الثلاثاء، 4 يناير، 2011

أنا و هم

طبعا اللى هيقرا العنوان على أنى انا وهم يعنى مش حقيقة يبقى مش مركز وياخد باب المدونة فى إيده أو صفحة السيارات .... العنوان بيقول أنا والناس التانيين :D
***
أحيانا الحب كعاطفة بيطغى على أى شخصية مهما كانت قوتها ..بحيث إن الحب لو تملك شخص تجاه شىء أو إنسان فهوا بيكسر كل قوانينه وبيخفى شخصيته تماما قدام الشىء دا او الانسان دا وطبعا كلنا فاكرين قصة الحب الرهيبة اللى بين شيطان وبنت ... ولا أنا محكيتش عنها ؟؟؟ يمكن أكون محكيتش عنها لكن الخلاصة إن الشيطان (( واحد يعنى بلاش ذكاوة قد يكون قاتل أو حرامى أو حتى بتاع فول )) فى القصة دى ملامح شخصيته الشريرة مع كل الناس بتختفى مع حبيبته وهى البنت اللى بيكون معاها وبيحبها بجنون وبيشوف إنها تستحق الإمتياز بأنه يعاملها بشكل مختلف عن كل الناس ويعاملها بالجانب الطيب منه بس ....أينعم هى هتحب الجانب الكويس الأمور اللطيف اللى بيحبها وبيدلعها بس طبعاااااااا هى متعرفش الباقى لأنه مستحيل يطلع قدامها الباقى دا
وأحيان أخرى الحب لما بيطغى على إنسان بيزيد ملامح شخصيته حدة مع الطرف التانى مش بيمحيها (( زى العقيد كمال مهران كدا ... مش عارف شفتوا المسلسل ولا لاء ... بس كان الراجل كل شوية ملامح شخصيته الأصيلة بتزداد حدة ... على فكرة كان بطولة عزت العلايلى اللى بحبه يوووه نقفل القوس دا بقى )) بحيث إن الشخصية ملامحها بتزيد وأصولها وقواعدها وطريقتها فى الحياة وأفكارها بتبقى أكتر قوة من حيث الخير والشر ومحدش يقولى الحب طاقة خير الله يباركلكم لأن فى الكتاب بتاعى بيقول إنه طاقة سواء خير شر بقى بس هوا طاقة ومش لازم تقتنع بدا (( لازم تقتنع على فكرة ... زى ما بتسمع عن الأب اللى قتل عياله عشان بيحبهم ؟؟؟ أينعم هوا تصرف غبى لكن الدافع بتاعه هوا الحب ... وكذلك اللى بيعذب واحدة عشان خاطر هوا بيحبها أوى وعايزها تركز فى اللى بيعمله عشان تكون أكثر حنان معاه ؟؟؟ أو عن اللى بتعامل واحد بجفاء عشان هى مش ينفع تبقى معاه طيبه لأنها لو بقت طيبة هتبقى بتعامله زى ما بتعامل كل الناس وهيبقى شخص عادى فى حياتها .... أينعم كل دا يعتبر جنون .. لكن مين اللى قالك أصلا إن الحب حاجة غير كدا ؟؟؟ ))
ملامح الشخصية فى كلتا الحالتين المذكورين هنا بتختفى ... ومحدش بيقولى بتختفى إزاى ؟؟ هيكون الرد الطبيعى والمنطقى إن حضرتك متعرفش الشخصية اللى قدامك دى أنهى واحدة فيهم ؟؟ هل الحب بيقوى ملامحها ولا بيخفى ملامحها وبيظهر لك الجانب اللى لازم تشوفه بس طيب وإنته أنهى فيهم ؟؟؟ وهل يستحق الطرف التانى إنه يشوف الحقيقة فيك أو يشوفك ؟؟ البوست والكلام دا كله مش عن الحب ... الكلام دا كله عن حقيقة الإنسان ... بتظهر إمتى ؟ أحب أقولك يا صديقى إن كل شخصية كل اللى مرت بيه من تجارب وخبرات وقصص سابقة وحتى لمسة أو موقف بيكون سايب فيها أثر زى ما تكون إنته ماسك آلة حادة وبتعلم بيها فى الحيطة أحيانا بيسيب علامة بسيطة وأحيانا بيشيل الطلاء وبيوصل لأعمق من كدا تخيل لو جبت نفس الآلة الحادة ومشيت بيها على نفس الأماكن ... هتلاقيها فى الأماكن الغائرة بتغرس وشوية وهى ماشية كدا تحس بإن مشيها مش سوى .... تعرف هنا إن حد عمل هنا علامة من قبل ..طيب وإيه فايدة التشبيه دا ؟؟؟ الفايدة فى إن حضرتك لو ركزت شوية تقدر تمحى غطاء الحب عالشخصية دا وتشيله وتشوف حقيقة الشخصية دى ... لأن أى حاجة حصلت لها غيرت فيها ومنقدرش نقول إن التغييرات دى بتتمحى بالساهل ... دى حاجة عاملة زى التعوير فى الوش ... متقدرش تشيلها بالساهل من شخص .. مينفعش تشيلها أصلا ... لازم هوا اللى يتحرك ويشيلها .. وبعد وقت قليل من الملاحظة والتركيز ( مش هتسيب قصة الحب وتقعد تلاحظ وتركز ... دا لو مكانتش قوة الملاحظة دى لعنة فيك فمش هتقدر تلاحظ زيى كدا ) هتلاقى إنك شايف المستقبل للشخصية دى وردود أفعالها وتصرفاتها هتبقى إزاى معاك أو مع غيرك وهتتصرف إزاى فى حالة خسارتك أو فى حالة القسوة منك ...أو لما تبقى كويس معاها عشان كدا ... بيكون من المستحيل إنك تبهرنى .... لأنى ببساطة على علم مسبق :)
شاب فقرى

