الجمعة، 12 نوفمبر، 2010

مجنونة ودماغى

البوست التالت فى 11-11-2010

كل ما حد يقرا حاجة وتعجبه أو يشوف تصرف غير متوقع منى أو من أى حد تطلع الجملة الشهيرة : آه يا مجنون ( لاسع ) يابن ال ... الناس بتعتبر الجنون ميزة وحاجة حلوة جدا إنك تبقى مجنون ودا لأن أحيانا بتبقى الطريقة الوحيدة اللى ممكن تعيش بيها الحياة إنك تعيش من غير قواعد ولا حاجة تحكمك وتبقى حر لا قوانين ولا عقل ولا أى حاجة ... يعنى بمعنى أصح Just do things
بيتصرف وخلاص وبيتحرك وخلاص ...السبب لأنى عايز كدا وأنا عاجبنى الحال كدا ومبسوط بيه أوى ... مبقدرش أتحبس جوا سجن او إطار ...
المشكلة بقى إن اللى بيشوف كدا بيحاول يقلد نفس التصرف ويعيش على نفس المنهج ويتصرف بنفس الأساس ...يعنى فى ناس متعرفش الفرق بين الجنون الطبيعى اللى بيبقى ناتج عن عقد نفسيه وكلاكيع وذكريات فى حياة البنى آدم وبين الجنون المصطنع اللى هوا بيتصرف عشان :انا عايز أبقى مجنون ..بس فى الحقيقة هوا مش كدا
اللى لاحظت عليهم الموضوع دا هما البنات ... يعنى بشوف أكتر من شخصية بتدعى الجنون ...يا جماعة هوا ليه فجأة بقى المرض النفسى والجنون حاجة حلوة وغاية الواحد يسعى ليها ؟؟؟؟ إذا كان عاجبك تصرف فقرى مثلا أو حتى تصرف أى واحد بتشوفه قدامك ...حاول توصل لنتيجة بدون ما تدعى الشىء لأن أمر شىء فى الحياة هوا إنك تعيش بشخصية حد تانى أو بشكل تانى أو فى إطار معين مش إطارك أو مش حقيقتك ؟ إزاى تتقبل على نفسك تعيش فى حقيقة مش بتاعتك يعنى مثلا بتعيش فى جلباب أبيك كدا أو بتعيش فى قناع حد عاجبك أوى .... لكن إنته فين ؟؟؟
الحقيقة إنى مقابلتش فى حياتى غير إتنين بس يتمتعوا بصفة الجنون دى ..( توتة - وسنوايت :D ) والباقى كلهم عايشين الوهم اللى كتبت عنه فوق .
ومن هنا أقول لكل مدعى للجنون : فوق وعيش ب وشك مش ب وش حد تانى أو فى إطار أو قناع أو شكل مش شكلك

دماغى
ومن اللى فوق دا ... أحيانا بلاقى واحد بينصحك واحد صحبى بيقوله بص ياريس ...إنته هتتقل عليها من هنا وهى هتقع عليك زى الجردل ...او ألاقيه بيقوله ..أول ما تلاقيها بدأت تتصرف بكذا قولها : لاااااااااااء دا أنا مش عارف إيه ؟
طيب إزاى تقدر تكمل مع شخصية مش فاهمة الدماغ اللى إنته عايش بيها ...بمعنى إنك لو إتصرفت معاها بطريقتك العادية فى الحياة أو منهجك أو أسلوبك إن إنته مثلا بتسأل ومهتم وبتتصل متين مرة فى اليوم وهى مركز الكون ..أو إنك مثلا شخصية بتنفض ومش بتسأل فى حد أو إنك مجنون ..أو غير متزن ومتقلب ودماغك مش معاك وراحت مشوار ولسه مجاتش ... إذا هى مقدرتش تحبك على الدماغ اللى فيك دى ... بالشكل دا والأساس دا والطريقة اللى إنته عايش فيها وبيها ...إزاى بقى هقدر أكمل معاها ولو حتى جبت كل الكتب وكل النصح اللى فى الدنيا
لو هى هتمشى بالكتب والنصح بتاع صحابى ..خلاص تروح ترتبط بيهم ( الحدق يفهم :D )
زى ما قلت Just Do things
بمعنى ... إن اللى مش هيقدر يتقبل الدماغ دى فى التعامل ... يبقى ليه تتعب نفسك مع الدماغ دى ... وليه تربط نفسك بيها ؟؟..
وأكيد اللى مش هيمشى بيها ... يبقى ميلزمش صاحبها
ولا إيه ؟؟؟

شاب فقرى

هناك 8 تعليقات:

Romancia يقول...

