الجمعة، 28 ديسمبر 2012

صفقات أبدية

إيه المشكلة فى إن الواحد يلتزم بكل كلمة قالها مع كل الناس فى كل وقت وفى كل لحظة ؟؟؟

دا السؤال اللى عليه البوست 
***

مبدئيا أنا شخص ملتزم جدا بكلامي ويمكن بالمعني الحرفي لدرجة إن ممكن حرف واحد يغير كل حاجة ,أنا عامل زي الدستور كدا , بس مش دستور مبارك المترقع من المجلس العسكري ولا دستور الإخوان طبعا اللى مش عايز أتكلم فيه , أنا كلامي دستور محدد وواضح جدا بحيث لو قلت إني هبقى موجود فى حالة ظهور أي مشكلة فأنا فعلا هكون كدا ولو قلت إني هعمل حاجة فأكيد أنا هعملها 
من أسبوعين كنت بكلم أعز صديقاتي , واحدة أعرفها من بتاع خمس سنين , قاعدين بنتكلم ودار بيننا الحوار التالي :
هي : هوا يا كريم إنته فعلا هتصدق فى كلامك اللي قلت هتعمله أول ما تخرج من القاهرة وتروح إسكندرية 
أنا : أيوا طبعا , من إمتي وإنتي بتشوفيني بخلف كلامي 
هي : مش عارفة يا كريم بس اللى بتقوله منطقيا شىء مستحيل إنك تمسح شخص بضغطة زرار
أنا : مين قال إنها ضغطة زرار يابابا 
هي : كلامك بيوضح كدا يا كريم 
أنا : المسألة إنها رمشة عين مش ضغطة زرار يعني بتغمض عينك وتفتحها ف لحظة 
هي : مستحيل يا كريم 
أنا : ومن إمتي وأنا أعرف المستحيل ؟
هي : بس حاسه إنك متقدرش علي دا وإلا كنت عملته من زمان 
أنا : تفتكري ليه لما إنت روحتي عملتي الهبل الل عملتيه لو فاكراه ليه مش مسحتك ف لمح البصر وإستنيت تفسير بالرغم من إن مفيش بينا لا قصة حب ولا يحزنون زي ما بيقولوا 
هي : يمكن لأنك بتقدر الناس ؟؟؟
أنا : لاء يابابا , الحكاية ملهاش علاقة بالتقدير نهائيا , الحكاية لها علاقة بإني لو طردتك فإنتي مستحيل ترجعي تاني ولذلك إستحملتك 
هي : يعني إنته بتتحمل عشان مش تطرد الناس ؟؟؟ فكرة غلط أو مش فاهماها 
أنا : مش غلط , بس مينفعش أنا أطرد حد بالشكل بتاعي غير لما أكون واثق إنه إبن كلب تماما وكلية
هي : ليك وجهة نظرك اللى تحترم 
***
إيه علاقة الحوار اللى فوق باللي هقوله ؟؟؟
علاقته إني ببساطة عقودي وإتفاقاتي أو وعودي لأي شخص وعود لا يمكن فكها بأي شكل 
يعني مثلا لما حصل إن فى شخصية أعرفها من سبع سنين كلمتني وقالت لى انا عندي حالة وفاة وبقالي سنين مش كلمتك ولكني بجد محتاجاك هنا زي ما كنت بتقول زمان إنك هتبقى موجود ...

وفعلا كنت موجود :)

ويعني مثلا لما فى بنت كلمتني من يومين وقالت لى كريم أنا بحب فلان وخايفة من كذا كذا كذا 

وكنت برده موجود وقدرت أرد عليها وأساعدها ومحدش يقولي إزاي برغم إنها من الناس اللى بتكدب بجنون لدرجة إنها بتكدب وهي بتاخد نفسها وفى نفس الوقت من الناس المطرودين بلا رجعة لأني مش برجع فى قراري 
ولكني كنت موجود ونصحت وإتكلمت كويس وقدرت والحمد لله إني أساعد .

اللى بيعجبني فى الأساطير إن عقود الشيطان مبتنكسرش وفى نفس الوقت  بتتنفذ مهما كانت , يعني فى أحد الأساطير الشيطان ميقدرش يعمل الشىء غير لما يوعد حد بعمله , يعني ميقدرش مثلا يجيبلك كذا إلا لو وعدك لأن الوعد هوا اللى بيلزمه وبيخليه ينفذ لك المطلوب 
طبعا أنا مش الشيطان لأني مجرد إنسان فيا خير الملايكة وشر الشياطين ومتقبل حقيقتي 
ولكن الأهم إن كريم بيلتزم بكل كلامه تحت أي ظرف وتحت أي قيد وتحت أي ضغط 
والأهم إني لما أقولك إن إمتحانك بكره هتنجحي فيه وأوعدك إني مش هسيبك تقعي 
يبقى أكيد هتنجحي وهسندك وهوقفك وهبنيكي زي ما وعدتك 
يبقي أكيد هبنيكي وهتقفي علي رجليكي وهتبقي أشطر دكتورة فى الدنيا 
وتيجي تديني مضاد حيوي عشان العدوي إياها :D
صفقاتي أبدية ومش بتنكسر ودايما بنفذها وعمري ما خذلت حد مهما كان قدر السوء اللى عاملني بيه أو مهما كانت حقارته ومدي سوءه
ودا شىء أفخر بيه إن عقودي وإتفاقاتي أقوي من عقود الشياطين ويمكن أبدية وملهاش حل ولا فك و دايماً بلتزم بيها .

