الثلاثاء، 18 يونيو 2013

الرجل الذي حلم كثيراً

- الرجل الذي حلم كثيراً بالمنزل 

حكايتي , حكاية الإنسان الذي لم يتمني من الحياة سوي منزل , بيت , بالمعني الحقيقي للبيت , أربع جدران تبني بيت , بيقولوا كدا , لكن ياتري هل هوا دا اللى بيتطلبه بيت ؟ البيت بيتطلب حب وأمان وإستقرار وفرحة وأغمض عيوني , وساعتها أحس إني بجد مرتاح , مش مجرد لحظة ولا كلمة , الدوام الأبدي للمعني الحقيقي للأمان , الدوام مستحيل لكن الواحد هيحارب عشان يخليه دائم , يبقى فى بيت وحب وراحة وأمان , مش عارف دا مش واصل لكل الناس اللي عرفتني ليه ؟ نفسي فى بيت يتقبلني ويضمني ويحسسني إنه حاببني بكل ما فيا , بالخير والشر , بالعزلة والكبت والجنون والفرحة والخجل والرغبة والشوق , هوا الموضوع دا صعب أوي كدا ؟
أحيان كتير سالت نفسي ليه الناس مبتحاولش تفهم كلامي ؟ لازم أكرر كلامي وأكرر و أكرر ويبان إن كريم شخص لحوح مصر علي إنه يعيد الكلام وكأنه بيسمع سورة فى حصة الدين فى إبتدائي , يااااااااااااااااه أنا ضاع مني وقت كبير أوي , احيانا لما بفتكر حاجة زي دي عيوني بتدمع وبتألم , بحس بإن روحي اللي ربنا خلقها بكمال معين - بحيث تمنحني طاقة وتخليني أقدر أعيش زي ما خلق أي روح تانية - بحس إنها عاملة زي نقطة من النور محبوسة جوا صندوق معتم جدا والنور بيتوجع لما بيتحبس بين جدران مصمته , آه والله , عارفين إن فى بعض الأساطير الروح ممكن تتعذب بكل شكل لكنها مستحيل يتم تقسيمها ؟ اللى بيتقسم هوا العقل والنفسية لكن مش الروح , الروح بتفضل فيها كل الطهر اللى ربنا وضعه ووضع سره فى الإنسان , هكمل حاضر ...
بضطر أكرر كلامي وأفهم الناس إني محتاج بجد حد مش يخذلني , مش عايز أبقى لوحدي فى حين إني ممكن أعمل المستحيل عشان اللى بحبهم , ليه أبقى لوحدي ؟ إيه العدالة في كدا ؟ أزمة وهتفوت طيب يعني ولا هيستمر الوجع ويسيب علامة جامدة كدا فى جدران نفسيتي وذكرياتي وكل ما إيدي فى عز العتمة تلمس العلامة أحس بالم مهول ؟؟ ليه الناس مش بتركز فى اللى بقوله ؟؟ هوا أنا بتكلم وخلاص ؟؟ ما أنا أي كلمة بقولها بلتزم بيها ... ولكني بقول التحذير مليون مرة لحد ما الناس بتبتدي تحس إني بايع تماما , عارفين ...
أنا نفسي فى بيت يضمني ونفسي فى أكل إيطالي , معرفش هاكل إيه ولكنه شكله هيبقى أكل حلو , نفسي فى أكل  إيطالي أنا مليش دعوة بقي هيبقى طعمه حلو ولا وحش ول احتي هيبقى غير مناسب بس نفسي فيه 
نفسي كمان بقى فى عصير ميوجعش سناني وميحسسنيش إني برتعش من كتر السكر أو من قلته , أو فى كوباية شاي حلوة كدا بالنعناع والسكر وأهم حاجة متكونش عمايل إيديا , عايز أحس إن فى حد تاني فى الوجود قادر يعمل حاجة زي دي , حاجة بحبها يعملها بمنتهي البراعة ويحط فيها كل الحب والحنان اللى ربنا خلقه فى قلوب البشر وأشرب شفطة فى الهوا كدا والوقت عصاري واحس بروحي خفيفة لما  أغمض عيوني 
نفسي فى سرير لما أفرد ضهري عليه أحس بإن كل همومي زي غربان طارت بعيد وجريت من كتر ما المكان مش مناسب ليها , ونفسي ساعتها أغمض عيوني لحظة وأنا باصص للسقف وأفتح عيوني ألاقى فى حد بيطبطب علي روحي وقلبي 
نفسي محسش لا بوحدة ولا بغربة ولا برغبة فى الرحيل من كل حاجة 
نفسي أحس إن الناس بتسمع الكلام بتنصت لكل حرف وبتفهم كل حرف بيتقال ولما بتتكلم فهما بيتكلموا بمنتهي الصدق والحقيقة وبدون ما يخبوا أي حاجة نهائيا , أنا قادر علي الدرجة دي من الصدق لكني معرفش الناس إيه نظامهم , زي ما يكونوا متبرمجين إن محدش يقول الحقيقة كاملة أبدا 
ياتري هلي هضطر ألف العالم كله عشان ألاقى اللى بدور عليه ؟
عشان ألاقى بيت و أسرة و أمان وفرحة وإستقرار وكوباية شاي وأكل إيطالي وعيون بتوعد وتوفي 
ياتري لازم أعمل رحلة ألف فيها كل مدينة فى العالم ؟؟
بس أنا من قبل ما أسافر بقولكم أهوه إن كريم تعبان أوي 
بجد تعبان اوي 
من كل الخذلان اللى شفته و من كل وجع بقصد أو بدون ومن كل ألم بسبب او من غير 
أنا بجد تعبان 
نفسي أغمض عيوني 
نفسي الغربان تطير 

