إيه آخر خطوة ...؟

الحب
الغريب إن كل مرة الواحد بيتجرح فيها من حد بيحبه ولو من غير قصد
بيكون حاسس إن بعد كدا عمره ما هيحب تانى
بس للأسف بيرجع يحب من تانى ويخلق لنفسه عالم خاص
ويبتدى يحس بالناس ويقرب منهم
ويحبهم
ويتجرح من تانى
يمكن عشان الحب عامل زى الإدمان
الواحد لما بيخش فى دايرته مش بيقدر يسيبها أبدا
يمكن الإدمان بيأذى الواحد بشكل جسدى كبير وبيبهدل الواحد وبيفاجؤه بمصايبه
والواحد بيبعد
لكن .....
الحب
جراحه أقوى بكتير من الإدمان
بالرغم من إنى أعرف ناس ماتت من السجاير والمخدرات
وناس تانية ماتت من الحب
بتوع الحب دول قليلين أوى
مش عارف ليه ؟؟؟
يمكن عشان لما بيموتوا الواحد بيحسد الطرف التانى
وبيقول يا بختك لقيت حد يحبك لدرجة إنه يموت وراك
حاجة وحشة وفى نفس الوقت بتكون قمة الوفاء
مش عارف
بس بإختصار
دايما الجرح بيكون من أقرب الناس ليك
مش عارف ليه
ياترى العيب بيكون فى إيه ولا مين ؟؟؟
العيب فينا مبنعرفش نوصل مشاعرنا ومش بنقدر ناخد خطوة جريئة للطرف التانى
ولا ياترى العيب فينا إننا إتعلمنا الحب من قصص فاشلة ؟؟
ولا يكون الطرف التانى أساسا مش حاسس
أو مش مقدر
ياترى مين الجانى فينا ؟؟
مش عارف أوصل اللى جوايه إزاى
سؤال :
ياترى إيه آخر خطوة هتعملها قبل ما تخسر الطرف التانى وتحاول تحافظ عليه بالخطوة دى ؟؟؟؟

إنتهى

=============|| كلمات من فيلم زى النهارده ||=============

البطلة : (( وكان جوايا إحساس إنى هشوفه تانى ))
فعلا إحساسى صدق بس حلمت بيها مش شفتها فى الحقيقة كان نفسى أحكى الحلم بس مينفعش
البطل :
(( ياريت الواحد كان بيعرف يتحكم فى مشاعره أو يفهم أسبابها ,,
ياريت الواحد كان بيعرف ينسى اللى عايز ينساه ,,,
أو يعرف إيه اللى بيخليه يتشد لناس معينه فى الوقت اللى كان حاسس فيه إن دا لا يمكن يحصل ))
البطلة : (( حاولت أبطل أفتكر إنى المفروض أنساه ))
البطلة : (( كنت كل ما أحس إنى خلاص هنهار أروح إسكندرية عشان ماما متشوفنيش كدا
فى الأول كنت بعيط ,,,, ولما العياط معملش حاجة كنام وكان نفسى كل مرة بنام فيها إنى مصحاش
لحد ما وصلت للمرحلة الأخيرة اللامبالاة وبقيت مش حاسه بحاجة ))
البطلة :(( كنت فاكره إن الذكريات ينفع تتمسح بدوسة زرار ))
البطل :
(( عشان فى حاجة بدأت بينى وبينك
حاجة إنتى عارفاها وحساها كويس
لو عاندتيها هتغلبك
متضحكيش على نفسك أنا متأكد إنك هتحبينى زى ما أنا هحبك
دا لو مكنتش إبتديت أحبك فعلا ))