لو هكتب كلمة فى الأجندة النهارده 
أو فى النوت بوك إياها 
فهقول إني مازلت مبسوط 
والنهارده عاصفة الشوق مكانتش سهلة خالص ولكن الحمد لله إنك كنتي هنا
وإني حاليا كويس أوي لأنك هنا 

Your Father
The Koko
...
الصورة علي فكرة شبه صورة الوردة البيضا اللى نفسي أشتريها 
بس التانية ليها ريحة وهتبقى رهيبة تحت المطر :P
#واخد بالك يا عمر ؟ 
ولا نقول ماي شوكليت ليدي ؟
ولا نقول ماي فانتستيك :)
خليني أتكلم بقى عن أختي شوية تحت 
بس كدهون :)
بدل ما أضربك فى سيقانك :P    
....
جاري الإستعداد لفرحة بكره 
لأنني ببساطة 
((
سأسطع كألف ألف ألف شمس كما لم أسطع من قبل 
سأشرق من جديد 
من بين النور والنار
لأجلها 
))
بحبك قد الحروف وبعد الحروف وبعد الكلام وقبل الكلام وقبل بكره وبعد بكره ولآخر يوم ومن أول يوم يا بنت اللذينة 
بحبك أكتر مما بحب نفسي 
أكتر مما بحب نفسي 
أكتر مما بحب نفسي 
عرفتي بحبك قد إيه ؟؟؟
كريم أخوكي مش بيكدب فى كلامه 
مش هنسي مين اللي علمتني أقرا واللي علمتني أكتب واللى علمتني حتي أمسك المعلقة وخلتني أفكر بالعقل فى مليون مليار حاجة 
واللى سهرت تكلمني فى أيام الطفولة وكبرت لى دماغي 
وقدرت تخليني أفكر وأبقى بني آدم 
واللى دايما نصحتني وكانت جنبي 
أنا بحبك 
وهفضل أحبك
وأوعدكإني هفضل أحبك لحد ما أموت 
ودايما هتلاقيني بساندك وجنبك 
وبالذات بكره 
يخرب بيت كدا 
بجد بحبك :)
أخوكي :
كرمللة :)
 

هناك 8 تعليقات:

غير معرف يقول...

الوفاء بالوعد صفة نادرة جدا لانها متعبة جدا..مش سهل انك تمد ايدك لناس خذلتك او ناس ماتستحقش المساعدة..رغم انك زى مابتقول طردتهم من حياتك بس اكيد انت بتعرف تسامح..او تنسى بالاصح تتناسى

:)

ربنا يجعل ايامك كلها افراح وتفضل عون لكل اللى حواليك

story pain

شاب فقرى يقول...

منورة وهرد عالتعليق وللاسف اضطريت اقص منه أجزاء لاني مش عايز حقايق معينة تظهر للنور

هرد عليه فى وقته

كل شىء فى وقته

منورة دايما وانتظري ردي يا عزيزتي pain

شاب فقري

mahasen saber يقول...

اجمل م فى البوست الفضفضه والبوح وانتا بتحكى بتحكى كأنى فى عرض حكى ممتع

حلو قوى يا كريم بس ملاحظه صعب قوى تمسح انسان برمشة عين زى ما بتقول العلاقات الانسانيه عايزه صبر وتسامح وبال طويل طويل طويل قوى

خالص تحياتى يا شاب يا فقرى

غير معرف يقول...

مش عارفة اقولك اية ؟؟؟؟؟

غير معرف يقول...

حتى اخر مكالمة كنسلت عليها فاكرة حد تانى اة يانى

شاب فقرى يقول...

غير معرف


مين ؟؟؟
مش واخد بالي بس ممكن أفتكر

شاب فقرى يقول...

محاسن صابر

منورة كالعادة وجدا جدا كمان :)

لما الصبر بينتهي
ولما التسامح مبيبقاش متبادل او عالاقل بيخلص رصيد الشخص

ببساطة بيبقى سهل اوى تمسحي اى حد فى فى غمضة عين

ودا عالأقل سهل جدا فى شريعتي

لكن علي قدر سهولته بخليه الاختيار الاخير والسلاح اللي ما قبل الأخير

فهمتيني طبعا

فى شريعتي انا سهل
:)
لكن عند الناس قد يكون شبه مستحيل
وخصوصا الناس اللى عارفاني كويس
:D


هستمر فى الكتابة كدا كتير اوى
اتمني يعجبك القادم

دمتي بكل ود

وفى انتظار آرائك دوما

شاب فقري

شاب فقرى يقول...

عزيزتي pain

جاء وقت الرد

أينعم انا فاصل وتقريبا كدا بنام وانا بكتبلك
ولكن

لا بسامح ولا بنسي

بس كلامي وعد يا pain


عمري ما أقول كلمة وأرجع فيها أو أقول كلمة ومنفذهاش

حتي لو مجروح ولكني طالما التزمت فلازم أوفي بكل التزاماتي
حتي لو اللي قدامي خذلني بشكل تام

بس كدا
التسامح للي يقدر عليه وللي يقدر يدفع تمنه وللي يقدر يعيش بيه او حتي يفكر فيه او يتقبل فكرة تنفيذه

انا بقى لاء

لاني مش بنسي
بفتكر كل حاجة اوى اوى اوى

وكمان التسامح صعب لاني شايف انها حجة الناس اللى عايزة توجعنا وتتعب اعصابنا وتجرحنا مرة واتنين وعشرة
هاتي لى حد مش قاصد يكسرني او يجرحني وانا هسامح وانسي كل تلات دقايق
فهمتيني اظن
صح ؟

منورة ودايما يشرفني ردك ووجودك

وعلي فكرة زعلان اوي لاني قصيت اجزاء من الكومنت

:)

هروح انام انا بقى حاليا

شاب فقري