الأربعاء، 6 فبراير، 2013

خد بالك

طبقا لكلامهم :
فلسفتهم .......


((

إنته إنسان سعيد وتقدر تفضل علي طول سعيد

لا شىء يستحق ولا أحد

تقدر تحقق نفسك فى شىء يعوضك ويملي البرد اللى جواك بدفا ويطمنك

لو خايف من حاجة إهرب منها


متثقش فى اى شخص


تقبل الواقع واتعامل معاه

))



طبقا لعقلي ودماغي وأفكاري ومشاعري أنا واللى بتصرف علي أساسه


-إنته فعلا ممكن تبقى سعيد
بس السعادة مربوطة بمسألة إختيار وفعل يعنى لازم تعمل اللى يخليك سعيد , مينفعش تقول أنا سعيد زي العبيط وإنته مفيش أى حاجة ولا أي سبب لسعادتك


 - فى ملايين الأشياء اللى تستحق وملايين الأشخاص اللى يستحقوا

وإلا مكانش زمانك بتخرج فى عز التلج يوم أجازتك عشان تقابل ناس جايين لك من سفر متعرفهمش ولا عمرك شفتهم قبل كدا غير مرة مثلا
وإلا مكانش زمانك بتعيط بحرقة لما حد من زمايلك يتوجع أو يتجرح أو يزعل أو يكتئب وبتحاول تخرجه
وإلا مكانش زمانك بتستحمل أهلك كل يوم فى حين إنهم حابسينك ومطلعين عينك
وإلا مكانش زمانك بتضحك فى وش ناس كتير وهما عاملين غلط وإنته بتسامحهم وتفضل عارفهم
فى مليون حاجة تستحق
من هنا بييجي التقدير
فى مليون شخص يستحق
وشخص واحد بس يستاهل كل حاجة
ومن هنا بييجي الحب
فاهميني طبعا


- لو خايف من شىء واجهه

متعييش عمرك فى هروب وخوف وتعب ووجع وبرد ويأس ويمكن خذلان كمان
روح إتكلم وإتفاهم وحس بالناس وإفهمهم
متسيبش الخوف يتحكم فيك , الخوف حاجة كويسة لأنه بيسيطر عليك وبيخليك تحافظ علي حاجات كتير
بس لو ركزت معاه
هتضيع نفسك
وهتضيع مليون حاجة بدون ما تاخد بالك
وتوجع ناس كتير اوى
متهربش
أقف وواجه كل شىء
إوعي تفكر إنك لما بتهرب بتنجي من الوجع
إنته لما بتهرب بتخلق وجع جديد
وبتخلق شىء جديد يتحكم فيك ويسيطر عليك ويغير طريقك
إنته إما بتهرب بتسيب ناس واقفة تحارب لوحدها
بتسيب ناس لوحدها فى وجعها وبتخلي نفسك برده فى وجعك لوحدك
مفيش سبب للهرب
الهرب لو اللى فى صفك مش قد المعركة (( لكن الغريب انه بيستحمل وإنه قدها ))
الهروب لو اللى قدامك ميستاهلش تحارب عشانه او معاه (( لكن الغريب انه يستاهل ))
الهروب لو اللى قدامك ممكن يتخلي عنك أو يخذلك (( لكن علي مدار فترات كبيرة وسنين معملش دا ))
الهروب لو اللى معاك ممكن يكسرك (( لكن مفيش اى احتمالية لاى حاجة زي دي وعمرها ما حصلت ))
الهروب ملوش لزوم
بيوجعك وبيوجع كل الناس
مش الحل ولا عمره هيكون
وغدا فى يوم ما سيعلم الكون كله ذلك


