الجمعة، 31 يناير 2014

إختيار

" سأموت وحيداً و عارياً لأن الله ليس له وجود "
رضوي عاشور / ثلاثية غرناطة 


***
عاشق سارح فى الملكوت , ميهموش العمر يفوت , يدفع فى الحرية حياته , لو إتكتف فى لحظة يموت 
ريهام عبد الحكيم / عاشق سارح فى الملكوت 
***
أنا مش عارف ليه ؟
هوا السؤال الأقدم فى التاريخ فعلا هوا ليه ؟؟  ولا ياتري كان (إزاي ) ؟
مش عارف الصراحة بس السؤالين أقدم من بعض ؟
ليه كدا يارب ؟
ليه بنخسر إيماننا ؟ هوا فعلا الإيمان ممكن نخسره ؟ ممكن نفقد إيماننا بشخص ما ؟ ممكن نفقد حاجة بالقوة دي ؟؟ طيب يارب هوا ليه بنفقد إيماننا بيك وبنضيع ؟ أو بندور عليك كل شوية بحيث نحس إننا غلط مليون فى المية لأن كل الناس اللى حوالينا ثابتين علي نفس المبدأ ومآمنين بيك ؟ بس ياتري هوا الإيمان بيك مجرد كلمة بتتقال ؟ هوا مش برده الإيمان بيك حاجة أكبر من الكلام ؟؟؟ 
طيب يارب ليه مبتتدخلش فى كل الأحوال السودا دي ؟ هوا إحنا مش عبادك الصالحين ؟ ولا حتي لو كنا مش صالحين هوا إنته مش كريم ورحيم يارب وعالم باللى فينا ؟ ليه مبتظهرش فى الأوقات دي اللى بتبقى فيها الصدمات أقوى من إن قلوبنا وعقولنا وإيماننا يتحملها ؟؟؟
يارب أنا مش عايز أجي الدنيا وأمشي وكأني مجيتش وكأني كنت مجرد إسم ؟ يارب أنا مش عايز أكون مجرد تلات ورقات : شهادة ميلاد وبطاقة وشهادة وفاة , انا عايز أعمل حاجة , فى ناس بحياتها بتحيي أمم وبترشد ملايين من بعديها وفى ناس موتها بيصحي أمم وبيحرك ملايين وبيسيب علامة فى التاريخ 
أنا مش عايز أروح أعزي صاحبي وأقوله البقاء لله , مبحبش المواقف دي ومبقدرش أتكلم فيها وبحس إن كل كلمة ممكن تتقال ما هي إلا جملة مبتذلة مينفعش تتقال , يارب أنا ببقى فاهم اللى حاسس بيه واللى حاسس بيه أى كلمة هقولها جنبه هيبقى ملهاش أى معني وهحس إني عاجز 
يارب أنا عارف إن المواقف الصعبة بتصنع الرجال والأيام السودا بتخلي الواحد يتعود عالمر عشان أكيد فى حاجات صعبة لكن لما بنقع ومبيبقاش فى أي حاجة تقول أي حاجة ولا حتي علامة ولا إرشاد نعمل إيه ؟
يارب أنا عارف إنك فى كل مكان وحوالينا بس يا هلتري دا هيخليني مش لوحدي لأنك علي طول معايه ؟ ما إحنا بنتوجع وبنكمل وبنحاول وبنحاول لحد ما نيأس تماما وندور علي طرق تانية لأحلامنا ونطلع من عزلتنا بكل وجعنا فاكرين إن اللى بنحبهم هيطبطبوا علينا او حتي الناس اللى عملناهم ووقفنا جنبهم هيعملوا أي حاجة لكن بنلاقى الشر فى نفوس الغلط والتراكيب الغلط فى النفوس اللى بتضيعنا أكتر وأكتر 

يارب أنا بشكرك علي كل عقبة عشتها عشان العقبات دي قوتني وخلتني عارف أعمل إيه وخلتني أنا وفى نفس الوقت مع كل عقبة كنت بزداد تصميم وقوة رهيبة علي إني أكمل وأمشي فى الطريق الصح أو يمكن فى الطريق بتاعي اللى بتمناه حتي لو كان غلط بس يارب مفيش فى إيدي حاجة أعملها عشان أخليه صح .... أنا مجرد إنسان مش هغير موازين الكون 
هستعمل حقي فى الإرادة الحرة ومش هغير الحقايق مش هقول عالغلط صح بس هختار الغلط وأنا متحمل مسؤليته أيا كانت لأني عايز دا 