===========

ملاحظات :
أنا مخنوق أوى ومش عايز أفتكر حاجة من الماضى أو من بكره حتى

شاب فقرى

عدنا بحمد الله

السلام عليكم ورحمة الله وبركاته
الحمد لله كنت عند الدكتور فى الإسماعيلية ورجعت
كانت سكة طويلة ومشوار أطول
بس الحمد لله خلصت على خير هبتدى أحكى من أول ما صحيت من النوم
***
طبعا كنت سهران عالنت إمبارح
كان فى موضوع مهم جدا شاغلنى
وكمان كنت بكتب لكم البوست السابق وكمان برد على التعليقات
وبشوف البوست بتاع اللقاء التدوينى الخاص بالمنصورة
وما شاء الله عليكم ربنا يجمعكم دايما فى الخير واضح إنه كان لقاء مثمر فعلا وأنا الحمد لله على كل حال مروحتش لظروف قهرية شرحتها
صحيت من النوم الساعة عشرة كل شوية أصحى وأبص عالموبايل
مستنى البهوات اللى جايين من طنطا ما هوا خلاص بقى الفقرى هوا اللى عارف الدكتور ولازم يوصلهم
كل شوية أصحى وانام ولا أمل على إن حد يتصل يقولى أنا خرجت من البيت
أبداااااااااا لحد ما جت الساعة واحدة ونص الو يا رجاله إنتوا فين ؟
قال إيه لسه فى موقف (( الجملة )) فى طنطا
قلت لهم ربنا ينتقم منك يابنى إنته وهوا كان هيبقى يوم جامد
قالوا مش مهم نبقى نروح تانى
المهم وصلوا هنا الساعة 3.30 تقريبا ووصفت لهم ينزلوا فين ويمشوا إزاى
ولفوا وراحوا حته غلط وكنت هضربهم بس الحمد لله المسامح كريم
روحنا ركبنا المترو وطلعنا على محطة رمسيس وبعدين عالمرج الجديدة
ومن هناك تقدر تركب إسماعيلية
وصلنا المرج الجديدة مش فاكر الساعة كام وطلعنا من المترو
بعد ما إتريقوا على إحدى عجائب مصر السبع وقعدوا يتريقوا على زحمة المترو
ويقولوا مفيش حد هنا معاه انفلونزا خنازير
طيب يا جماعة تيفود
طيب أنفلونزا طيور
قلت لهم لاء عيب فى واحد برا واقف مخصوص للحاجات الحلوة دى
طلعنا وجبنا شوية حاجات نتسلى فيها فى السكة
ببص لقيت البياع بيقولى تلاتين جنيه
طبعا إفتراء بس هنعمل إيه ركبنا العربية وطيران على إسماعيلية
ربنا كرمنا بعيلين صغيرين زى السكر كانوا جمب السواق عمالين يهزروا معانا
ويدونا طوفى ونكت وكمان بعتوا لصاحبى مقطع عالموبايل
لبنت متقطعه بمعنى كلمة متقطعه وبيقولوا دى بنت ليلى غفران
شوفوا الأطفال بقوا بيفكروا فى إيه
العنف
ودى مشكلة شغلتنى كتير أوى وفكرت فيها طول الطريق وإحنا بنهرج
المهم وصلت إسماعيلية الساعة 7.30
وطبعا بما إنى كنت هناك كتير كل صيف أو كل فترة أنزل أتفسح
((||
ملحوطة : لو عايز تصيف فى إسماعيلية مفيش غير شطين بس كويسين وممتازين وعن تجربة شاطىء القوات المسلحة و شاطىء الدانفا جمبه على طول الأول عائلات وفخم جدا والتانى إحتمال تلاقى فيه أجانب لانه غالى وفخم ومحترم ومش أى حد بيدخل وإياكم بشاطى الفيروز (( شاطىء البيبى )) أنا روحته ومقدرتش انزل الميه أساسا
الصورة اللى فوق دى من داخل شط القوات المسلحة من سنتين تقريبا
واللى بعيد وعامل زى الخنجر دا النصب التذكارى لجندى المجهول وروحته تقريبا من تلات سنين ونص
واتصورت هناك والصور اتمسحت وكان يوم فخم موت بس فى الشتا
||))
فقلت إشطة ولفيت بيهم وعملت فيها المرشد السياحى
وريتهم بقى إسماعيلية من جوا التاكسى اللى رخيص جدا
يعنى حاجة بستغرب لها جدا هناك التاكسى رخيص جدا
وفخم جدا جدا جدا يلف بيك وياخد اتنين جنيه ونص
فعلا إسماعيلية عروس القناة يا ولاد جميلة ونضيفة وهادية ومليانة تاكسيات
بس زعلنى أوى إن عساكر المرور البنات مكانوش هناك
لان الصيف خلص وراحوا المدارس :((
