السبت، 22 أكتوبر 2011

ولكن برده ليا شروط

ولكن برده ليا شروط

كِفَايَه انِّي بَاحِبِّكْ مُوتْ

وحُبّ النَّاسْ نَدَامَه وْعَارْ

وحُبِّي عَكْسهُمْ عِفَّهْ

ولَوْ تِرْضِي فَعَنْدِي شْرُوطْ

أَنَا طَبْعاً بَاحِبِّكْ مُوتْ

ولَكِنْ بَرْضُه لِيَّه شْرُوطْ

أَنَا عَايْزِكْ تِكُونِي فِي الْوَرِيدْ دَمُّهْ

وِتِبْقِي فْ عَقْلِي انَا هَمُّهْ

وِتِبْقِي وَرْد جُوَّا الْقَلْب

غِيرِي يْشُوفُه يِتْحَسَّرْ... وَلاَ يْشِمُّهْ

وعايزك تفهميني لو كلامي طلّ من رمشي

وعَايِزْ رِمْشِك الْجَارِحْ

صِرَاطْ يِجْرَحْ فُؤَادْ غِيرِي مَايِرْحَمْشِي

وَانَااجِيلِك

أَعَدِّي فُوقْ صِرَاطْ رِمْشِكْ... وَلاَ اخَافْشِي

قصيدة مرسال لحبيبتى لأشرف توفيق :)
وأغنية لفرقة مسار إجبارى بنفس الإسم
***

الحرية نوع من الإخلاص
الحرية ما هى إلا عبارة عن إختيارات ومسؤلية , ولما تسيب الدفة لحد تانى يسوق المركب بتبقى سايب له عمر جاى وأحلام سنين قدام و لهفة وشوق لبكره كمان وسايب له حاجات ميتقالش عنها كلام لأنها أكبر من كل الكلام , إختيارات والإختيارات بتجيب عواقب سواء بعقاب أو بثواب , وحتى لو مشيت وسيبت كل حاجة بتستنى تشوف الحرية هتوصل الطرف التانى فين , تشوف مركب حبك ممكن تنجى فى قلب العواصف ولا لاء , تشوف الشارع هيحضن الريح ويكمل ولا هيتقطع وتغرق كل أحلامك وأفكارك وكل اللى بنيته , فى كل لحظة فيها بعد أو قرب أو إختيار بيكون فيها حرية , الحرية بتظهر لك الإخلاص بحيث إنه يا إما هتلاقى الطرف التانى محافظ عليك مهما كنت ومهما كانت مبرراتك وشكلك وإختياراتك اللى فاتت واللى عملتها معاه , تلاقيه مقدر تضحياته ومقدر تضحياتك ومقدر كل لحظة كانت حلوة أو مرة أو وحشة أو حلوة وتلاقيه بيحضن الألم وبيعانق التعب والمر عشان بيحبك وحتى لو مش جنبه هيختارك ويستناك ويبعت لك كل يوم مرسال يقولك من عالشباك إنه بيحبك ومستنيك ويفضل يحاول ولو فشل بيحاول تانى وتالت ورابع وعاشر ومبييأسش , مبيفكرش فى الكرامة أو فى أى حاجة تانية لأنه شايف حبك إنته حياة وشايف إن لو بعد عنك مش هيلاقى شط تانى يرسى عليه ولا هيلاقى حضن تانى يقدر يساعه أو يملاه , شايف إن حبك حياة ولو إتخلى عنه يبقى كل يوم هيموت يا إما لوحده أو مع حد تانى ولا يعرف عنه حاجة , الحرية بييجى معاها إختيارات والإختيارات بييجى وراها عواقب والعواقب لازم يتم تحملها مهما كانت ... للأسف محدش بيفهم معنى الإختبار غير لما بيغلط .
***
الشعلة والمعرفة
أى علاقة بتبتدى دايما بشهر عسل ومع أول كلمة حب ومع أول خروجة ومع أول سهرة للفجر ومع أول كلمة حلوة بيبتدى شهر العسل وبتقيد الشعلة اللى بتجمع الطرفين وتفضل قايدة كدا طول ما هما مبسوطين وفرحانين إن هما لقوا بعض (( على إفتراض إنه حب حقيقى ... لو يعنى )) ويفضلوا سوا كدا غرقانين فى العسل وناسيين بكره وناسيين المستقبل وناسيين كل حاجة ومكملين وبيحاولوا يعيشوا كل إحساس بأى شكل لحد ما تبتدى المشاكل بأفكار وحدود كل طرف ومتطلبات ورغبات وإحتياجات كل طرف , ومن هنا تبتدى الشعلة شوية شوية تنطفى ومع كل جرح بيموت شوية حب وتتكسر شوية حاجات لحد ما ييجى يوم يبقى الطرف التانى عادى إنى أجرحه ما هوا هيسامح وهوا بيسامح لأنه أساسا مش فى دماغه أى حاجة ولا فارق معاه .
أقدر أقول إنى عرفت كتير وإتعلمت كتير وشفت كتير وعمر ما كل حكاياتى طلعت برا أو إتعرفت لحد مهما كان قريب ولكن المعرفة وكتر اللى مريت بيه عملنى إزاى أكمل وإيه اللى بينور الشعلة أكتر وإيه اللى بيخمد نارها وإيه اللى بيقويها ويخليها لآخر لحظة منورة وبتدى طاقة للعلاقة عشان تستمر , إتعملت ( والحمد لله ) اللى يخلينى أعرف طريق للفرحة وطريق إزاى تقدر تكمل بيه العلاقة وإزاى تقدر تقف مكانك ساكت وهى بتضيع لأنك ببساطة عايزها تضيع لأن الطرف التانى ميستاهلش , إتعلمت كتير ...

