الأربعاء، 16 فبراير 2011

مبارك الأب ... عندها يا أدهم




السلام عليكم ورحمة الله وبركاته
بعد تنحى الريس محمد حسنى مبارك ولأول مرة فى مصر يطلق على رئيس كلمة الرئيس الأسبق وبدأت أنباء عن مرض الرئيس الأسبق : محمد حسنى مبارك وبدأ المصريين فى التعاطف وظهرت صفحات حب وبدأت تتنظم مسيرات فى حب الرئيس وحملات تدعو له بالشفاء ومصريين بيبكوا بليل كل يوم (( والله العظيم الكلام دا بجد وحقيقى وناس متعلمه وواعية وناس جهلة برده متعرفش لا تقرأ ولا تكتب )) وبدأ الناس تحن لما مضى وتبكى الرئيس المريض بالسرطان وظهرت تفسيرات بأن الجيش كان ينوى الإنقلاب وكلام كتير كدا مش لازم نتكلم فيه دلوقتى .... هنتكلم فيه لاحقا
لكن الأهم حاليا هوا الرئيس محمد حسنى مبارك ومرضه والتصرف الصادر من البعض ...أنا طبعا مليش علاقة بحد وكل واحد حر فى رأيه وقلت من أول يوم نزلت فيه فى الثورة أو شجعت لها أو حتى إتكلمت عنها إن النزاع على اللى هيمسك مصر أو عن اللى المفروض يحكمها يتحل بحاجة واحدة : إنتخابات نزيهة وشريفة وقاضى لكل صندوق فى ظل شفافية وصدق تام ... غير كدا يبقى ملناش علاقة بحد وكل واحد حر فى رأيه ... مش هفرض عليك رأيى لكنى هناقشك فى رأيك عالأقل
نيجى للسؤال الأهم والإجابة المستفزة :
السؤال : إنته بتبكى على جناب الريس ليه ؟؟؟
الإجابة :
- الرئيس مبارك كان بطل حرب أكتوبر
- الرئيس مبارك فى بداية حكمه كان راجل طيب وكويس
- الرئيس مبارك عيشنا فى سلام طوال فترة حكمه
- عملنا مشاريع وكبارى ومترو الأنفاق وقهر الإرهاب والجماعات المتطرفة فى مصر
- راجل كريم ومحترم ويستحق التبجيل ل...كذا كذا كذا كذا

ردى :
أولا : فلنقل إنى شاركت فى حرب أكتوبر ... ولا بلاش الحرب ... أنا شاركت فى الثورة الحالية ومن أول مظاهرة طلعت (( زى أول ضربة جوية كدا )) وإتبهدلنا وحصلنا وحصلنا ... هل دا يمنحنى الحق فى سرقة البلاد ؟؟؟ هل مشاركتى فى شىء بطولى (( هوا فى الأساس واجب عليا إنى أطلع أقول لاء للفساد والظلم زى ما واجب على كل جندى إنه يدافع عن وطنه )) تمنحنى الحق فى إفساد وطنى أو قتل أبناؤه ؟؟؟ هل عشان الريس شارك فى الحرب أصبح من حقه إنه يذلنا كل شوية بمشاركته دى ويسرق البلد ويكون السبب فى كل البلاوى ؟؟
وهل الرئيس إحترم ضحايا الحروب ومن شاركوا فيها زى الفريق سعد الدين الشاذلى ؟؟ جمعة الشوان ؟؟ وغيره ....
هل الرئيس إحترم المدنيين ؟؟؟ هل أصدر أوامره للداخليه بمعاملتهم بإحترام وحمايتهم فى المظاهرات عالأقل وبدأ يستجيب للطلبات من اليوم الأول ؟؟؟
هل الرئيس إحترم ورد مصر (( الشباب )) ووفر لهم فرص عمل أو حتى حاول أن يترك لهم شىء من الكرامة ؟؟ أو حتى رحمهم ؟؟؟أو جاب لهم حقهم لما ماتوا فى العبارة ؟؟؟ أو حاول يقضى على الفاسدين المحيطين بيه ؟؟؟

