الموت يلقى عليكم السلام

السلام عليكم ورحمة الله وبركاته

إحم إحم

الفقرى يتحدث

الأسبوع اللى فات حتى الأمس بيحصلى حوادث كتير جدا
نبداأ بمواجهات مع الموت

........|| مواجهات مع الموت ||.........
أول موقف كان فى فرح طنطا وإحنا طاالعين من طنطا
طبعا راكبين عربية ملاكى ومسافرين طالعين القاهرة
والسواق حبيب هارتى كان شارب حشيش :D
طبعا كان مهيص ومشهيص العملية والحالة تمام
بس والله على قد ما كنت قلقان على قد ما شكرت صانع الحشيش دا واللى إبتكره وقلت الحمد لله إنه شربه
لأنه والحمد لله السواق مزاجه مش بيتعدل غير كدا ولا بيعرف يشوق غير كدا
ملحوظة : العربية متأجرة هى والسواق :D لأحسن حد يقول بتصاحب حشاشين يا فقرى :$

الموقف التانى وإحنا راجعين من المعادى عالدائرى
كنا سايقين ببساطة جدا على 180 كيلو متر فى الساعة
يعنى ال 500 متر بنمشيهم فى ثانية :D
وفجأة الزيت اللى فى العربية وقع أو حصل مصيبة ووقفنا بشكل فجائى وكما هنتقلب :D
وطبعا مش عايز أقولكم ربنا ستر لو حد كان جاى من ورانا بسرعة كان زمانكم دلوقتى بتعزوا فى الفقرى
رغم إنى عارف إن أهلى مش هيسكتوا غير لما ياخدوا بالتار بس مش مشكلة إبقوا عزوا فى المدونة هنا
والحمد لله ربنا حلها لنا فى الليلة دى ووصلت البيت الساعة سته :D
علما بأن الموقف دا حصل عالطريق الدائرى الساعة اتنين

نسيت أقولكم إن وإحنا واقفين جت عربية ضخمة تريلا كدا
وقام الكاوتش مفرقع ولولا ستر ربنا كان زمانها خبطت فينا وبقينا كلنا فطيرة باللحمة :D
طبعا عطلت فى نفس المكان
محدش يقولى إن العيب من الفقرى بقى :$
عالعموم أنا هقول لوزارة المرور فى مصر هنا
إنى لما أنزل أمشى فى الشارع يفضوا لى الطريق
أنا أهم من المسؤلين
لأن لو مشيت فى الطريق ممكن تحصل حوادث أو كبارى تقع
فبالذوق توقفوا الطريق وتريحوا دماغكم :$

الموقف التالت :
لما ركبت من إسماعيلية عربية طنطا وفوتت فى الطريق عالزقازيق وبنها ونزلت فى بنها
كنا سايقين الساعة اتنين ونص وكان الجو زفت والطريق كله عربيات نقل كبيرة وبلاوى
وكنا هنموت متين مرة مش مرة واحدة بس
ولما نزلت بنها وملقتش عربيات وقمت اتمشسيت وكنت ناوى أمشى لحد القاهرة بالظبط 45 كيلو
بس لقيت فى أول إستراحة عربية توصلنى مصر والحمد لله وصلت فى عربية نقل
شفت فيها الرعب :D

ما أحلى الرجوع إليه

الموقف الرابع :
إمبارح وأنا فى الشغل مسكت مكنه بشكل غلط
نسيت
قلة تركيز كنت بفكر فى حاجة تانية
طبعا مش عايز أقول إنى كان ممكن أموت أو إيدي تتقطع أو يحصلى كارثة بس ربكم بيحبكم وبيحبنى وخلانى أعيش عشان أكتب لكم البوست دا
طبعا المكنة إسمها الصاروخ
اللى يعرفها هيعرف أنا بتكلم عن إيه بالظبط