المهم وصلنا للدكتور اللى جمب B-Tech جمب السلم الأزرق جمب محطة قطر إسماعيلية
وطلعنا وحجزنا بكام الكشف يا سيدى
سبعين جنيه
طبعا دفعنا بدون مناقشة مع إنه المفروض ستين بس :$
إستغلال من التمرجى بقى
وقالنا تعالوا الساعة تسعة ونص
طلعنا وروحنا تانى عند الموقف الكبير بتاع إسماعيلية بتاكسى لطيف ظريف
وقعدنا على كافتيريا الجوهرة
كافتيريا بجد نضيفة ومحترمة وفخمة جدا
من كتر العناية فيها تحس إنك قاعد فى فندق
والله ما لقيت زيها ولا حتى فى مدينة نصر
المهم خلصنا وقمان إتمشيت بيهم لحد الدكتور بدون تاكسى
طلعنا وكشفنا وكله تمام وأخدنا الدوا وعينة مجانية كمان
ببص عالدوا لقيته لعلاج الإضطرابات العقلية والشيزوفرنيا
بصيت لصاحبى
وقلت له إلا فريدة عاملة إيه دلوقتى :D
(( من فيلم أحمد حلمى آسف عالإزعاج كان عنده المرض دا وكان بيتخيل حاجات ومنهم بنوتة عسولة بيحبها إسمها فريدة ))
المهم قلت معلش طلعنا بعدها تعالوا يا شباب أنا عازمكم هناكل إيه ؟؟؟
قلت لهم أجمد مطعم فى إسماعيلية هنا هوا (( حسن أبو على )) أكل بحرى
بس طلعنا وجبنا الأكل اللى بحبه كله
يعنى لو روحت هناك أنصحك بشوربة السى فود وطاجن سى فود برده وشوربة أم الخلول
والحاجات الحلوة دى يعنى مش هيكلفك كتير
يعنى لو كنت فرد واحد هتدفع حوالى ستين جنيه
المهم قررنا نروح
بس قعدنا على ترعة الإسماعيلية الكورنيش بتاعها رائع والليل هادى الساعة اتناشر ونص
وطلعنا من إسماعيلية من الموقف الكبير الساعة 1.15
طبعا أنا قلت أركب معاهم طنطا
لأن لو ركبت المرج هنزل هناك مش هعرف أروح
مفيش عربيات ولا مترو
ركبت معاهم لطنطا العربية مشيت كالتالى بالظبط
إسماعيلية - الزقازيق (( بالشرقية )) - بنها (( وبعدين طريق مصر إسكنندرية الزراعى دخلت العربية من عند توشيبا العربى بالظبط)) - طنطا
طبعا المشوار كان طويل وكان إحساسى بيقولى يابنى إحنا خلاص مش هنروح السنة دى
وحسيت إننا فى الدوران حلو أفريقيا والله
الحمد لله العربية معطلتش وقضينا وقت لطيف بنهزر ونهرج
وأنا بشوف الطريق كالعادة
فوتنا عالشرقية والزقازيق بالعربية
بجد كنت سعيد لانى عمرى ما روحتها
بس مسيرى هروحها
اللى إتضح لى بالرغم من إننا كنا بليل
إن المدينة زحمة جدا جدا جدا بالنهار
ومحدش يقولى عرفت منين
قلت الحمد لله إننا ماشيين باليل
وصلت عند توشيبا العربى عالطريق الزراعى الساعة تلاتة إلا ربع
طبعا كنت بفكر أخش بنها وأبات عند قرايبى
بس لغيت الفكرة لقيت عربيات مخصوص جميلة أوى ب 35 جنيه
طبعا المشوار ميستاهلش عشرة جنيه
بس هوا إستغلال بقى
وبينك وبين القاهرة 45 كيلو ي
بقى الحل إيه؟؟؟؟؟
تمشى يا معلم
لأن العربية كانت هتودينى بنها مش القاهرة
مشيت شوية ووقفت أشاور طبعا مفيش كلب عبرنى ورضى يقف (( مش عارف ليه الناس مش لبعضيها ))
روحت عند كافتيريا عالطريق وكلمت صاحب عربية نقل نازل القاهرة
وركبت معاه
أيون زى ما فهمتوا بالظبط
فى الصندوق
45 كيلو فى الصندوق بتطلع مقتنع إن الإنسان أصله عمود نور مش قرد زى نظرية داروين للبتنجان الشهيرة
نزلت القاهرة وروحت ونشرت التعليقات وكتبت لكم البوست دا
طبعا أنا نازل تانى إستشارة الأسبوع الجاى يوم الأتنين مع صحابى
أنا كتبت كل التفاصيل عشان تحسوا بالرحلة والمشوار
أنا الصراحة نفسى أكتب فى أدب الرحلات زى أنيس منصور
بس أنيس منصور كان بيلف العالم وأنا بلف مصر بمزاج
وطبعا أنا مش قريت له لسه
أكيد لما أقراله هتعلم منه كتير فى الجزئية دى
خالص تحياتى لكم
السوندباد البرى :)
شاب فقرى