ثانيا : هل بداية حكم الرئيس مبارك تشفع له كل اللى عمله فى التسعتاشر سنة الأخيرة ؟؟؟
يعنى مثلا وليكن شاب فقرى رئيس الجمهورية وعملت لكم الأنفاق الطائرة .... فهل من حقى بقى إنى أعمل اللى أنا عايزه بعد كدا عادى ... سواء بتوزيع ثروة البلد على أولادى أو إسكات صوت الحق فى البلد وقهر المفكرين وإعتقال المواطنين ؟؟؟

ثالثا :
هل الهروب من الحرب فى الأصل ... عمل بطولى ؟؟؟
إن كانت الحرب واجبا عليك وتفاديتها ... فإنته فى الحالى دى مش بطل ...إنته جبان
هل تصدير الغاز للعدو الأول للمصريين وللعرب والمسلمين يعتبر عمل بطولى أو سلمى ؟؟؟
وهل هروبك من الحرب بحجة البناء ... وبعدين يختفى البناء والتنمية .... يبقى حضرتك بتبنى عزبة بقى مش بتبنى بلد عشان تحارب أو تكون دولة قوية ... ولا إيه ؟؟

رابعا :
عمل المشاريع والحاجات الكتير الحلوة دى هل دا مكافأة من بيت الريس ؟؟؟ يعنى هل هوا أعطانا الميراث الخاص بيه وقام بعمل تلك المشروعات من ماله الخاص ؟؟؟ هل هذا ليس واجبه وهوا متفضل ومتكرم علينا بيه جدعنه ؟؟؟
طبعا واجبه كرئيس جمهورية وواجب القسم اللى أقسمه وإن لم يكن جاهز لهذا فليه يقسم القسم من الأول أصلا ؟؟؟

خامسا :
العذر الأكثر إستفزاز ....(( فقع من وجهة نظرى ))
حضرتك حاليا وليكن فى عهد السيد الرئيس المبجل المحترم محمد حسنى مبارك (( نتكلم بأدب )) وبتقبض 500 أو 650 جنيه (( مش قلنا بلاش قلة أدب )) ... وخد بالك إنته بتقبض كويس فى ناس تانية شغالة باليومية ومش بتشوف الطبيخ أو اللحمة أصلا ... دا بفرض إن حضرتك موظف ... قولى بقى هتربى عيالك إزاى من المرتب المحترم دا فى عهد الرئيس المبجل ؟؟؟
هتأكلهم حب الريس ؟؟؟ هتعالجهم بطيبة الريس؟؟؟ ولا هتفسحهم كل جمعة بجدعنة الريس ؟؟؟
ساعتها خلى المشاعر تنفعك .... السياسة والحكم لا يقيم بالمشاعر والعواطف بالرغم من إننا شعب عاطفى بالدرجة الأولى ... ومعظم أحكامنا وتصرفاتنا قائمة عالعواطف والمشاعر

كام سؤال أخير :
هل من حقنا أن نشمت فى مبارك ؟؟؟
هل يستحق عطفنا أو حبنا ؟؟
هل كل أعماله البطولية تيشفع له إطلاق النار على المتظاهرين والمدنيين أو إختطاف أبناء الشعب وتعذيبهم فى السجون ؟؟؟؟
هل يستحق الدفن فى مصر أو حتى جنازة عسكرية ؟؟؟
هل يستحق أن يحيا بيننا على أرض مصر ؟؟؟
هل يظل للأب حقوق حتى بعد أن يعق أبناؤه ؟؟؟
هل الفساد الذى إنتشر فى عهده يمكن المسامحة فيه ؟؟؟
ماذا عن شهداء الثورة ؟؟ وماذا عن شهداء العبارة وقطار الصعيد و أكثر من قطار غيره ؟؟ وماذا عن تصدير الغاز ؟؟ وماذا عن من ماتوا فى السجون ؟؟ وماذا عن مليارات سويسرا ؟؟؟ وماذا عن أمراض الشعب المصرى التى سببها له بفساد من حوله ومتاجرتهم فى دماء المصريين ؟؟؟ وماذا عن كل العقول المفكرة التى هجرت البلاد بسبب فسادها وإحتمالية دفنهم أحياء يشتكون فى طوابير دواوين الحكومة أو فى إنتظار قراراتها ؟؟ وماذا عن التوريث وجمال وعز وصفوت وسرور وغالى وغيرهم ؟؟؟ وماذا عن الرعب الذى سببته للشعب بفتح السجون ؟؟؟ وماذا عن وعن وعن ... لا تسعنى المدونة ولا حتى الكتب لنشر آلام الشعب التى سببتها بعنادك وجبروتك وتكبرك علينا وفسادك أولا وأخيرا ....

