الأربعاء، 3 أكتوبر، 2012

لو تعرفي

لو تعرفي
أنا أد إيه موجود تملّي في سكّتك
وحلم دافي لسّه تحت مخدّتك 
أنا قوّتك
حريّتك 
و حنيّتك
و تهورك 
و حكمتك
و ألفتك 
و غربتك 
و رغبتك في الحياة
فى الحياة

 

و هل إفترقنا موش صحيح الحب غيّر كل شيء
و الروح تبوح بأسرار اللقا لحظة ميلادنا كل يوم
و الروح تبوح بأسرار اللقا لحظة ميلادنا كل يوم
و الروح تبوح بأسرار اللقا لحظة ميلادنا كل يوم
 كل يوم

ليه ترسمي الكون الوسيع صندوق ورق !؟
 إستسلمي 
و إحلمي 
بكون جديد 
و مختلف
و اللي نلاقيه هوا المهم 
و أي شيء بنخسره مهوش مهم 
و مستحيل الحلم ممكن يبتدي من غير وصال بين البشر 
و نجوم كتير بتتولد حين نلتقي 
و نجوم تموت لو نفترق في الحياة 
لو تعرفي 

 ***
 بس دا لو تعرفي ...
وللأسف محدش بيعرف حاجة ...
حتي لو قلت الكلام وإتسمع وإتقري وإتفهم ممكن ميكونش بيتفهم زي ما إنته عايز تفهمه للى قدامك لأنه ببساطة له معني كبير أوي عندك , مش مجرد كام سطر او كام حرف أو فكرة مخفية أو حتي ذكري منسية أو أو أو لأنه المعني عندك حقيقة وإحساس وإيمان مش مجرد الكلمة اللى بتتسمع لاء فى كتير أوي وراها ممكن محدش ياخد باله منها حتي لو غنيت بالكلمة وسبحت بيها كل يوم مليون مرة وكأنك الراهب العاصي الملعون اللى مفيش له توبة ...
لو بقي ...
لو المعني يوصل 
لو الإحساس يوصل 
لو الحقيقة تتفهم كويس ..
لو لو لو لو لو مليون المليون المليون لو ..
إحتمالات مليارات المليارات 
بفكر فى الإحتمالات اللى قدامي بلاقيني ممكن أبقي مليار مليار حاجة بعد كل اللى مريت بيه وقواني وخلاني احسن و و و و, لكن بلاقيني مختار أكون أنا وبس مش المليار مليار حاجة , لأني مش حاجة , لأني مش جثة بتتنفس , لأني إنسان , لأني اللي فيا لو كان لعنة فهوا أحلي هدية برده , فى حاجات كتير أحلي من إنك تذكرها أو تفتكرها وفى حاجات كتير أكثر وجع من إنك تفكر فيها برده أو تمد إيدك على عينيك وتشيل الحاجز اللى حطيته  مانع عشان يعميك عن رؤية كل شى بس فى حاجات بتوجع لدرجة إنك متقدرش تقرب لها , منتش قد الوجع , وحتي لو كنت قده وأقوي منه مليون مرة وياما شفت وياما بكيت وياما إتكسرت إيه لزمة إنك تروح تتكسر تاني ؟؟؟ نوع من الحج الروحي مثلا ولا نوع من أنواع صلاة الألم لجنونك ؟؟؟
لو تعرفي ...
لو بقي ..

الصورة تصويري من فيلم : snow white and the Hunts man من النسخة البلوراي الاربعة جيجا و640 ميجا , كنت منزله عشان اشوفه مع حد أو أحوشه ليوم وحش يقدر يفرحني فيه وبالذات لأنه بيتكلم عن سنو وايت أكتر بنوتة و شخصية بحبها ... والصورة لما سنو وايت أكلت من التفاحة وقبل ما الأمير يفوقها بقي ...


 شاب فقري 
ملحوظة : إلي الدنيا اللي تقريبا إتحدتني ووقفت قدامي عشان منشرش البوست , من أول النت البطىء اللى رفض نشر البوست نص ساعة كاملة وأغني علي الحجار اللى كانت تايهة مني والصورة اللى إترفعت فى عشر دقايق لوحدها , وكل حاجة بتوجع فى كل حرف بيتكتب سواء هنا أو جوايا , وعنيا اللى بقت بتحرقني بجنون و التلاجة اللى وقعت النهارده عليا وانا شايلها ونزلت عليا سليمة والحمد لله وكل العلامات الكونية والإشارات والقدر اللى وراني حاجات بتقولي متكتبش وخليك مغمض عينيك إلا إني مازلت مازلت بقول لكل الحاجات دى طز جدا وبقولهم كعادتي فاشل فى الخضوع لأي شىء وكعادتي متمرد على اللخبطة دي كلها .

هناك 6 تعليقات:

sara adel draz يقول...

البوست حلو اوى ....

وبالنسبة للدنيا اللى بتتحدانا فهى اوقات بتبقى رخمة اوى وعايزة حد ارخم منها عشان ينتصر عليها

تحياتى

شاب فقرى يقول...

:) :) :)

بقالك كتير أوي مزرتينيش :)

منورة أولا

وجدا كالعادة

مازالت الرخامة مستمرة ومازال فشلي فى الخضوع مستمر :)

تحياتي
شاب فقري

أشرف يقول...

لو تعرف أنت بقا
أنك بالبوست دة أبهرتنا
بالبوست ده فوقتنا
عرفتنا
أن فيحد مننا
متمرد اكتر مننا
تقبل مرورى وردي
ودومت بخير

Tamer Nabil Moussa يقول...

السلام عليكم


ادعوك لحضور حفل توقيع ديوانى الاول

يسعدنى حضورك

التفاصيل فى المدونة عندى

مع خالص تحياتى

فافى يقول...

حلوه اوى بس انا تهت :)

mahasen saber يقول...

الحياه متبئاش حياه بدون كل ال لو لوات دى والدنيا طبيعى تخلق كل وجع بداخلنا

ايه بئا موضوع التلاجه ده ..تلاجه بحالها وقعت عليك

والصوره حلوه قوى ولفتت نظرى قبل ما ااقرا البوست