ونتوكل على الله ونخش فى أحداث أخرى

أثبتت لى الظروف إنى شخص عامل زى الجوكر أى مكان بيتحط فيه فى الكوتشينه بيسد
وبيلعب وبيبقى ميه ميه
لما نزلت الشغل اللى قلت لكم عليه بالاضافة للدراسة فى الكورسات وبالاضافة لشغل النت وبالاضافة للدراسة
لقيت نفسى بتعلم بسرعة والحمد لله
إكتسبت معلومات كتيرة فى وقت قليل
قلبى جامد بقيت بستخدم حاجات ممكن تودينى فى داهية عادى جدا :D
دعواتكم معايه يا جدعان

وننتقل لجزء آخر ونقول :
إن فى ناس كانت فاكرة بعد البوست بتاع (( أتمنى أن أغفو قليلا ))
إنى يائس وقاعد عالجدار جمب الفرخة قاعد أعيط
طيب هتقولولى فرخة إيه
هقولكم فرخة هنيدى اللى بيقولها (( عالجدار عالجدار الفرخة ماشية عالجدار ))
بحب الأغنيه دى أوى

:D

مش إكتئاب ولا حاجة بس مطلوب منى أركز فى أكتر من حاجة
ومشغول وبسهر طول الليل وبنزل الشغل وحالتى ما يعلم بيها إلا ربنا
يعنى لما كنت بكتب فى اليوم تلات مقالات كان الناس بتقولى براحة ياعم فقرى
مش بنلحق نقرا وبتاع

طيب دلوقتى ؟؟؟

أستمر كل سنة بوست ولا أستمر كل يوم إتنين وإطلع اللى جوايه وأصدعكم :)

المهم دلوقتى

ياريت تركزوا فى الدعاء :D
هيعمل شغل جامد معايا لأنى محتاج دعواتكم بجد
البوست اللى فات فلسفى أوى ياريت محدش يفكر يقراه لأنه مش هيفهم حاجة
واللى هيفهم هجيبله عسلية
وبرده هيدفع تمنها :D

