السبت، 9 فبراير، 2013

عن بلادي الأولي

السما فى بلدنا بس هي اللى تقدر تقولك الحقيقة ويمكن كمان تقولك إن كاميرا الموبايل فيها مشكلة لازم تصلحها
السماء صافية علي المدي
والشمس فى عز الشتا
أما عن السحاب فبيبقى بيغازل الشمس كل يوم
لكن اليوم دا انا كنت محتاج صفا وروعة وخضرة وهدوء وناس بتحبني بجد وبحق وحقيقي
الله يرحمك يا والدي
فات سنين علي وفاتك ولسه الناس فاكراك بكل الخير وبتحبك بجد 
وصحيح بقى 
أنا مبسوط أوي بالسفرية دي 
وعايز أقول إني دلوقتى فهمت سبب الغضب وسر الزهق 
إنته مكانش ضايع منك حلم 
لكنك كنت عايزني أكبر وأبقى راجل طيب ومحترم 
أنا بحبك أوي 
ووحشتني أوي 
***
الصورة دي لأرضنا لا مؤاخذة :D

***
عن الهوا اللى يرد الروح
عن الناس الطيبين
عن الجذور
عن البلد
***
هي : عندك بلد يا كريم ؟
أنا : طبعا عندي بلد أمال إيه ؟
هي : بجد
أنا : آه والله , روحي قولي لبابا عايزة أتجوز كريم عشان عنده بلد
هي : يا سلام
أنا : آه والله , عرفي كل أصحابك والناس إن كريم عنده بلد بالكامل , عندي وطن
هي : وماله أقولهم عشان نروح فى داهية كلنا :D
أنا : محدش يقدر يعملك حاجة طول ما أنا معاكى
***
Remember who You Really Are 
ساعتها بس هتعرف مين ينفعلك ومين مينفعلكش 
***
فى مثل شعبي أول مرة أسمعه فى حياتي
سمعته فى البلد المرة دي :D
وهسجله هنا فى المدونة ولكن بالكود : فى عروسة تتباس وعروسة تنداس وعروسة تنضرب بالرصاص
يمكن هما قدروا يصنفوا الزوجات بسهولة
لكن عمي وعدني يبقي يشوفني عروسة تتباس :P
هههههههههههههههههههه
مش قصتنا دلوقتى
***


تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .
Deleted
شاب فقري  
****
 
المهم 
كانت زيارة موفقة برغم مرض عمي الشديد 
واللى أسعدني وعده بإنه هييجي يقضي معايه أسبوع فى القاهرة 
واللى أسعدني أكتر إني هوديه للدكتور 
هوا انا لسه محكتش عن عمي ؟؟؟
أحكيلكم ؟؟؟
بإختصار 
راجل مكافح ويعتبر إستاذي فى الحياة وحتي لما روحت له وهوا مريض لقيته نازل الشغل ومش هامه حاجة 
من الناس اللى علمتني الثبات وانك تقف لآخر لحظة فى المعركة ومن الناس اللى بتقربني من ربنا بجد 
ويمكن هوا الوحيد اللى كدا 
وخلاني أحرت الأرض :D
تباً لكم أنا رائع 
ليا فى كل حاجة 
:D
فكروني ب عم حسن الراجل اللى شغال فى المصنع بقاله عشرين سنة  كان فى المصنع القديم لما واحد قاله ما تشوف عروسه لكريم تكون بنت ناس ومتعلمه وطيبة وعلي دين وكدا يعني من معارفك
قام قالي : تقدر تشتغل عامل فى مصنع تلج أو بلاستيك يا كريم وتقف شغال تمنتاشر ساعة فى اليوم 
رديت : أنا فعلا إشتغلت قبل كدا عامل وإشتغلت فى كل حاجة يا أسطي ميغركش منظر الأستاذ والحسابات ومكتب الإدارة
قام قالي : لما تنوي قولي ياأستاذ كريم 
كانت الفكرة الأهم إن الواحد يقدر يقف ويشتغل ويطلع عينه ويعرف يفتح بيت ويشيل مسؤلية 
شكرا عمي محمد لأنك فعلا أستاذي 
وأنا بحبك حتي لو كنت إنته سبب دموعي فى يوم من الأيام 
البوست خلص 
صح ؟؟؟
كل سنة وإنتوا طيبين 
شاب فقري
9-2-2013
تحديث لحاجات نسيت أتكلم فيها :
My Dark Passenger was Never Wrong- 
غريزتي وإحساسي الأول عمري ما بيكدب ولازم أصدقه دايما مهما الأحداث أو الناس قالوا .
- عن الشاب القاهري الشبراوي المنوفي المحاسب المهندس صاحب الشركة والعاطل واللى بيمشي فى كل حاجة وأى حاجة وله فى كل خرابة عفريت علي رأي كيمو صاحبي 
- عني لما بقدر أميز الكويس من الوحش والشخصية المحترمة من الشمال من أول محادثة وعن إحساسي اللى مبيكدبش فى الناس .

هناك 6 تعليقات:

Nour يقول...

