أبى الحبيب .... إليك أشتاق.

بسم الله الرحمن الرحيم

أبى الحبيب : بابا

بعد التحية ....

وحشتنى كتير أوى مش عارف أقولك كتير فكرت بينى وبين نفسى إنى عمرى يضيع وأشوفك تلات دقايق بس مش عارف هعمل فيهم إيه أو هنقول فيهم إيه ومش عارف هستمد منك إيه فى التلات دقايق دول ومش عارف ليه برده تلات دقايق هوا نظره واحدة منك هتكفينى
مر سنين كتير نسيت فيها معنى أن كلمة الأب ومعنى الحنان اللى مشوفتوش من حد غيرك نسيت فيها معنى إنك تزعقلى كل يوم الصبح عشان أصحى ونسيت فيها إزاى بيبقى للحياة طعم تانى وإنته فيها وإنته منورها وإنته بتقولى كمل وإتعب ساعتها كنت فاكر إنك أكتر واحد فى الدنيا دى بيتعبنى لكن بعدك فهمت معنى التعب وفهمت معنى إن الواحد يكمل وهوا مش مرتاح ,, يمكن نسيت فيها كل حاجة وإتحفر جوايا حاجات فيها معنى الأبوة لأولادى إن شاء الله بيتهيألى إنى مش هعرف أبقى فى حنانك عليه أنا بالذات

لكن ....
عمرك ما هتقرا الكلام دا ولا هتحس بكلامى
الله يرحمك
كنت فاكر السنين هتنسينى بس خلاص بعترف
إنك وحشتنى أوووووى
مش عارف أقولك إيه؟؟ :'(

أنا حتى مش عرفت أمتع عينى بيك وإنته مبتسم ليه قبل ما تموت ولا عرفت أبقى جمبك
مش تقلق عليه أنا مش بنهار
ومستحيل أنهار أو أزعل على فراق حد من بعدك أو عينى تدمع على فراق حد غيرك حتى لو كانت روحى معاه
بيمر عليه الأسبوع الأخير اللى قضيته معايه وبيمر عليه ليلة وفاتك وبفتكرك على طول وبفتكر اليوم دا
كان يوم جمعة
الجمعة دى الوحيدة اللى مش عرفت تصلى معايه
كنا على طول بنصلى سوا ويمكن يوم الجمعة دا مكنتش تعرف تتحرك من غيرى
سامحنى لأنى كنت قاسى عليك قوى وإنى مكنتش مصدق
أنا مكنتش متخيل إنك ممكن تستند عليه
لأنك بالنسبة لى القوة كلها والقدرة واللى يقدر يسند أى حد لكن مينفعش حد يسنده
مش عارف أقولك إيه
أنته من يوم ما مشيت أنا مش عرفت أستند على حد
دخل حياتى ناس كتير ,, ناس قالوا إنهم صحابى واللى قالوا إنهم بيحبونى وكله كلام ملقتش حد أعرف أستند عليه بجد أو أفكر إنه يبقى جمبى
صدقنى من يوم فراقك بقى للحياة كلها لون واحد ومبقتش ببكى على فراق حد بقيت ممكن أبيع أى حد ومفيش حد عرف يكون فى مكانك ولا حتى أقل منك
مش عارف أزورك
مش قادر أقف قدامك
حاسس إنى مقصر معاك
حاسس إن على قد ما فكرت فيه أنا نسيتك
والله ربنا يعلم ولا يوم غبت عن بالى
فات كتير
أربع ولا خمس سنين
مروا زى الطيف والحلم
وبقيت مش عارف اعمل إيه فى غيابك
بس وحشتنى
فقلت أكتب لك جواب
أنا عمرى ما عرفت أكتب جواب لحد
بس بكتب دا عشان ايه
مش عارف
بجد وحشتنى
ربنا يرحمك يارب
ويصبرنى على فراقك

إبنك ...
أنا

متع نفسك ...!