شاب فقرى

المستقبل ... مجرد وجهة نظر

السلام عليكم ورحمة الله وبركاته

أرى البعض دوما يشخص بصره وينتقل إلى عالم آخر عند التفكير فى المستقبل
لا يدرك أن هذا المستقبل هوا من صنع ذلك العقل الصغير الذى يحمله على كتفيه ويفكر به الآن
يختلف البشر دوما في نظراتهم للأشياء وهذا هوا سبب التناقضات العديدة فى تلك الحياة
والسبب الرئيسى للحروب
فبعض الناس يرى الشىء بشكل خاص ومنهم من يرى الشىء بشكل آخر
ومنهم من يصنع منه نظرية عظيمة تدرس فى الكتب والجامعات وتعتبر مرجعا لكبار المفكرين
الذين يرون ويطبقون تلك النظرية من وجهات نظرهم الخاصة فقط
ولكن أكثر ما قد يجذبنى فى الدنيا هوا النفس البشرية وكيف تنظر إليها وتتعامل معها
لم أستطع دراسة الطب النفسى يوما لأنه يندرج تحت دراسة الطب التى بالنسبة لى تعتبر مستحيلا لا أريد تحقيقه ولا الوصول إليه
ولكن يظل شغفى قائما بالطب النفسى
فمن وجهة نظرى أن أعظم ما خلق الله فى هذه الدنيا هو الإنسان
وبالأخص العقل الإنسانى والنفس البشرية
يعتبر بالنسبة لى أعظم ما خلق الله فلا يمكن أن أجد شيئا آخر يجذبنى فى هذا الكون بالكامل مثل سبر أغوار النفس البشرية وتحليل
أدق التفاصيل فيها واصلا منها إلى أسرار الماضى بل وأيضا حكايات المستقبل قبل أن تأتى
هل تصدق هذا
يمكنك بقليل من التفكير أن تعرف مستقبل الإنسان
لا أريد أن أسمع منك قولا يفيد بأن هذا مستحيل وبأن هناك مثات الآلاف من الإحتمالات
ولا أريد من عباقرة الرياضيات أن يحسبوا لى إحتما أن يستيقظ الإنسان ما بين السابعة والثامنة بالتباديل والتوافيق
فأنا لا أنظر للأمر من تلك الناحية
حقا أنا لا أعلم صغائر الأمور فى ذلك المستقبل
لا أعلم حقا من ستتزوجين
ومن ستحب فى المستقبل يافتى
ومتى ستعمل وكيف ستعمل ولا أعلم راتبك
ولكن من شخصيتك وظروفك وما تمليه على نفسك البشرية
أرسم لك طريقا مبنى على كل ما رأيت
لا أرى إحتمالات للظروف
فحين ترى الأمر من كافة النواحى حقا لن تجد إحتمالا للظروف
فحين تدرك ابعاد الموقف جيدا لا يمكن أن تفاجئك الظروف أو تفاجئك العوامل الخارجية
فمن خلال طبيعتك البشرية وطريقة تفكيرك يمكننى أن أقول لك مواصفات فتاة أحلامك التى ستعشقها
وهل ستتزوج عن حب أم لا
ويمكننى أن أقول لكى وظيفتك المستقبليه ومتى سيفتح قلبك أبوابه للعشق
ومن ستصادق ومن سيظل معك حتى نهاية الطريق وحتى الرمق الأخير
إن الموضوع قائما بالكامل على إختياراتك وطريقة تصرفك فى حياتك اليومية
فاليوم واجهنى موقف أثناء العمل إن لم أكن متيقظا وسريع التصرف كعادتى لكنت الآن بين عداد الموتى
وكذلك أنت وكل شخص فى هذى الحياة
تصرفاته وتفكيره و أصغر الصغائر فى نفسه البشرية التى هوا مقتنع بها وبكل أفكاره ومعتقداته
هى التى تحدد ذلك المستقبل
فحين تذهبين مثلا مع إحدى صديقاتك لشراء قبعة أو حجاب للرأس
فأنتى تعلمين أنها تفضل مثلا اللون الأزرق وأنها لا تحب الرسومات الكثيرة وأنها تعشق النقش
ولهذا فأنتى تعلمين ذوقها الذى يتحكم فى شاء السلعة أيا كانت التى بالتالى تتحكم فى رزق شخص ما يبيع تلك السلعة
وبالتالى أنت تعلم جيدا هل أنت شخص تستطيع إقتناص الفرص وهل قادر على تغيير نفسك للأفضل أم لا؟
والعديد من تلك المبادىء البسيطة
الموضوع قائم على نتائج سهلة وبسيطة قائمة على مبدأ واحد

(( الحتمية ))

حقا إنه لمن الممتع أن أرسم لك مستقبلا وأراك تخطو فيه لحظة بلحظة كما رسمته لك
ملاحظة صغيرة للعلم : لم يخب هذا الأسلوب ولا مرة منذ أن إتبعته
ملاحظة : لم أقم بالرد على تعليقات البوست السابق لإنشغالى لأننى لم أجد ردا لشخص قد فهم البوست أو المغزى منه
وسأحاول الرد على الجميع الآن

