الأربعاء، 26 يناير 2011

ماحدث لنا فى الخامس والعشرين من يناير


السلام عليكم ورحمة الله وبركاته
وجاء يوم 25 يناير أخيرا بعد طول إنتظار ...حتى فى نفس اليوم الصبح كنت حاسس إنه بعيد أوى وكان عندى إحساس رهيب إنى هكون واقف لوحدى وبهتف ... ومش عارف ليه ... الصراحة مصدوم من اللى حصل ومكنتش متخيل
مظاهرة قوامها 50 ألف متظاهر .....
سمعت إنها محصلتش فى مصر من السبعينات وأغلب الظن أن يوم الجمعة هيكون زى يوم وفاة جمال عبد الناصر ... مصر كلها هتخرج
نبدأ الأحداث من الأول زى ما حدث معايه
بداية اليوم أمام جامعة القاهرة ...صمت رهيب أمام الجامعة حوالى 16 عربية أمن مركزى بخلاف سيارات المطافى ...شىء لا يشجع إطلاقا بالإضافة لعدم وجود أى تجمع ... ويمر الوقت وأنا مستنى ومش شايف حاجة إلى أن إتصلت بزمايلى ... يا جماعة فى إيه ...لقيت إن كل الأماكن اللى إتحددت هى اماكن وهمييييييييييييييييييييييييييييية ...طيب وإزاى يا شباب ؟ لقيت الرد إن دا هوا مجرد إرهاق للى بيحاولوا يسجننونا ... يعنى يوم عيد الشرطة هتنزل الشرطة كلها الساعة السادسة صباحا فى أماكن معينة فى إنتظار المتظاهرين لحد الساعة إتنين ...إديناهم ميعاد ومروحناش :D... والأحلى من كدا هوا مجرد التفكير فى مرور سيارات الأمن المركزى فى القاهرة الساعة الثانية ظهرا هيكون مستحيل ...
وصلنا لمكان المظاهرة سيرا على الأقدام فى شارع جامعة الدول العربية ... ذهلت من العدد ومن العزيمة والحماسة وحب مصر ...
متخيلتش فى يوم إن يكون فى روح وحدة جوا مصر بالشكل دا ... من أول ثانية فى المظاهرة وكلنا كيان واحد ... وروح واحدة
قوات الأمن المركزى بتحاول تحاصرنا ولكن على مين ؟؟؟؟
الناس دى جعانة ... الناس دى مش لاقية شغل ... الناس دى صابرة على الفقر ... الناس دى عاطلين .... الناس دى عندها عيال خايفة على مستقبلهم ... الناس دى فى منها اللى عايز يشتغل هنا ومش عايز يسيبلكم البلد
هل هيقدر الأمن على شعب بيتجرع الفقر والجوع والبطالة و غذاؤه هوا حب مصر ؟؟؟
مستحيل ...
حواجز كتير فى الطريق حتى ميدان التحرير ... حواجز أمنية نردد أمامها كلمة واحدة كلما نراها ...( سلمية ) ... ونعبر فى سلام وأحيانا لا يحترموا هذا ونلاقى الضرب والدفع من قوات الأمن المركزى
وصلنا ميدان التحرير فى مظاهرة بالآلاف ... وكان أول حدث فى الفيديو التالى :



سيارة تابعة للأمن تحاول تفريق المتظاهرين بالمياه ويصعد إليها شاب يحاول إيقاف مدفع المياه ... ويصعد ظابط مباحث أو مخبر خلفه لتوقيفه ويقع الإثنان من سرعة السيارة ....
شجاعة وجرأة ووحدة وإحساس بالمسؤلية من هذا الشخص ... لك منا كل التحية ...( حافظت على أخواتك واللى معاك من الإلتهاب الرئوى والميه البارده فى الوقت دا والله لسه بدعيلك حتى الآن )

