الثلاثاء، 5 مارس 2013

حاجات مبتتكررش

قبل ما اتكلم فأنا عايز أقول إن أنا غلط 
وانى انا غلط فى انى اقول علي نفسي غلط 
( تناقض محتاج حد عارفني كويس عشان يفهمه )
دا مبدئيا 
وقبل ما اتكلم عايز أقول إني عايز أحكي لكم علي يوم البدلة بكل تفاصيله 
من أول ما لبست البدلة عشرة الصبح ونزلت سيلنترو لحد ما روحت الساعة إتنين بليل 
يوم طويل ومرهق ومش عارف هكمل إزاي أو صاحي إزاي أو ليه بس أهوه آدي الجمل ...
عايز أتكلم عن الناس اللى بتمشي بالجملة وإنى الأيام اللى فاتت قطعت تمانين فى المية من العلاقات اللى بيني وبين الآخرين 
متبقاش غير قصة الحب اللى شايلها للبنت اللى حبيتها فى يوم 
و 
شخصية تانية 
يعني نقدر نقول شخصية واحدة فقط فى حياتي المزدحمة حاليا 
وقبل ما أتكلم برده 
عايز أقول إني نفسي أكتب عن العزلة واللى حسيته فيها 
عايز أكتب عن الناس اللى طردتهم شر طردة وكأني معرفتهمش فى يوم من الأيام 
عايز أتكلم عن واحد حداشر 
عايز أتكلم عن شهور فاتت 
عايز أتكلم عن قراراتي الجديدة 
عايز أقول كتير أوي 
وطبعا عايز أتكلم عن حلمي الجديد 
وطبعا عايز أحكي عن البنت الأمورة بتاعة سلنترو وبوكية الورد بتاع النهارده اللى جابته معاها .
عايز أتكلم عن إني بحب السجاير وبعشقها بجنون وفى نفس الوقت هبطلها 
عايز أحكي عن الراجل اللى له سلطة أبوية عليا والوحيد اللى لما بقابله فى الشارع بطفى السجارة فى إيدي وإحط إيدي فى جيبي وأشاور من بعيد وأمشي فى هدوء لأحسن يشم ريحتي أو ياخد باله بالرغم من إن فى حد قاله كريم بيدخن 
عايز أحكي عن إني الأيام دي تعبان جسديا لدرجة إن صوابعي جلدها باظ تتماما لدرجة إنى قلعت الدبلة ودي كارثة فى حد ذاتها 
لأن علي مدار الإتناشر سنة اللى فاتوا مخلعتهاش من إيدي يوم بس دلوقتى لو لبستها مش هتدخل صوابعى ولا هتخرج منها غير بالدم والجلد 
عايز أحكي عن حالة العصيان اللى أعلنها جسمي كله 
عايز أكلكم عن الليل إزاي بيفوت والنهار إزاي بيوجع و الوقت بيعدي بصعوبة إزاي 
عايز كمان أتكلم عن وصايا الرحيل وشرائع الغضب وقانون الغياب 
عايز أوصفلكم الشوق والوحشة والوحدة والألم اللى بقوا تقريبا معايه فى كل حياتي 
عايز أقولكم كتير عن التمسك باللي بحبهم 
عايز أحكيلكم عن رد الفعل واللى نويت أعمله من إني هقطع طرق رد الفعل بشكل كامل فهتقروا بعد كدا المدونة فترة كبيرة بدون اى تعليقات وحد تاني هيمسك الصفحة ويارب الأكونت بتاعي ينجو من اللعبة دي كلها 
عايز أحكيلكم عن كمية البلوكات اللى حصلت والمشاكل اللى جرت الفترة اللى فاتت 
عن إني كمان قررت اقفل سكك كتير أوي 
عايز اكلمكم عن أمور كتير أوي ومش عارف لو بدأت أتكلم هخلص كلام إمتي 
أنا واثق إني هقول كتير أوي وواثق أكتر من إني لو بدأت أتكلم فأنا علاقتي بالعشرين فى المية من الناس اللى باقيين هتنتهي ومش هيتبقى حد نهائيا 
أنا حاليا فى حالة مزرية زي ما كان هاوس بيقول كدا علي نفسه 
مقتنع انى همشي فى طريقي انا مش طريق الناس بتقولي عليه هوا الصح 
انا حاليا تعبان 
ومش قادر اكتب 
اكيد هكتب وهحكي لكم 
وهاخد قرارات وهبقى البطل بتاعي 
هبقى أنا زي ما انا عايز 
وهبقى كمان الشخص اللى بحبه 
وهحبني اوى 
وعن انى قررت أخذل ناس كتير أوي 
تقريبا قررت أخذل كل اللى اعرفهم 
عارفين لما تستنوا حاجة وتتعبوا عشانها وتحصل 
زي بالظبط واحد فضل يحب واحدة سنين وسنين وسنين وفى الاخر اتجوزوا وعاشوا فى سعادة 
اهوا دا بالظبط , الفرحة والله تستاهل التعب 
بس ياتري اللى قدامك يستاهل ؟؟؟
أنا هكتب كتير وهجيب صور وهنزل مصايب عالمدونة 
ومش ههتم بأي شىء فى الوجود غيري
بيتهيألي فى محاولتى لأني أبان مش مغرور قللت من نفسي أوي فى عيون ناس كتير 
لكن متقلقوش 
تقريبا مضطر أرجع مغرور تانيزي ما كانوا بيقولوا عليا 
أنا خسرت كتيرررررررررر 
وفى لحظة واحدة وقفت وقلت : فاكر كريم كان عامل إزاي ؟
ومن هنا 
شغلت فيلم عبيط أوي وقعدت اتفرج وفكرت 
وشفت مشهد صدفة 
خلاني اقول لاء 
لاء لاء لاء 
المهم حاليا 
انا مش ضامن اللى ممكن يحصل 
ممكن أستخبي كام يوم يمكن اسكت ومتكلمش عن كل دا واعيش تاني فى الهموم دي كلها 
ويمكن أقول لاء وأحارب نفسي ولازم أنتصر عشان أرجع أعيش انا وأحبني واعيش مبسوط تاني 
لو كتبت عن أى حاجة جت سيرتها هنا هعمل عليها تاج تحت البوست بعنوان ( حاجات مبتتكررش )
ودلوقتى واضح انى تعبان ومرهق ومريض ومنعزل ومكتئب وحالتي زفت 
ولذلك 
فوجب عليا أنهي البوست وأسكت 
بيس
فقري

