الأحد، 21 نوفمبر 2010

الحمار وصاحبه




فى مثل قديم كل الناس بتقوله ... : ( إربط الحمار مطرح ما يحب صاحبه )
طيب لو إنته صاحب الحمار بقى وربطته فى مكان غلط ؟؟؟
القصد هنا لو كنت حضرتك صاحب الحمار أو الشىء وحطيته فى مكان غلط
زى ما بيحصل وتلاقى حد بيقولك الحياة كدا إنتهت بموت فلان ....مع إن الحياة مش هى فلان وفلان مكانش له أى لزمة ولكن وجوده كان كافى ( طبعا هنا الموت سواء بالفراق أو الموت فعلا )
فى الحالة دى هنا الشخص دا قدر يربط بين الحياة وفلان أو واحد تانى ربط بين الحب وبين سعدية أو بين البحر وبين سعدية فكل ما يشوف البحر يفتكر سعدية ويفتكر ( هتموتى يا سوسو :D ) أو واحد تالت ربط بين كرة الطائرة هوايته ورياضته المفضلة وبين حبيبته اللى كانت بتحب تشوفه بيلعبها أو بتلعبها وبعد فترة سابته أو هاجرت وركبت الوباء وراحت الوباء :D ... أو بين الجواز وسعدية برده ( مش عارف إيه حكاية سعدية دي ) باترى إيه الموقف دلوقتى؟؟؟

الغباء فى الحياة إنك تربط بين شىء معنوى وشىء مادى قابل للتغيير ,,بمعنى إنك تربط مثلا بين قيمة عظيمة جدا زى الحب أو الإحساس بالحياة أو العطف أو الشوق وبين شخص معين أو شخصية معينه ...
هنا حضرتك قدرت تربط شىء مادى أو حاجة بتحبها وساكنه كل أحلامك وبين شىء متغير ... المعنى الكبير أو الشىء المعنوى اللى بنتكلم عنه وليكن الحق أو الحب أو العدل هنا عمره ما هيتكسر ولكن الشىء اللى ربطته بيه زى الإنسان مثلا أو زى ( سعدية ) هتتغير عادى جدا وهتتبدل ويمكن اللى كانت بتقول ( آمين ) إمبارح بكره تقول آه وأووووه ولاء وكل حاجة تانية ...القصد يعنى إن الربط هنا غير منطقى وملوش أى فايدة غير فى وجود سعدية لأن طبعا إنته ساعتها ( فى وجود سعدية ) هتبقى عايش مع أفلاطونية الحب أو حقيقة العدل اللى على فكرة ( كائن وله عقل وبيفكر ..ملناش علاقة بقى إذا كان سعدية فى دماغها كيس فول ولا مهلبية ) فهنا يا صديقى أنصحك فورا بقتل سعدية أو ربط معانيك وأشياءك المهمة والروحانية والجامدة جدا فى أى حاجة ثابته لا تتغير مش فى كائن حى فى دماغه كيس فول أو دماغه من الفراغ اللى فيها لو خبطت عليها هتلاقيها بتعمل صوت وبترن ... ولا إيه ؟؟؟

تحياتى
شاب فقرى

هناك 14 تعليقًا:

بطوط يقول...

كلامك منطقى ومقنع

كاتونيا يقول...

بسم الله الرحمن الرحيم
احم احم
مش فاهمه اي حاجه
وبعدين مين سعديه دي اصلا :)

شاب فقرى يقول...

تومى وبطوط
انا والله مبسوط باول تعليقين دول جداااااااااااااااااااااا
لانهم يحملوا نفس الاسم
المهم
:)
تومى
يعنى مثلا لما الواحد يربط بين طعم الشوكلاته وبين الحب
طيب لو الشوكلاته فسدانة وطعمها معفن ... هل يبقى الحب وحش ؟؟؟
فهمتى الفكرة ؟؟؟
:D
الناس بتربط المعانى الكبيرة الخيالية بحاجات عبيطة ممكن وقابله للتغيير
فلما الحاجات البسيطة العبيطة بتتغير زى البشر مثلا الواحد بيفقد الثقة فى الرموز والمعنى الكبير
بس كدا

نورتى جدا جدا :)
فقررررررررررى :)

اه صحيح
سعدية دى ماى لاف :D

dr_s20 يقول...

كلامك جميل وصح ميه فى الميه
بس للاسف فى الاغلب بيحصل غير كده خالص
لانه مفيش حد دلوقتى بيفكر فى اى حاجه بطريقه سليمه من الاساس
علشان ما اكونش ظالمه هما قليلين جدا
يبقى صعب جدا لنهم هيوصوا للنتيجه الى انت بتناقشها دى
ملحوظه

انا لسه عارفه المونه دى اول مره اشوفها
بجد باهنيك على كتاباتك الى بتدل على مستوى فكرى عالى

الحياة الطيبة يقول...

