الأحد، 27 مايو، 2012

بيقولوا ( 1 )


بيقولوا الواحد لما بييجي يموت حياته كلها بتمر قدامه كأنها شريط سينما ...
هما عرفوا منين إذا كان كل اللى ماتوا ماتوا ومقالوش حاجة 

بيقولوا إن لما الواحد بينسي وبتمر الأيام وبيكمل حياته مش بيحس بحاجة فاتت فى الماضى ...
طيب يا هلتري اللى الواحد بيحس بيه وبيضحك أوى أوى أوى من جواه ومن قلبه أو بيتوجع أوى كدا دا يبقى مر بيه ولا ممرش وياترى أصلا اللى قالوه دا صح ولا بيشتغلونا ؟؟؟

بيقولوا إن بكره حلو أوى ...
طيب هوا حد فيهم راح بكره وإتأكد بقى من المعلومة الخطيرة اللى بيقولوها لنا دى ؟؟؟

بيقولوا إن النسيان نعمة ...
طيب وياتري لو النسيان نعمة ليه بننسي الحاجات الحلوة اللى فرحتنا أوي زمان أو طيرتنا فى السما أو سنين الطفولة لما كانوا بيشيلونا ويرمونا فى الهوا ويدلعونا فى كل لحظة ؟؟؟؟

بيقولوا إن اللى بيتكسر مبيتصلحش ...
طيب مش يمكن هما محاولوش بما فيه الكفاية ؟؟؟ ويمكن لو إحنا حاولنا أكتر هنصلح كل اللى بيتكسر 

بيقولوا إن الحب لازم يبقى فيه عذاب لأن مفيش حلاوة من غير نار ...
طيب مش يمكن هما اللى بيعشقوا النكد وفى ناس فعلا عندها إستعداد تخلى الحياة حلاوة من غير نار فى قصة حب .؟؟؟

بيقولوا إن الواحد مبيعرفش إنه كان عبيط غير لما بيمر بيه الزمان ويبص وراه على كل اللى فات ...
طيب ما انا لما ببص على فكرة زى دى دلوقتى بشوف إن دا هوا العبط ذات نفسه إنى أحقر من أى حاجة فى حياتي أو من أى حدث وأعتبره عبط فهوا دا العبط بعينه 

البوست الأول :
 من حالات ووصف إحساس وكلمة شعورية ... البوست كله تساؤلات عقلية ولكنه بيوصف حالة الشك جوايا انا  .... مفيش إحساس للشك أو التمرد بييجى بدون فكرة .
البوست فى حملة مها النجار ( وصف كلمة شعورية ) والكلمة هنا هى الشك فى الحياة  وإحساس التمرد على كل شىء بنسمعه وبنشوفه 
وبما إنه الأول ... فيا هيبقى فى غيره على نفس الوتيرة دى يا إما هيبقى فى غيره فى وصف كلمة تانية ...
شاب فقري

هناك 7 تعليقات:

Miss LoZa يقول...

بيقولوا أن البوست ده حلو جدا
طيب لما يشوفه الى بعده هيقولوا عليه أيه ؟

ههههههههههههههههههههههه

سيبك من أى حاجة فى البوست

شايف اسمى منور أزاى ؟! :$

هههههههههههههههههههه

بجد بقه البوست عاجبنى جدا اصلا وعايزة منه تانى

بما أنى فى امتحانات وبَخُم فى الكومنت فأنا مش عارفة أعلق على كل حاجة فيه

بس أستنى منى كومنت أد البوست بتاعك مرتين اصلا :P

هاه
بس
خلاص
يلا
كفاية

شاب فقرى يقول...

على فكرة مكنتش اعرف ان انتى ميس لوزة
اه والله :D
البوست حلو جدا
الحمد لله على نعمة الستر وان الواحد عرف يكتب ويشارك بحاجة حلوة :)

اها
نادر اما انشر اسم اى حد عالمدونة بتاعتى :D
اسمك منور وزى الفل

إسمك مكتوب فى المحضر :D

هيبقى فى منه تانى بعون الله
مع انه مش عاجبنى لاكتر من سبب :D

مستني ذلك الكومنت

واهلا يا ميس لوزة :D

فقري :)

Story pain يقول...

بيقولوا إن بكره حلو أوى ...
طيب هوا حد فيهم راح بكره وإتأكد بقى من المعلومة الخطيرة اللى بيقولوها لنا دى ؟؟؟
فعلا احنا بيتضحك علينا كتير أوى

مازالت لكتاباتك ابداع(مش فقرى)..يا فقرى..:)

شاب فقرى يقول...

STORY PAIN
انا زعلان
بقالك اكتر من سنة مش بتزوري المدونة
حمدا لله بالسلامة
بيتضحك علينا كتير
أمال أنا بتمرد ليه ؟؟؟
:)
منورة وياريت تنوري أكتر هنا ومش تختفى كالعادة
مبسوط بوجودك :)
فقري :)

nebal يقول...

طب هو حد فيهم راح بكره ؟؟ ... بكره حلو ان شاء الله
بوست متفائل وشكاك برضه  يعترض على كل شيء نظري اتقال كقالب واتخذ مثال
جميله كلماتك يا فقري ... ربنا يوفقك

MEROOooOOoo يقول...

جميل جدااااااا
فعلا ساعات كتير بنقول ونردد الجمل من غير ما نفكر فيها

MISS ROODY يقول...

بيقولك. بقى يا سيدى
ان البوست ده جامد جدا

كلامك رائع فعلا و عندك حق و انت كده شاركت الالف اللى انا منهم اللى مش بتحب تقتنع باى كلام و خلاص و منهم الحاجات اللى كتبتها