الأربعاء، 2 فبراير 2011

خطاب شكر لرئيس الجمهورية


أولا وقبل أى حاجة لازم أقولها بصراحة : شكرا ياريس
بجد شكرا
إنته بكل اللى عملته بجهاز الشرطة يوم التلات والاربع والخميس والجمعة ( 25 - 26 -27 -28 ) قدرت تصحى فى المصريين معانى الرجولة ...قدرت تخلى حتى الناس الغلابة اللى ملهاش فيها تنزل وتقول لاء وتنزل وتتضرب وتكمل برده ...قدرت ياريس تخلى المصريين ينزلوا بالسلاح يحموا بيوتهم فى لجان شعبية وقدرت تصحى الرجولة جوا شباب الوطن ... بقوا واقفين فى الشارع بيتعاملوا بإحترام أو فى مظاهرة بيهتفوا بإسم مصر اللى مكانوش بيفتكروه غير فى كاس الأمم ... بجد ياريس اللى عملته خلانى ألعن أبو اليوم اللى كرهتك فيه ... إنته اللى قدرت توحد المصريين بإنك تجعل نفسك العدو المشترك للجميع ... إنته قدرت على مدار تلاتين سنة توعد ملايين الوعود ومنلاقيش منها أى حاجة فى أى حاجة ... قدرت بعون الله تصنع نوع من الصمت للقادة العرب علمتهم إزاى يسكتوا وميعبروش الشعب ويعملوا نفسهم كأنهم مفيش ...قدرت ياريس والحمد لله تلعب على عواطفنا بحرب أكتوبر وثورة يوليو أكتر من تلاتين سنة ... قدرت تقنعنا إنك البطل العظيم اللى نزل لنا من السما عشان ينجدنا ويعيشنا فى حب وأمان وإن إنته نبى ومرسل من المرسلين جاى تطهر البلد وتحميها ... بجد ياريس مش عارف أقولك إيه عاللى شفته فى المظاهرات ...هما دول المصريين ؟؟؟ بجد هما دول ؟؟؟ أمال مين اللى كان بيتحرش ؟؟؟ ومين اللى كان بيسرق ؟؟؟ ومين اللى كان بيعمل جماعات مسلحة ؟ وفين القلة المندسة ياريس ؟؟؟ أنا حتى الآن مش مصدق اللى شفته فى الناس اللى بتحافظ على الأمن فى الميدان ومن الناس اللى بتلم الزبالة ومن الناس اللى بتملى ميه وتسقى اللى واقفين فى الحر ومن اللى بيساندوا بعض فى كل حاجة ....أنا مش متخيل بجد اللى حصل ... دا لو كان حصل حرب مكانش الناس هتتحرك بالشكل دا ...أنا دلوقتى ياريس بفتخر بجد إنى مصرى ...حسيت إنى مصرى بجد والناس بترج الميدان بكلمة تحيا مصر أو بتقول النشيد الوطنى ...حسيت بكيان واحد للمصريين ... حسيت بوحدة ونوع من العيلة وفين ؟؟ فى الشارع وغلاوتك ياريس .
ياريس الشرطة السرية والمخبرين والبلطجية اللى نزلتهم مش خوفوا الشعب وشعبك قدر يكون لجان شعبية تقف فى وش الكلاب دول وتصدهم والجيش كمان ياريس قدر يعتقلهم ...أنا مشوفتش الجيش الصراحة بيحمى المنشآت عندنا هنا لا فى القسم ولا فى مجلس المدينة ولا فى البوسطة ولا فى أى حاجة تانية بس الحمد لله قدرنا ندافع عن بلدنا كلنا ...
عارف ياريس كلاب العادلى اللى كانت بترش الميه عالناس وهى بتصلى فى المظاهرات أو بتضرب الناس بالرصاص الحى أو بالقنابل المسيلة للدموع ... صدقنى ياريس مخوفناش للأسف وخيبنا ظنك وطلعنا رجالة



