الثلاثاء، 4 يونيو 2013

صورة لا تكفي

صورة للذكري مع الناس اللي بجد بنحس إنهم فلتة من فلتات الزمان ومع الناس اللى بنقدرهم بجد , الناس اللى بنفكرلهم وبنفكر معاهم وبيسمعونا بجد , الناس اللى نقاءها غير قابل لأي نقاش , الناس اللي بجد بعرف أخاف عليهم أكتر من نفسي , للناس المعينين اللي ملهمش زي , الناس اللي هما بني آدمين وبشر بجد فيهم نقاء 
أنا مش عارف أتكلم أو يمكن مش عايز 
بس اللي واثق منه بشكل خيالي 
إن صورة مش كفاية 
اللي كفاية بجد 
هيحصل وهيكون له وقته 
إن شاء الله...

كريم
***
فى دماغي حاجات كتير أوي تخص حاجات أكتر , نبتدي نتجه للتجريد بقي , و ندخل الكنترول روم
فاكرين الأسطورة بتاعة الملائكة الباكية ؟؟؟
أحكي لكم عنها
الملائكة الباكية كانوا بشر
فى مواقف معينة إختاروا يقفوا مكانهم بدون أي حركة وبدون أي موقف ومع خوف وإدعاء رهيب بعدم المعرفة ظاهر فى كلمة ( مش عارف ) او ( مش عارفة ) اللي حصل إن الناس دي إتحكم عليها بالندم والألم والنهاية
البشر دول إتحولوا لتماثيل ميتة فى هيئة ملايكة بتمسح دموعها
لعنتهم إنهم مش بيتحركوا إلا فى الخفا ومستحيل حد يشوفهم بيتحركوا ولو لمسوا أي حد بيدمروه بيختفي وبيترمي فى دوامة الزمن وبيرجع بالزمن ليوم يبتدي فيه نهاية عمره بحيث لو كان هيموت فى سن تلاتين مثلا وهوا عنده عشرين سنة يرجعوه بالزمن عشر سنين ويعيشوا علي قوته وعمره اللى ضاع ويبقوا أقوي بس فى هيئة تماثيل ميتة
الكون كله شايفهم موتي
ولكنهم بيتحركوا وبيخرجوا من حالة التماثيل دي فى الخفا بدون ما حد يشوفهم
الوحدة الرهيبة والتجميد الدائم فى نفس المكان
البكاء المستمر ووضعية الحزن
الناس اللى وقفت تتفرج لما أغلي شىء فى الوجود كان بيضيع من إيديهم
لما كانوا فاكرين أن نعم ربنا أمر مسلم بيه ومستحيل يضيع منه أي حاجة وإن الأشياء اللى عايزينها هتيجي لهم بدون تعب
الناس اللى متعبتش عشان حاجة تستاهل
انا مش عايز أتكلم فى الموضوع دا
أنا داخل الكنترول روم و هبتدي التجريد
أشوفكم علي خير ...
***

هناك 4 تعليقات:

doaa elattar يقول...

طب أنا فاتني كتير أوي جدًا يعني .. بس كنت الأيام اللي فاتت مش فاضية أتعب حتى :(

بس ده مش معناه إني مش هكومنت على كل بوست فاتني على فكرة حتى لو مش دلوقتي :)

أدخل بقى في المهم

الصور مش تخليد للشكل على قد ماهي تخليد للذكرى والروح واللحظة .. في ناس بتبقى عايز تحطهم جواك وتحتفظ بيهم لأكبر فترة ممكنة .. الناس دي قليل أوي لما بنلاقيهم .. فلما نلاقيهم لازم نحافظ عليهم :)

ــــــــــــ
"الناس اللى وقفت تتفرج لما أغلي شىء فى الوجود كان بيضيع من إيديهم"

جاتلي فترة كنت بسأل نفسي دايمًا ياترى ايه الاقل ندمًا

إني أندم على شيء عملته وغلط لما عملته ولا أندم على شيء معملتوش ؟

اكتشفت إن الندم على شيء اتعمل أشرف من الندم على شيء متعملش .. ويمكن مانندمش أصلاً على الشيء اللي عملناه ده .. لأننا على الاقل حاولنا وطلع غلط .. لكن ندمنا على شيء مش عملناه .. معناه إننا كنا "بنتفرج" وخايفين ننزل ساحة المعركة لنتجرح أو نتوجع

ــــــــ

افتقدت وجودي هنا :)

الازهرى يقول...

:)

شاب فقرى يقول...

هنا افتقد وجودك برده

دايما فى التعليقات بتوصلي لجوهر المكتوب علي طول

شىء جميل ان حد يفهم المكتوب ويقول رايه

:)

كل حرف فى مكانه :)

منورة يا دعاء

فقري

شاب فقرى يقول...

أزهري :)