إمكانياتى صفر

السلام عليكم جميعا

يارب دايما بخير

هنا الفقرى يتحدث بكل فقره وهمومه ومشكلاته وسلطاته وبابا غنوجه

اليوم حصلى موقف فى الشغل تعب اعصابى

كنت فى مدينة جديدة بعمل شغل لناس مهمين

طبعا فى البدايه انا كنت فاكر الشغل فى الشقة تبع الراجل الكبير اللى بيتكلم معانا

وعادى بقى مر يوم الشغل بكل تعبه وهمومه وقرفه والحمد لله إتعلمت كتير أوى وتعبت أكتر

لأن التركيبات بتبقى متعبه وبتكسر الجسم وبتخلى الواحد راجع مش شايف قدامه

فما بالكم بقى بالشىء اللى زاد همى

بعد ما خلصت الشغل ومشيت بكلم صحبى

فبقوله إلا مين الواد الشاب اللى كان بيكلمك دا بعد ما خلصنا الشغل

قالى : واد مين يا كيمو دا وكيل نيابة يابنى

أنا ضحكت أوى أوى أوى

دلوقتى إتضحت كل حاجة فى بلدنا العظيمة دى

تجمعت حواليه كل حاجة

إن لما واحد أمور يخلص الكلية

وباباه يشوف له وظيفة بواسطة ويشغله

ويجيب له شقة فخمة فى مدينة جديدة

ويجيب له عربية 2009

ويتجوز أحلى وأرق بنت فى الكلية وأطيب بنت

ويجيب منها بنوتة زى القمر

طبعا ربنا اللى يعلم إنى ميفرقش معايه كل دا

أنا من وجهة نظرى إن البنى آدم رأس ماله هوا تفكيره ونفسه وعقليته

يعنى مش هتفرق أنا اهلى مين أو أهل مراتى مين أو حتى ساكن فين

عارفين إيه أكتر حاجة إتمنيتها فى كل دا ؟؟؟؟؟

فكروا

إنى نفسى أتجوز عشان يبقى عندى بنوتة عسولة زى دى

ملحوظة :
كنت بكلم صاحبى بقوله بتحلم بإيه ؟؟
قالى نفسى فى شقة فى المدينة الحلوة دى لأنى بعشق الهدوء
رديت بينى وبين نفسى :
إنته حلمك شقة لأنك بتعشق الهدوء
أنا حلمى أبقى صاحب المدينة دى اللى أنشأها من الأصل
لأنى مينفعش أحدد حلمى وطموحى فى شقة وعربية ووظيفة وهبل من دا
أنا مقتنع فعلا إن كل واحد عايش فى الدنيا دى
على قد حلمه
يعنى أنا بحلم إنى أشتغل بمرتب 500 جنيه يبقى يوم ما أخسر حلمى هشتغل ب 400
لأن الحلم هوا اللى بيحدد هدفك و يخليك تتعب عشان الهدف دا وبيحدد تعبك

أكيد فهمتوا قصدى

وفهمتوا يعنى إيه إمكانياتى صفر

يعنى لا أملك إلا نفسى

لا فى واسطة تجيبلى وظيفة فى موقع حساس

ولا فى كاشات بنكيه تخلينى أعمل مدينة كرمللة

ولا فى أب أو قريب يقف جمبى ويمد لى إيده ويمهد لى الطريق بخبرته

طبعا والدى الله يرحمه كان معروف عنه إنه لو لمس التراب بيحوله دهب (( يعنى كان شاطر أوى أوى أوى ))