بسم الله الرحمن الرحيم
البوست دا تكملة لبوست آخر بعنوان الغرقى
لما كتبته كل اللى قروه ماعدا تعليق واحد بس هوا اللى فهم الغرض من الحكى
نبدأ على بركة الله

***

متع نفسك
يعنى إيه متعه أساسا ؟؟
المتعه هوا إحساس بيأتى من فعل معين أو فكر محدد بيسيطر على عقل الانسان وكيانه ويخليه يحس بإحساس يعلو السعادة ويسمى الإستمتاع
المتعه ليها أشكال كتير جدا لا مجال لذكرها ولكننا هنتكلم فى المتعه نفسها
محدش يفهم غلط

المتعه بالنسبة للبعض هى الإبداع
مثلا :
بتكون فى كتابه الشعر للبعض وإظهار مشاعره للآخرين من خلال إلقاء قصيدة تسحر المستمعين
قد تكون فى رسم لوحة جميلة تجسد موقف معين يسحر الناس
قد تكون فى قراءة والترجمة من بعض الكتب الأجنبيه
قد تكون فى الجلوس منفردا هادئا وحيدا فى صمت فى الظلام (( زيى مثلا ))

المتعه بالنسبة للبعض الآخر هى العمل
مثلا :
الحلم بهدف كبير وعالى والوصول ليه وتحقيق الحلم المستحيل للناس والتعب والمجهود بالنسبة لى بيكون حلو
الشغل بالنسبة للطبيب مثلا وتحقيق ذاته بالكشف عن المرضى وعلاج الكثير منهم
التصميم بالنسبة لمهندس شاب ورسم مبنى عملاق ويقف قدام المبنى بعد ما ينتهى ويبص لرسمه عالورق ويشوف المبنى
أكيد إحساس ممتع

لكن بالنسبة لشخص معندوش أدنى فكرة عن التعليم
ولا حتى يفهم ولا يعرف يعنى إيه ثقافة ولا حتى بيتابع أخبار
بيتابع أنا بكره إسرائيل كنوع من حب الوطن
وبيسمع العنب العنب العنب إعتزازا بتراثه الشعبى
وبيشوف نانسى وهيفا عالدش عشان يبقى إسمه بيشوف بنات
شخص فى الأرياف مثلا
كل همه هوا الزرع والحصاد والشغل والتعب والعرق والمجهود وياكل ويشرب ويربى العيال ويشترى فدانين للعيال ولا يبنى لهم بيت

يعنى متعه إيه اللى هيفكر فيها غير شغله وتعبه وعرقه ووصوله للى بيحلم بيه

الشخص المذكور دا هوا اللى غرق فى بوست الغرقى
وكما قال مدون قرأ البوست جملة أعجبتنى جدا وأكدت لى هوا فاهم اللى قراه

---------------------
أحمد عاطف يقول...

البقاء لله يا شاب

ثقافة الشعوب الطيبة تجعلهم يتكففون المتعة في اي شيء صغير حتى ولو كان سيودي بحياتهم