خيالي دايما هوا المنطقة اللى بيتحرك منها كل حاجة من أول الملايكة والأحلام للشياطين اللى مبترحمش
يا هلتري نفس زي نفسي كدا شقية وتعيسة ليها بيت وامان فى الدنيا دي ؟
عايز أقولكم إني والله بجد بتعب من التفكير واحيانا من انى اشوف 

إحدى أعظم النعم اللى ربنا أنعمها عليا هي إني أشوف 
بدقق كويس لدرجة إني بقرا مشاعر الناس وأحيانا خيالاتهم 


عايز اقول ان وقت زي دا هوا اكتر وقت فى الوجود كله بحس فيه إني بلاش أتكلم وخليني ساكت 
عارفين ليه ؟
لأن الحياة علمتني إن الحقيقة اللى بتطلع فى الوقت دا محدش بيقدر يحسن إستخدامها 
فى ناس بتستخدم الحقيقة عشان توجعك أكتر برغم كل المواقف اللى اثبتت فيها نفسك واثبتت فيها صدقك وبرغم كل شىء 
وفي ناس تانية بتستخدم الحقيقة دي عشان تريحك وتطمنك بجد وتطبطب علي روحك حتي لو بينك وبينها بعد مكاني وزماني 
مبحبش أقول حقايق كتير , بتوجع من كترها لأنها بتفكرني بكل أوجاعي دفعة واحدة 
وكأنها زي ما تكون كوباية مج كبير كدا مليان فودكا وبيتشرب علي دفعة واحدة

كاس الوجع يا كريم 

إتعلمت أعمل مليون حاجة 
منهم التخلي والخذلان والقوة والصبر 
لكن مش معني إني عارف الطريقة إنى أنفذ 

الناس اللى محاولتش لحظة تقدر أي حاجة أو تحارب عشان أي حاجة , المسامح كريم

انا نفسي فى اكل ايطالي بجد
نفسي فيه أوي :(
نفي أروحه فى مطعم فى ايطاليا بجد 
نسي أتعشي فى ال..........

**كتابة الاتنبن بليل ونم النشر فىا لتلات الصبح 
** نمت وانا بكتب ولذلك خلص البوست جري جري :)
شاب فقري

هناك 4 تعليقات:

عبارات عاريه يقول...

رساله الى وحيد نص الليل
انت ليه وحيد قوى كده
بتنده بصوت عالى قوى فى نص اليل ومع كده محدش سامعك ....او بتنده وانت واثق ان محدش حيسمعك فمحدش بيسمعك
حاجه كده زى الحلم الى بنعمله ....انت الى بتحدد اذا كان حيطلعلك صوت ولا حيبقى مكتوم حيسمعك حد ولا لا ..فى حد فى الصوره معاك ولا مفيش غيرك ....وحيد
يا ترى انت من يصنع وحدتك ام هى مفروضه عليك فرضا
نفسك فى بيت؟؟ولا نفسك فى الى يملى عليك البيت
نفسك فى كبايه الشاى؟؟ولا نفسك فى الى يقدمهالك وانت نفسك فيها ومن غير ما تطلبها
نفسك فى الاكل الايطالى ؟؟؟؟ولا نفسك فلى يشاركك حلاوته والتعليقات عليه
نفسك فى الى يسمعك ؟؟ولا الى يحس الى بتقوله
نفسك وجعك ينمحى ؟؟ولا تلاقى بس الى يطبطبلك عليه وطببهولك فيشفيه ويمحى وجع السنين
نفسك الى يشوف نقطه النور الى فى الصندوق ؟؟؟ولا فى الى يطلق سراحها فتنطلق روحك مع روحه نقطتى نور احرار تمارسان حريه الاستمتاع بالنور
نفسك فى تفضفضه؟؟ولا نفسك فى الى متخفش تفضفضله فيمسك عليك زله من وسط الى بتحكيه ....زله اى زله ...زله حب او زله كره اوزله ضعف او زله زل
فين الى تحكيله من غير متخاف منه
فين الى تبكيله من غير متخاف منه
فين......فين البيت المليان....الى مش اربع جدران وبس
فين الانسان الانسان

عزيزى الوحيد لست الوحيد الوحيد

مروه زهران يقول...

تستحق
السعادة والبيت والأمان والاستقرار وكل حاجة حلوة
هتلاقيهم قريب أكيد

شاب فقرى يقول...

عبارات عارية

تعليقك عجبني اوي عشان مهتم بالتفاصيل

لكن الفكرة مش فى الشاي ولا الاكل الايطالي ولا السمع ولا ان الوجع ينمحي
الفكرة فى وجود اللى يعيش معاك كل دا ويعملك اللى بتحبه ويحس بيك ويفهمك ويقدرك ويسمع منك ويبقى حر معاك ويستمر للابد لاخر العمر :)

انتى فاهمة البوست كويس ومش محتاجة اجابات منى الاسئلة او توضيح

والحمد لله أنني لم أعد وحيداً

:)

منورة جدا وفى انتظار تعليقاتك دايما بقى

شاب فقري :)

شاب فقرى يقول...

مروة زهران

:)


الحمد لله علي ما وجدته

منورة جدا ومش تحرمينا من مرورك بقى :)

ورايك يشرفني التعقيب عليه

تحياتي


فقري :)