***
العزلة والوحدة مش الصحرا اللى بنروحها لما بنيأس ,مش بنروحها عشان نندفن 
العزلة والوحدة لكل الناس لكن كل واحد بيستعملها بطريقته 
واحد زي حالاتي بيروحها عشان يستمتع الصراحة مش عشان يتعذب ويعيش فى الألم 
بروح عشان بلاقى نفسي وبعرف أتكلم معاها كويس 
عشان هناك بيبقى فى قوة مفرطة لأن مبيبقاش فى حاجة بتشد أو بتكسر ولا روابط بتحكمنا ولا حاجة تشدنا لتحت
فى ناس كتير فاهمة الموضوع غلط
***

عالمزيكا 
قلبي فى إيدك 
موج البحر شديد 
صوت فيروز 
الرمل 
الهوا 
صوت العزف عالكمان من Awake and alive 
مش إنتي اللى هتشديني للضلمة 
مش هتقدري تطفي النور تاني 
المفتاح مش فى إيدك 
الرسم مبقاش علي ورقك 
إنتهت السيطرة 
إنتهى العهد دا 
هيبتدي عهد جديد 
أنا ممكن أبقى فكرة أو إيمان أو قيمة أو أمل
بس أنا فى الحقيقة أكبر من كدا 
أنا إنسان  
إنسان لحم ودم وبيحس ودا اهم من كل المذكور 
كل الحاجات اللى فاتت أجزاء مجرد أجزاء مني 
بقدر أغير وأصنع وأكريت عوالم من الصفر 
بقدر علي مليون حاجة 
وأولهم إن مش إنتي اللى هتموتيني 
ولا إنتي اللى هتطفي النور 
ياااااااااااااااااااااااااااااااااااااااااااااااااااااااااااااااااااه 
مفتقد ( إسكيب )
 جدااااااااااااااااا

بقى عندي القدرة إني أنتقم وإني أدمر عوالم كاملة وحكايات كبيرة فى لحظات 
بقي عندي القدرة إني أكسر بكل شكل ممكن ومعملتش دا ..
المسألة كلها إختيار 
وأنا خلاص إخترت الإختيار اللى يخليكي فى كون و أنا فى كون آخر 
 كملي وعيشي 
زي ما بتجري وتهربي 
جه الوقت اللى آجري فيه ...
جه الوقت اللى نبدل فيه الأدوار 
حظ سعيد فى الدور بتاعي 
وتذكري ... العدالة تنبع من التوازن وهي اللى بتخلي وجود الخالق فكرة قابلة للتصديق 
و عن نفسي شايف إن هوا دا الأوان 
Have Fun
#كرة التلج #ساعة #سنين #قصر_الأميرة_بطاطس
***
هي نسيت أنا مين من فترة طويلة أوي 
نسيت الشخص اللى كان موجود فى الأول ولسه بتتعرف عليه 
هي وغيرها كتير 
مش عارف ليه الناس بتنسي  , ومش عارف ليه الناس بتتوه , هوا الطريق مش واضح ؟
؟؟؟
***
أحيانا القلوب بتخاف تمشي فى الطريق 
 المشكلة كلها إن القلوب ممكن متصدقش إن اللى قدامها حقيقي من روعته 
أو تفتكر أنها ببساطة متستاهلش دا ومتستاهلش دا كله 
زي ما كنت بقول زمان وزي ما قريت فى الخيميائي من كام يوم