إلى أجدع مدونة فى الدنيا حبيبة قلبى

السلام عليكم ورحمة الله وبركاته

اليوم أنا هبوح لكم بسر خطير

مخبيه عليكم بقالى كتير أوى

اليوم أنا هتكلم عن واحدة مدونة معانا غالية قوى على قلبى

من الآخر بحبها :D

ومش حب عادى

بحبها من زمان أوى

بجنوووووووووون

(: (: (: (:

إستغربتم ؟؟؟

إستغربوا كمان وكمان

لأن البوست بالكامل هيتكلم عنها هى وبس ...!

طبعا ناس كتير سألتنى مجيتش ليه لقاء المنصورة
أنا كان الرد الطبيعى بتاعى إنى كنت جاى من السفر وتعبان
لكن اللى يعرفنى كويس يعرف أنى بستعبط جدا :)
لأنى لو عايز أطبق أربع تيام ورا بعض هطبق :)
وإنى لو عايز أسافر المريخ وأنا منمتش بقالى يومين
هسافر
طيب مجيتش ليه يا فقرى ( إسم مش شتيمة ) ؟؟؟
عشان حبيبتى مش هترضى تيجى معايه :((
وأنا قلبى مش هيطاوعنى أسيبها فى البيت وأمشى أروح أتفسح :((
أيوا يا جماعة أنا قلت لها ومش لقيت منها قبول بالإضافة لأنها ملهاش علاقات كبيرة بأصحابى اللى فى اللقاء
طبعا بعضكم يعرفها لكن مش كلكم وهى مش بتعلق عندكم أوى

هى بتدون بقالها تلات سنين تقريبا
هى اللى علمتنى التدوين
إحنا بدأنا فى الأول كل واحد بمدونة
بس انا كنت بكتب بوست كل كام شهر
وهى بقى الله ينور كانت كل يوم زى حالاتى دلوقتى كدا
أنا الصراحة بحبها من أول يوم

طيب مين الأمورة دى ؟؟؟

الأمورة تبقى أختى :)

واحدة فى المدونات اللى بيعلقوا عندى هى بس اللى تعرفها وتعرف اننا اخوات
بمحض الصدفة لانها ذكية أوى ولأنى كنت عايزها تعرف
وياما أختى كتبت فى مدونتها وقالت كريم وكريم وكريم وقطعت فروتى

ومن منبرى هذا أقولها مش هجيب لك آيس كريم السنة دى فى عيد الحب عشان بتتأخرى فى الدفع وبتدفعى مؤخر :D