شاب فقرى

أتمنى أن أغفو قليلا

تتجاوز الساعة الرابعة صباحا بقليل
أحاول أن أنسى ما يدور حولى
أحاول أن أطرد شبح الموت بهدوء من حياتى
أغلق أبواب مدنى فى صمت
فلم يعد من المجدى أن تظل مفتوحة أمام من هجرها عامدا
يسود الصمت لدقائق
لا أحاول تجاوز تلك الحالة
فقط أريد أن أحياها المزيد والمزيد من الوقت
أمسك بهاتفى والسماعات الصغيرة
ينطلق صوت الأغنيات فى رأسى منبها جسدى
أضغط زى الإيقاف
أخرج إلى الشرفة وأنا أحاول أن أستمر فى تلك الحالة فى ظلمة الليل الهادىء
أنظر إلى السماء ولا أدرى ماذا أنتظر أن أرى
فها هنا لم تعد تظهر النجوم
تنتشر غيوم الدخان فى السماء وكأنها تشكل عتمة تمنع دفء القمر من الوصول لروحى
وأشعر و كأنها تتغلغل فى صمت محاولة أن تخنق أنفاسى
أنظر للمنازل من حولى
لا أجد ما يستحق النظر
أضغط زر تشغيل الأغنيات من جديد
تنطلق الأغنيات بين ثنايا عقلى محاولة إنعاشى وأن تجعلنى أعود مرة أخرى إلى ذاتى
أفكر فى صمت
أنتقل من تلك الوقفة وأجلس على حافة الشرفة
يزداد تلاحق أفكارى و رعشة البرد تضرب جسدى بقوة
أحاول معرفة ما أمر به
هل حقا أحببتها ؟
هل هوا مجرد إعجاب؟؟؟
لما تركت أبواب مدنى دون حتى أن تنظر لها؟؟
أفيق من أفكارى وتزداد رعشة البرد
هل حقا قد أغفو وانا على حافة الشرفة ؟
ترى إلى أى جانب قد أقع ؟؟
لو غفوت الان وسقط جسدى على الطريق
هل ستمر حياتى كشريط سينمائى أمام عيناى
ترى هل سأرى أحبتى كما كنت أراهم من قبل فى أحلام اليقظة يبتسمون فى صمت ؟
أغمض عيناى محاولا خوض التجربة
أتمنى لو أن أغفو قليلا
بالرغم من كل التعب والإرهاق والدوخة ورعشة البرد ولا أغفو
لا أدرى لماذا
ربما عقلى الباطن يرفض الموت بتلك الطريقة
أغلق عيناى مرة أخرى
أكرر أمنيتى بأن أغفو ولو لثوانى معدودة
تستمر الأغنيات قائلة
(( كل الحواس إتلغت حتى طعم الوجع ))
أبتسم متأكدا مما تقوله الأغنيه
وأعود مرة أخرى لأمنيتى الضائعة

أحلام ضائعة
شاب فقرى

إيه آخر خطوة ...؟

الحب
الغريب إن كل مرة الواحد بيتجرح فيها من حد بيحبه ولو من غير قصد
بيكون حاسس إن بعد كدا عمره ما هيحب تانى
بس للأسف بيرجع يحب من تانى ويخلق لنفسه عالم خاص
ويبتدى يحس بالناس ويقرب منهم
ويحبهم
ويتجرح من تانى
يمكن عشان الحب عامل زى الإدمان
الواحد لما بيخش فى دايرته مش بيقدر يسيبها أبدا
يمكن الإدمان بيأذى الواحد بشكل جسدى كبير وبيبهدل الواحد وبيفاجؤه بمصايبه
والواحد بيبعد
لكن .....
الحب
جراحه أقوى بكتير من الإدمان
بالرغم من إنى أعرف ناس ماتت من السجاير والمخدرات
وناس تانية ماتت من الحب
بتوع الحب دول قليلين أوى
مش عارف ليه ؟؟؟
يمكن عشان لما بيموتوا الواحد بيحسد الطرف التانى
وبيقول يا بختك لقيت حد يحبك لدرجة إنه يموت وراك
حاجة وحشة وفى نفس الوقت بتكون قمة الوفاء
مش عارف
بس بإختصار
دايما الجرح بيكون من أقرب الناس ليك
مش عارف ليه
ياترى العيب بيكون فى إيه ولا مين ؟؟؟
العيب فينا مبنعرفش نوصل مشاعرنا ومش بنقدر ناخد خطوة جريئة للطرف التانى
ولا ياترى العيب فينا إننا إتعلمنا الحب من قصص فاشلة ؟؟
ولا يكون الطرف التانى أساسا مش حاسس
أو مش مقدر
ياترى مين الجانى فينا ؟؟
مش عارف أوصل اللى جوايه إزاى
سؤال :
ياترى إيه آخر خطوة هتعملها قبل ما تخسر الطرف التانى وتحاول تحافظ عليه بالخطوة دى ؟؟؟؟

