الاثنين، 29 أغسطس 2011

ليلة العيد يا حبيبتى

السلام عليكم ورحمة الله وبركاته
حبيبتى الغالية : ... وهكتب ليه حروف إسمك ما هو أنتى فى قلبى ساكنة القلب عارفة بقصتى وحالى

النهارده ليلة العيد ... إنتى مش فى حضنى النهارده للأسف ولكن ... إنتى أكبر من كل حاجة فى حياتى ...أكبر منى ومن حضنى ومن أى كلام أقدر أقوله ...إنتى معايه ... ماليانى ... مالكانى ... لأول مرة بقولها وأنا حاسس إنى مش هتجرح منها أو هتألم بسبب إنى قلتها ... لأول مرة حاسس إنك فى كل حاجة ... فى عقلى وأنا بكتب ... جوا قلبى وأنا بحس ... فى عيونى وفى كل جزء فيا بلاقيكى ...النهارده يوم خاص بيا أنا وإنتى وبس ... نفسى أقعد أكلمك وأحكى لك عن اللى جوايا واللى حاسس بيه ...نفسى النهارده تبقى ماليانى أكتر من كدا ... نفسى تبقى معايه أكتر من كدا ... نفسى أشوف عينيكى قبل ما أنام ... نفسى أسمع صوتك وأنتى بتغنى ومبسوطة وبتحاولى تخلينى انام عشان هنصحى من بدرى ... أنا مبسوط لأن دا اول عيد هيمر علينا يا حبيبتى ... مبسوط جدا
كان نفسى يمر علينا وإحنا مخطوبين أو متجوزين او قاريين فاتحة أو أى حاجة ...
إن شاء الله كله جاى عن قريب أوى اوى اوى ... بس إكبرى إنتى بس وخدى بالك من نفسك عشانى
كان نفسى النهارده فى الوقفة كدا أكلمك عالفطار وأقولك إنى جاى أفطر عندكوا النهارده ... وأجيبلك هدية صغيرة ... يمكن أرسملك حاجة بتحبيها مع إنى فاشل فى الرسم بس لما بيتعلق الموضوع بيكى برسم وبرسم حلو قوى كمان ... يمكن أجيبلك كتاب بتحبيه ... يمكن أجيبلك هدية مجبتهالكيش قبل كدا ... وتتفاجئى زى كل مرة ... كان نفسى أفطر عندكوا النهارده ... والطريق يبقى زحمة وتقولى لى مينفعش تتأخر بقى وتتصلى تقولى لى إتأخرت ليه ... بس والله مش هيبقى بإيدى بقى ... إنتى عارفة إنى بتأخر وبحب أتأخر ... وعارفة ليه ؟؟؟ صح ؟؟؟
بس أوعدك إنى هاجى فى ميعادى مش هتأخر ....
ويمكن بقى بعد الفطار نقعد نتكلم كلنا سوا ... وبعدين نخرج بقى سوا برده ... ولا تحبى لوحدينا ؟؟؟ مش عارف بقى بس لازم نخرج أو يمكن نطلع نقعد عالسطوح ونقعد نتكلم ونهزر ونفرح لحد ما ييجى الوقت اللى همشى فيه وأول ما أنزل هتتصلى بيا تقولى لى هفضل معاك عالتليفون لحد ما تروح ... ونفضل نضحك ونفرح سوا
عارفة دايما لما برسم حياتى أو بتخيلها ... بتخيلها حلوة أوى بيا وبيكى ... ببقى برسم مناسبة زى دى وأنا شايف إن مستحيل يدايقنا شىء أو يغلس علينا حاجة فى الدنيا دى ...لأنك هتفهمى كلامى اللى هقوله لما أقولك إنك ماليانى أو لما أقولك بحبك يوم العيد ... مش عارف بقى ... بس هتبقى حلوة لما هتبقى هنا ... كل حاجة هتبقى أحلى ... عالأقل هعرف أنام بدرى بقى ... ما أنتى جنبى هنا اهوه .
وأول ما أروح أتصل بيكى تانى وأنا لسه قافل معاكى وأنا بفتح الباب وأقولك وحشتينى زى ما وحشانى دلوقتى كدا بالظبط ...
يمكن ملكيش نصيب تسمعيها منى فى الوقت اللى بكتب فيه لكن اكيد هيبقى لك نصيب تسمعيها مستقبلا كتير اوى حتى وانتى معايه وفى بيتى ... هنسهر سوا وهقعد أحكى لك بحبك قد إيه وأحكى لك على بكره وعلى اللى هنعمله وعلى مستقبلنا وولادنا ... هحكى لك على عمر هتقضيه معايا ... هحكى لك عن حياة فى إنتظارك ... وعن ولادنا وهنعلمهم إيه لما يكبروا يعملوه فى العيد
وياترى هنفسحهم وهناخدهم فين ونفضل كدا لحد ما انام منك كالعادة واصحى قبل الفجر بربع ساعة على صوتك
واروح اصلى الفجر والعيد
واول ما اطلع من الصلاة اقولك كل سنة وانتى طيبة
سبحان اللى خلق المودة والرحمة بين الأزواج وخلاهم مكملين لبعض بالفعل
انتى بتكملينى
نصى التانى اللى مقدرش استغنى عنه
واروح الاقيكى عاملة لنا فطار
طبعا لازم تعملى فطار
امال ايه
مش يوم العيد بقى :P
واورح بقى اديكى العيديه ونلف على حبايبنا كلهم ونسلم عليهم وعلى قرايبنا
من اول اهلك لحد اخر حد فى اهلى انا مش عارف ليه دايما الازواج بيكرهوا اهل الزوجة مع انى والله هحب اهلك واراعيهم زى ما هراعيكى يمكن عشان هما السبب فى وجودك فى الحياة وهما اللى حافظوا عليكى وحبوكى وخلوكى بالروعة دى والتربية والادب دا ربنا ما يحرمنى منك يارب واخيرا بحبك