الدفع مقدم يا أختى العزيزة

طبعا مش هقعد أشكر فيها وأقول إنها سر سعادتى
والأخوة اللى بينا عمرها ألف عام
وإننا ملناش غير بعض
وإنى بحبها والكلام الحلو دا كله
لأنها أكيد حاسه
وإحنا فاهمين بعض كويس

طبعا أنا مش هقولكم هى مين ؟
ومحدش يقولى هى مين عشان والله ما هقول دلوقتى خالص يمكن بعدين وانا حلفت أهوه
عشان الموضوع سر إلى يوم يبعثون

دعواتكم بقى لأنى مسافر بكره للدكتور(( مخ وأعصاب )) فى إسماعيلية
إنتم عارفين إن الشيخ البعيد سره باتع

تحياتى إليكم

بس خلاص

كان معكم

شاب فقرى

--------
ملحوظة : مش هتبقى آخر مرة أعلن إنى بحب واحدة فى مدونتى ,,, باقى كمان مرة وخلاص ...
تلميح عن شخصية أختى : كاتبه بارعة جدا للخواطر والقصص القصيرة لدرجة تجعلك تبكى بجنون ....

سيبها هى اللى ترد (( فرح طنطا ))

صباح الفل

أنا رجعت من طنطا خلاص

الساعة دلوقتى سته الا ربع الصبح

الحمد لله صحيت امبارح بدرى وعلى ما ظبطت الحال بقت تلاتة ونص

هوبا ... دا النهارده الخميس

هوبا ... الموصلات زفت

هوبتين تلاتة اربعة نزلت وقفت فى الموقف بتاع نص ساعة

فضلت واقف محترم

مش عارف أزاحم الناس من كتر ما بطلت أخرج وبقيت حاسس إنى الدكتور كراملة سبعة ماجيستر وستاشر دكتوراه بوقفتى دى

المهم

لقطت عربية من اول الخط (( الساعة اربعة ونص )) وركبت ووصلت مع صلاة المغرب

نزلت فين فى طنطا

نزلت برا طنطا عند مدخل إخناواى (( قرية هناك قبل كوبرى المحلة ))

نزلت واتصل بصحابى وراحوا يستنونى على كورنيش بلازا

(( كافتيريا محترمة جدا ومن موقعى هذا أحب أسلم على حمزة وسلمان ))

وأنا عديت الطريق وصراحة رحت آكل

أصل العبد لله مكلش ولا لقمة من الصبح

يادوبك صحيت على كوباية المعلم شحاته أبو كف

يطلع حد مش عارف الكابتن العريق شحاته أبو كف ويقولى هوا مين :D

أقوله دا نور مثله نور الشريف مع سعاد حسنى فى فيلم جامد موت

المهم الكابتن شحاته كان بيجيب بيضة وكوباية لبن ويضربهم ويشرب

أنا عملت الخلطة دى بس بالخلاط

لييييييييييييه ؟؟؟؟؟؟

عشان خاطر الزفارة تروح

وفعلا مبقاش فى أى زفارة وكان مشروب مليان بروتينات

المهم روحت أكلت فى مسمط الريس هناك أول ما تعدى الطريق والجرسون اللى هناك جدع اوى

أول ما شافنى إفتكرنى بالرغم من انى مش فى طنطا كل يوم وجرى عملى الطلب بتاعى أبو خمسة جنيهات :D

حاجة كدا عالقد (( كبده )) لأن انا مش باكل من اى مسمط برا البيت :D

المهم طلعت جرى على بلازا

وصلت لقيتهم ملطوعين هناك

نزلت المشاريب بالترتيب والإجبار

هناك حمزة وسلمان بيشربونا اللى هما عايزينه وبالترتيب وبالإجبار :) صدق فإنها حقيقة

المهم طلعنا بعدها نجيب شوية العاب نارية من مكان فى طنطا وطلعنا على المكان اللى فيه القاعة

مكان محترم مش فاكر إسمها إيه كدا كوين

وهى طبعا كانت مليانة ناس

بجد شفت هناك بنات طنطا بجد بقى :)