كلمة أخيرة للرئيس الأسبق حتى وإن لم يكتب لها النجاة لتصل إليه :

سيدي الرئيس :
كل الشعب كان يتمني لك خروجا كريما من السلطه...لأننا لسنا شعب خائن لا يقدر الجميل ولسنا أنذالا ولأنك كنت رئيسا لمصر أم الدنيا و أرض الكنانة وكنت جندى من خير أجناد الأرض ولكنك نسيت هذا وتناسيت من أنت وما هوا دورك حقا ونسيت أبناء وطنك وأمرت بإعدامهم فى الشوراع ... و للاسف أنت من اضطررتنا لذلك .. وعلي الرغم من فرحتنا العارمه بنجاح ثورتنا الا انها تركت لنا غصه في حلوقنا لاننا لم نكن نرغب في ان يخرج رئيسا لمصر بتلك الطريقه وكنا نتمني خروجا كريما ... وتركنا لك الأختيار تقديرا لك ... تركنا لك بعض الكرامة والتقدير ولكنك تماديت فى عنادك
أنت من وقفت في وجه التيار... تيار الحرية وموجات تسونامى الغصب وتكبرت على أن تتنحى ونسيت ان من يقف فى وجه تيار الحرية ومن يتاجر فى ألام الشعب وفقره لا يستطيع يصمد كثيرا .... وفى النهاية لا أدعو لك ولا أدعو عليك إنما أقول : حسبنا الله ونعم الوكيل والله يحكم بين الشعب وبينك يوم الدين ... لكن لا تنتظر منا شيئا ولا حتى عطفا ... فجراح الوطن منك أعظم من أن يطويها النسيان أو الشفقة أو حتى الحب

شاب فقرى

ملحوظة : محدش ييجى يقولى يا عميل وبتحب مبارك والرغى الفاضى دا ... المقال مجرد نقاش ورد على المتعاطفين معاه وتقدير له كرئيس جمهورية سابق وإنسان .... غير كدا لو مفهمتش يبقى تقرأ تانى لأنك مقرتش أصلا أولانى ...

ملحوظة 2 :
قريت إستاتس عند سووو عالفيش وكان بيقول كل ما نيجى نقول حاجة عن مبارك يقولوا لنا أبوكم مبارك ولو إتكلمنا عن الشرطة اللى بتقتل الناس فى الشوارع يقولوا إخواتكم معلش يا شباب .... دا إيه العيلة الوسخة دى
:D

هناك 15 تعليقًا:

Unknown يقول...

يا عميل
ههههههههه
تقبل مروري , انا شفت واحد من اللي كانوا بيعيطوا على الرئيس المخلوع بس عادي انسان جاهل وتعليمه على قده وكل اللي يفهمه في الدنيا ان مبارك مدخلناش في حروب قلت اسيبه للايام تعرفه ليه مبارك مدخلناش في حروب , يومين ولقيت مهندس محترم بيقولي ان احمد عز صعب عليه لما طلع في الحربية ساعتها حسيت احساس غريب عجيب مش عارف اوصفه بصراحه

غير معرف يقول...

