الخميس، 15 سبتمبر 2011

الإنسحاب و نقطة الإنكسار والتسليم

النهارده بتكلم عن علم ومعرفة وتجربة وخبرة ...
النهارده أنا عارف بقول إيه كويس أوى ...
لذلك ركز فى كلامى ...
كلمة كلمة ...
حرف حرف ...

***
الإنسحاب :
الإنسحاب من حياة إنسان عامل بالظبط زى الإقلاع عن الإدمان ... مستحيل تقدر تعملها لو إنته مش مرتب نفسك صح ... لو مش عامل حسابك على كل حاجة بمعنى كل حاجة ... إنسحابك بدون تفكير وبدون خطة وأحيانا لو بخطة فاشلة هيكون بالنسبة لك إنهيار لإنك هترجع له أضعف من الأول مليون مرة .
نقطة الإنكسار :
عند إنسحابك من حياة شخص ما ..لو فى بينكم علاقة عاطفية أو قصة قوية او حاجات تقوى اللى ما بينكم ... بتصبر ... بتحاول تكمل فى إنسحابك ... بتحاول تبقى أقوى ... بتعمل كل الحاجات اللى تمنعك عن الرجوع .. بتاخد خطوات يمكن شايفها لا طائل منها عشان خاطر تشغل بالك وقلبك بس الطرف التانى بيكون فى حياتك بنسبة مليون فى المية فمش بتقدر على اللى بتعمله دا عشان كدا بتفضل تتحمل لحد نقطة معينه تفضل تفكر نفسك بعيوب الطرف التانى ... وتحاول تشوف النتيجة المصيبة اللى هتحصل لو رجعت له تانى ... تفكر نفسك بكل حاجة وحشة .... عشان تثبت على موقفك ولكنك بتنسى :
1- إن مع الوقت شوقك بيزيد وبيتضاعف أضعاف أضعاف مقاومتك
2- إن حبك له مع الوقت هيبقى عقدتك فى حياتك والقصة اللى هتغير لك مسار حياتك
3- إن إنته بتحبه مش معاه عشان هوا أحلى واحد فى الدنيا أو أجدع واحد فى الوجود
4- إن الحب لا يعترف لا بالظروف ولا بأى شىء عشان كدا هيفضل يكبر فى قلبك هتفضل تتحمل وتتحمل وتتحمل وتتحمل لحد نقطة معينة هتلاقى نفسك بتتقبل فيها عيوب الطرف التانى هتلاقى نفسك جاهز لإعطاء الطرف التانى أى شىء هتلاقى نفسك عايز ترجع الجنة اللى إتحرمت منها برغبتك بإنسحابك وهنا بتحصل نقطة الإنكسار اللى بتنكسر فيها نفسك تحت ضغط إنته لا تتخيله ولا عمرك فكرت إنه يحصلك
التسليم :
فى الحالة دى بتسلم بكل شىء وبتتقبل أى شىء .... فاكر إنك كنت سايب لعبة على الترابيزة ولما ترجع هتلاقيها ... فاكر إن إنته هتلاقى كل شىء فى مكانه ...ولكن تسليمك جه فى الوقت الغلط ... ممكن يفرق دقيقة أو ثانية أو ساعة ... على حسب سرعتك فى الرجوع ... على حسب ما هتكون خسارتك ... سواء مع نفسك أو مع الطرف التانى .... هقدر أقول حاجة واحدة : تخيل لو الطرف التانى رفض رجوعك ؟؟؟ هتلاقى نفسك ولا حاجة ... بمعنى ولا حاجة ...
***
بس كدا إنتهى الكلام ... اليومين اللى فاتوا كانوا يوم وحش أوى ويوم حلو أوى ومليان مفاجات شفت حاجات متتحكيش ... بس هكتب عنها
صحيح : كاتب البوست دا ليه ؟؟؟
بفكر نفسى بوقت كنت فيه عندى نقطة إنكسار ... ودلوقتى معنديش
بفكر نفسى بوقت كنت فيه ممكن أسلم ... ودلوقتى مستحيل
بفكر نفسى بوقت مكنتش بعرف أنسحب فيه ... ودلوقتى بعرف
مينفعش أقول الطرق لكل دا مع إنى عارفها ودا مخلينى متوجعش مهما كان السبب
مينفعش أقول لأن لو عرفت سر الخدعة فالساحر هيقعد فى بيتهم
كريم فقرى

ملحوظة : يوم الجمعة فى نفس المكان بتاعنا الساعة تمانية هستناكى ... متتأخريش .

هناك 9 تعليقات:

غير معرف يقول...

لو بعت وش اسمايل ممكن يعبر عن كلام مش عارفين نقوله

شاب فقرى يقول...

رد خاص جدا إلى صاحبة التعليقات التى لاتنشر
تحبى أناقش المشكلة والموضوع هنا ؟؟؟ فى الرد ؟؟؟؟
فى انتظار رأيك عشان أبتدى أتكلم
وأنا قريت ردك وكونت فكرة وعندى رأى إن شاء الله هيفيدك جدا
فى انتظار موافقتك على انى اناقش المشكلة هنا
تحياتى
فقرى

شاب فقرى يقول...

غير معرف
ياريت والله
نفسى فى وش واحد اسمايل :(

شاب فقرى يقول...

صاحبة التعليقات التى لا تنشر
أى رد ليكى مش عايزاه يتنشر نهائيا ...
طيب إزاى أرد ؟؟؟
إزاى ؟؟؟
عالعموم وخلاصة الكلام وبعد نقاش ممكن يستمر سبع ساعات
أحب أقولك إن رأيى الشخصى
سيبيه ... سيبيه ... سيبيه
إنسيه تماما وكملى حياتك أو إعملى حياة تانية من جديد
لازم تسيبيه وتمشى
لازم تمشى
عايزة تعرفى رأيى بالتفصيل يبقى تقترحى شكل أرد بيه عليكى وأنا أرد ...
لأنى مش عارف أرد عليكى إزاى
منورة وفى إنتظار آرائك دايما
خالص التحية والتقدير والإحترام
كريم فقرى

شاب فقرى يقول...

اضيفه ولا ابعت لك عليه الرد ولا ايه ؟؟؟

sony2000 يقول...

عندك حق ياكريم
وربنا معاك يارب

حـــلـــم كـــان يقول...

اعتقد ان السبب ان تكتب البوست ده انى كنت محتاجه اقرا الكلام ده فى الوقت الى انا فيه ده بالذات

قلم رصاص يقول...

انت رائع ياكريم
:)

Romancia يقول...

انت مش ممكن يعنى وفى الوقت دة بالذات الاقى البوست بتاعك كلامك كتير بيجى فى وقت يخلينى قربت اصدق انك حد اعرفه وبتعامل معاه وكان الكلام موجه ليا

خالص تحياتى