والا إيه ؟ على فكرة انت كلامك كبير وصح مئة بالمئة وعمل مثل لما تكون في غرفة مظلمة وتفتح النور فجأة ,ويشغل الإدراك بطريقة تكون ثابتة ولا تُنسى .
كثيراً ما نضع الحمار في المكان الغلط بدون وعي منا بذلك ....أما الآن سنضعه في مكانه ,سلمت أناملك كتابة أكثر من رائعة .

غير معرف يقول...

بص هقولك حاجة كل واحد فى الدنيا دى فاكر نفسة اذكى واحد واجمل واحد ........مش ممكن اقدر احكم على الناس بالغباء او بالذكاء كل واحد لة افكارة ومعتقداتة وبتختلف من شخص لاخر حسب البيئة والتربية وحاجات كتير يعنى ساعات يبقى مخى مهلبية هههههههههههههه زى مابتقولودة بيكون من التشتت وقلة التركيز يعنى ادخل سوبر ماركت اقول لنفسى هو انا هشترى اية...ادخل محل ملابس ادور على الفلوس اما وقعت واما نسيتها فى البيت ....وعندى خوف من الناس لو حد بص لى امشى على الرصيف التانى...لو ركبة تاكسى ايدى على الباب وهكذا متعرفش طريق دكتور نفسانى ؟؟؟؟؟؟؟؟؟؟؟انا عبسلام قبل متسال انا مين

غير معرف يقول...

اة على فكرة فية حاجات انتة بتهرب منها ومش بتجاوب عليها مش عارفة هى برضوا حاجات معنويةاتعلمت منها اية مش عايز تقول....فى الجنب على اليمين عند وحشتنى كلماتك كدة...

شاب فقرى يقول...

غير معرف
اكييييييييييييييد حضرتك مش عبسلام :)
دا شىء انا واثق منه :D

اعرف طريق دكتور نفسانى شاطر اوى
وبروح له كتير
واقدر ابعت لك رقم العيادة كمان :)


اكيد فى حاجات بهرب من الاجابه عليها لانى مش بجاوب عليها لاى حد
واكيد كاتب مفتقدك عشان لما ترجع تعرف العنوان وتقدر توصل
واكيد الكلام مفهوم
وان الطريق ليا مش يافطة عالجمب مكتوب عليها مفتقدك بس
ولكنى مفتقدها حقا
:)
الجملة بتاعت مفتقدك دى لشخصية معرفهاش ولا تعرفنى وعلمتها كتير واتعلمت منها حاجات بسيطة اوى
لكن لذيذة اوى
بقالها هنا اكتر من تسع شهور :)
ومستنى برده اعرف مين
لان اكيد انت مش عبسلام
:)

اما بالنسبة لرايك فى البوست
فاقرا تانى
لان موصلتش للفكرة لسه :P
تحياتى
فقرى

شاب فقرى يقول...

dr s20
شكرا لرايك جدا
واكيد بدأت أتابعك :)
نورتى المدونة جدا
خالص التحية والاحترام والتقدير
فقرى

صمت المشاعر يقول...

هو بقي المغزي في كلمة والا ايه الاخيره دي ههههههههههههههههه

بجد كلامك حقيقي فعلا بس السائد احنا كبشر بنربط قيمه جميله ثابته بشخص معين وزي ما قلت الشخص مش دايما هيبقي ثابت علي مبدء معين في حياته ولكنه بيتغير بتغير الاجيال والظروف

بحييك علي الفكره

Qatarat Nada يقول...

وانا برده ماكنتش فاهمة ولا كلمة
بس فهمت من تعليقك على تومي
انا بفهمها وهي طايرة والله بس احيانا يانا بكسل اجيب اللى بيطير دا يا اما هو اللى بيبقى رخم ومابيجيش من نفسه :D

بس كلامك صح جدااا وفعلا بقينا بنربط بين كل حاجة من غير مانعرف اذا كانت الحاجة اللى ربطنا بيها حاجة تانية دي تافهة ولا لا
ودا بيأثر طبعا علينا وعلى نفسيتنا
ربنا يستر بقى وييسرلنا امورنا

تسلم ايديك
اختك الحجة :)

صوت من مصر يقول...

كيمو مش انتى صاحبى وحبيبى
كلامك مظبوط
ههههههههههههه

Unknown يقول...

:)

Unknown يقول...

كل واحد بيصتع تشبيهاته حسب المود العام لحياته و حسب نظرته للكون ، منقدرش نحاسب الناس علي نظرتها الخاصة للحياة مهما كانت سخيفة ف نظرنا ، جايز المواقف اللي قابلتك ف حياتك كانت تخلي نظرتك للحياة زيه و تشبيهاتك هيا تشبيهاته ، الموضوع نسبي مش أكتر و كل واحد فينا ليه فلسفته الخاصة في الحياة...