أنا متابعة المدونة بتاعت حضرتك بس دي أول مرة اعلق على اي توبيك فيها، ومش عايزة افضل اقول كلام التهنئة و المدح للشباب على اللي عملوه عشان ده امر مفروغ منه ،انا بس عايزة اعلق على كلمتك للرئيس السابق ، اعتقد ان اغلب الشعب كان عايز يحفظ كرامة رئيسه وكان متوقع ان يكون في تجاوب اسرع من كده وبصورة مُرضية أكثر من كده والكل كان مستغرب عناد فرد واحد قصاد الملايين دي كلها ..


موضوع الجنازة العسكرية من عدمها اعتقد ماحدش فينا يقدر يوافق أو يرفض الموضوع ، اعتقد انه هايكون إبداء رأي مش اكثر وأنا بالنسبة ليا مش هاتفرق ، انا كل اللي يهمني الناس اللي بتقول انه لازم يمشي بره مصر ، شايفة انه مش من حق اي حد ان يجبر اي مواطن انه يسيب بلده او يجبره انه يُدفن بره بلده ، يعني انا مع حق اي مواطن مهما كانت افعاله انه يدفن في بلده ..

كمان موضوع ان اي حد يتكلم بصورة انسانية عن مبارك يبقى عميل او خاين ، طيب حضرتك طلعت مظاهرات وشفت ألوان العذاب كلها ، بس ده مش هايغير إن احنا بشر يعني باعامل اللي قدامي من المنطلق ده ، وبعدين الواحد بيتكلم حسب تفكيره وثقافته ومنطقه للأمور ، يعني المفروض لما ننادي على حرية التعبير يبقى نقبل كل اشكال التعبير بكل اختلافها من اقصى اليسار لأقصى اليمين...

معلش حاجة اخيرة ، هو مجرد اقتراح ، هو ليه حضرتك وباقي المدونيين اللي شاركوا في الثورة مش تعملوا مشروع توثيق للثورة عشان التاريخ يفتكر موقف كل واحد وقرّاء التاريخ يقرروا ميين كان على حق وميين كان على باطل ، يعني ممكن كل واحد يكتب يومياته عن الثورة زي ما هو شافها وحضرها وحسب وجهة نظرة و تتجمع في كتاب أو موسوعة أو اي شكل ، المهم ان الثورة تتوثق ، وبأسرع وقت عشان مافيش تفاصيل تتنسي ...

واسفه على الإطاله ...

ولاء

غير معرف يقول...

بجد شكرا ليك لانك قولت كل اللى نفسى اقوله

♥نبع الغرام♥♪≈ يقول...

مقال جميل بحيك عليه

وفى الاول وفى الاخر كلنا ابناء بلد وحدة

ربنا يهدى الاحوال

تحياتى ليك يا عميل

هههههههههههههههههههههههههه

حـــلـــم كـــان يقول...

حسبنا الله ونعم الوكيل والله يحكم بين الشعب وبينك يوم الدين ... لكن لا تنتظر منا شيئا ولا حتى عطفا ... فجراح الوطن منك أعظم من أن يطويها النسيان أو الشفقة أو حتى الحب


انا عن نفسى مش متعاطفه معاه ولا مع اللى عمله فى بلدنا
لكن فى نفس الوقت مش هشمت فى مرضه لان مفيش شماته فى مرض ولا فى موت

هراء لا داعى له ..... يقول...

يا جماعة مينفعش أى ذرة تعاطف مع خاين و عميل و خارج على الشريعة و ظالم و فاسد و كمان حرامى و قاتل


دا وصمة عار فى تاريخ البلد دا للأبد

و يوم ما يموت و يلاقى حسابه عند ربنا هيكون يوم فرح تانى

اسيره الاحزان يقول...

هذا رايك .... ويبقى لى رايى

الفراغ يقول...