وأنا حاليا بحاول أكون كدا

أو كمان أحسن من كدا

صحيح الإمكانيات صفر

بس الشغل جبار

والتعب والمجهود المبذول كبير

والأمل فى ربنا أكبر


مش هطول عليكم

دقايق وهرد عالتاج

شاب فقرى

حقا إمتلكونى

كلما إقتربوا منى
وهم يظنون العكس
وهم لا يعلمون
كلما وقفوا بجوارى
كلما لم يشعروا بأنهم يقدمون شيئا
بأن ما يفعلونه (( عادى )) من أجلى
أنه لا يوجد بشر آخر يقتربون منه هكذا
يضحون من أجله
يتعبون حقا
ولكن لا يشعرون
يظلون بجوارى
برغم أننى لا أعلن حالتى لأحد
برغم أننى لا أقبل قرب أحد
طالما إقتربوا ولو حتى مرة
وساندونى دون أن يدرون
دون أن يشعرون بأن هذا شيئا إضافيا
وأنه يجب أن يظلوا هكذا دائما
وأنهم لا ينتظرون أى شىء
فقد إمتلكونى
وإلى الأبد
سيجدوننى بجوارهم
حتى وإن لم أستطع أن أكون لهم صفة أمام الناس
فلا أنا صديق ولا حبيب ولا زوج ولا عشيق
أنا ما هوا أنا
كريم
وهم هنا فقط
دون أن يشعروا
فقد إمتلكونى
وإلى الأبد
وحتى يقولون (( إرحل فى سلام ))

شاب فقرى

ملحوظة : بجد شكرا
ملحوظة : البوست الجاى تاج هرد على كل اسئلة البوست الماضى

تاج

أنا نويت أجاوب على أى تاج إتوجه لى فى أى يوم

أى حد بعتلى تاج فى احد الأيام

أو عنده أى سؤال

يرد هنا ومعاه الرابط أو السؤال :)

وأنا هجاوب عنهم كلهم فى البوست الجاى

وآسف لو إتأخرت على حد فى الرد عالتاج

بس والله كنت محتار شوية

ومكنتش عايز أخلى حد يعرف فقرى

بس خلاص نويت أرد

بالإنتظار :)

وشكرا للكل بجد :)

شاب فقرى

الموت أرحم

الموت أرحم من فراق الأصدقاء والأحبه
الموت أرحم من إهانة من أقرب الأصدقاء
الموت أرحم من غدر الأصحاب
الموت أرحم من بعد من أحببنا
الموت ارحم من البقاء والإستمرار فى وحدتى
----
صراحة أنا متعود على كل دا
فالموت بالنسبة لى مش حل ولا أرحم ولا حاجة
ولكنى كتبت كدا من حزنى على اللى شفته الفترة اللى فاتت
الساعة اللى قعدتها عالنت هقوم متنكد
وفعلا الموت أرحم
خالص تحياتى

شاب فقرى

سر الغياب

بسم الله الرحمن الرحيم
يارب دايما كلكم بخير
إزيكم جميعا
أنا بقالى تقريبا تلات أيام مكتبتش حاجة ولا حتى أظهرت التعليقات
ولا رديت حتى عالموبايل على حد غير الناس اللى إتعودت أكلمهم وبرده عددهم قل وبطلت أرد عالموبايل
ولا حتى كنت برد عالميل غير عالناس القريبين منى بس والحمد لله عددهم فى نقصان
وإيميلى الشخصى كنت مش بفتحه نهائى
دا طبعا إيميل تانى غير بتاع المدونة

ببساطة كنت بحقق حلم قديم
بس معرفتش أحققه زى ما حلمت بيه بسبب أكتر من حاجة

- إنى ولله الحمد جالى دور برد من يوم الجمعة اللى فات كسر عضمى وهد حيلى وكنت بنزل الشغل وانا بتألم وأحيانا كنت بدوخ ومش بحس بنفسى غير وأنا على كرسي وبحاول أجمع أفكارى
- الحمد لله رب العالمين اليومين دول كان فى طحن فى الشغل اللى بشتغله برا (( فى الورشة اللى بتعلم فيها )) فكنت متبهدل وطالع عينى بجد
- الحمد لله إنى كنت مشغول جدا لدرجة إنى إمبارح والله ما كنت قادر أقف على رجليه
-مش كنت بدخل نت خالص غير كل يوم تلات أربع ساعات بليل من واحدة لحد اربعة الصبح
ولما ربنا كرمنى ودخلت قمت داخل ناقل السيرفر وبقيت عمال أرد على أى حد بيكلمنى بكلمة طيب ويت

تلخيص للحالة : ( تعبان - عيان - بموت - مفروم فى الشغل - مش بخش المدونة ))