عندك حق جداااا
اسمحلى ارفعلك القبعه على الكملمتين الى فى الجون دول

شاب فقرى يقول...

Romancia
:)
تسلمى يارب
نورتى المدونة
فقرى

shemo_ joker يقول...

السلام عليكم

ازيك يا فقرى

بقالى كتير مش دخلت
ليكم وحشة كلكم واااالله

كل سنة وانت طيب


http://shemo-fashion.blogspot.com/

غريبة اول مر ابقى تانى تعليق هههههه

يارب دايما كلكم بخير

استنونى ان شاء الله حبقى معاكم باذن

الله ع طول


فى رعاية الله
shemo
حرجع بمدونتى الرئيسية fashion

شاب فقرى يقول...

شيمو
نورتى
وعينيه أحجز لك أول تعليق البوست الجاى طبعا :)
هتنورى باى مدونة تدخلى بيها
والف الف الف حمدالله عالسلامة :)
فقرى :)

شمس النهار يقول...

شوف انا مالييش في الكلام الكبير ده
انا اللي اعرفه ان الحب والصداقه فطره

لو قعدنا نخطط لها ونقول هنعمل كذا لو اتعمل كذا
وكده
مايبقاش حب ولا صداقه ولا اي علاقه اصلا
وقلته احسن

:)

زهرة يقول...

أكيد اللى ميقتنعش بفكرى أنا ودماغى أنا ووأسلوبى انا بردوا .. يبقى مينفعش أتعامل معاه ..

لانى مش هفضل صحابى كتير ولا هفضل وسطة تاخد كلام من هنا ترضى بيه هنا وعلى الله يرضى :(

بالنسبة للجنان وتعدد الشخصيات أحيانا والله بتكون ميزة لإنك تبقى حد تانى تحبه وخلاص وتهرب منك

لو حاسس إنك متدايقو لا زعلان ولا موجوع

ووو بس

بحييك على كلامك :)

صمت المشاعر يقول...

كلامك صح فعلا وتلخيصه في ثيم واحد درسته طوال الكليه وهو BE YOUR SELF

دمت بكل خير

همسات وبحــ الحياه ــر يقول...

اغيب شوية الاقى 3 بوستااااات
وكل واح منهم عايز عريظه هههه
اولا :)
اتفرج ياسلام
تحفه بجد
فكرنى بموضوع كنت كتبت فيه انك تتخيل ان فى كل مكان انت فيه متركب كاميرات بتصور تصرفاتك وافعالك وكلامك والناس بتوف كل دا شوف قد ايه هتحاول تغير من افعالك وكل حاجة غلط فيك قد ايه هتحاول تبقى حد كويس
عارف لما تخيلت الحبيبين تخيلت ان فيه واحد عايش دور الضحية وانه هيموت على حبيبه وهو ولا فى دماغه والتانى بيحب بجد ومقهور تخيل بقى لما التانى دا اف ايه اللى جوه الاولانى على رأيك هيحس قد ايه انه صغييير اوى وانه ازاى صدق الحب دا
موضوعك جمييل فى انك نهيته بعلاقتك بربنا
المشكلة ان فيه ناس لما بتحس ان حد بيراقبها بتير سلوك جواها عشان تظهر بمظهر احسن مابالك بقى ان ربنا هو اللى شايفها ومراقب تصرفاتها
جمييييييييل
************************
فعلا في لحظات بتعوضنا عن عمر واحزان كتيره عدت
مر عليا شيط الذكريات كله وانا بقرأ البوست
*******************
كتي بيقولوا عليا مجنونة لانى بحب اعمل اللى انا عايزاه وبغامر وبعي حياتى ف\اللى انا راسماها لنفسى بس كتير تلاقى حواليك قيو تمنعك مع انك اصلا مبتعملش حاجة غلط لكن كون انك تطلع بره العاادات والتقاليد يبقى انت مجنون !!! غريب مش كدا
فكرتنى بأغنية مكى لما بتقول ماتحاولش تبقى حد تانى غير نفسك
مبمحش الناس اللى بتلبس قناع حد تانى عشان هى عاجبهم شخصيته او او
هههههه مين سنو وايت دى ؟
إن اللى مش هيقدر يتقبل الدماغ دى فى التعامل ... يبقى ليه تتعب نفسك مع الدماغ دى ... وليه تربط نفسك بيها ؟؟.. عليك نوووووووور
كفاية كدا عليك النهاردة اصلى رغايه ومش هتسلم منى هههههه