الأحد، 31 يوليو 2011

أنا هغير الواقع

فى كل سنة شهر تمانية بيكون أسود شهر فى السنة كلها من قبل ما يبدأ بخمستاشر يوم ومن بعد ما يخلص باسبوع ... هالة سودا وأحداث سودا بتحصل , يعنى مثلا لو قعدت معاكوا أفتكر فى شهر تمانية كل سنة حصلى إيه هفتكر وفاة والدى فى نفس الشهر والعملية اللى عملتها والنزيف والشركة اللى خربت وفلست تلات مرات فى شهر تمانية وإنى سقطت بتاع تلات مرات فى شهر تمانية دا غير الحوادث الفردية والجماعية ولو مكانش فيه حوادث كفاية أوى أصعب فترة تعب ومرض مريت بيها فى حياتى السنة اللى فاتت اللى قدرت تغير حياتى فعلا ... إنى فى الأساس كائن شتوى بالفطرة وبعشق البرد اللى عالأقل الحل الأسهل فيه هوا إنك تحط رجليك فى ميه سخنة وتدفى تحت اللحاف أو تنزل تتمشى وتتمتع ببرد الشتا بليل .... شهر تمانية بإختصار هوا أسود شهر بالنسبة لى فى السنة
ندخل فى اللذيذ والمهم

السنة دى شهر تمانية بيوافق رمضان ... يوم بيوم ... ومنتظر فى شهر تمانية السنة دى يحصل حاجات كتير حلوة فى حياتى , هغير حياتى بالكامل فى الشهر دا إذا شاء المولى تبارك وتعالى , هقدر أغير مسار حياتى كلها ... طبعا الموضوع عامل زى منعطف خطير ولازم تهدى السرعة شوية وتحاول تفكر كويس أوى قبل ما تعمل أى حاجة ... بس على فكرة برده اللى بياخد المطب عالسريع طالما إمكانياته كويسة يبقى يقدر ينجو منه .... واللى بياخد المنعطف عالسريع برده بيقدر ينجو منه لو عنده قدرة ومهارة كافية ,,,


السنة دى فى شهر تمانية نويت أكسر سلسلة الأحداث اللى بتحصلى كل سنة فى شهر تمانية ... السنة دى رمضان وأنا هنغير كل حاجة ...
السنة دى فى شهر تمانية هغير مسار حياتى ... هقدر أعرف الصح فين وحلمى فين وأكافح عشان أوصله
السنة دى فى شهر تمانية : أنا مستنى تلاتين خبر حلو ... وكل يوم خبر
عشان كدا من فضلك يا عزيزى قارىء المدونة ... لو حصل حاجة حلوة مهما كانت تافهة ... تعالى قولى
لو شفت موقف حلو أو فيه أمل تعالى أحكيلى ... يمكن تكون إنته الخبر الأول أو الثانى أو الثالث
بعون الله أنا مسافر النهارده ومش خايف ولا قلقان من أى قلق فى بداية الشهر الكريم اللى هيغير عمرى كله فعلا
بعون الله القصة هتكمل ... بس ياترى مين متابع ومستمتع ؟؟؟
إن شاء الله هحاول أكتب كل يوم بوست حتى لو هقولكم فيه اليوم كان خنيق ...
مع العلم إن آخر يوم نزلت إسكندرية كتبت بوست ومنزلتوش وسيفته عالجهاز عشان مكسرش تسلسل الأحداث فى القصة
اليومين الجايين هبقى أنزل باللاب عالبحر بالليل وأكتب لكم بقيت القصة وأرجع لكم فى المدونة تانى
ياترى وحشتكم ؟
ياترى هوحشكم ؟؟؟
طيب دعواتكم بقى ... ومن صباحية ربنا مكلتش ... فهاكل وأسافر وإن شاء الله بايت ليل نهار هنا فى المدونة ... دا لو لقيت نت يعنى فى الشقة اللى هقعد فيها
أشوفكم على خير
كريم عبد القادر

عارف إنك مش هتمشى
وعارف إنك غيرهم لأنك فعلا غيرهم
وإن مسير المصنع يفهم كويس أوى إن اللى بينتجه وبيتحكم بيه هوا اللى له فايدة فعلا مش العشرة سنتيمتر اللى مش بيتعمل بيهم حاجة وبيتباعوا خرده
وإنتى مش خردة :)
ونسيت أقولك حاجة بصحيح .... كل سنة وإنتى طيبة :)
عرفتى بقى كنت مستنى إيه ؟؟؟
أدرك أنك غير عادية ومجنونة وأحياناً عشوائية ودوماً تلقائية
لكنى ما أدركه أكثر هوا أنك أنثى إستثنائية
ملحوظة : عمرك ما هتفشلى فى المهمة الأولى لأن المهمة مش هى الهدف لكن هى إنك لو غلطتى تعرفى هتتصرفى إزاى
وإنتى نجحتى
مبروك بقى

هناك 12 تعليقًا:

mira@ يقول...

ياااااه
والله زمان يا كريم
وحشتنا بوستاتك
بس بصراحه مش فاهمه حاجه
عامةً انا متابعه لحد ما افهم
كل سنه وانت طيب وربنا يحققلك اللي بتتمناه

زهرة يقول...

كل رمضان وانت بخير :)) رمضان كريم

شمس النهار يقول...