حاجات كتيرأوى منعتنى من تحقيق حلمى ومن قربى منكم مش عارف أفتكر منها أوى

***
أقولكم بقى على حلمى القديم
هوا ببساطة إنى أختفى
حالة ما بين الموت والحياة
يعنى لا ميت ولا حى لا راغب فى الحياة ولا رافض ليها
لا أنا بحب الدنيا ولا أنا عايز أخش الجنة أو النار
ببساطة عايز أختفى كأنى مكنتش إتخلقت فى أحد الأيام
ومش عايز حد يطلع يقولى حرام والحياة كلها أمل وبتاع
لأنى والحمد لله عارف كدا وفاهم كدا كويس أوى وكمان اللى أنا فيه مش من ظروفى دى حالة نفسيه انا عايش فيها ومبسوط بيها أوووووى
***

===== ردا على تعليقات مستشار إبليس =====

بالنسبة للبوست السابق أعزائى المدونين
هشرح ببساطة المغزى منه مع إن دى أكتر حاجة تحرق دمى بس معلش هحاول
مستشار إبليس
يعنى إيه إبليس كرمز
بعيدا عن إنه مغضوب عليه ومطرود
ولكنه مخلوق مؤمن بوجود الله يعنى أحسن من بشر كتير أوى مش مؤمنين بوجود ربنا أصلا
النقطة التانية :
إنه ببساطة بيوسوس للناس
بيقرب منهم وبيعرف نفسهم فى إيه (( كل شيطان بيعمل كدا )) بيعرف يحرك البنى آدم من شهواته ورغباته وأحلامه
بيخلى الواحد يشوف حاجات هوا أساسا مش فى حاجة ليها على إنها حاجة مصيرية ومهمة فى حياته
بيوسوس له بعمل الشر أو الحاجة اللى الشيطان عاوزها
طيب يعنى إسه مستشار إبليس
ببساطة كدا وبهدوء وبدون نظرة دينيه أو نظرة منطقية متخلفة
هوا شخص بيقدر يفهم الناس أوى
وبيعرف هوا عنده إيه مقوماته إيه
وبيفهم إحساس الناس وتفكيرهم وطريقة تفكيرهم كمان
وبيعرف حتى ماضيهم من إحساسه ومن تصرفاتهم وكلماتهم البسيطة
شخص ذكى ببساطة
دايما معاه ورقة رابحة يقدر يكسب بيها الطرف التانى مهما كان
أنا طبعا حاولت أوضح دا فى أول كام سطر
على إنه شخص شرير وبيحرك الناس للشر
بس مش دايما مستشار إبليس بيحرك الناس للشر
لأن من وجهة نظرى أى واحد يعمل كدا بشوف إنه شخص مش كويس لانه بيحرك الناس وبيلعب بعقولهم
من الاخر إفتكرت كلمة قريتها فى فيلم أجنبى كان بيسأل طبيبة نفسيه بيقولها وظيفتك إيه
قالت له (( we Fuck people minds ))
ومسمعتش قبل كدا حد قال كلمة مستشار إبليس دى بس أطلقت إسم إبليس على أعز صحابى كلقب غلاسه عليه
وأصحابى الحلوين قلت لهم إنى أنا المستشا لأنه مش بيتحرك غير برأيى :$
أظن المعنى وضح وبقى زى الشمس
بالنسبة للنقطة الخاصة ب الرد عالتعليقات السابقة
أنا مش رديت مش عشان أنا وحش وعامل فيها مشغول
والله فعلا مشغول جدا جدا جدا جدا
ولما بقعد عالنت بحس إن مخى واقف وإنى إنسان آلى
ومش مركز فى حاجة
عشان كدا هطلع التعليقات كلها وهبقى أرد عليهم بعدين (( دا لو فى حد مستنى رد على التعليق بتاعه ... فرض جدلى يحتمل الصواب والخطأ ))

====================

فى الآخر أحب أوجه شكرى للشخص الوحيد اللى سأل عليه وكان متابعنى وبيسأل فى التعليقات :)

طبعا مكانش شخص واحد بس حسيت إهتمام بجد من شخصية معينه :$ ودا طبعا شىء يشرفنى

ومع خالص تحياتى

وإنتظروا إن شاء الله بوست تانى بس لما أصحى كدا وألف على كل المدونات وأشوف اللى بيحصل وأنا مش هنا

خالص تحياتى وتقديرى وإحترامى لكم جميعا

كريم
شاب فقرى