فلندعوا الله ان يغفر لهم

----------------------

يعنى أولاد البلد اللى بيدوروا على شىء صغير جدا جدا جدا قد يكون بالنسبة للبعض الآخر مقرف أو كله قذارة عشان يستمتعوا بيه
زى ما فى ناس هوايتها الرقص مع الأغنيه
فى ناس بتعشق العوم فى الترعة والبلاوى التانية
يعنى لو أى واحد من اللى بيقرا البوست دلوقتى قالوا له ينزل الترعة ولو حتى هيلاقى مال قارون تحت مش هينزل
لأن ببساطة الموضوع دا موضوع ثقافة
المصريين مش غرقانين فى الترعة
المصريين غرقانين فى بير غويط
والبير دا مليان بالعادات والتقاليد الغلط والأفكار المتخلفة اللى بتأذيهم وبتضرهم وبالثقافة العتيقه القديمة اللى متنفعش فى هذا الزمان
ويمكن من الحاجات اللى فى البير دا هى عدم إحترام الغير
يعنى ممكن واحد يسمع شيخ الازهر بيقول الحجاب والنقاب ويطلع يقول النقاب عادة ومش من الدين
بيتهيألى إن اللى بيتكلم هنا هوا شيخ الأزهر مش عم سيد بتاع البليلة
يعنى راجل دارس فى الدين وعارف أكتر من الشيوخ اللى الجماعة المتشددين طالعين بيهم السما
اللى بيلعبوا على أعصاب الشباب عشان يلموهم حواليهم وبس
دى كانت ملاحظة صغيرة بس عالهامش ونرجع لموضوعنا من تانى
يمكن إحنا فعلا بننشر رأينا بحرية عالنت فى المدونات والمواقع والفيس بوك وغيره
ولكن هل الناس الفقرا الغلابة دول حد بيوصلهم
الناس اللى شقيانة طول السنة وبرده مش بتقدر تخرج من البلد اللى هما فيها ولا حتى يمتعوا نفسهم بأى شىء
الناس اللى عيالها بتستحمى فى الترعة وبيروحوا يغسلوا المواعين بتاعتهم هناك
الناس الفقرا والغلابة
نعملهم إيه ؟؟؟

إنته كمدون واجبك تجاههم إيه ؟؟؟

طبعا أنا هنا مش بتكلم عن الدعم المادى والمالى لأن الناس اللى بتكلم عليها دى يحسبهم الجاهل أغنياء من التعفف
أنا بتكلم فى حاجة مهمة جدا بالنسبة لهم ولينا كلنا
التوعية
محو الجهل والثقافة الغلط اللى هما فيها
يعنى إنته كمدون أو كفرد فى أسرتك المفروض محدش يسكت لما يشوف غلط
سواء فى الأسرة أو فى المجتمع أو الوسط المحيط
أيا كان الغلط دا صغير
مش حكاية العوم فى الترعة بس
الناس دى محتاجه اللى أهم بكتير من الأكل والشرب
محتاجه تنور عقلها
تفهم وتفكر قبل ما تعمل الشىء
تنتبه للكارثة اللى ممكن تحصلهم من الشىء مهما كانت
أظن كدا البوست (( الغرقى دلوقتى إتفهم ))
ووضح معنى كلمة المتعه بالنسبة للناس الفقرا
اللى ممكن تكمن فى سجارة وقعدة عالسطوح بليل فى الطراوة
او تكون فى تستير البنت اللى حيلتهم
أو فى ليلة حب بسيطة
حاول تغير الوضع اللى حواليك
الناس هتقول عليك حشرى ؟؟؟أو بتدخل فى اللى ملكش دعوة بيه ؟؟؟؟
أحسن ما تقف قدام ربنا وتقوله يارب انا سكتت عالغلط وسيبت مثلا عيل زى دا يغرق فى الترعة لانى كنت مكسوف اقوله متنزلش..

مش عارف أقول إيه تانى
بس مفيش توضيح اكتر من كدا

البقاء لله فى كل ضحايا الفقر والجهل ونقص التوعية وإنعدام الثقافة فى مصر
وربنا يصبرنا على مدعين الدين والمتشددين اللى ناسيين ان الدين يسر لا عسر

تحياتى
شاب فقرى

خطوة تقربنى إليك ..!

