الجمعة، 9 ديسمبر 2011

لو حلمك [ بقلم الباشا ]

قصيدة لو حلمك بقلم صديقى المدون : شريف الباشا

لو حلمك
كنتي حافظتي معايا عليا
كنتي فضلتي ماسكة إيديا
وما بعدتيش !
كنت باموت
حتى الأهة
كنت حابسها وأبان مبسوط
علشان بس ما تتغميش !
حبيتك
وما حبيتنيش !
إلا حتى ما حاولتيش !
متكلبشة رجليكي فِ خوفك
فشل الماضي ساكن جوفك
وانتي مكانك ما خرجتيش !
فالحة تقولي :

إنـِك ليا .. وماليش غيرك
ما تسيبنيش ؟

إزاااااااااي ؟

بتلاعبيني ؟

ولا إكمني كنت عليكي رايح جاي ؟

جايز طيب

بس الطيبة ما تعيبنيش !

بس !


خلاااااااااااص !


ما ترديش !


***
اتطمنتي إني حبيبك ؟
وإني فِ جيبك ؟
وإنك لو سيبتيني هاضيع
وابقى ما فيش !
دايماً فاكره إنك أذكى
وإنك مالكه
طب بالذمة ؟
حد يشد ولا يرخيش ؟
كوني صريحة فِ مرة وحيدة

وما تغشيش !

هل فعلاً

كنت أنا حلمك ؟

ابنك ؟ راجلك ؟ سندك ؟ كلك ؟

حضن لهمك ؟ قدر احتلك ؟

ولا ده كله جبر خواطر ؟

ما تجاوبيش !

ده مش إجباري

وما تعتذريش !

إذا كان قلبي

اتداس بالجزمه

وما وقفتيش !

***

الحُــب

عطــــاء

مش ضمة فِ ضلمة

ورسالة ناعمة

وشغل نفاق !

الحُــب
أرزاق
وأنا مش شحات
ولا غاوي إواء
وما باشكيش !
الحُــب
خِنـــــاق
فِ الروح
بيعلم
مش تهويش !
***
خلليـــــــــكي
غبية
عنيدة
تاخدي تمللي
ولا تديش !
خلليـــــــــكي

محلك سِر

بتنزفي عمر

وما بتمشيش !

ماشيه بضهرك

معجبه إنك

ما بتقعيش !

خلليـــــــــكي
تايهه ما بين أحلامك
ولا تصحيش !
خلليـــــــــكي

عايشه فِ كدبه كبيـــــرة

اسمها : انتي

وانتي ؟؟

ما فيش !

زي الأغنيـــــــــة

بكلام ثابت

بعد شوية

بيصبح بايت

ما بيغويش !

أغنيـــــــــة

مهمــــا كانت

حلوة

شجية

ما تشـَبعش

ولا ترويش !

أغنيـــــــــة

مهمــــا نحسها

مش بتحس !

تاخد مننا

ولا تنقصش !

وما بتسمعش ..

غير لشيطانها

وما بتهديش !

***

الله يسامحك
وأنا ....
لو كنت ظلمتك
سامحي ....
أو
ما تسامحيش !
دي حاجة تخصك وحدك

ما تفيدنيش !

أنا من غيرك بيكي هاعيش !

قلبي أنا واخد ع التلطيش !

عاااااااااااااااااااادي

ما تدقيش !

إفرحي ياللا ما تتكسفيش !
سيبي الحزن بحاله عليا
هايكفيني ما تهتميش !
هايغطيني فوقي وتحتي
وهاينحَر من دمي وراحتي
ما فيش حزن ما بيقضيش !
إمشــي بسررررررعة
ما تلتفتيش !
***
بكره الدنيا تفضى عليكي

واللي معاكي .. هايبقى عليكي

تشحتي حد يحن عليكي

ولا تلقيش !

ما أنت "نفسك" ما رحمتيش !
***
فاكره ؟
لما سألتك
- وأنا قدامك -
عايزه إيه ؟
وما عرفتيش ؟
أديني خلصتك مني يا ستي !
عرفتي الوقتي ؟؟
............
ما تبكيش !
***
- ملحوظة :

مهما تحاولي إنك تنسيني

ما هاتنسيش !

***

شريف بعشق القصيدة دى وبالذات الأجزاء اللى علمت عليها كدا وكدا ...
تحياتى ليك ودامت إبداعاتك ..
شاب فقرى

هناك 5 تعليقات:

P A S H A يقول...

اتشرفت بجد بوجود القصيدة عندك :)
والمدونة وصاحب المدونة تحت أمرك يا أستـــاذي .. ربنا يكرمك ويوفقك وييسرلك الاحوال بإذن الله

وباعتذر جداً عن التقصير في المتابعة

أخوك شريف

شاب فقرى يقول...

الباشا حبيبى :)
منور يا كبير
وكلماتك بجد إبداع
واللهم آمين يارب يسمع منك
أخوك فقرى :)

شاب فقرى يقول...

غير معرف
أولا عشان أنا مش عارف مين بيتكلم
ولا عارف بتتكلم فى إيه
ولا حتى وصلنى قبل كدا منك كومنتات فمش عارف أرد
والله والله والله ما فهمت الكومنت خالص بأى شكل من الأشكال ...
ياريت تفهمينى ومن الأول وواحدة واحدة عشان أقدر أرد عليكى
أكيد مستنى التعليق الجاى وهحاول أفهم منه أكتر
خالص تحياتى وتقديرى وإحترامى
فقرى

شاب فقرى يقول...

غير معرف
منشرتش الكلام
إحكى من الأول
وإتكلمى وهرد عليكى هنا
تحياتى
فقرى

حبات التوت يقول...

بجد حلوة
وجامدة اوى كلمتها واضحة وصريحة وتوجع

لا حلوة بجد