السبت، 4 يونيو، 2011

عاصفة السعادة ل २३ ثانية



دايما عشان أفتكر موقف بالتفصيل بأخد صورة ... ليا أو للمكان او لشخصية مؤثرة فيا وفى الموقف , لازم يبقى فى حاجة جنب ذاكرتى الفولاذية ودقة ملاحظتى تفكرنى باليوم أو الموقف ... غريب إنى أصور فيديو بدون قصد , مبتحصلش لأنى بصراحة بكره الفيديوهات الشخصية لأنها بتبقى مليانة تفاصيل لكل الناس , أى حد ممكن يمسك الفيديو ممكن يلاقى تفاصيل من كل حاجة سواء الصوت أو شكل اللى فى الفيديو أو حتى الدوشة وتأثير الهوا واللبس والجو المحيط ... كل دى تفاصيل بتتخزن جوانا كبشر كل يوم فى كل المواقف اللى بنمر بيها ... بتتسجل جوانا وبتتحفر ومش بتتنسى حتى لو قررنا ننسى ...يمكن فى تفاصيل كتير فى حياتك مش ملم بيها ولكن ...تحت تأثير عوامل معينة تقدر تستعيد لحظات كتير جدا من حياتك ... وفى حالة رغبتك فى الإحتفاظ بذكريات معينة فدا سهل جدا لأن كل التفاصيل اللى بتمر عليك بتبقى عامل زى واحد عمال يلم ورق ويرميه فى أوده ضلمة ومش عارف كل حاجة بتاعت إيه وخاصة بإيه ... لكن مع ترتيب الأجداث وتصنيفها جوا دماغك بشكل سليم تقدر تفتكر كل حاجة مهما كانت بسيطة أو ملهاش لزمة او حتى مهما كان كم المعلومات دا
***
الفيديو ممكن ينقلك إحساس حقيقى من خلال صوت شخصية معينة أو من خلال أغنية كانت شغاله عالبحر أو منظر النيل أو البحر فى اللحظة اللى إتصور فيها وكمان الوقت والمناسبة , ناهيك طبعا عن صوت الطرف التانى أو الحدث أو الموقف اللى بيذكرك فيه الفيديو وهل هوا بيعبر عن فرحة شديدة ولا قلق ودا كله غير شكلك فى الفيديو دا ... ممكن تحس إن اللى كان فى الفيديو( إنته يعنى ) ومبتسم دا هوا حلم حياتك كشخص إنك تعيش سعيد وتبقى زيه ... بتتمنى لو إتحبست جوا اللحظة دى مدى الحياة ... سعادة أبدية ومش مهم مبدأ الإستمرارية عذاب ( سنة الحياة هى التغيير وهوا اللى بيمنح لحياتنا معنى والإستمرارية ومعايشة نفس الشىء أو الإحساس للأبد فهى قتل لكل ما هوا جميل لانه بيصبح مجرد شىء روتينى وعادى وبيفقد قيمته إذا لم تشعر بكل لحظة فيه وبسمو الغاية اللى بتسعى ليها) وبتتمنى لو تعيش الموقف تانى وتسمع الصوت للهوا والكلام وكل حاجة ... والإبتسامة وعاصفة السعادة اللى بتمر عليك وبتعيش فيها ومن خلالها حلم لا يمكن يتكرر أبدا
***
كل شوية يشتغل الفيديو وقلبك وحياتك تتحرك من جديد
فيديو تلاتة وعشرين ثانية من الزمن
عاصفة من السعادة والحب والعطاء والفرحة
عمر تانى
تصوير الفيديو نفسه كان غلطة
ولكنى
فرحان بالغلطة دى جدا جدا جدا
تحياتى
شاب فقرى

هناك 9 تعليقات:

فتاه من الصعيد يقول...

كفايه اوي 23 ثانيه سعاده في الدنيا دي :)

شاب فقرى يقول...

كفاية ثوانى الفرح بجد
عندك حق والله يا دكترة
شاب فقرى

لورنس العرب يقول...

جميل انك عرفت تسعد نفسك 23 ثانيه
ده في حد ذاته انتصار كبير

شاب فقرى يقول...

الأجمل فكرة إن السعادة ممكن تستمر ما هوا أكثر من تلاتة وعشرين ثانية يا لورانس ...
نورت جدا
اخوك فقرى

mira@ يقول...

كل ما بتضايق بفتح فيديو قديم واتفرج عليه
فيديوهات مليانه ذكرى وسعاده صافيه
بس المشكله ان انا كده ببني سعادة أيامي على ذكريات راحت من زمان
نفسي ترجع الايام اللي كان كل يوم اخلقلي لحظاية سعاده بفيديو " 23 ثانيه "
بوستك ده رجعني لورا أوي وعشت قصه جميله مع ذكريات "" انتهت "
شكرا انك عيشتني سعاده ولو انها مزيفه

شاب فقرى يقول...

mira@


Move on

بس كدا

بسنت يقول...

انا ايضا لازم اخد من المكان شئ رمزى يفكرنى بيه- ولو كانت تذكره مثلا
الصور ايضا لازم ولابد
بس القيديو مش جربت قبل كدا
بس هو اكيد بيكون رجوع للذاكره لتفاصيل يمكن ما اخدنا بالنا منها لحظته هى دى اكيد السعاده الحقيقيه
انك تعرف وتتأكد انك عشت اللحظات دى

shemo_ joker يقول...

السلام عليكم....

ازيك يا فقرى وحشانى اوووى والله المدونة عندك


بس كنت مش باجى عشن الامتحانات وكدا

تعرف بجد البوست جامد اوووووى ومش زى العادة لأنه بالنسبالى مختلف

بس زى العادة بتخلينى اخد بالى من حجات كانت حاصلة فعلا بس مكنتش وخدة بالى منها

زيى مثلا فكرة انى اخد شىء صورة او ذكرى
لمكان عشان ابقى ملمة بتفاصيل الموقف

بيحصل كدا فعلا بس الى خلانى اتعلم اعمل كدا
حد غالى اوى عندى فذكريات مشتركة فهو بيعمل كدا فتبقى معايا....

بس انا مش مع فتاة من الصعيد
مش كفاية 23 ثانية فرح لان الدنيا مش وحشةاوى كدا ممكن تكون فيها ناس وحشين بيسببوا لينا الم بس الدنيا مش وحشة اووى
طلما فيها ناس زينا بيحلموا انهم يعشيوا فى سعادة وبيسعوا لانهم يحققوا دا

والمفروض طماعنا فى رحمة ربنا وكرمه تخلينى نحلم بسعادة وفرح اكتر من كدا




دومت بخير
فى رعاية الله
shemo

الحياة الطيبة يقول...

اللحظات السعيدة تمدنا بطاقة تكفينا العمر كله ، طريقتك جداً جميلة ومُبدعة في تذكر أحداث مهمة ،دائما تساعدنا الصور في توثيق أحداث حياتنا ،بوست ممتع ،تقبل مروري ، دمت بخير ....تحياتي.