الأحد، 3 فبراير، 2013

أنت سيد قرارك

أنت سيد قرارك مش حد تاني 

إنته اللى بتصنع المتاهة اللى بتوجعك واللى بتضيعك فى النص ميت ألف مرة وتخليك واقف مكانك 

إنته اللى بتصنع قرارك 

مش الكتب اللى بتقراها وبتقولك تمشي فين 

ولا الناس اللى بتنصحك وبتقولك مينفعش تثق فى حد او مينفعش تعمل كذا أو كذا 

ولا الأشخاص اللى بيقفوا يصقفولك لأنك سمعت كلامهم المعسول ونصايحهم اللى بتخليك برده متردد وواقف لوحدك 

إنت سيد قرارك 

إنته سيد قرارك قبل ما الباب يتقفل 

وممكن الباب يتقفل عادي جدا فى وش أي حد 

المسألة كلها عشان الباب يفضل مفتوح محتاجة إختيار 

المسألة كلها محتاجة وقفة وإختيار بجد 

بدون وقفة فى النص وضياع وتوهة بسبب ناس مش هيعيشوا حياتك 

إنته بس اللى هتعيش حياتك 

مش هما اللى هيعيشوهالك ولا هما اللى هيتوجعوا بدالك لو خسرت الناس اللى بيحبوك بجد 

مش هما اللى هيونسوك ويسمعوك بالليل وانته لوحدك فى عز البرد 

مش هما اللى هيملوا الفراغ اللى بييجي كل ليلة وبيكبر كل ما بتبقى لوحدك 

مش هما اللى هيقدروا يسمعوك ويلمسوك من جوا اوى 

مش هما اللى هيدوك فرصة واتنين وعشرة لأنك ببساطة بالنسبة لهم مجرد زميل او صديق او رفيق او حتي صاحب 

مش هما اللى هيقفوا جنبك ويبنوك ويقولولك انته قوي وتقدر تكمل ويساندوك تنجح 

كل الزحمة دي مجرد منظر 

متثقش غير فى احساسك وبس 

وافعالك خليها بيوجهها القانون بتاع ربنا

قانون المولي سبحانه وتعالي 

ساعتها بس مش هتبقى بتعمل حاجة غلط 

ساعتها بس مش هتبقى بتخذل اى حد 

إتبع إحساسك فى حياتك وقلبك لأنه هوا الوحيد اللى عارف الحقيقة 

وإتصرف طبقا لإحساسك دا وأفعالك تكون خاضعة للقانون الرباني 

وبكدا لا هتبقى بتخذل حد ولا بتوجع حد 

فكر إن فى ناس تانية مستنية إختيارك ومستنية بس تتكلم 

مش تفكر بس فى نفسك وتقول انا عايز ابقى فى عزلة او لوحدي 

لان كل الحاجات دي مش بتفيد 

دي بتقيد الواحد مكانه مليون مرة 

وبتوجعه اكتر 

فكر فى غيرك زي ما بتفكر فى نفسك 

هتلاقيك مش بتخذل حد 

بالعكس بتريح غيرك وبتريح نفسك 

إتحرك 

الباب هيتقفل فى لحظة ما 

والله العظيم الباب هيتقفل 

وعن قريب اوي 

والكارثة علمك بدا 

ووقوفك فى صف المتفرجين كدا 

إحمد ربنا إن الباب لسه مفتوح وإستغل دا وسيبك من كل الحاجات اللى أثرت عليك قبل كدا وأثبتت فشلها وأثبتت إنها مش الأهم ...

إنت سيد قرارك 

إنته اللى تقدر تختار 

ومش يفرق معاك اى حد 

مش تخلي الناس يتحكموا فى مسار حياتك 

خد موقف يرضي ضميرك ويخليك تعرف تنام مرتاح بليل 


وبس كدا

هناك تعليقان (2):

doaa elattar يقول...

إحم ده أنا فاتني كتير :D

ماينفعش حد يختارلنا تفاصيل حياتنا واختياراتنا وماينفعش نهرب من الاختيارات بإنهم نخليهم هما يختاروا عشان نعلق عليهم فشلنا وعشان نلاقي شماعة نبرر بيها حياة وعمر اتسرق مننا لأن غيرنا رسمه لينا.. ده غير إننا لما نيجي نتحاسب هنتحاسب عن قراراتنا إحنا مش قرارتهم

عجباني جدًا فكرة البوست :)

شاب فقرى يقول...

مش كتير أوي يا أفندم

:)

إتفضليه يا افندم

وعلي فكرة بوست الحملة بتاع النهارده

مسروق من عندك :D

الجملة اللى اوحت لى بالبوست بالكامل من عندك

بس انا طبعا للامانة نشرت المصدر :P

انا عايش حياتي طبقا للمبادىء اللى فى البوست دا

اختياراتي انا

وافكاري انا

ليا حدود هي القانون الرباني

لو كسرتها

بستغفر واتوب وارجع تاني التزم بحدود القانون دا

طبعا فى شوية جنان علي شوية امل علي شوية حاجات كتير جدا

بس انا حر فى اختياراتي ومش بمشي ورا كلام الكتب او ورا كلام الناس

كله بيتوزن فى دماغي وبيتم خلطه وبفكر بطريقتي وباختياراتي انا
لانى دايما بقول ربنا هيحاسبني انا

يبقى محدش يتدخل بقى

:)

منورة دايما

وعلي فكرة المدونة هنا بكتب كتير اوى اوى فى احيان معينة

والفترة دي منهم :)

:)

شاب فقري :)