السلام عليكم أعزائى قارئى المدونة
أحبكم فى الله

اليوم والحمد لله أخدت خطوة نحو المستحيل
أو نقدر نقول المجهول
او نقول خطوة نحو اجمل احلامى
أو نقدر نقول خطوة تقربنى منها
من مين ؟؟؟
فتاة الأحلام طبعا
البوم بدأت بإنتظام مراجعة ومذاكرة منهج عالمى معتمد يخص اللينوكس (( عشقى الأول ))
الشهادة اسمها RHCE والامتحان ب 2800 جنيه
وفى مهندسين متخصصين حاولوا يمتحنوا فيها وفشلوا وسقطوا
ولو هدرسها فى سنتر معتمد (( فى اتنين بس فى مصر )) هيبقى ب 9800 جنيه فى تلات او ست اسابيع
بمعدل دراسة يومى 12 ساعة تقريبا
بدأت اليوم بمعدل عدد ساعات مراجعة ومذاكرة يوميا بشكل جنونى
لدرجة إنى من أول يوم مش قادر أركز فى أى حاجة وعايز أنام بس من التعب
تعبان من المجهود الذهنى طول اليوم ومن الشغل بليل ومن كل حاجة ومفيش جزء من جسمى مش بيتوجع
بدات المراجعة والمذاكرة النهارده مع مهندس صديق مقرب بالنسبة لى
هوا لسه ممتحن قريب كورس فى السيكيورتى اتكلمت عليه قبل كدا ونفسه مفتوحه عالدنيا
بس المشكلة فى المنهج الجميل اللى بنذاكره
إنه منهج صعب (( لأنه لينوكس ...بالرغم من انه عشقى الاول بس منكرش صعوبته ))
وان المنهج مليان ومعقد حبتين
والامتحان بتاعه يعتبر من اصعب امتحانين على مستوى العالم فى مجال ال it
الامتحانين هما ((CCIE & RHCE ))
لانه بيستمر ست ساعات وبيكون عملى مش زى بقيت الامتحانات فى الشهادات والمناهج المعتمدة
يعنى ربنا يوفقنى
أذكر فى يوم من الأيام مهندس صديق مقرب منى جدا قالى
(( قدامك خمس سنين على ما تخش الامتحان ... لازم خبرة عملى كويسة
وكمان لازم تكون فاهم كويس أوى ))
ودا خبير مفيش منه مثيل فى مصر ... وأنا عملت بنصيحته
اليوم وبعد مذاكرة وتعب وارهاق اكتر من خمس شهور هبتدى أراجع
يعنى اختصار خمس سنين فى خمس شهور ..
تعب + سهر + شغل + مذاكرة + كل أنواع العقبات
اليوم هوا اليوم الأول فى المراجعة والدراسة بالنسبة لى
7-10-2009
يارب يوفقنا
دعواتكم يا جماعة
مش هقدر اكمل كتابه من التعب
ولكن حتما سنتحدث غدا


وحتما سأصل .... بإذن الله ...وحشتينى أوى

شاب فقرى

مش عايز حد يشوفك .. يقولك عليك إن أنته ملكش لزوم

السلام عليكم ورحمة الله وبركاته
بمناسبة يوم 6 أكتوبر قررت أكتب موقف حصلى النهارده