أدب وجمال وعلم

ما شاء الله عليهم :)

طبعا بغض النظر إن محدش عبرنى بنظرة فى الفرح

ولا حد قالى عقبالك

إلا أنى مبردش على البنات اللى بيكلمونى

هسيبها هى اللى ترد على راى جنات (( حبيبى على نياته ))

ههههههههههههههههههههههههههههههههههه

(( بس أنتى طبعا أحلى من أى واحدة فى الدنيا
كفاية إنك أنتى أنتى
مش عارف أقولك بقيت بتخيل فرحى كل شوية
ومش متخيل قاعد مع حد غيرك))
طبعا الكلام دا لخطيبتى لو فكرت فى يوم تخش المدونة مستقبلا فى أحد الأيام منتفضحش بقى :$ :D

المهم خلص الفرح

صحيح الدى جى طول للساعة اتناشر

بس معلش قلت عادى

نزلنا من القاعة على اتناشر ونص

أربع عربيات عالطريق الزراعى بنوصل العروسة المعادى

كنا ماشيين بنرقص عالطريق (( صدق حدث بالفعل ))

المهم

انا قلت ربنا فك فقرى وراجع فى عربية مخصوص وكمان ماشيين بمزاجنا ومعايه صحابى

تقريبا انا اللى حسدت نفسى

المهم وصلناها المعادى وطلعناها الشقة كمان

وهوبا نزلنا جبنا أكل وكانز وطرنا عالدائرى

شوية والعربية اللى الفقرى جنابى راكبها وقفت

قال إيه عطل وكنا ماشيين على 180

فصلت فجاة ووقفنا براحة والعربية كانت بتتحرق :D

صباح الفل

فضلنا اربع ساعات عالطريق الدائرى

ساعة بنشوف المشكلة وبندور على حبل او wire من اى عربية تريلا معديه

بس مفيش كلب عبرنا (( زيادة فى الفقر ))

شوية والعبد لله إبتكر فكرة

أحنا نفك اليفط المتعلقة عالدائرى ونعمل بيها حبل

آه وربنا فكرتى :D

اهوه بالمرة أخلص تارى من بتوع مجلس الشعب :D

فكينا اليفط وبعد ما عملنا كل حاجة

قال إيه الفقر بيتفك دلوقتى وطلع لنا واحد بحته حبل

قلت رضا وشيلناها فى العربية ومشينا

ونزلت أنا عند منزل الدائرى عند غبور كدا عالطريق الزراعى

بس بعد ما اتفقت مع صاحبى نزل احنا التلاتة اسماعيلية يوم السبت نصيف فى اخر الصيف ونقضى يوم هناك وبعدين نروح بليل للدكتور المخ والاعصاب اللى هنتعالج عنده بعون الله

المهم

نزلت ركبت لحد البيت

فعلا نطلع من اليوم دا بكذا حاجة :

1- إياك تركب فى عربية مع الفقرى
2- إياك تعزم الفقرى على فرح (( ولو كان هيتجوزك خليكى من بعيد لبعيد كل واحد فى قاعة
3- إياك تفكر توصل العروسة لشقتها ... ليه فاكر نفسك أمها ولا العريس
4- إنى عايز أتجوز بس كل حاجة معاندانى ودا العادى بتاع الفقرى
5- إنى بفكر فى فتاة الأحلام اللى بدأت ملامحها تتضح قدامى أكتر ما باخد نفسى
6- إنى إتحرمت كتير من الدلع والحب والحنان وبفكر أعوض كل حاجة مع فتاة الأحلام دى وبدعى ربنا تكون عاقلة وتفهمنى
7- إن إياك ثم إيام وإياك وإياك إنك تعمل إيه وربنا ما فاكر نسيت :D
8- إنى هضرب كوباية شحاته ابو كف دى دلوقتى فى يوم الجمعة عشان اقدر اطير عالمنصورة
9- إنى هرجع ميت من المنصورة أكتر مما أنا ميت ناو
10- إن الفقرى كرامللة آه بس راجل أوى :)
11- وووووووووووووووووووووحشتيييييييييييييينى
12- إن فى تعليق ريته وغاظنى أوى لأنى مكنتش متوقعه عالبوست اللى فات