إستمرت المظاهرة رغم غباء الأمن المركزى والتعامل اللى أبسط ما يقال عليه همجى من قوات الأمن والقصف بالقنابل المسيلة للدموع ورفض الأمن ومحاربته للمتظاهرين بالأمس حتى لا يبات أحد فى ميدان التحرير .
أنا سعيد باليوم دا برغم المساوىء اللى حصلت فيه والأحداث اللى عكرته
مكنتش متخيل إن الناس ممكن تستجيب وتنطق وتتحرك وبالأعداد دى كلها ... خمسين ألف متظاهر وكيان واحد مش خايف بيهتف بإسم مصر ... ولكن الأمل فى ربنا كبير ...
شكرا لصديقى اللى رافقنى طول اليوم ...شكرا يا ضياء :)
وسنستكمل ما بدأنا ... ولنا ولمصر الله
فيديو خاص بالسحل اللى حصل فى ميدان التحرير بليل عند فض المظاهرة ...
شاهد للضرورة وتذكر أن الحرية أغلى من كل شىء ... فالحياة بدونها لا معنى لها ...الفيديو من شبكة رصد





دعواتكم لنا ولمصر ....
ونداء لكل شخص قرر إنه أجبن من إنه يقول كلمة حق أو يشارك ... ذنب أى حد إتضرب أو إتهان أو بكى فى اليوم دا من القنابل المسيلة للدموع فى رقبتك ...لأن عدم وجودك أضعف كيان التظاهر وعدم وجودك كان سبب فى إن الناس دى إنضربت ومخدتش حقها لحد دلوقتى ... خليك راجل وإنزل ... العمر واحد والرب واحد
ملاحظة : صور اليوم اللى صورتها فى أكونت الفيس بوك ... تحياتى

شاب فقرى

هناك 3 تعليقات:

غير معرف يقول...

Please take a look at this:

http://m.yahoo.com/w/ynews/article/world/0?url=http%3A%2F%2Fxml.news.yahoo.com%2Fus%2Fnews%2Frss%2Frichstoryrss.html%3Fu%3D%2Fnm%2F20110126%2Fwl_nm%2Fus_egypt_protest&.ts=1296087090&.intl=US&.lang=en&.tsrc=yahoo&ref_w=frontdoors

Just copy - paste it in your browser...


Mubarak never experienced this level of public anger and such a rejection of his legitimacy in 30 years of power,"

rabina ma3aki ya masr ya jada3a...

:)))))). Ana Happy jeddan!

shemo_ joker يقول...

السلام عليكم.....

ربنا معاكم يا رجالة مصر
ربنا ينصرنا ع الظلمة ويخلصنا منهم

بجد انا كمان مكنتش متصورة ان الدنيا حتبقى عملة كدا كنت مفكراه كلام وخلاص

ربنا يارب ميضيعش تعبكم ع الفاضى ....


بجد فعلا فى وقت ما حبنا بيبان للبلد دى كلنا بنعرف نجمع مع بعض وباذن الله نعرف نعمل حاجة... وربنا يحفظكم من اكيد الكلاب بتوع الامن المركزى وامن الدولة ودا اقل ما يقل عنهم من الفيديوهات الى شوفناها هنا وع الجزير
وع الفيس وكل وسائل الاعلام الغير مصرية الى بتبين انها حكومة متفاهمة ومتضامنة مع الشعب ..


لنا ولكى الله يامصر
دومت بخير
فى رعاية الله.
shemo

موديل يقول...

انا مقيمة خارج مصر ، مغتربة ن الناس اللي مشوهم من البلد لكن فعلا اول مرة ارفع راسي و اقول انا مصرية بفخر اول مرة احس ان الشعب نزل لحاجة تستاهل اول مرة اقدر اقول عملوها الرجالة و ما يوتش الموضوع ماتش و لا هيفات اخرى
يا رب يتمم نصرنا
موديل

http://back2evans.blogspot.com/