إنتهى

=============|| كلمات من فيلم زى النهارده ||=============

البطلة : (( وكان جوايا إحساس إنى هشوفه تانى ))
فعلا إحساسى صدق بس حلمت بيها مش شفتها فى الحقيقة كان نفسى أحكى الحلم بس مينفعش
البطل :
(( ياريت الواحد كان بيعرف يتحكم فى مشاعره أو يفهم أسبابها ,,
ياريت الواحد كان بيعرف ينسى اللى عايز ينساه ,,,
أو يعرف إيه اللى بيخليه يتشد لناس معينه فى الوقت اللى كان حاسس فيه إن دا لا يمكن يحصل ))
البطلة : (( حاولت أبطل أفتكر إنى المفروض أنساه ))
البطلة : (( كنت كل ما أحس إنى خلاص هنهار أروح إسكندرية عشان ماما متشوفنيش كدا
فى الأول كنت بعيط ,,,, ولما العياط معملش حاجة كنام وكان نفسى كل مرة بنام فيها إنى مصحاش
لحد ما وصلت للمرحلة الأخيرة اللامبالاة وبقيت مش حاسه بحاجة ))
البطلة :(( كنت فاكره إن الذكريات ينفع تتمسح بدوسة زرار ))
البطل :
(( عشان فى حاجة بدأت بينى وبينك
حاجة إنتى عارفاها وحساها كويس
لو عاندتيها هتغلبك
متضحكيش على نفسك أنا متأكد إنك هتحبينى زى ما أنا هحبك
دا لو مكنتش إبتديت أحبك فعلا ))