التعليقات عالبوست اللى فات هرد عليها وهنشرها بكره لما اجى من المنصورة
إنى بجد تعبان أوى وحاسس إن باب الأودة بيرقص وبينادى عليه أقوم أكمل معاه رقص
دعواتكم أن يعود الفقرى على خير

أنا هقوم أجهز شنطة السفر بقى عشان مش شايف قدامى ولازم أنجز :)

الفقرى يحييكم من قصره وعلو الدور اللى ساكن فيه بتواضع ويقولكم كلكم

رجاءا دعواتكم
هرد عليكم نفر نفر يا حبايبى :)
بس لما ارجع بعون الله

يا جماعة الله يهديكم اقروا البوست اللى فات كويس عشان هيبقى ليه تكملة
وهيبقى فى شعر ورد شعرى على كلام شعرا كبار وعايزين صقفة حلوة كدا
وكمان أنا مش طارح حالة عامة وبطلب رأيكم
أنا بتكلم عن شاب فقرى
جامعى ومهندس محترم فى عالم الكمبيوتر
مش بيتعلم صنعه عشان أى حاجة تخطر فى بالكم
بس عشان الوقت يفوت حرام
وأنا عندى فلوس ومكان أفتح فيه ورشة
ودى ورشة ألوميتال
أنا ليه قرايب شغالين فيهم وناس محترمة جدا جدا جدا ومتربيين ولا عمرى سمعت منهم كلمة وحشة
وحالتهم ميسرة وعندهم سلسلة محلات فى مدينة نصر

يعنى أنا صعبان عليه الوقت وخصوصا إنى كمان عاجبنى المجال لأن لا بتعامل فيه مع صنيعيه ولا بتاع
وكمان بيفكرنى بأكتر حاجة بعشقها بالتركيبات الهندسية
أنا بسميها كدا
يعنى الحاجة دى عاملة إزاى وقايمة على إيه ومن جوا تصميمها عامل إزاى
فمش نازل أعمل اجة غلط ولا أتعامل مع صنيعيه فى موقع عمل ولا مع اى طائفة صنايعية
فقط العدة والخامات

وحشتينى (( جارى دك الحصون ))

شاب فقرى

--
* تحديث:
أنا تعبان جدا جدا ومش قادر أتحرك
وعندى ظروف قهرية جدا
أنا قايم أنام
انا مش رايح اللقاء يا شباب
ولما أصحى هبقى أرد عالتعليقات وأنشر كل التعليقات وأرد عليها

أنا كنت جهزت الشنطة ولبست ومقدرتش أتحرك

لنا عودة

فقررررررررررررررى

إليكى أكتب فى عيد الحب :)

السلام عليكم ورحمة الله وبركاته
النهارده إكتشفت بالصدفه إنه عيد الحب
واحد رخم جاى يقولى كل سنة وإنته طيب
جاى يغيظنى يعنى عشان هوا خاطب وأنا لاء :((
وكمان فى تدوينات كتير إتكتبت رومانسية بتتكلم عن عيد الحب
فقلت ليه مش أكتب أنا كمان :$
أهوه اكتب لها
واحكى عن ذكرياتى فى عيد الحب دا

وأخد رأيكم فى كام موضوع شاغلين بالى أوووووووووى:

الموضوع الأول :

الكلام هنا للبنات بس
أو للشباب كمان اللى عايز يقول رأيه نو بروبلم
أنا فكرت إن عندى وقت كبير فراغ
أيون فراغ
أنا متعود إن يومى بيكون عادة 120 ساعة
يعنى شغل بنسبة 100 %
لكن حاليا صراحة الشغل قل أوى
مش معنى كدا إنى هبطل
لاء
لكن بفكر فى حاجة تانية مهمة
إن الواحد يتعلم صنعه
أيوه يتعلم أى صنعه فى الدنيا
ممكن بعدها يفتح ورشة أو مصنع
وكما قال النبى عليه الصلاة والسلام ( رحم الله رجلا بات كالا من عمل يده )
فأنا إنطلاقا من هذا الحديث الشريف ومن إنى لقيت نفسى فاضى فكرت فى حكاية الصنعه دى
بغض النظر عن الاستمرار فيها