ملاحظة بمناسبة الصورة : أحيانا لما بتيجى لك فرصة مستحيلة وبيكون قدامك شىء يستاهل ... بدل ما بتتعامل معاه وتحاول متخسروش .. بتعمل حاجة من التلاتة : يا إما تسيبه كدا لحد ما يضيع وإنته واقف منبهر زى الصورة ... يا تقعد تحميه من الأشباح وتلف حواليه وتنسى إن الشىء دا أساسا ملكك وتسيبه لحد ما يطير منك يا إما بقى تعتبره شىء عادى فى حياتك بتعظيم نفسك إنك أكبر من المستحيل وإن دا شىء عادى... مع إنك ولا حاجة والمستحيل عارف نفسه كويس أوى وزى ما قدر يعملك فى يوم ... يقدر يعمل غيرك ..وإنته كارت محروق
***
بالنسبة للبوست السابق وقصة .. تحت مشرط الجراح
تعليقى بقى ردا على كل التعليقات من اول جزء فى القصة لحد البوست دا وهوا يعتبر النهاية اللى مش هكتب بعده فى الموضوع دا تانى

الموضوع كله يا جماعة حقيقة
حقيقة بمعنى انه حدث بالفعل
حصلى بالفعل
طيب ننتقل لنقطة تانية
النهاية دى حقيقية
لاء
أنا حبيت أقفل النهاية قدامكم لسبب
لأن الحقيقة مينفعش تتنشر تحت أى مسمى
لأن اللى هيقراها يا هيشوفها رومانسية أوى
يا هيشوفها أوفر أوى يا هيقولى دا كله قصة يا اما حتى هينسبها للواقع
وفى كل الحالات انا مش هرتاح بنشرها
فالنهاية .... متنشرتش
مش عشان محصلتش
لاء حصلت وكانت أروع من دى مليون مليون مليون مرة
بس لا تصلح للنشر
بس كدا
:)
القصة كلها بتوصف شخص بيقرب من الموت واحساسه بكل شىء حواليه
وحالته النفسية لحد ما وصل لمكان هوا واثق انه هيموت فيه
مش مهم بقى خطورة العملية والرغى دا كله
المهم ايمانه بانه هيموت هنا ونفسيته المتحطمة
هوا شايف كل حاجة بتواسيه وبتحاول تقف جمبه وهتفتقده
بس كدا
شاب فقرى

هناك 11 تعليقًا:

تحياتىdody يقول...