===========

ملاحظات :
أنا مخنوق أوى ومش عايز أفتكر حاجة من الماضى أو من بكره حتى

شاب فقرى

عدنا بحمد الله

السلام عليكم ورحمة الله وبركاته
الحمد لله كنت عند الدكتور فى الإسماعيلية ورجعت
كانت سكة طويلة ومشوار أطول
بس الحمد لله خلصت على خير هبتدى أحكى من أول ما صحيت من النوم
***
طبعا كنت سهران عالنت إمبارح
كان فى موضوع مهم جدا شاغلنى
وكمان كنت بكتب لكم البوست السابق وكمان برد على التعليقات
وبشوف البوست بتاع اللقاء التدوينى الخاص بالمنصورة
وما شاء الله عليكم ربنا يجمعكم دايما فى الخير واضح إنه كان لقاء مثمر فعلا وأنا الحمد لله على كل حال مروحتش لظروف قهرية شرحتها
صحيت من النوم الساعة عشرة كل شوية أصحى وأبص عالموبايل
مستنى البهوات اللى جايين من طنطا ما هوا خلاص بقى الفقرى هوا اللى عارف الدكتور ولازم يوصلهم
كل شوية أصحى وانام ولا أمل على إن حد يتصل يقولى أنا خرجت من البيت
أبداااااااااا لحد ما جت الساعة واحدة ونص الو يا رجاله إنتوا فين ؟
قال إيه لسه فى موقف (( الجملة )) فى طنطا
قلت لهم ربنا ينتقم منك يابنى إنته وهوا كان هيبقى يوم جامد
قالوا مش مهم نبقى نروح تانى
المهم وصلوا هنا الساعة 3.30 تقريبا ووصفت لهم ينزلوا فين ويمشوا إزاى
ولفوا وراحوا حته غلط وكنت هضربهم بس الحمد لله المسامح كريم
روحنا ركبنا المترو وطلعنا على محطة رمسيس وبعدين عالمرج الجديدة
ومن هناك تقدر تركب إسماعيلية
وصلنا المرج الجديدة مش فاكر الساعة كام وطلعنا من المترو
بعد ما إتريقوا على إحدى عجائب مصر السبع وقعدوا يتريقوا على زحمة المترو
ويقولوا مفيش حد هنا معاه انفلونزا خنازير
طيب يا جماعة تيفود
طيب أنفلونزا طيور
قلت لهم لاء عيب فى واحد برا واقف مخصوص للحاجات الحلوة دى
طلعنا وجبنا شوية حاجات نتسلى فيها فى السكة
ببص لقيت البياع بيقولى تلاتين جنيه
طبعا إفتراء بس هنعمل إيه ركبنا العربية وطيران على إسماعيلية
ربنا كرمنا بعيلين صغيرين زى السكر كانوا جمب السواق عمالين يهزروا معانا
ويدونا طوفى ونكت وكمان بعتوا لصاحبى مقطع عالموبايل
لبنت متقطعه بمعنى كلمة متقطعه وبيقولوا دى بنت ليلى غفران
شوفوا الأطفال بقوا بيفكروا فى إيه
العنف
ودى مشكلة شغلتنى كتير أوى وفكرت فيها طول الطريق وإحنا بنهرج
المهم وصلت إسماعيلية الساعة 7.30
وطبعا بما إنى كنت هناك كتير كل صيف أو كل فترة أنزل أتفسح
((||
ملحوطة : لو عايز تصيف فى إسماعيلية مفيش غير شطين بس كويسين وممتازين وعن تجربة شاطىء القوات المسلحة و شاطىء الدانفا جمبه على طول الأول عائلات وفخم جدا والتانى إحتمال تلاقى فيه أجانب لانه غالى وفخم ومحترم ومش أى حد بيدخل وإياكم بشاطى الفيروز (( شاطىء البيبى )) أنا روحته ومقدرتش انزل الميه أساسا
الصورة اللى فوق دى من داخل شط القوات المسلحة من سنتين تقريبا
واللى بعيد وعامل زى الخنجر دا النصب التذكارى لجندى المجهول وروحته تقريبا من تلات سنين ونص
واتصورت هناك والصور اتمسحت وكان يوم فخم موت بس فى الشتا
||))
فقلت إشطة ولفيت بيهم وعملت فيها المرشد السياحى
وريتهم بقى إسماعيلية من جوا التاكسى اللى رخيص جدا
يعنى حاجة بستغرب لها جدا هناك التاكسى رخيص جدا
وفخم جدا جدا جدا يلف بيك وياخد اتنين جنيه ونص
فعلا إسماعيلية عروس القناة يا ولاد جميلة ونضيفة وهادية ومليانة تاكسيات
بس زعلنى أوى إن عساكر المرور البنات مكانوش هناك
لان الصيف خلص وراحوا المدارس :((