شكرا ياريس لأنك خليت الشعب يبقى رجالة تقدر تقول لاء بكل العناد والجبروت اللى أبديته لينا ورفضك لترك منصبك ومحاولتك للكدب علينا إمبارح وعدم تعديل المادة 88 من الدستور اللى بتنص على اشراف القضاء اللى حضرتك شيلته .... ومحاولتك إستعطاف الجماهير العريضة إمبارح بإنك هتموت على أرض مصر ...بجد حركت قلوبنا كلنا ...لكن ياترى لما ييجى لنا سرطان بسبب القمح والاغذية والمبيدات اللى بيأكلها لنا كلابك هل هنتعالج بالحب والعطف ؟؟؟ ياترى اللى بيقبضوا 250 جنيه فى الشهر هيقدروا يصرفوا لما مرتبهم يخلص ويصرفوا شوية قيادة أو بطولة من بتوعك ؟؟؟ ياترى ياريس كرامتك هتأكل المصريين وتعالجهم ؟؟؟
ياترى ياريس هتقدر تنفذ أى وعد من اللى قلته ؟؟؟ ياترى هتقدر ياريس تلتزم لآخر مرة ...؟؟
على كل حال مش هتفرق لأن الشعب مش هيسكت وكلنا عايزين نيجى نشرب معاك الشاى فى القصر يوم الجمعة العصر ؟؟؟ ولا دا مش من حق المواطنين الغلابة طبقا للدستور ؟؟؟ لو مش من حقنا فحاول تغيره ياريس وإنته الكبير برده
وفى النهاية أحب أقولك هتوحشنى من هنا ليوم الجمعة ....
والبلطجية اللى نزلوا ميدان التحرير دول ... أنا شفتهم قصاد ماسبيرو إمبارح ومش فرقت معايه وهما بيهتفوا بإسمك ... مش هيقدروا على ناس مش لاقية تاكل وجعانة ووقفت فى وش الرصاص الحى ومش هنسكت لهم ياريس .... لو حضرتك وصلت لك الرسالة أحب أقولك ياريت يعنى لو تكرمت ولو تعطفت تحل الخلاف بيننا وبينهم فى إنتخابات نزيهة تحت إشراف قضائى محترم ونزيه ...


ما نشرته صباحاً تعليقا على ما رأيته أمام مبنى ماسبيرو :

إمبارح راجعين من ميدان التحرير وماشيين عالكورنيش نلقى نظرة ونعرف من أين يقوم التلفزيون المصرى بتصوير بنقل الشوارع الفارغة ومن أين تصور العربية ...إستمر سيرنا حتى ماسبيرو ووزارة الإعلام لنجد مظاهرة قوامها 300 متظاهر تنادى : يوم الجمعة العصر هنروح كلنا عالقصر ..
قوات الجيش تحاصر مبنى ماسبيرو وتمنع المتظاهرين من أى شىء سوى أن يرحلوا أو يقفوا فى صمت
إستمر سيرنا لنعبر حتى وزارة الخارجية ونرى مؤيدين مبارك .. محموعة من البلطجية والنساء غريبات المنظر وبعض العجزة ... تشكيلة مختلفة .... وبدأنا نسمع بقى العبارات القبيحة اللى بتأيد الريس
- العيال السيس اللى بتعارض الريس بتروح فين ؟؟؟
- العيال اللى بتت**** واقفين يعارضوا فين ؟؟
- كلنا بنحب الريس ويلعن تلاتة *** ** المعارضين
- وتوجه احدهم لأحد ضباط الجيش قائلا : إنته فاكر إن الشوية دول ميقدروش على اللى فى ميدان التحرير ... اللى فى الميدان دول عيال م***
وفى وسط الزحام شاب يرتدى زيا منمقا (( بدلة سودا ))ويمسك هاتفه الجوال ويتكلم لمن على الطرف الآخر :
- أيون يا دكتور كلهم من الحزب
دا قبل الخطاب بثلاث ساعات على الأقل
وضحت اللعبة من قبل الخطاب اللى قاله الريس
من قبل أى شىء فأنا ضد الهتافات التى تحمل سبابا وأهانة على أحد جنود مصر
وضد طرد أى مواطن مصرى خارج البلاد ....كلنا مصريين ...إترك الحكم وإعتزل العمل السياسى وإرحمنا
إترك لنا شيئا أجمل لنتذكرك به ...
إرحمنا الله يرحمك

فى أمان الله
المواطن المتظاهر المصرى :
شاب فقرى


هناك 17 تعليقًا:

شمس النهار يقول...

ياريت النت مايقعدش الشباب في البيت
مكانك مش في البيت مكانك في ميدان التحرير
شكرا

شاب فقرى يقول...

أمى الطيبة
موعدنا معروف ومحدد ومكاننا فى الميدان
شكرا جدا لوجودك :)
إبنكم فقرى

S@M@H يقول...

المشكلة ان الواحد مبقاش عارف يصدق مين ولا يكذب مين البلد فى حالة خداع كله بيضحك على كله واخرتها هتبقى سودا ع الكل ...ربن يستر

S@M@H يقول...

الواحد مابقاش عارف يصدق مين ويكذب مين البلد فى حاله خداع كله بيضحك على كله ومحدش عارف اخرتها ايه ...ربنا يستر.

S@M@H يقول...

الواحد مابقاش عارف يصدق مين ويكذب مين البلد فى حاله خداع كله بيضحك على كله ومحدش عارف اخرتها ايه ...ربنا يستر.

توتو يقول...

شكرا ليك انت


بجد ربنا يجمى كل شبابا مصر والطاغيه يمشي بقه


الذ حاجه امبارح واحد متصل مع معتز بيقول حرام ياجماعه مصر عمرها ماموتت الفرعون بتاعها


طيب اقول ايه

sweet angel يقول...