كل سنة وانت طيب ياكريم وفي خير وصحة وسعادة

فتاه من الصعيد يقول...

كل سنه وانت طيب يا كريم ..... وان شاء الله شهر 8 يكون احلى شهر في عمرك السنه دي :)

wella يقول...

الله يقويك ونقدر تغير الواقع للى انتة بتحلم بية
وان شاء الله شهر 8 يمر السنة دى حلو مش وحش زى كل مرة وان شاء الله مش تحصل فية مشاكل ولا حاجات وحشة تانى

:) ربنا معاك وكل سنة وانتة بخير وينعاد عليك رمضان بالخير

بقوللك اية ابقى اقرى
كتاب The Secret كتاب حلو ابقى اقراه

wella يقول...

على فكرة انا مقموصة منك وزعلانة عشان انتة مش بتعبر امى اية يابنى مساء الخير او صباح الخير

MISS ROODY يقول...

اولا..بجد اسلوب حضرتك راائع
ثانيا..لو عايز اخبار حلوة انا عرفت قبل رمضان بيوم ان مصطفى حسنى جه يصلى عندنا فى المسجد بتاعنا وو هايصلى كل يوم و هايقول الخطبة....هو ده بالنسبة ليا يفرح اوى
ربنا يوفقك و يفك نحس الشهر ده معاك
على فكرة انا كمان بكره الحر جدا جدا
و بحب الشتا اوى

غير معرف يقول...

هههههههههه بحس ان دمى تقيل ولونة غامق والله قولت لنفسى كدة مرة كل سنة وانتة بخير اهو فرصة رمضان تبطل فية السجاير على فكرة شهر 8 من اجمل شهور السنة عندى حصل لى فية حاجة جميلة هو انتة فين بجد ممكن اعرف ؟؟؟؟

شاب فقرى يقول...

غير معرف
انا فى اسكندرية
ومش عارف مين
بس ادعيلى كويس بقى
:D

غير معرف يقول...

عارف إنك مش هتمشى
وعارف إنك غيرهم لأنك فعلا غيرهم
وإن مسير المصنع يفهم كويس أوى إن اللى بينتجه وبيتحكم بيه هوا اللى له فايدة فعلا مش العشرة سنتيمتر اللى مش بيتعمل بيهم حاجة وبيتباعوا خرده
وإنتى مش خردة :)
ونسيت أقولك حاجة بصحيح .... كل سنة وإنتى طيبة :)
عرفتى بقى كنت مستنى إيه ؟؟؟
أدرك أنك غير عادية ومجنونة وأحياناً عشوائية ودوماً تلقائية
لكنى ما أدركه أكثر هوا أنك أنثى إستثنائية
ملحوظة : عمرك ما هتفشلى فى المهمة الأولى لأن المهمة مش هى الهدف لكن هى إنك لو غلطتى تعرفى هتتصرفى إزاى
وإنتى نجحتى
مبروك بقى


رغم ان الكلام ده حلو اووى والاحلى منه البوست نفسه بس الكلام ده انا شايفاه احلى ونظرة الثقة اللى ياما اتحرمت نها احلى واحلى واحلى // بس متأخر اوى بجد نفسى اعيط

شاب فقرى يقول...

ميرا
منورانى دايما بتواجدك ومتابعتك وتعليقاتك وسعيد جدا بيها:)
يارب يسمع منك
فقرى
============
زهرة
الله اكرم ورمضان كريم عليكى :)
وكل سنة وانتى طيبة
نورتينى جدا
فقرى
=============
شمس النهار
أمنا الغالية
وانتى بالف صحة وسلامة وخير يارب
:)
نورتينى ووحشتنى زياراتك وتعليقاتك ونصايحك
فقرى :)
===============
فتاة الصعيد
وانتى طيبة وان شاء الله يتغير الحال ويبقى تمام التمام يارب
================
بت يا ويلا
هاتى لى الكتاب هدية مش لسه هشتريه ولا ايه ؟؟
:D
ومش تزعلى ولا تتقمصى انا والله مشغول وانتى عارفة
وعالعموم
صباحك سكر
================
ميس رودى
بيتهيالى اول كومنت ليكى هنا
شهر تمانية كوكتيل النكد
ربنا يسترها علينا فيه
نورتى وفى انتظار رايك فى كل ما اكتبه
فقرى
===============
غير معرف الاول
انا رديت عليكى مرة بس برد تانى
وانا نيتى من شهر خمسة اساسا ابطل سجاير فى تمانية بدون ما اعرف ان رمضان جاى فيه
:)
والحمد لله رمضان ماشى معاه يوم بيوم
:)
===============

شاب فقرى يقول...

رغم ان الكلام ده حلو اووى والاحلى منه البوست نفسه بس الكلام ده انا شايفاه احلى ونظرة الثقة اللى ياما اتحرمت نها احلى واحلى واحلى // بس متأخر اوى بجد نفسى اعيط

عيطى براحتك
بس أنا مش منتظر منك ردود

لكن ردى على كلامك
الكلام حلو ومش لازم يتفهم لانه من خصوصيات اليوميات اللى انا بس اللى بفهمها وبسيبها علامات للايام تفكرنى بحاجات حصلت او بتحصل


متأخر أوى
بيتهيالى مش فاهمة المكتوب اصلا

نفسك تعيطى
حاولى ... بس مش هتعرفى لأن مصدر الحس مش موجود

تحياتى