الخميس، 19 سبتمبر 2013

عن نجاح عظيم

النهارده حسيت إني عملت حاجة مهمة جدا 
طبعا فى بوست لسه مكتبتوش أو ببساطة حاجات لسه مجبتش سيرتها بس داخل أسخن كدا عشان أعرف أكتب لاحقا وأتكلم عن نقطة النور بكلمتين وبعدين أكتب البوست ...
النهادره كنت فى آخر أيام تدريب ورشة مسرح الشارع اللى انا مدرب فيها ( ورشة بره الصندوق )
النهارده جالنا فى آخر الأيام عمر 
وهوا شاب متأخر ومصاب بمتلازمة الداون أو بتأخر عقلي 
عمر عايز يمثل ويشتغل ومصر يركز ويعمل الحاجة اللى بيحبها 
النهارده فى ال Feed Back واحنا بنتكلم بعد الورشة 
عمر قال : شكرا ليكم كلكم وأنا مبسوط بيكم جدا 
وكمل كلامه وقال : ومبسوط أكتر بوجود مدرب وكابتن وأستاذ وحد بيعلمني وبيساعدني الكابتن كريم 
وبعدين ...
وعمر سلم عليا وحضني يا ولاد ...
أصلا وهوا شغال وبيمثل أنا كنت فى قمة سعادتي 
ولما حضني كدا وقرب مني فى وقت قياسي وقدر يتعامل معايه ويثق فيا ويتعلم مني وكمان أبقى فى مرتبة مهمة جدا عنده دا كان نجاح بالنسبة لى 
أقدر أقول إن فى حياتي أحضان مبنساهاش 
الحضن دا إنضم للأحضان دي وعمري ما هنسي كدا ....
أنا فى غاية الفرحة والسعادة والفخر والكل حاجة حلوة 
شكرا يا عمر بجد ...
وشكرا يا مرام 
وشكرا لنقطة النور 
شكرا مليون مرة 
والبوست الجاي بعنوان أحضان 


بكره هيكون العرض المسرحي الختامي للورشة وشاركت فى الاخراج والتمثيل برده هشارك فيه وطبعا فى الاعداد والتدريب للفريق كله , أنا مبسوط جدا ... يارب خير إن شاء الله 
الإيفنت هتلاقوه عالأكونت عالفيس بوك وهتلاقوه علي صفحة التحرير لاونج برده : بكره فى شارع هدي شعراوي فى وسط البلد الساعة اربعة ونص ...

أنا بس عايز أقول إن لو العرض فشل ( لا قدر الله ) وإن كل حاجة باظت هفضل طول عمري سعيد وفخور تماما بالايام دي وبكل اللى جري فيها 
وهفضل فاكر حضن وتقدير عمر وهفضل بعتبر اللحظة دي من أكتر لحظات سعادتي وفرحتي وأعظم نجاحاتي ...
شكرا لعمر بجد
اللى خصني من دون كل الناس وكان سعيد بيا :)
صحيح قال كابتن كريم بس عادي يعني 
الله 
تصبحوا علي فرحة وربنا يكرمنى واعرف انام مرتاح 

البوست الجاي مش عارف هيبقى عن العرض ولا عن ديكستر ولا عن اغنية اجنبي ولا عن الأحضان 
الله اعلم 
اللى هحسه اكتر بقى :P

أراكم بعد الفاصل :)


شاب فقري 

تحديث :
صحيح : أديني كتبت أهوه يا دعاء وموجود :) وبكتب ولسه بدري يعني أوي على الرحيل اللى هيبقى فى 26-10

هناك تعليقان (2):

doaa elattar يقول...

^ــــــــــ^

الله

إحنا طول مااحنا عايشين وبنقابل في ناس بيبقى نفسنا نسيب بصمةمع كل حد بنقابله .. وبنفرح لما بنعرف إن وجودنا فرق معاهم .. لكن مع عمر لو سيبت بصمة البصمة دي بتسيب أثر جواك انت لا يُنسى زي مايكون هو اللي علمك وفرق معاك مش انت :)

ربنا يوفقك ياكريم ويارب تفضل كدهون تكتب على طول :)

Nelly Aly يقول...

بما أني بطلت أصدق أي حاجة في الفترة اللي فاتت وجالي حالة إنعزال تام وتقريبا ودعت كل حاجة في حياتي اللي فات..

إلا أن البوست ده كان نقطة نور ليه..

وأوحتلي كمان أني أكتب عن النقط النور اللي في حياتي..

ربنا يفرح قلبك وينجح العرض المسرحي..

نيللي علي