ومش بحبهم ولا بطيق نهجهم وسلوكهم
لأن أى تفكير مفهوش إخلاص لربنا بجد تأكد إنك رايح بيه جهنم
يعنى من الأخر كدا
عايز تفكر فى الدين أوكى ...... لكن متنساش السبب من وجودك فى الكون إنك تعبد ربنا وتعمره

***
يا خسارة حاليا مش عارف ولا قادر أفتكر حاجة تانى

لكن والله صدقونى الحياة أعظم وأكبر من إننا نقضيها فى حاجة واحدة بس

لازم تدرس وتشتغل وتكتب تدوينات وتصاحب ناس وتقرب من ربنا وتعمل كل حاجة

مش لازم يبقى ليك مخدر معين يلهيك عن كل حاجة فى الحياة ويخليك تركز معاه هوا بس وتسيب كل حاجة

حاول تغير أو تنتج وتحط هدف وتوصل له وتعيش فخور بنفسك وراضى عن نفسك يعنى لو موتت حالا مش هموت حزين

لأنى خلاويص حققت رسالتى فى الحياة

بس كدا

شاب فقرى

إمكانياتى صفر

السلام عليكم جميعا

يارب دايما بخير

هنا الفقرى يتحدث بكل فقره وهمومه ومشكلاته وسلطاته وبابا غنوجه

اليوم حصلى موقف فى الشغل تعب اعصابى

كنت فى مدينة جديدة بعمل شغل لناس مهمين

طبعا فى البدايه انا كنت فاكر الشغل فى الشقة تبع الراجل الكبير اللى بيتكلم معانا

وعادى بقى مر يوم الشغل بكل تعبه وهمومه وقرفه والحمد لله إتعلمت كتير أوى وتعبت أكتر

لأن التركيبات بتبقى متعبه وبتكسر الجسم وبتخلى الواحد راجع مش شايف قدامه

فما بالكم بقى بالشىء اللى زاد همى

بعد ما خلصت الشغل ومشيت بكلم صحبى

فبقوله إلا مين الواد الشاب اللى كان بيكلمك دا بعد ما خلصنا الشغل

قالى : واد مين يا كيمو دا وكيل نيابة يابنى

أنا ضحكت أوى أوى أوى

دلوقتى إتضحت كل حاجة فى بلدنا العظيمة دى

تجمعت حواليه كل حاجة

إن لما واحد أمور يخلص الكلية

وباباه يشوف له وظيفة بواسطة ويشغله

ويجيب له شقة فخمة فى مدينة جديدة

ويجيب له عربية 2009

ويتجوز أحلى وأرق بنت فى الكلية وأطيب بنت

ويجيب منها بنوتة زى القمر

طبعا ربنا اللى يعلم إنى ميفرقش معايه كل دا

أنا من وجهة نظرى إن البنى آدم رأس ماله هوا تفكيره ونفسه وعقليته

يعنى مش هتفرق أنا اهلى مين أو أهل مراتى مين أو حتى ساكن فين

عارفين إيه أكتر حاجة إتمنيتها فى كل دا ؟؟؟؟؟

فكروا

إنى نفسى أتجوز عشان يبقى عندى بنوتة عسولة زى دى

ملحوظة :
كنت بكلم صاحبى بقوله بتحلم بإيه ؟؟
قالى نفسى فى شقة فى المدينة الحلوة دى لأنى بعشق الهدوء
رديت بينى وبين نفسى :
إنته حلمك شقة لأنك بتعشق الهدوء
أنا حلمى أبقى صاحب المدينة دى اللى أنشأها من الأصل
لأنى مينفعش أحدد حلمى وطموحى فى شقة وعربية ووظيفة وهبل من دا
أنا مقتنع فعلا إن كل واحد عايش فى الدنيا دى
على قد حلمه
يعنى أنا بحلم إنى أشتغل بمرتب 500 جنيه يبقى يوم ما أخسر حلمى هشتغل ب 400
لأن الحلم هوا اللى بيحدد هدفك و يخليك تتعب عشان الهدف دا وبيحدد تعبك

أكيد فهمتوا قصدى

وفهمتوا يعنى إيه إمكانياتى صفر

يعنى لا أملك إلا نفسى

لا فى واسطة تجيبلى وظيفة فى موقع حساس

ولا فى كاشات بنكيه تخلينى أعمل مدينة كرمللة

ولا فى أب أو قريب يقف جمبى ويمد لى إيده ويمهد لى الطريق بخبرته

طبعا والدى الله يرحمه كان معروف عنه إنه لو لمس التراب بيحوله دهب (( يعنى كان شاطر أوى أوى أوى ))

وأنا حاليا بحاول أكون كدا

أو كمان أحسن من كدا

صحيح الإمكانيات صفر

بس الشغل جبار

والتعب والمجهود المبذول كبير

والأمل فى ربنا أكبر


مش هطول عليكم

دقايق وهرد عالتاج

شاب فقرى