احييك من كل خلية فى عقلى
انا بقول زيك واكتر لكن مش عارفة اغير قلب المتعاطفين مع سيادة المبجل (حسبى الله ونعم الوكيل فيه )
ولا اجد لهم عذر الا اننا شعب طيب ومسكين وواخدين على القليلة نعمة وبنحمد ربنا على اللقمة الحاف
وعيش فقير وموت مستور
اللى يضحك بقا ان لما حسبوا المليار ده يعيشك ازاى
لاقوا انك تخرج ب10000جنيه يوميا ولمدة 274سنه وماترجعش منهم بمليم
بقول لواحد كناس الكلام ده
رد عليا وقاللما معايا الفلوس دى كنت كلت لحمة كل يوم
صحيح هم يضحك وهم يبكى
ولك كل الشكر والتقدير
ونفسى تقرأمقالى الاخير واشوفك انت واخواتك الثوار بتطالبوا بحقكم فى قيادة مصر
نفسى اشوف وزير من شباب هذا الوطن..ودا لاعيب ولا قلة ادب ..دا حقكم فى بلدكم

رحاب صالح يقول...

هههههههه
والله انت يا كريم عسل
انا معاك معاك معاك
مقال بجد تحفة وكلام حلو
بس بلاش الكلام الابيح ده
ههه
انت فاهم اقصد اية

basma bahaa يقول...

بيعانوا من متلازمة ستوكهولم بعيد عنك
انا شايفة والله انهم يغيروا اسمها ويخلوها متلازمة مبارك
ردك قوى ومقنع
بس على فكرة سو كان قايل عنها عيلة بنتشى حرام:D

VÖltaa يقول...

عيلة وسخة وساخة ياجدع

بوسة ياض

الفراغ يقول...

يافقرى انت فين بقالك 4 ايام
اياك تكون نمت وخلاص على كدا
اصحى وشوف المصيبة اللى احنا فيها
هناك خبر يفسر الهدوؤ الذى يتعامل بيه شفيق مع الاحداث
هناك مايفسر ليه الجيش مش بيقبض على مبارك
هناك مايفسر ليه شفيق قال فى اخر مؤتمر مع الصحافه انا مابشتغلش لوحدى
انا فوقى رئيس لازم اعمل حسابه
وماهو التفسير ؟؟؟؟؟؟؟؟؟
ان كلمة تنحى لما تأتى فى خطاب عمر سليما
ولكنه قال تخلى ...وتخلى يعنى ترك مقاليد الحكم للجيش ولكن هو كما هو رئيس للجمهورية
وكأنه فى اجازة
فى مصيبة اكتر من كدا
ان الشعب والساسه والمثقفين كلنا خدنا على قفانا

احلام جوليا يقول...

يقال ان العبيد اذا حررتهم فانهم سيعودون للسيد راكعين لانهم يهابون الحرية
والرهينة اذا انقذتها ستميل للالتصاق بالمختطف انه مرض نفسي مرض يولده الجبن والتخاذل واظن لدينا من الجبناء الكثير للاسف لدينا عبيد يخشون الحرية احتقرهم مهما دافعت عن اختلاف وجهات النظر احتقر تلك المراة التي وقفت تقول انها تشهد الله على مسامحته ولم تراعي الامهات التي قتل اولادها واحتقر هذا الرجل الاحمق الذي بكى وقال خد الدوا ونبي ياريس وبقوله يا اهبل يا ابن ال.......... دوا ايه ونيله ايه ده بياكل كافيار وشيكولاته وبيضحك من هبلك الي بيعزز قواته الي بيحشدها علينا يا اهبل ده انت بالنسبة له اقل من خادم واقل من عبد يا اهبل ابكي فمن هم مثلك السبب فيما وصلنا اليه

نيللي علي يقول...

هم كان بيعيطوا عشان عندهم اصل بس لاسف مع حد معندوهش اصل ولا وفاء لبلدو

طبعا اللى عيط واللى معيطش اصلاء هو ده صفات الشعب المصرى

باختصار انا هقول حسبى الله ونعم الوكيل فى كل حاجه عملها فين

وربنا هيجبلنا حقنا

امين يارب العالمين

be pleased يقول...

الله ينور عليك :)