حبيبك اللى ميقدرش يستغنى عنك
كريم

هناك 7 تعليقات:

shemo_ joker يقول...

السلام عليكم...


كل سنة وانت طيب يا كريم

وكل سنة وانتم دايما مع بعض ياررررب
وربنا يجمع بينكم ع خير ويخليكم لبعض
وميفرقش بينكم ابدا

ويحقق احلامكم

فى انتظار الجزء السادس
دومت بخير
فى رعاية الله
shemo

candy يقول...

كل سنة وأنت طيب ...

وياريت كل الشباب زيك كدة :)
بس كويس أنك كتبت الكلام دا فى بوست على المدونة ، علشان زوجة المستقبل تفكرك لو نسيت ...
ماكلهم بينسوا ;p

candy يقول...

كل سنة وأنت طيب ...

وياريت كل الشباب زيك كدة :)
بس كويس أنك كتبت الكلام دا فى بوست على المدونة ، علشان زوجة المستقبل تفكرك لو نسيت ...
ماكلهم بينسوا ;p

candy يقول...

كل سنة وأنت طيب

ربنا يخليكم لبعض ، ويجمعكم فى الحب والخير

وكويس أنك كتبت الكلام دا على المدونة ، علشان يبقى محفوظ للزمن ، علشان لما تنسى زوجة المستقبل تفتح الأرشيف وتفكرك ......... مالكلهم بينسوا.

دكتـــ نبضــة ــــــــــورة يقول...

كل سنة وانت طيب يا كريم ينعاد عليك بخير يااارب
ويارب العيد اللى جاى مخطوبين او متجوزين او اى حاجه المهم تكونو مع بعض وربنا يجمعكم على خير

بس انا عايزه اعرف حاجه هو يا ترا الاحاسيس الحلوة دى بتستمر كتير والا بتيجى فترة وتروح مننا ومنبقاش لقينها

حتت فضول بقا
انت ليه بتحب تتأخر ؟؟هاااااا ليييه
:)
فضول بقا بعيد عنك (:

وتانى مره كل سنة وانت طيب وعيد سعيد
وانا عايزه العديه :P

جايدا العزيزي يقول...

ربنا يسعدكم يارب

كل عام وانت طيب


☻/ღ˚ •。* ♥♥ ˚ ˚✰˚ ˛★* 。 ღ˛° 。* °♥ ˚ • ★ *˚ .ღ 。
/▌*˛˚ عــــــيــــــــد ** فــــطــر ** مــبـــاركــــ˚ ✰*

Romancia يقول...

حبيته اوى البوست دة وقريته ليله العيد