هناك 4 تعليقات:

أبو مروان يقول...

ايه الكلام ده كله
انا مش عارف اقولك ايه
دي اوي زيارة ليه للمدونة بالصدفة
الكلام ده لو علي نفسك فعلا
هقول اني انا اللي فقري جدا
اول ما عدي علي المدونة القي كدا

إن شاء الله الكلام ده كله يكون عن حد ثاني وتكون احسن

خليك مان يامان وشد حيلك كدا

doaa elattar يقول...

طول مااحنا عايشين طول مافي حاجات هتقع مننا وحاجات هتنضملنا في سكتنا .. المهم إننا نفضل إحنا ... نتطور أكيد .. نتعلم أكيد .. نغير اللي مش عاجبنا اوك .. لكن الأساس إننا نفضل إحنا.. زي بيت بتغير فيه لكن أساس البيت ثابت .. عشان مانتوهش من نفسنا محتاجين كل فترة نتأكد إن البيت بأساسه زي ماهو وإن اللي حصل تغيير طفيف

وعلى فكرة من حق أي حد في الدنيا انه يكتئب وينعزل عشان يعيد حساباته ويعرف يقوم من جديد .. ده حق مشروع :)

كن بخير :)

asmaa fathy يقول...

تخبط وتناقض وحاجات كتير حسيتها هنا

انت لازم تحط نقطة ومن اول السطر

نصيحة ياريت متخسرش الناس اللي بتحبك بجد

ال 80 في المية اللي خسرتهم مش مهم لو الباقين بيحبوك فعلا

انت محتاج تعيد حسباتك من الاول

قرارك في انك تبطل السجاير رغم حبك ليها قرار سليم أعتقد حبك لنفسك ولصحتك المفروض يكون أكبر ربنا ادانا الصحة نعمة المفروض نشكره ونحافظ عليها

اللي بيحبوك بجد مش هيسمحولك انك تخسرهم ولا هيسمحوا لنفسهم انهم يخسروك


متجيش علي نفسك علشان حد وفي نفس الوقت اوعى في يوم تيجى علي اللي بيحبوك

لانك ساعتها مش هتلاقي حد يحبك ولا حد جنبك

وساعتها أكيد هتخسر نفسك وحاجة مهمة جدا في حياتك صعب تعوضها

Mahmoud Bahgat يقول...

على فكرة كلنا بنمر فى أوقات كتيير فى حياتنا بلحظات زى دى نبقى مستغربين لنفسنا مين ده هو ده احنا ولا حد غيرنا عايش جوانا بس أهم حاجة نعرف نرجع لنفسنا و نرجع نفسنا لنفسنا
أفكارك و كلامك عميق بس محتاج انى اقرى أكتر من اللى فات يمكن أفهم و لو مفهمتش مش مهم المهم انك ترجع لنفسك