- لازم تثق فى الناس وتقع عشان تتعلم إزاي تقف وتثق فى مين

لما تقع والناس تخذلك هتعرف كويس أوي أوي أوي مين اللى ممكن تثق فيه
ومين اللى ممكن تعتمد عليه
ومين اللى مهما عملت هيفهمك ويتفهمك ويعرف يتعامل معاك
هتعرف مين فيهم اللى بيحبك بجد وعايزك كويس
مش مجرد رفيق قعدة او شات او مكالمة او حتي مقابلة
هتعرف مين فيهم بجد كويس لما يكون بيسأل عليك عشان بيحبك وعايزك كويس
ومين بيعمل كدا عشان يسلي وقته ويلاقي حد ينصحه
مش شرط الناس تمنحك حاجة عشان بيحبوك
ممكن يكونوا بيمنحوك دا لغرض فى نفوسهم لتعويض شىء جواهم أو عشان يحسوا انهم بيقدروا ينصحوا ويوجهوا غيرهم وناجحين واصحاب عقول
ممكن يكونوا بيمنحوك اى شىء لغرض نفسي مش مصلحة
ساعتها فى وقت زي دا لما تثق وتقع ولما تنصت للى قدامك مش تسمعه وبس هتعرف كويس أوي مين الشخص اللى بيحبك ويستاهل ثقتك بجد
ومين اللى ميستاهلش

- عايز تبقى مرتاح متحاولش تعوض حاجة بحاجة تانية 
حط كل حاجة فى مكانها 
متروحش تقول أنا هذاكر أوي أو انجح أوي عشان أنسي وأبقى كويس 
زي واحد مريض بيقول أنا هروح أكل شاورمة عشان أصحي بدري 
هوا كدا بالظبط 
حط كل حاجة فى مكانها لأن مفيش حاجة بتملي مكان حاجة تانية 
والأمس مبيموتش 
والحمد لله إني أقدر أخلقه وأصنعه من تاني 
  



- اللى بيتقبل الواقع دا واحد كسول وإنته مينفعش تبقى كدا لازم تحارب وتقوم من مكانك وتتعب 
مش قصدي ثورة
لكن فى مليون حاجة تقدر تعملها
بدل ما تتوجع عشان بعيد عن فلان
تقدر تكلم فلان وتتفاهم معاه وتواجهه وتريحه وتريح نفسك
تقدر تتأقلم مع الواقع وفى نفس الوقت تحاول تغيره ولو بفكرة ولو بفعل بسيط ولو بكلمة أو مكالمة او رسالة
تقدر تحاول  وتفشل وتحاول تاني
لأن هي دي الحياة يا عزيزي
الحياة بيبقى نفسنا فى حاجات وبنمنع نفسنا شوية وبنحاول شوية وبنجرب شوية
وبنقف فى وش التيار
واحيانا بنسمح للموج يكسرنا ويكسر أحلامنا
ونرجع نبني تاني بقوة ونسنتني الموج
والمرة الجاية حتي لو كسرنا
هنحاول تاني
زي اى قصة حب يا عزيزي
تقدر تقف فى وش الموج والبعد والفراق والوجع والألم
 والموج يكسرها كلها
ولكن إرادة الأتنين وإيمانهم بإنهم soul mates  بيخليهم يرجعوا لأن ملهمش مكان غير بعض
ويبنوا من جديد ويستنوا الموج
لو كل واحد بيحب تقبل الواقع
كان الكون إنتهي من زمان
لو كل واحد بيقول أصلي هعيش وخلاص
مكانش زماننا جينا الدنيا ولا إتولدنا أصلا