اول زيارة .. سجل يا تاريخ :D

عني لما بقدر أميز الكويس من الوحش والشخصية المحترمة من الشمال من أول محادثة وعن إحساسي اللى مبيكدبش فى الناس .
وعني لما بركز في التفاصيل وخبايا الشخصيات واحلل المواقف والتصرفات والكلمات .

بس ساعات الموضوع ده بيضر اكتر ما بيفيد ساعات بحس اني لو اتعاملت مع الناس كدا على عمايا هرتاح اكتر :D

emy mohamed يقول...

احساس جميل محدش يقدر قيمته الا المحروم منه
بالرغم عندنا الاراضى والناس الى بتتعب بجد مش الى بتقعد على مكاتب وبتقبض قد كده( ) على رآى تيته ومش بيقدروا النعمه الى فى ايديها ويطلبوا اكتر بدون مقابل للعلم بيكون مسترورين اوى
المهم عندنا كده بس بعشق يوم شمس النسيم ويقولوا بدعه يقولوا جهل يقولوا تخلف دى حجه علشان انزل الارض ولتوضيح اكتر بشم ريحه جدى فى ارضه وبحس بيه وحنانه فيها
وبتخلى عندك شعور وطاقه روحيه تتجدد في الانسان تخليه يعمل ويشتغل اى حاجه ومش عاوزة اقول عملت ايه هههههههه
طولت عليك بس بجد مشاعرك حاسه بيها
واسمع كلام عمك خليه يشوفلك عروسه البنات الى هناك بتكون اصيله بجد وطموحها سعاده جوزها وبتتحمل وبترضى بالى مقسوملها
ربنا يكرمك ونفرح بيك
تحياتى

شاب فقرى يقول...

Nour

أنا مبرتاحش غير لما ابقى فاهم بعمل ايه وبتحرك ازاى
مبسحمش لحد يديني على قفايا
ولو حصل
ففى لحظة
بيخسرني فيها بشكل كامل وكلي
ومن هنا عليه انه يبتدي من جديد
من الصفر خالص
:)

ويمكن من تحت الصفر

فى ناس بنرتاح لهم ويستاهلوا كل خير

بس بركز برده
دي طبيعة وغريزة فيا
مقدرش امنع نفسي :D

شاب فقرى يقول...

بعد العمر دا كله
اخليه يشوفلي عروسة ؟؟؟
وانا مشوفش لنفسي :D

ميصحش :D
أمال انا عايش بعمل ايه

:)
انا بحس فيها مش بوالدي ولا بجدي وبس
ولكن ب جد والدي كمان

اللى الكل بيقول انى شبهه بشكل كبير :D
فى الكلام والتفاصيل
والافعال والتصرفات
ويمكن لانه وهوا عنده تلاتة وسبعين سنة
قرر يتجوز
ويبقى عنده اولاد من جديد
وحدث فعلا
راجل عنده امل
حتي لو علي اعتاب الاخرة
:)
بيحب الحياة والحياة بتحبه
هحكي عنه فى مرة :)

منورة يا إيمي
وعقبال كل كومنت
وانا بحرت وبزرع وبجمع وكل حاجة
واحيانا بنزل فى الري والتمهيد للري كمان

فلاح فلاح يعني :D

كريم
شاب فقري :)

emy mohamed يقول...

ههههههههههه انت غلبان ببتحرت وتزرع
مش عاوز اقولك اه انا متعلمه وماليش فى الاراضى ولا عندنا ارض زراعيه ووالدتى والدى متعلمين وموظفين
الى انى بعشق الارض واى حاجه من ريحه جدو انى غيرهم خالص احب اروح واحضر ولاده بقره صغيرة واقف اتفرج واحط ايدى فى بؤها علشان تتعلم وتاكل من امها وانى احب الخيل وركوبه والحماره واكل بقره او جاموسه ولو كنت بعرف اجيب منها اللبن كنت عملت بس حاولت ومش عرفت ههههههههههههه
حاجات جميله جدا جدا
ومره ساعدت خالى فى كل الشغل ده واكتر قبل مااروح الشغل لما كنت بشتغل اه
هى جنون للى نفسه يتجنن ويجدد من قلبه
احساس لا يفهمه الاخرين
حبيت الموضوع سامحنى انى فتحت على الرابع
تحياتى
تقبل مرورى ^_^

شاب فقرى يقول...

Emy mohamed

:D

هنا أنا بفتح لحدود فوق الرابع

الرابع بالنسبة لى حد قديم ومفيهوش متعة غير الهدوء ...

وهناك أنا بتجنن بزيادة

بس الفرق الوحيد انى عملت تسعة وتسعين فى المية من الحاجات دى بشكل يفوق المعتاد

وباقى لى بس انى اكررها فترة من الزمن واجمع شوية معلومات اكتر عن حاجات فى المجال وازرع الارض وبس :D

طبعا دا غير القوة الجسدية والنوم بدري
:D

منورة يا ايمي :)

وانا سعيد جدا بوجودك

وبانك بتفتحي عالرابع
لانى بحب كل من بيفتح عالرابع وبيعلق بضمير وبيبقى زائر دائم

دمتي دايما بكل ود وفرح وكدا يعني

:)

كريم
شاب فقري