الأحد، 24 فبراير 2013

متغمضش




- لما بتغمض بتشوف إيه 
- رؤي عن الموت والنهايات والوجع والألم ويمكن عن أشياء غير حقيقية ومستحيلة وأصوات مألوفة ولكنها مستحيل سماعها فى اللحظة الحالية 
- بسيطة , متغمض 
- محتاج انام وأصحي بدري ورايا حاجات كتير أوي 
- يبقى إتعب فى يومك عشان تقدر تنام على طول 
- تعرف إني جربت ستاشر ساعة شغل ويمكن كسرت حاجز التمنتاشر واقف علي رجليا وبتحرك وبحسب وبفكر وبتكلم فى الفون وبخرج وبرده منهرتش الإنهيار المطلوب عشان أنام أول ما احط راسي عالمخدة 
- يبقى يا إما تطبق لحد تاني يوم يا إما تستحمل الثواني اللى بتغمض فيها 
- كان جه عليا وقت بقدر أغمض عيوني بدون وجع وأتخيل كل شىء فى الوجود 

صوت عالي من بعيد : Focus

بحاول أنطق وأكمل كلامي ...
- كان جه عليا وقت بقدر أغمض عيوني بدون وجع وأتخيل كل شىء فى الوجود وبقدر فيه أستدعي الذكري 

صوت موسيقي ( بسكاليا ) فى الخلفية

بحاول أتكلم وأخرج كل اللى جوايا ...
- كان جه عليا وقت بقدر أغمض عيوني بدون وجع وأتخيل كل شىء فى الوجود وبقدر فيه أستدعي الذكري كنت ساعتها بقدر أفكر وأتكلم واتحرك 

صوت همس ( متخافش أنا هنا )

بصرخ صرخة مكتومة بتتناسب مع حجم الوجع والخوف والغضب والألم 

- كان جه عليا وقت كنت فيه أنا 

كل شىء بيسكت فجأة والإحساس بالوجع بيزيد مع الذكري

- كنت مبسوط فى يوم من الأيام ......

صوت غريب بيعلي فى الخلفية زي دوشة وحركة وصوت عربيات وزحمة شديدة أوي وإحساس بالصداع هيفرتك دماغي

- إيه ؟؟؟

الصوت بيعلي بس مش واضح فيه ولا كلمة وكأن الزحمة كلها بتتكلم وصوت القطر عالي أوي 

- هوا أنا كام مرة كنت هموت قدام القطر ؟؟؟؟

صوت البحر بيغطي علي كل شىء عالزحمة والناس والموسيقي وعلي كل إحساس 

-هوا الهوا والبرد والوجع بيطبطب علي حد ؟؟؟ ولا هوا دا الشتا بيودعني عشان ممكن مش يقابلني تاني 

بيهدي صوت البحر وبيتبقى الصمت 

- هوا أنا ميت ولا فى الطريق للموت ؟

صوت عالي أوي بينطق بنرفزة وغضب ووجع وصداه عالي أوي وكأنه بيتصرخ من جوايا 

- قلت لك متغمضش 

ينزل الستار 

شاب فقري

هناك 4 تعليقات:

sara draz يقول...

الحل .. ربنا

لما بنقربله الدنيا بتهون أوى وبنحس قد ايه هى رحلة قصيرة وهتنتهى

صدقنى الحل ربنا ..

أسماء فتحي يقول...

متغمضش
معاك حق اوقات كتيره بنخاف نغمض بنخاف من اللي بنشوفه واحنا مغمضين
البوست ده بيصفنا كلنا

تحيــــاتي
كانت هنا ورحلت
Asmaa Fathy

Do3aa El_attar يقول...

لما بنغمش بنكون احنا ونفسنا ووحدتنا وذكرياتنا وبسسسسس

ساعتها بنحاول نغمش عشان نرتاح لكن للأسف مش بتيجي الراحة بيجي الوجع والألم وناس كانوا هنا بس مش بقوا موجودين، واحنا زمان بس مش لقينا.. عشان نرتاح محتاجين سلام نفسي داخلي عشان كل اللي بيوجعنا يبطل يوجعنا :(

أسماء فتحي يقول...

ادعوك لزيارة مدونتي المتواضعة
وذكر رأيك في ( في دار المسنين )
آخر كتاباتي حالة عشتها للأسف
وتأثرت بها ولم أستطع نسيانها فقررت أن أكتبها
علي هذا الرابط
http://asmaafathy.blogspot.com/


تحيــــــــــاتي
كانت هنا ورحلت
Asmaa Fathy