رد خاص
وأنا كمان عايزك بجد ... وفهمت معنى الإنتظار ...
شاب فقرى
ملحوظة 1 : شكرا لكل الناس اللى وقفت جنبهم لما كانوا بيموتوا بمعنى الكلمة ووقفت جنبهم وكنت موجود كل لحظة فى كل يوم وملقتش منهم رسالة وأنا عيان أو حتى سؤال ... سبحان الله ... سبحان الله ... سبحان الله .
ملحوظة 2 : أنا بقيت كويس الحمد لله وبخير وبكتب من جديد ... تحياتى يا حلوين :)
ملحوظة 3 : البوست الجاى بقى ... مين اللى يقدر يحبس بحر ؟؟

هناك 11 تعليقًا:

الوردة السوداء يقول...

الكلام ده مريح :)
هستى البوست الجاي..
دمت بابتسامة وبقلم نابض :))

Sally Ahmed يقول...

ويلكم بااااك يا فقرى "الف حمد الله على السلامة"
ايه الرجووع القووي دة حلوووة قووى
مستنيه اللى جاى :)

Carol يقول...

عجبني التدوينة جدا
طريقتك و تحليلك
ونظرتك للحياة
و اللي اتعلمته من الايام

فعلا مبسوطة عشان جيت هنا صدفة :)

غير معرف يقول...

اقول بس اية؟سكت الكلام وخلص؟

شاب فقرى يقول...

الوردة السوداء
تأخرت الزيارات بس نورتى فى الاخر :)
دمتى بكل ود ... الكلام فيه معانى كتير بس فعلا مريح
:)
فقرى

شاب فقرى يقول...

sally ahmed
كله بأمر الله
إحنا بنعمل اللى علينا وبنروح للدكتور وبناخد الدوا وبرده بنعمل نفس الغلط كل مرة :)
الشفا دى مسألة بتاعت ربنا وإحنا برده بنعمل اللى علينا من حيث سبب التعب :D
دعواتك يا سالى
اللى جاى قريب إن شاء الله :)
منورة
فقرى

شاب فقرى يقول...

carol
أنا أسعد طبعا بمرورك :)
وربما صدفة خير من اى حاجة تانية
:)
منورانى :)
فقرى

شاب فقرى يقول...

غير معرف
أكدب عليك لو قلت لك فهمت من الست كلمات دول حاجة :)
نورت يا عزيزى
أخوك فقرى

غير معرف يقول...

هههههههههههههههههههههه طب منا عارف

غير معرف يقول...

مع انى بافهمك من غير ماتتكلم وبتوقع هاتكتب ايةوساعات القيك كاتب اللى فى دماغى بس الفرق انى مش باعرف اعبر

شاب فقرى يقول...

غير معرف
ياريت ياريت ياريت نتكلم
طالما فى حد فاهمنى كدا
يبقى سيب اى وسيلة نتواصل بيها
أكيد دا هيسعدنى وهفهم اللى هتقوله وهيشرفنى نتكلم
:)
منور وفى انتظار آراءك
حاول تعبر
سهل على فكرة :D
أخوك فقرى