هو لازم يمشي
بس مش دلوقتي
مينفعش يمشي ويسيبها لاي حد يمسكها
لازم نامن انتقال سلمي للسطله

الحياة الطيبة يقول...

عندما يشتد سواد الليل وتتشابك خيوطه فذلك يبشر بطلوع الفجر , بشركم الله بفجر قريب ,تحياتي .

غير معرف يقول...

ربنا يحفظك ويحفظ شباب مصر ويثبته

طمنا عليك علطول يا كريم

غير معرف يقول...

ربنا يحفظك ويحفظ شباب مصر ويثبته

طمنا عليك علطول يا كريم

hend anwar يقول...

ارحل بقى خلى عندك دم

hend anwar يقول...

ارحل وخلى عندك دم


انا ختلى رصاصة خرطوس علشان بقول ارحل


والجماعة البلطجية اللى الشرطة خرجتهم من السجون هما اللى قالبين البلد


مش عارفة هانفضل لحد امتى عملاء لاسرائيل

eng_semsem يقول...

استمروا والله معاكم وهيخرج ونحتفل كلنا معاكم بنصركم على اللي مش مقدر قيمتكم
كان نفسي اكون معاكم وفي اول الصفوف بس يا خسلره بيني وبين مصر مسافات لكن كل احداثها بتابعها بالثانيه
ربنا معاكم وينصركم وافتكروا دم الشهداء اوعوا يروح هدر وفي الهواء

♥نبع الغرام♥♪≈ يقول...

ما قام به شباب مصر و ما سيقوم به هو الحقيقة الوحيدة التي يجب ان تترسخ في اذهان و ضمير كل الاحرار في مصر
ان حالة الطوارئ و الاستبداد و الحكم المطلق الذي عاشت فيه مصر قد ان اوان انتهائه و القضاء عليه و ان تعيش مصر دولة حديثة مدنية لا دولة دينية و لا دولة بوليسية مستبدة
عاش شعب مصر و عاشت مصر دولة حرة مستقلة
و حفظ الله مصر و شعب مصر
تحياتى

ملاك يعيش بكوكب اخر
ايناس

Story pain يقول...

يا كريم أرجوك كل ما تفتح المدونة طمنا عليك وعلى اللى معاك

ربنا يحفظكوا ويثبتكوا

غير معرف يقول...

مصر تحتاج للدعاء

أرجوكم ادعوا لها

اللهم لك الحمد كله كما ينبغي لجلال وجهك وعظيم سلطانك

اللهم صل على محمد وعلى آل محمد كما صليت على إبراهيم وعلى آل إبراهيم وبارك على محمد وعلى آل محمد كما باركت على إبراهيم وعلى آل إبراهيم

اللهم الطف بأهل مصر

اللهم احفظهم بحفظك واكلأهم برعايتك و احفظ بلادنا يا رب العالمين

اللهم انصر المصريين في أرض الكنانة وحكم فيهم شرعك واكفهم شر كل طاغية جبار

ربِ انصر إخواننا وأهلنا في مصر و لا تنصر عليهم، ربِ ثبت أقدامهم وارحمهم

ربِ رد كيد كل من أراد بهم السوء يا عزيز يا جبار
اللهم احفظ مصر واهلها وكل ما فيها

يا الله يا رحيم يا حي يا قيوم برحمتك استغيث

اللهم انت ثقتي في كل كربة ورجائي في كل شدة وانت لي في كل امر
اللهم يا قادراً على كل شيء .. اغفر لنا كل شيء وارحمنا برحمتك الواسعة التي رحمت بها كل شيء وإذا وقفنا بين يديك لا تسألنا عن أي شيء فإنك أهل التقوى وأهل المغفرة .
اللهم عجل الفرج وأرح العباد والبلاد ممن خربوها وأذلوا أهلها
اللهم كن لأهلنا في مصر ناصراً ومعيناً
اللهم ارزقهم الأمن والأمان والسلامة والإيمان
اللهم اعصم دماء المسلمين و أعراضهم و أموالهم
اللهم أمين
يارب العالمين
استغفر الله العظيم الذي لا إله إلا هو الحي القيوم وأتوب إليه.
نسألكم الدعاء

Heba Faruq يقول...

شكرا لك ولكل الشباب الحر
وبما إنك من الشباب اللي خرجوا 25 يناير ياريت توضحلنا الصورة أكتر ليه فيه شباب دلوقت بيطلعوا يقولوا انهم من شباب 25 يناير وانهمانسحبوا من زمان وملهمش دعوه بالمتظاهرين الموجودين الآن وانهم ماكنوش بيطالبوا باستقالة النظام وكلام كتير ملخبط وناس كتير اتلخبطت فين الحقيقة حيث انك مشارك فعلي

وشكرا لك
مع تحياتي