نمت بليل وصحيت مدايق
كالطبيعى نزلت أتمشى فى البلد
بمعنى أصح عالكورنيش
وأنا ماشى شفت ولد وبنت ماشيين بشكل رومانسى أوى
قلت (( ربنا يهدى ..دا العادى فى هذا الزمان ))
لكن قبل ما أوصلهم لقيت فى إتنسن شباب واقفين
واحد منهم وجه للبنت كلام خلاها تقف
واحد منهم قرب من البنت وهوا بيتكلم
وضربها ومد إيده عليها
........
صراحة مش إستغربت
اللى خلاها تمشى مع شاب وهى فى السن دا
وشاب بالمنظر اللى كانت ماشية معاه
تستاهل أكتر من كدا
طبعا على ما عديت من جمبهم كانت البنت اتضربت
قام الشاب اللى ماشى معاها ......... معملش حاجة
خدها ومشى فى الاتجاه اللى انا ماشى فيه بالظبط
وهما ماشيين ورايا
طبعا أنا قررت أنا هعمل إيه
سبقتهم شوية
لقيت عربية بوليس
أيوة عربية (( أتارى )) من اللى بنشوفها فى الأفلام وفى أى كمين
طبعا أنا توجهت تجاه العربية
ودار الحوار التالى :
شاب فقرى : سلامو عليكم ياباشا (( من باب الأدب مش أكتر ))
الظابط الأول : وعليكم السلام ... فى إيه
شاب فقرى : أنا شفت بنت ماشية مع شاب اللى هناك دول (( وشاورت عليهم ))
الظابط الأول : وبعدين ؟؟؟؟
شاب فقرى : وبعدين قام فى اتنين شباب واحد منهم ضربها أو إتحرش بيها معرفش صراحة .
الظابط التانى : فين دا
شاب فقرى : هناك أهوه هما دول .
الظابط الأول موجه الحديث للظابط التانى : هاتهم وتعالى و إقعد معانا يا فقرى شوية
(( طبعا محدش منهم طلب يشوف البطاقة بتاعتى ولا حتى الكارنيه ولا أى حاجة ...
حاجة حلوة أوى إنهم ركزوا فى المشكلة وسابوا أى حاجة تانية ))
قعدت معاهم شوية ...
الظابط الأول بيطلع سجارة وبيكلمنى: سجاير يا شاب
شاب فقرى : شكرا ياباشا مبدخنش :D
ولع سجارة وانا قاعد معاه و أنا مستنى
الظابط الأول : أنا جبتهم
طبعا البنت كانت ماسكة الموبايل وواقفة عادى مرتبكة والشاب اللى معاها ماسك سيجارة وبيدخن
الظابط التانى : مين البنت دى ؟
الولد المعفن : خطيبتى
الظابط الأول : إرمى السجارة ياله
رماها الشاب المعفن وبدأوا يتكلموا
الظابط : إيه الحكاية فى حد ضربك
الشاب المعفن : دى خطيبتى وابن خالتها ضربها لانه كان عايز يتجوزها ورفضت واتخطبت لى
والواد دا متغاظ وإحنا إتصلنا بخالها
البنت وهى ماسكة الموبايل : أيوا صح
الظابط الأول : طيب إتصلى بأبوكى
الشاب المعفن : والدها متوفى
الظابط الأول : إتصلى بخالك
البنت: الموبايل فاصل شحن (( مع انها كانت مسكاه وبتتكلم فيه من دقيقتين ))
الظابط الأول : مش تبهدلى نفسك ولا تعرفى الأشكال دى
لأن إنتى لو أختى مش هرضى أى حد يبصلها لو حد بصلها هقتله
البنت فى هدوء :طيب
يلا إمشوا من هنا
وبعدين أنا بكلم الظابط التانى اللى كان جوا العربية
شاب فقرى : محتاج منى حاجة تانى ولا أمشى ؟
الظابط التانى : لاء ياباشا إنته اللى لو عاوز أى حاجة إحنا تحت أمرك فى أى شىىىىء
ما هوا لو كل واحد فى البلد دى عمل زيك وشاف غلط وقال عليه البلد مكانش زمان دا حالها
شاب فقرى : كل سنة وإنته طيب
كان فى ظابط تالت جه بعربية مليانة
قالولى وإنته طيب
وصلت الموبايل وشغلت الأغانى ومشيت