****
إنتوا ماشيين غلط لأنكم متعرفوش معني الفقد زيي
ولأنكم بتتكلموا وخلاص
محدش يعرف اللى انا بتكلم فيه دا
للأسف
ناس كتير هتقرا البوست
وتقول دا بيعاند وعايز يمشي الكون علي مزاجه ويتحكم فى الناس
ومش عايز الناس تهرب منه وهوا وحش وزي الزفت
أيوا
أنا وحش وزي الزفت
ومعنديش مشكلة فى دا
ومبسوط بدا
وراضي جدا
بحاول أطور وأصلح من نفسي كل يوم وكل لحظة
ومش بزهق ولا بتعب ولا بكل ولا بمل ولا بيأس
مش بقدم مبررات ولا تفسيرات ولا عايز
ولا ناوي أقول حاجة لأي حد
أنا مش عايز أعاتب وألوم ولا عايز أفهم ولا عايز أوصل لحقايق
أنا السنة اللى فاتت دي فى آخر كام شهر قدرت والحمد لله إني أنتصر علي أكتر جانب وحش فيا
مش مرة واحدة ولا مرتين
والحمد لله زي ما بقول انا وحش وزي الزفت
ومش عايز احرك الكون علي مزاجي
ومش عندي مشاكل فى ان الناس تمشي او تهرب او تجري او اى حاجة من الحاجات دي
كل واحد بيعيش حياته طبقا لمجموعة من إختياراته
ومحدش هيعيشها بداله
حياتك هي السجن الكبير لنتيجة إختياراتك يا عزيزي
وأنا علي سلام وصلح مع نفسي وبحبها جدا
برغم كل الشرور
أما أصحاب الفلسفة اللى فوق فهما كمان أحرار فى قناعاتهم وإختياراتهم
ولكن واجب عليا أوضح وأتكلم
حتي لو عارف إن دا مش هيغير أي حاجة والبوست دا ملوش أى تلاتين لزمة
بس أنا بواجه 
وبقف وبحارب 
ومش بهرب 
ومش بتخلي ولا بخذل 
أنا مش إنتوا 
ولا عمري هكون 
ولكني هحترم حرية كل إنسان آخر 
وللعلم :
أنا بقدر أصلح اللى إتكسر لأني برده مش زيكم 
مش برمي الشىء ولا الشخص تحت أي ظرف 
     


أنا تعبت من الكلام
باقى بوست تاني كاتبه من يومين فكرته حلوة أوي وجميل أوي أوي أوي
هحاول أنشره
إن إستطعت
بس مظنش إني هفتح قلبي وعقلي للناس للدرجة اللى تخليني أنشر بوست زي دا
بس هجيبلكم مقطع منه

**** مقطع من بوست جديد : كلمة واحدة بس ****

كلمات كلمات كلمات
كل ما كلامك بيكتر
كل ما بتزود الحروف وتاخد نفسك بين السطور
كلام كلام كلام
وفى الآخر
ببقي حاسة إن فى كدب
المرة دي مسموحلك ترد
بكلمة واحدة بس علي كل سؤال
بدون اى اضافة
لو مقدرتش تترد بمنتهي الصدق من خلال كلمة
لو مقدرتش توضح بدون تبريرات وشرح مقالات وامثلة
لو مقدرتش تقول الحقيقة بمنتهي الصدق وبدون أى إخفاء لأي تفصيل
ساعتها بس هقولك كل حاجة إنتهت
أنا أعرفك كويس جدا
أكتر مما تعرف نفسك
أنا الطفلة اللى سكنت جواك
حبيتها وعشقتها وأصبحت هي حياتك كلها وإتلخصت فيها كل البنات
إتلخص فيها الحل لكل العقد اللى جواك
إتلخص فيها المنطلق للجنون والحب والعشق والفرح والشوق
دلوقتى عرفتني ؟؟؟
أعرف عن اللى جواك كويس أوي
عن كل حرف عشته
عن كل بنت كلمتها
عن كل حيلك
عن كل ألاعيبك
عن إنك قدرت تعلم شخصية مبتقدرش تنطق إسمها من غير كسوف إزاي تكدب
أعرف كل إنتصاراتك
أعرف كل هزائمك
أعرف روحك من جوا فيها إيه
أعرف بتدور علي إيه
ومعني اللى بتدور عليه إيه
أعرف كل نظرياتك وكل إثباتاتك ومبادئك وقوانينك
أعرف سر الصندوق
أعرف إيمانك مخبيه فين ؟؟
أعرف قلبك حفظته فين ؟؟
ودلوقتى جه وقتى أسألك ...
جاوب بكلمة واحدة بس علي كل سؤال بدون أى إضافة
إتفقنا ؟
 - متفقين

***

هي : إنته فين ؟؟
أنا : عزلة

هي : ليه ؟
أنا : وجع

هي : فين اللى بيحبوك ؟؟؟
أنا : بعيد

هي : ليه ؟
أنا : غلطاتي

هي : ومين اللى بيحبوك
أنا : بنت

هي : مين ؟
أنا : أروي

هي : إشمعنا ؟
أنا : بريئة

===========

يتبع دا لوقررت أنشره بقى 

أوعدكم الأسئلة هتبهركم ...
والرد كذلك 




منفسيش فى حاجة
تصبحوا علي خير



ربنا فى ست أيام خلق الدنيا 
وإنتي فى ست إيام عملتي حاجات كتير قوي
 (( مش هوصفها هنا ولا هقولها ))
لذلك فأنا شاكر لك جدا 
مع السلامة