شكرا باولو ... خلي التايهين تايهين , كل واحد يتحمل نتيجة أفعاله 

***
كنت خايف لما أبص لنفسي وأركز وأدون ملاحظاتي عن شخصي 
خوفي مكانش فى محله 
لقيت عيوب كتير جدا وقدامي وقت كبير جدا أقدر أعالج كل العيوب دي 
حالة من الإستقرار النفسي والعاطفي مخليني رايق للدرجة دي 
اللى تخليني أركز بدون تعب
عندي وقت أقرا عن أينشتين وعن فلليني وأقرا كل الكتب اللى نفسي أقراها 
عندي وقت أحدد فيه حاجات كتير أوي هتخليني مبسوط 
يارب يسعدني ويقويني عاللى بتمناه 
والأهم من دا كله يصبرني 
لأن يا حبيبتي الطرق الطويلة بنكملها وبننتصر فيها بالصبرررررررر مش بالقوة 

يارب 

***
أنا حر 
وهفضل حر 
وزي ما بطلت سجاير الفترة اللى فاتت 
هبطل حاجات تانية بحبها برده 
بيس 
***
إختيار 


شاب فقري

هناك 5 تعليقات:

Story pain يقول...

فى ناس بتفقد ايمانها وهى فى طريقها للايمان الاقوى والحقيقى دى الناس الصادقه اللى فعلا كانت بتدور على الحق زى الدكتور مصطفى محموداللى بعد الحادوتوهه وتخبط وتفكر وصل للايمان وحاسينا بايمانه فى كل كلمه كتبها بعد رجوعه للاسلام ..وفى ناس بتفقد ايمانها لانها مش عايزه تشوف الحق ومش عايزه توصله هى بتدور على نفسها ورضاها وعدم صدقها بيخليها ماتوصلش...ربنا يثبتنا ويميتنا على الاسلام والايمان

Story pain يقول...

دايما بلائى عنده اجابات للاسئلة اللى مش بعرف اجابتها او اخاف اسئلها زى الاسئلة اللى انت كاتبها

http://www.youtube.com/watch?v=hIo4k_fUS9g

غير معرف يقول...

بص
احنا ناقصنا شىء واحد بس
اننا ندرس عقيده
عارف لو.درستها؟؟
هتعرف تجاوب على كل الاسئله اللى جواك دى

Do3aa El_attar يقول...

عارف ياكريم .. اوقات لما بسأل الأسئلة اللي بتسألها دي .. بفتكر "حبيبة" بنت أختي ..

حبيبة أوقات بكون خايفة عليها جدًا فبقولها مثلاً ماتعمليش كده عشان هيأذيكي .. فبالتالي بعقلها الصغير هي عايزة ده وشايفة ان مفيش اي حاجة فيه بتأذي واكيد بتزعل مني

وقتها بقى بفتكر ربنا .. حاجات كتيرة ربنا بيمنعنا عنها وبيمنعها عننا لأنه هو شايف واحنا مش شايفين .. شايف مثلاً ان "طبطبته علينا" لازم تتأخر في التوقيت ده عشان نتعلم .. ولأننا لسه "صغيرين" فأكيد مش قادرين نستوعب ده .

دمت بخير :)

Sahar Elgafary يقول...