***
أنا بحكى الموقف دا ليه وعملت كدا ليه ؟؟؟؟
لأنى لأول مرة فى حياتى أشوف بعينى تعامل بينى وبين الشرطة ومشوفش اللى بيتحكى عليه
يعنى مثلا كان ممكن اى ظابط من الاتنين يقول انى طرف فى الموضوع ويدخلنى معاه ويودينا القسم كلنا
أو كان ممكن يقولى بطاقتك والكارنيه ويعمل أى مشاكل عالفاضى معايه أو مع الولد والبنت
لكن كان واضح جدا إن البنت لا مخطوبة ولا بتاع وإنها ماشيه مع البوى فرند بتاعها بتتفسح مع جنابه
فاكرة نفسها ماشيه مع حامى الحمى وإن دا اللى هيسندها لو شاب تاني من اللى كانت ماشية معاهم قبله شافها وإتغاظ
مش عارف أقول غير
إنى لو مكنتش بلغت مكنتش هنام أسبوعين بالميت كدا
ومكنتش هبقى راضى عن نفسى لأنى فعلا مرضاش بكدا فى مجتمعنا
وفعلا إتضح لى سلامة مبدئى إنى مش أمشى مع أى واحدة فى أى مكان بدون صفة شرعية أو علاقة رسمية
ولو مشيت مش هتمشى عالكورنيش
ولو مشيت عالكورنيش مش هسكت لو حد فكر يكلمها حتى أو يبص لها
فى ناس ممكن تشوف إنى فضحت البنت .. بس ياترى اللى حصلها مكانش فضيحة ؟؟؟؟
مش عايز أى واحد يقرا البوست دا يبقى سلبى
أمال مصرى إزاى وبتحب بلدك وعايز تغيرها وتقضى عالتحرش والفساد
ولا هوا الناس تفتكر الشرطة لما يبقى فى حاجة مش قادرين عليها ؟؟؟
والحمد لله إنى عملت شىء يرضينى تجاه بلدى فى ذكرى 6 أكتوبر
إتصرفت تجاه حالة من الفساد فى الأخلاق والمسخرة
إتحركت وأخدت موقف وبلغت
ومقدرش أقول فى الآخر غير شكرا لجهاز الشرطة فى مصر .
بالرغم من إنى كل أما أمشى فى أى مكان فى مصر بيطلع لى واحد يقولى بطاقتك
ويحسسنى إن شاب فقرى خطر عالشعب
(( لأنى body bulding شوية ))
بس برده عندهم حق وأنا مبسوط بيهم
وزى ما فى عناصر فيها زى الزفت فى ناس كويسة جدا
ومفيش جهاز أو شركة فى العالم كله مفيهاش فساد
يمكن اللى بنشوفه من فظائع منهم عالنت بيحصل تجاه ناس تستحق كدا
لأن عن نفسى كنت ممكن أقتل الشاب اللى ضرب البنت لو كانت أختى سواء أنا من الشرطة أو حتى بتاع بليلة
ودا موقع وزارة الداخليه عالنت للإبلاغ عن أى تجاوز
وفى الآخر ... بحبك يابلدى

(( أنا عمرى ما هسكت عالحق ...إوعى تفكر فى يوم تهرب ))

شاب فقرى

----
ملحوظة البوست اللى فات ليه تكملة .لأنى حسيت إن مفيش حد فهم المغزى منه غير رد واحد.
الكلام اللى باللون الأزرق من أغانى راب هوا والعنوان

الغرقى

حتى هذه اللحظة مازلت فى حيرة كبيرة ماذا سيكون إسم هذا البوست
ولم أصل بعد
ولذلك سنترك هذا لمشاعرى بعد الكتابة