ولكن السؤال هنا للبنات لو إتقدم لك واحد فى يوم من الأيام صنايعى
يعنى بيعمل شغلانه معينه أيا تكن
والراجل دا متعلم والحمد لله وخبير كمبيوتر ومهندس عما قريب
زى حالاتى كدا تعملى إيه ؟؟؟؟

أنا مش بكتب البوست عشان عايز رأى واحدة بعينها ,,,, لاء لاء مش تفهمونى غلط
أنا عايز أعرف تفكير البنات فى النقطة دى بالذات لأنى مش سألت فيها ولا فكرت فيها قبل كدا ولسه فى طور التفكير
فلو إتقدم لك صنايعى وكسيب وكمان معاه ورشة ولا حاجة
هتقولى إيه ؟؟؟

الموضوع التانى :

لا أذكر لنفسى بتاتا أى ذكريات عن عيد الحب
لا عمرى جبت لواحدة هديه ولا حتى باكو لبان
ومحدش يستغرب
ولا عمرى أخدت الموزة بتاعتى وطلعت عالكورنيش
وجبت إتنين كانز ووقفنا كدا زى العيال الأمامير اللى ماليين الكورنيش
لكن فى مرة كنت بحب واحدة وكانت رافضة موقف الحب
دا لحد ما اتقدمت لها بس إتقدمت متأخر ورفضت وإتخطبت دلوقتى
والحمد لله الموضوع إتنسى وربنا كان جمبى
قبل ما يحصل دا كله أنا فكرت أجيب لها إيه فى عيد الحب
طبعا إتصلت بيها قلت لها هابى فلانتين
قالت لى وانته طيب يا خويا ,,, صمت الوقفه ياواد ولا مصمتهاش :D
قلت لها فاتتنى الصراحة قالت لى يلا معلش السنة الجاية بقى تلحقها
المهم فكرت اجيبلها وردة وأقف فى مكان مخفى
أستناها لحد ما تيجى وأطلعها الورده مفاجأة كدا زى الساحر وأفاجئها بيها
بس قلت لاء حاجة تقليديه أوى
فكرت وهدانى تفكيرى إلى بما إنها بتعشق الفاكهة
إنى اجيب لها فاكهة حلوة بتحبها
فكرت فى كل أنواع الفاكهة اللى كانت دايما بتطلعها من شنطتها
(( أيون صدق كانت ممكن تطلع من الشنطة أى حاجة تتخيلها او لا تخطر على بالك ))
قلت فاكهة إيه بقى ؟؟
قلت مفيش غير اليوسفى لا بيتفعص ولا بيبوظ ولا بيبقى مر ولا معفن
وقلت أجيبلها حباية يوسفى وأحطها فى شيكارة (( أيون شيكارة ))
وأحط الشيكارة فى شنطة هدايا محترمة وأقدمها لها تعبيرا عن الحب الرهيب اللى ما بينا
وبدأت فى التجهيز فعلا
ولكن فات العيد وفات أسبوع ومش شفتها
ولما قابلتها بعدها مصدقتش اللى كنت بعمله
بس حلفت لها إنى كنت هعمله فعلا
غير ذلك لا أذكر إنى فى يوم جبت لأى بنت أى هدية
غير أختى جبت لها فى مرة آيس كريم ودفعتها حسابه كمان :D

----

إليكى أكتب فى عيد الحب :)

الآن ..
قد علمتى كل ما تريدين عنى
قد أدركتى الحقيقة
عرفتى من أنا وكيف أفكر ومن اكون
فتحت لك أبواب مدنى
فهل تدخلين :$
تحياتى

شاب فقرى