عام نتفوا علي بعضينا

من فتره كان في برنامج تلفزيوني وكانوا الشارع بيصوروا ومستضيفين واحد المهم ان الراجل بيسالوه بيقولوا له ايه مشكلتك فقالهم مشكلتي في الصرف الصحي ، قام المذيع قاله ماله الصرف الصحي فكان رد الراجل البريء التلقائي : عم نشخرا علي بعضينا 

دلوقتي الجو ليل وانا محبط جدا وطول اليوم قعدت اكتب اني يائس ، مش عارف ليه كل دا او مصده ايه ، رمبارح كنت بتكلم مع واحد صاحبي فبقوله انا مشكلتي اني مش فاهم الناس كان الناس كلها بتتكلم هندي وانا الوحيد اللي بتكلم عربي ولا انا فاهمهم ولا هما فاهميني ، فالراجل فهم اني بتكلم عن اللغه والثقه بالنفس وبعدين قلتله اني مبعرفش اتعامل بالنسبة لي الناس والتعامل عموما لغز كبير وبحس معظم الوقت اني مش عايز اتعامل مع حد ، الفتره دي يمكن صعبه حبتين ، عارف يا ( عزيزي ثيو ) الفترة دي وسخة فشخ وبكرهها وعايز العب بوكس او اي رياضة عشان افرغ الطاقة دي ، النهارده نزلت شغل جديدة تقريبا لو انا والناس بنتف في بق بعض هينتقل بيننا مرض الكورونا بصعوبة عن الخرا اللي بعمله وبيعملوه ، انا قرفان فشخ وحاسس اني عايز اتغمس كلي في حمام سباحة كله كلور ، انا تعبان اوي اوي وعايز اريح بالي ، متعرفش حد يريحني ياعم الحاج

دلوقتي قاعد ومشغل المقطوعه بتاعه كلاود اطلس وفاكر لما كان بيكتب الجواب وبيقوله في مشاعر بتعيش وبتنجو عبر الزمن ومش معني اني مش جنبك اني مش حاسس بيك او مش متصل بقلبك علي خط مباشر 

انا حاسس اني عايز اقعد كام سنة لوحدي فيهم اصفي دماغي لكن مفيش وقت ، دلوقتي بس عرفت ليه الناس العجوزه بتقعد عالمعاش سنين مبسوطة لانه ما صدق يلاقي وقت يبقي تافه فيه ويقول اي هري ويعمل اي هبل والسلام 

انا امي وحشتني جدا وابويا كمان واحشني ووحشني انام في اوضتي او انام وانا مشتريح ومشوشايل هم ، النهارده كان فرصه حلوه والله بس ضاعت للاسف لاني مزاجي اتعكر 

عزيزي وصديقي الحبيب مش لازم والنبي يبقي محور المكالمة كلها انت عايز ايه خليني في ضمن افقك في الرؤية حسسني اني مهم وانك متصل تطمن ليا عشان صاحبك وبتحبني ، عارف يا ابراهيم ، انا يائس أوي وإبتديت أصدق إني لازم هييجي وقت واطير فيه  ويمكن اروح البحر او اسافر امريكا او اقطع ورقي واروح اعيش في ايطاليا عالبحر وطز في اي حاجة ، انا راجل نفسي احس بالطبيعه وبالحياة واتبسط والحاجات االتافهة بتبسطني 

بيبسطني انك تهتم بيا او تساعدني ابقي كويس وبيبسطني انك تحتويني وتسمعي وتطبطب عليا وبيبسطني انك تصبرني او تخليني احس ولو لثانيه انك حاسس بيا 

واكتر حاجة بتبسطني :  الإيمان

لان ياصاحبي حتي الإيمان بينجي ومش بس اللي مآمن لكن اللي آمنت بيه كمان بينجو 

عايز اشرح والله ان اللي امنت بيه مش هيبقي عايز يضيع ايمانك وهيحارب اكتر لان غريزه البقاء ولان عنده حاجة يخاف عليها بس بصراحة مليش نفس وعايز اقدم ادخن واشرب كوبايه بيبس واشوف فيلم انفينتي وور تاني بتاع زانوس واقعد استرخي قبل انلوم عشان بكره يوم طويل وهتفشخ شغل ويمكن نتصاب وبالمناسبة انا كدا تحطيت في شريحة الشخص اللي بنسبة تسعه وتسعين فالميه هيتصاب 

خالص محبتي ولو جرالي حاجة اكيد هكتب وصية واكتب بوست وداع مش هنسي مدونتي الحبيبة يعني

تصبحوا علي خير وانتم اهل له وانا مستريح ومطمن ومتصدق وعارف انام ومبسوط 

بس كل دي احلام والاحلام للاطفال