المهم وصلنا للدكتور اللى جمب B-Tech جمب السلم الأزرق جمب محطة قطر إسماعيلية
وطلعنا وحجزنا بكام الكشف يا سيدى
سبعين جنيه
طبعا دفعنا بدون مناقشة مع إنه المفروض ستين بس :$
إستغلال من التمرجى بقى
وقالنا تعالوا الساعة تسعة ونص
طلعنا وروحنا تانى عند الموقف الكبير بتاع إسماعيلية بتاكسى لطيف ظريف
وقعدنا على كافتيريا الجوهرة
كافتيريا بجد نضيفة ومحترمة وفخمة جدا
من كتر العناية فيها تحس إنك قاعد فى فندق
والله ما لقيت زيها ولا حتى فى مدينة نصر
المهم خلصنا وقمان إتمشيت بيهم لحد الدكتور بدون تاكسى
طلعنا وكشفنا وكله تمام وأخدنا الدوا وعينة مجانية كمان
ببص عالدوا لقيته لعلاج الإضطرابات العقلية والشيزوفرنيا
بصيت لصاحبى
وقلت له إلا فريدة عاملة إيه دلوقتى :D
(( من فيلم أحمد حلمى آسف عالإزعاج كان عنده المرض دا وكان بيتخيل حاجات ومنهم بنوتة عسولة بيحبها إسمها فريدة ))
المهم قلت معلش طلعنا بعدها تعالوا يا شباب أنا عازمكم هناكل إيه ؟؟؟
قلت لهم أجمد مطعم فى إسماعيلية هنا هوا (( حسن أبو على )) أكل بحرى
بس طلعنا وجبنا الأكل اللى بحبه كله
يعنى لو روحت هناك أنصحك بشوربة السى فود وطاجن سى فود برده وشوربة أم الخلول
والحاجات الحلوة دى يعنى مش هيكلفك كتير
يعنى لو كنت فرد واحد هتدفع حوالى ستين جنيه
المهم قررنا نروح
بس قعدنا على ترعة الإسماعيلية الكورنيش بتاعها رائع والليل هادى الساعة اتناشر ونص
وطلعنا من إسماعيلية من الموقف الكبير الساعة 1.15
طبعا أنا قلت أركب معاهم طنطا
لأن لو ركبت المرج هنزل هناك مش هعرف أروح
مفيش عربيات ولا مترو
ركبت معاهم لطنطا العربية مشيت كالتالى بالظبط
إسماعيلية - الزقازيق (( بالشرقية )) - بنها (( وبعدين طريق مصر إسكنندرية الزراعى دخلت العربية من عند توشيبا العربى بالظبط)) - طنطا
طبعا المشوار كان طويل وكان إحساسى بيقولى يابنى إحنا خلاص مش هنروح السنة دى
وحسيت إننا فى الدوران حلو أفريقيا والله
الحمد لله العربية معطلتش وقضينا وقت لطيف بنهزر ونهرج
وأنا بشوف الطريق كالعادة
فوتنا عالشرقية والزقازيق بالعربية
بجد كنت سعيد لانى عمرى ما روحتها
بس مسيرى هروحها
اللى إتضح لى بالرغم من إننا كنا بليل
إن المدينة زحمة جدا جدا جدا بالنهار
ومحدش يقولى عرفت منين
قلت الحمد لله إننا ماشيين باليل
وصلت عند توشيبا العربى عالطريق الزراعى الساعة تلاتة إلا ربع
طبعا كنت بفكر أخش بنها وأبات عند قرايبى
بس لغيت الفكرة لقيت عربيات مخصوص جميلة أوى ب 35 جنيه
طبعا المشوار ميستاهلش عشرة جنيه
بس هوا إستغلال بقى
وبينك وبين القاهرة 45 كيلو ي
بقى الحل إيه؟؟؟؟؟
تمشى يا معلم
لأن العربية كانت هتودينى بنها مش القاهرة
مشيت شوية ووقفت أشاور طبعا مفيش كلب عبرنى ورضى يقف (( مش عارف ليه الناس مش لبعضيها ))
روحت عند كافتيريا عالطريق وكلمت صاحب عربية نقل نازل القاهرة
وركبت معاه
أيون زى ما فهمتوا بالظبط
فى الصندوق
45 كيلو فى الصندوق بتطلع مقتنع إن الإنسان أصله عمود نور مش قرد زى نظرية داروين للبتنجان الشهيرة
نزلت القاهرة وروحت ونشرت التعليقات وكتبت لكم البوست دا
طبعا أنا نازل تانى إستشارة الأسبوع الجاى يوم الأتنين مع صحابى
أنا كتبت كل التفاصيل عشان تحسوا بالرحلة والمشوار
أنا الصراحة نفسى أكتب فى أدب الرحلات زى أنيس منصور
بس أنيس منصور كان بيلف العالم وأنا بلف مصر بمزاج
وطبعا أنا مش قريت له لسه
أكيد لما أقراله هتعلم منه كتير فى الجزئية دى
خالص تحياتى لكم
السوندباد البرى :)
شاب فقرى