احب ابدأ كلامى وأقولك ....
(الفنون جنون )
وبجد الموضوع جامد جدا
وبالنسبه للبوست اللى قبل ده ((تحت مشرط الجراح ))
اناعارفه ان ده محصلش اكيد يعنى
واكيد كنت عارفه ان هى ليها نهايه تانيه
وبجد الفكره عجبتنى اوييييييي
والنهايه مختلفه جدا
ودمت فى ابداعك ...
فى رعاية الله

غير معرف يقول...

اليوم أحس إني مش مركز خالص، ويا دوبي اقرا سطرين على بعض وبعدين أضيع الباقي، بس عالعموم اللي لفت انتباهي الجملة دي :(عشان كدا ... بيكون من المستحيل إنك تبهرنى .... لأنى ببساطة على علم مسبق)
هم اللي يحبوا بعض ودايبين في بعض وكل يوم بيناموا في حضن بعض ويحكوا لبعض ويداعبوا بعض، مش محتاج أي واحد منهم لأنه يبهر التاني، لأن تصرفاتهم كلها عفوية ومافيهاش تكلف ومشاعرهم كلها صدق ودفء وحب وحرارة، وما فيهاش تمثيل خالص.

شاب فقرى يقول...

غير معرف ورد سريع مخصوص ليك قبل نهاية التعليقات
انا مش بتكلم عاللى بتقوله دا
انا بتكلم فى القسوة
فى ناس احيانا بتقسى لدرجة انها بتبهرك ازاى عملت كدا
بتقسى بافعال
وبتفسى بتصرفات
انا بقول ان الحاجات الوحشة مش بتبهرنى
لو ركزت فى سياق الكلام هتفهم دا
انا بتبهر بالحاجات الكويسة
لانى مش بكون عارف ان فى حد خياله وقلبه طيب ونقى للدرجة
لكن مش بنبهر بأى شىء يعمله الانسان فى حالة القسوة او الشر او الزعل او الغضب
بس كدا
دمت بكل ود
ودام غير تعريفك

fafy يقول...

يا شاب يافقرى انا حاسه انك توهتنى

fafy يقول...

ملحوظه: انا قريت عنوان البوست صح(:

اعقل مجنونه يقول...

بست رائع كالعاده

shemo_ joker يقول...

السلام عليكم....

ازيك يا فقرى ....


بجد جامد بس مش كالعادة المرادى جامد بزيادة

تعرف احلى فى كتابتك انك بتكتب فى تفاصيل تفاصيل صغيرة اوى

يمكن فعلا زى ما انت بتقول عن نفسك
مصاب بلعنة قوة الملاحظة .


اكتر حاجة بجد عجبتنى اوى
وركزت فيها جدا اخر جزء وفعلا دا الى احنا بنعمله اما بنقابل شخص سبيشيل فى حياتنا ودا طبعا غباء وانا اول حد بيتصرف بالغباء د بس بحاول اغيره بعد ما لفيت نظرى ليه بكتابتك...

عندى طلب صغير
مينفعش تكتب كدا واحنا نفضل نعلق مع نفسنا كدا اتهيئلى لو حد عاوز يتناقش معاك مش حيبقى فى نتيجة اجابية للى انت كاتبه ع رغم قيمة الكبيرة
فحيبقى احسن لو رديت ع التعليقات
عشان يبقى فى كوميونيكات بينك وبين الناس الى بيقرؤا ليك.

تسلم دماغك
ودومت مجنون عشان جنانك مفيييد اوى
وربنا يزود عندك نعمة قوة الملاحظة
دومت بخير
فى رعاية الله.
shemo

شاب فقرى يقول...

دودى
والله كان نفسى انشر النهاية التانية لانها اكتر جنونا
بس دى عجبتنى
لان مش دايما الحقيقة حلوة ...
:)
منورة دايما
شاب فقرى

شاب فقرى يقول...

فافى
ركزى وانتى مش هتتوهى
:)
نورتى
والحمد لله ان فى حد فهم وقرا العنوان صح بسهولة
:$
دمتى بكل فرح
شاب فقرى

شاب فقرى يقول...

اعقل مجنونة
:)
وجودك الاروع
فقرى

شاب فقرى يقول...

shemo joker
بالنسبة للطلب
انا والله بمر بفترة مليانة مشاغل
لكن كل ما بقدر ارد برد :)
أدام الله زياراتك وسعادتك بما يكتب
:)
ومنورة ودايما فى انتظار رايك
شاب فقرى