بسم الله والصلاة علي رسول الله
يعني مش عارفه أبدأ منين بس
زمان وأنا صغيره مع أول أختبارات لينا في الحياة بينفتح كتابنا علي أول إختبار حقيقي وهي سن المراهقه.. اللي بسببها بتتشكل شخصياتنا فأول حاجه بنعملها أيه الحب العشق الغرام الذكريات لحد ما نقع في الهموم من كتر ما القلب تعب وانهد وأحنا يادوب 13 و14 سنه ويادوب لسه الكتاب مفتوح القلب الصغير متعلق بأشخاص أو أماكن أو مظاهر وذكريات لحد ما يموت
طب آخر حاجه بنعملها أيه غير بردوا دائرة العشق والغرام ونفضل ندور ندور لحد ما كل حياتنا تبقي بعيده تماما عن ما خلقنا من أجله وهو الإيمان
بما كتبه الله عليك والتسليم به والرضي فيه ولو بغير رغبتك ...فربما منعك فأعطاك وربما أعطاك فمنعك...وكم منا أكمل قصص نجاحه أو حبه وأيضا لم يجد السعاده..
يا عزيزي أملآ فراغات قلبك بالله تسعد وتهنأ لأن السعادة هي أن يكون حب الله ورسوله أولي من حب الدنيا وأفرادها...تعرف ..
كلما منعتني الأقدار شيئا أقول اللهم إن كان فراق في الدنيا فلقاء في الآخره
حين تعيش علي أمل الجنه بجمالها فيما لا عين رأت ولا أذن سمعت ولا خطر علي قلب بشر حينها فقط تنزل البلايا وأنت تحمد الله أن رفعك درجه بصبرك أو ربما خفف عنك ببلاء صغير رفع بلاءا أعظم...كل خيارات الله نعيم أخرج م الدائره وأنظر من الخارج من فوق ستتعلم كيف تسير الأمور فنحن في أختبار آجلا أم عاجلا سينتهي ...
أحيانا أنظر بشكل آخر كلما كادت نفسي علي أقتراف ذنب واجهت عدوي علي أنه هو يحفر لي ذلك الذنب لأقع لأكون معه رفيقتا في الجحيم ...فأبليس آيس من رحمة الله يبكي يحسدنا لأن الله أقسم علي نفسه أن العبد مادامت روحه في جسده يذنب ويتوب ويتوب ويذنب إلا غفر له لأ وبدل سيئاته حسنات...لآ وإن هم بسيئه ولم يفعلها كتبت حسنه ..وإن هم بحسنة ولم يعملها كتبت حسنه وإن عملها كتبت عشره..بربك ما هذا الحلم وهذه الرحمات وإن صليت سنن الظهر الثمانيه والظهر أربعه حرم جسدك عن النار ... يعني لو حد عند أمه سرطان قلناله خد الدوا ده جديد أدفع مليون دولار وها تخف ها يشتريه
وأحنا ربنا يقولنا صلي طب قول أذكار الصباح والمساء...الخ الخ أي حاجه تبت عليها دائمه صغيره وهاتدخل الجنه ...نقول ربنا عمل فينا وسوا ومش هو رحيم ومش هو ومش هو..
يا عزيزي نحن جميعا صنفان إما جاهل بدين..يفوت حياته في قرآن الشياطين كما أخبر المصطفي الأمين..في المعازف والأغاني التي تصيب القلب بالهم والحزن عكس القرآن الشافي علي صوت مشاري راشد أو عبد الباسط
أوصنف يعرف ولا يطبق ...مصيبه..
الجنه حلوه قوي
والحياه قصيره قوي
وعندنا باب في الجنه للصائمين..يعني صك نجاه من النار
وعندنا باب للقائمين
والمتصدقين
وعندنا صيام يوم 13 و14 و 15 يذهبن وحر الصدر أي الهم اللي بيكبس الواحد بيقي عايز يموت احسن وكل الناس تقول مخنوقه مخنوقه طب ما تصوموا سبحان الله والحمد لله ولا إله إلا الله والله أكبر الملائكه قامت زرعتك نخله في الجنه فورا...يعني ايه يعني صك نجاه من النار ترجم ..أفهم..حلل...واتعلم آيه ونفذها
كن قرآنا يمشي علي الأرض وخلي طموحك فوق مش مجرد حب نبدأ بيه حياتنا وتنتهي بأمه.
وفي الآخر ما عملناش حاجه لأخراتنا
وكما قلت أخي الكريم هي وساوس شيطانيه يجعلنا نسأل حتي في النهايه يسقطنا فيما قلت هو مش ربنا رحيم ليه مابيرحمناش الخ الخ أيوه يا إبليس اللعين هو رحيم حتي أنه لبي طلبك حين قلت له أمهلني الي يوم يبعثون ...فسبل حلمه عليك يا من عصيته وأنت في جنته ومع ملائكته وعفي سلفا حين كنت أسيرا وصعد بك من الأرض للسماء وأسكنك جنته حتي أصبحت طاوس الملائكة من كثر عبادتك وصلاتك ولكنك غير مخلص منافق فأمسيت مرجوم مدحور بغرورك لأنك لم تسجد آدم فحسدته فكان دمارك يا صبر الله عليك وصدقت وأنت الكذوب...بأنك لن تقدر علي عباد الله المخلصين...
اللهم إجعلنا منهم وثبتنا علي دينك وأقبضنا وأنت راض عناآمين والمسلمين
.شكرا لطرحك ...
ونأسف لتطويل.