الثلاثاء، 10 يناير 2012

وراء الحقيقة

بيقولوا إنى باخد بالى من التفاصيل
فكرت كتير فى كل فعل ورد فعل إنته عملته وكل تصرف كان المنبع بتاعه إيه وكان السر اللى بيحرك دا كله إيه وفكرت فى القرارات والأحداث و كل حاجة حصلت , دا غير اللى إتحكالى ومكنتش أعرفه وغير اللى عرفته لوحدى , تعرف إنى فكرت لدرجة إنى وقتى بقى محتاج وقت زيادة عشان أفكر فيه , مجرد التفكير هلك أعصابى وتعب مخى , ومبقتش حاسس مين هنا أو مين كان هنا أو مين ممكن يكون هنا , فكرت كتير لدرجة صعبة تعبت روحى ومبقتش بقدر أخلى الموضوع يفوت بالساهل , لكن إنى ألاقى مبرر لكل الغضب دا ولكل الزهق واليأس والحزن دا فى نهاية المشوار , صدقنى والله العظيم حاولت : بررت بالأحداث والظروف والوجع والألم اللى كنت عايش فيه . لكن قبل كدا ؟؟؟ كان إيه السر

هوا إنته كنت بتجيب القوة دى كلها منين أصلا يعنى ؟ , أصلى عمرى ما شفت ضعف فيك فى حياتى من كتر القوة اللى كانت عاملة زى هالة حواليك بتقدر تتحكم فيها وتطوعها , فى الأول كنت فاكر الغضب دا مجرد إستعمال مفرط للقوة ولكن مع كل العقل دا ومع كل الفكر دا ... إزاى كان بيفلت الغضب منهم و إزاى كانت القرارات الغلط بتطلع منهم ؟؟

مش عايزك تقولى مجرد إنسان ومش عايزك تقولى الواحد بيفقد أعصابه لأن أنا وإنته عارفين كويس أوى أوى أوى إن عمر ما حد فينا فقد أعصابه للحظة او إتعصب لدرجة مبقاش شايف فيها اللى قدامه وبيجرح وخلاص , لأن أنا وأنته عندنا تحكم بعيد عن كل الناس وبعيد عن نفسنا حتى , أنا بجد حاولت وحاولت وحاولت لحد ما فى الآخر عرفت الإجابة ...

عارف إنك حزين ومكسور وموجوع أوى ودى كانت النهاية ولكن قولى براحة لو سمحت يعنى : هوا إنته مش عايزنى أمسح الحزن دا كله ؟؟ ولا عايزنى أعيش فيه ؟؟؟ ما هوا يا تتسيبنى أعيش فيه براحتى وساعتها هيبقى فيا ككل الغضب والحزن والعزلة دى كلها وهيرجع من تانى لحياتى مبدأ الوحدة ( مش هنكر إنى عايش المبدأ دا دلوقتى بس مش موضوعنا ) ساعتها هيبقى الوضع مختلف لو سلمت زى ما إنته سلمت

لو سمحت متقوليش بقى مسلمتش وإنك حاربت و إنك تعبت لإنى هسألك السؤال الأبدى : ليه محاولتش أكتر وحاربت أكتر وتعبت أكتر ؟؟؟ هوا مش الموضوع كان يستاهل ؟؟؟ طيب ليه محاربتش أكتر وليه مش إتحديت أكتر ؟؟؟

أنا سمعت كتير جدا عن اللى عملته قبل كدا لدرجة خليتنى أحس إنى معملتش لك ولا ليا أى حاجة وإن كل المجهود والطاقة والتعب دا كله مجرد حاجات تافهة جنب اللى إنته عملتها ... ليه بقى مش حاربت أكتر ؟؟؟ ليه مش إتحديت كل حاجة زى ما عملتنى أو على الأقل حاولت تصبر زى برده ما علمتنى إن الصبر ملوش نهاية وإن لو جه وقته فلازم تصبر وتستحمل ؟؟؟

بص ... فى حاجات لو عملناها هنبقى مستحيل ولو معملناهاش هتفضل حياتنا ملحمة من الألم والوجع والإستمرارية وفعل الصح بغض النظر عن الآخرين وهتفضل الملحمة دى بتمثل الوحدة والصبر والعزلة أو بمعنى آخر مش هتبقى ملحمة بقى مع الصبر على كل دا هتبقى بمعنى آخر أسطورة .

باقى أربعتاشر يوم وتصدق وحشتنى أوى
مفتقد حضرك بشكل فظيع ,, مفتقد نقاشى معاك لأنى كنت بحس إن فى حد بيتكلم وفى وجهة نظر وفى حد بيفكر وبيقدر على كل حاجة , بجد مفتقدك ومفتقد الحديث معاك و هستنى هديتك , عارف إن الوقت مش هيعدى من غير ما توصلنى منك هدية ...


كريم

هناك 3 تعليقات:

شاب فقرى يقول...

صورة ايه وعمرة ايه وجلباب ايه
انا مش فاهم حاجة من حضرتك ...
ممكن شوية توضيحات بس كدا ؟؟؟
ياريت يعنى عشان مفهمتش حاجة أنزلك الصورة اللى عايزها :)
تحياتى
فقرى

شاب فقرى يقول...

وياريت تمضى فى اخر الكومنت عشان اعرفك بعد كدا يعنى
اذا سمحتى يعنى
شكرا

شاب فقرى يقول...

يعنى انا بقول بس : صورة ايه اللى بجلباب وعمرة ؟؟؟؟
انا عمرى لا روحت عمره ولا لبست جلباب ولا حطيت صور زى دى عالفيس
مين حضرتك بجد لأنى وربنا كدا تهت خالص
المفروض ان كل واحد يخش يتكلم ويرغى فى موضوع ويعتقد إنى خلاص مكشوف عنى الحجاب وهعرف شخصيته
ما تكتب إسم سموك
وهوا أنا لازم أسأل فى كل كومنت
لا إله إلا الله
فقرى