شاب فقري
6-2-2013 

P.S : بكره برده رايح المسرحية وزي ما كتبت فى البوست السابق وهروح وهستني زي ما قلت بالظبط ودا بدون ما أسبب إزعاج أو قلق لأي شخص ولا أزعل أي حد , أو أكون مصدر ضيق لأي شخص .
أنا بلتزم بكلامي ووعودي  

هناك 3 تعليقات:

zeze يقول...

اولا بسم الله ماشاء الله عليك
بجد دي مش مجاملك بس انا فعلا عجباني طريقتك في الحوار مع نفسك وصراحتك الجميلة دي وانك بتحاول تمشي دماغك علي اللي انت شايفه صح ومش العكس و انك راضي عن نفسك دي حاجة كويسة بس الاحسن انك بتحاول تتحسن
دا طبعا علي عكس ناس كتير
بس بقي حكاية الثقة بالناس صعبة عندي شوية
مش عارفة يمكن دا علشان اتخدعت في ناس كنت فاكراهم قريبيين مني اوي
نفسي احاول اصلح دا في نفسي بس مش عارفة ازاي
وحاسة ان الحب اللي بجد دا ممكن يكون في القصص وبس واتك تلاقي شخص بيحبك كدا زي مانت باوحش والحلو اللي فيك وانك مهما عملت هيستحملك ومش ممكن يفرط فيك صعب اوي
بس شكله طلع موجود لما قريت كلامك وحسيت قد ايه انت متمسك بالي بتحبها وحتي لو في صعوبات قدامك
ويارب يجمعكم بالحلال الطيب قريب امين معلش طولت شوية بس كلامك اجبرني
بارك الله فيك

غير معرف يقول...

you are amazing just the way you are

shimaa

doaa elattar يقول...

سعيدة بعودتك ده أولاً ..

ثانيًا: أعلق على البوست بقى

أنا مقتنعة تماماً إن مش كل حاجة نقراها أو نسمعها أو نشوفها حقيقة مطلقة ومن المسلمات .. كلها في الآخر وجهات نظر وخبرات حياتية لشخص زينا مر بنفس التجارب أو تجارب مشابهة

ماينفعش زي ماقولت إني اقول زي العبيطة أنا سعيدة حتى لو مش سعيدة على أساس إن العقل الباطن بيصدق أيوتها حاجة .. الوجع والحزن لازم ياخدوا وقتهم عشان نقدر نقوم من تاني .. تجاهل الشيء مش معناه إنه مش موجود بالعكس بيكبره جوانا أكتر لأن صوته جوانا هيعلى يوم ورا التاني وهيجي يوم مش هنقدر نسكته ..

وبرضه من ضمن الأشياء اللي مؤمنه بيها إن ماينفعش التعميم المطلق عشان قابلنا عينة كده .. ده بالنسبه لموضوع الثقة

نيجي بقى لنقطة الخلاف بينا ..

"أنا بقدر أصلح اللى إتكسر لأني برده مش زيكم
مش برمي الشىء ولا الشخص تحت أي ظرف"

ده في رأي صح بس برضه مش في كل الحالات ولا ينفع لكل الحالات ..

أحيانًا بيكون قرار البعد دوا وعلاج لحاجات كتيرة رغم إنه مؤلم .. بس علاج الألم ساعات بيكون ألم أقوى منه .. زي ماقولتلك قبل كده ماينفعش نتمسك بحد وجودنا في حياته عبء .. كلامك يصلح لما يكون الاتنين عايزين بعض بنفس ذات الدرجة لكن لو حد متمسك والتاني لاء .. أعتقد البعد بيكون أفضل للاتنين

بس خلاص

بالنسبة بقى للأسئلة والإجابات ففي انتظار التكملة ...

ويارب اللي مستنية تلاقيه :)