***
الصداقة من أسمى وأجمل العلاقات فى الحياة
التى لا نستطيع الإستغناء عنها ولو لوهلة صغيرة
بالأمس كنت أزور مجموعة من أصدقائى المقربين جدا فى محافظة قريبة نسبيا من القاهرة
( طنطا - الغربية )
أقطع تقريبا 90 كيلو مترا بالسيارة حتى أجلس معهم ساعتين وأعود مرة أخرى إلى منزلى المحبوب :( :(
لا أستطيع وصف مدى فرحتى بلقائهم جميعا وكلنا جالسين غارقين فى أحاديث تخصنا وتخص أعمالنا
وحتى تخص حياتنا الشخصية وتفاصيل لا أنوى ذكرها
ولكنها تظل دوما اجمل اللحظات التى اجد فيها نفسى وأشعر بأن روحى قد عادت إلى مرة أخرى
وإن كان السفر لذلك المكان البعيد يفتت قلبى
فكلما مررت على بلدتى القديمة (( بركة السبع )) أسعر بأننى أعشق هذا المكان
أشعر وكأننى ينبغى ان أنزل من السيارة أدفن نفسى فيها حتى لا أفارقها أبدا
وصلت بالامس فى تمام التاسعة والنصف
جلسنا نحكى فى أحاديثنا المعتاده فى المكان المخصص لنا
كافتيريا هادئة جميلة تطل على النيل
أو بصراحة أكثر تطل على (( ترعة القاصد ))
كنت دوما أقول لأصحابى ساخرا
(( بقى جايبينى من القاهرة مخصوص عشان أشوف حلاوة الترعة وجمالها ))
كل مرة كنت أتخيل أنها مجرى مائى صغير
وبالرغم من قدرتى الفائقة على الغرق فى شبر ماء إلا أننى دوما أتخيل نفسى وأنا أعوم فيها وأعبرها بسلاسة
وأنها (( صغيرة ))
إنتهت الليلة بكل جمالها ورونقها وكل ما أحببته فيها بعد جوله حتى الثانية صباحا فى شوارع طنطا الرئيسية
ميدان الساعة وحول السيد البدوى والمنطقة الرائعة تلك
وفى أثناء العودة مررنا مرة أخى على ترعة القاصد
وهنا دار الحديث التالى :
صديقى 1 : تعرف يا شاب هنا غرق اتنين من اسبوع
شاب فقرى : نعم
صديقى 2 : كانوا مين دول ؟؟؟
صديقى 1 : تعرف الواد محمود قطة
صديقى 2 : اللى كان بيركب الموتسيكل ويلف البلد ويشغل أغانى بصوت عالى دا ؟
صديقى 1 :هوا الواد الر** دا
شاب فقرى : الله يرحمه متقولش عليه كدا .. وبعدين عايز أفهم انتم بتتكلموا جد؟؟؟
صديقى 1 : آه والله كان نازل مع واحد صحبه يعوم هنا فى الترعة دى وكان معاهم عيل صغير
قعدوه فوق جمب الهدوم يحرسها ونزلوا مش طلعوا
الطفل فضل ربع ساعة واقف وبعدين خد الهدوم لاهل الطفل وقالهم ان هما نزلوا الترعة ومطلعوش
وبعدين يا فقرى قاموا جه الغواصين وطلعوا واحد من الاتنين ودفنوه والتانى طلع بعده بتلات تيام
مالك يا فقرى
انته هتعيط ولا ايه
امال لو كان صحبك بقى
شاب فقرى : لو كان صحبى انا كنت ممكن اعيط فعلا
بس مبعرفش اعيط يارجاله
هوا انتوا بتنزلوا زيه كدا يخرب بيوتكوا
صديقى 1: ننزل نعوم ايه يابنى انته شايفها حلوة اوى
انته اتجننت ؟؟؟؟
دى عالم جاهلة
وهوا ايه اللى يخليه اساسا ينزل يعوم هنا
صديقى 2 : فى ناس بتحب كدا يابنى والله دا بييجوا من البلاد اللى حوالينا يعوموا هنا
شاب فقرى : هى صحيح الترعة نصيفة وجميلة بس مش للدرجة دى يا جدعان
انتم محسسينى اننا قدام حمام سياحة الهيلتون
صديقى 3 : والله يابنى أكتر من كدا
أنا نفسى العوم دا عندى هوايه
صديقى 1: دا حمار متصدقوش دا مبيعرفش يعوم ولا عمره نزل ولا يعرف ينزل حتى
شاب فقرى : على الله الناس يبقى عندها وعى وتتعظ شوية
انتهت الليلة فى سلام
وهنا نعود إلى موضوعنا الرئيسى
شاب فى مقتبل العمر غرق فى الترعة
أقسم لكم أنه لو كان أى شخص اخر حكى لى هذه القصة
لم أكن لأصدقه حتى لو أقسم بكل شىء
ولكن إنها الحقيقة
مازال فى بلادنا أولئك الطيبين
من يعتبرون الترعة فى أى مكان شرم الشيخ
من يعشقون مياهها بقذارتها وبكل ما فيها
وربنا يهدى عباده
شاب فقرى
------
ملحوظة هامة:
ماكتب حقيقى 100 % وغير قابل للسخرية أو التهكم من أى تعليق .
من أراد واعظا ...فالموت يكفيه .
انا من سكان قاهرة المعز ومليش اى علاقة بالحاجات دى بس بحكى الموقف عشان ندعى للى توفوا
لا انا ولا صحابى لانهم ساكنين هناك بس