الثلاثاء، 9 نوفمبر 2010

بصلة حبنا


أحيانا بيدفعك التفكير فى الطرف التانى فى أى علاقة حب ناضجة ( مش لعب عيال يعنى.... او لو حتى لعب عيال ) إلى إنك تسأل نفسك ياترى أنا بحبها ليه أو بحبه ليه ؟ ومن هنا تبتدى دماغك تبتكر فى مميزات وتحاول تشوف عيوب إنته مش شايفها ( دا لو كنت بتفكر يعنى لا سمح الله ..لأن مفيش حد بيحب وبيفكر ) وتبتدى من هنا تتخذ بقى ميت إتجاه لكل ميزة تلاقيها فى الطرف التانى يعنى مثلا تبتدى بإن اللى قدامك دا شخص جميل وحد لذيذ بجد ( بقرف من الجملة دى يا جماعة أرجوكم محدش يكررها ) وإنسان كوول كدا ورايق والدنيا بتتشقلط حواليه وهوا عادى وبشوش وفى أمل ( مش عارف ليه دايما الناس بتشوف فى أمل فى قصة الحب زى ما يكون الحبيب دا ملاك نازل من السما وهيغير الواقع على رأى أونكل زيزو حبيبى ) وإنه مش كدا وبس لأ دا كمان ضحكته بتخلى الشمس تطلع والسما بتنور وبيطلع من تحت الأرض إبتسامات وحاجات كميلة خالص ( بقرف من اللفظ دا برده ) وإن الحاجات الكميلة دى هى اللى بتكملك ... وتلاقى الشاب من دول يقولك يا سلام يا جدع أول ما شفتها حسيت إن الجنة إتفتحت لى أو إنى واقف قدام السنو وايت ( على فكرة سنو وايت كانت هبلة لأنها أكلت التفاحة ) وتلاقيه عمال يوصف فى جمال خطوتها ورقة عينيها ( مع إن كل العيون بتتشابه بعد الجواز بشهرين وبتصبح عضو فى أعضاء الجسم مش بتاخد بالك منه أكتر ما بتاخد بالك من الملح فى الأكل ) وإزاى بتضحك وإزاى شفايفها فيهم سحر الكون وإزاى هى بتعدل النضارة ( لو بتلبس نضارة ...على فكرة بحب النضارات أوى ) وإزاى وهى بتقوله وهوا مروح وعلى عينيها نظرة حزن من معاميق المعاميق العميقة : إنته ماشى ... ويوصف بقى قد إيه بيكلمها وقد إيه بيرتاح معاها وإزاى كانت بتاكل وبتشرب زى العصفورة وهى قاعدة معاه ... وإزاى مديتلوش رقم موبايلها وكانت بتتصل بيه من أرقام غريبة عشان مينفعش رقمها يبقى معاه ولو طبعا هنا بنتكلم عن شاب هتلاقى البنت بتوصف إنه هوا راجل ووقف جمبها ( صراحة مش عارف البنات بتحكم إزاى عالشاب إنه هوا راجل فى حين إنها متعرفوش ... لأن كلمة راجل دى بتنطبق على كل الذكور زى ما كلمة طير بتطلق على كل الطيور من أول النسر للفرخة لامؤاحذه يعنى ) وإزاى حاسب لها فى الترماى ولما فى واحد بص لها وهى ماشيه معاه قام صاحبنا بص له بقرف وشال عنها المنظر الوحش وأحرجه ...وإزاى وهوا بيكلمها بيحسسها إنها ست البنات يا كميلة إنتى ( كميلة تانى ...أنا خلاص هتشل ) وإزاى صاحبنا بقى حافظ عليها وهما فى الأتوبيس ومرضيش يلزق فيها كدا ولا كدا وإزاى مسك إيدها من خوفه عليها وهوا بيعدى الشارع ( دى عالبنات اللى مش بتتبع نظرية حنفى وفوزية ...إنظر مسرحية سك على بناتك الفصل التالت الدقيقة خمستاشر :P ) وإزاى الأمور كان لابس شيك وحاطط برفيوم رهيب والجزمة كانت بتبرق ( على فكرة ولله الحمد انا بغير الجزمة كل سنتين .. والجزمة حاليا مقطعة مقطعة مقطعة وبتشتكى لطوب الأرض ... ) وإزاى بيتصرف وإزاى بيمشى جمبها والعك دا كله
انا نفسى أقول لكل اللى بيفكر بالطريقة دى كلمة واحدة بس بنقولها إحنا بالألف وأهل إسكندرية حبايبى بيقولوها بالياء
: أحيييييييييييييييييييييييييه هوا لسه فى ناس هبلة كدا
إنته لو بتفكر فى الحب بالشكل دا او فى الطرف التانى بالشكل دا يبقى محتاج تفوق وتعقل كدا وتضرب لك حجرين تفاح وكوباية خروب .... كدا إنته أو إنتى هيبقى عامل زى اللى بيبص على منظر البصلة زى لينا ويقول بصلة حبنا :D
أنا مش هنا بتكلم فى مميزات الطرف التانى لكن بتكلم فى القبول
لأن نقطة العقل بتيجى فى مرحلة الإختيار من البداية عشان ميحصلش لا سمح الله ( بريك آب فى وسط العلاقة ونقول ياريت عتريس كان خد فكيهة بدل فؤادة وإهوه كله مشمش )
ا
لميزة الوحيدة اللى ممكن تفكر فيها فى علاقة حب ناضجة بجد ..إن الطرف التانى دا مش حد تانى ... يعنى بإختصار هى تبقى هى ..يعنى أنا مثلا مبسوط جدا وفرحان ( واخدين بالكوا طبعا ) إن هى تبقى هى مش واحدة تانية لأن بإختصار انا حتى لو طلع لى المصباح بتاع جدو علاء الدين الأبنودى وطلبت منه بنت تحمل كل مواصفات البنت اللى بحلم بيها وحبيبتى ... حتى لو جابها لى ... فللأسف مش هتبقى هى ... المفروض إنك وإنته بتتقبل الطرف التانى فإنته بتقبل قفص خيار كدا معلش يعنى ولا خليها قوطة فى حالة البنات عشان الطماطم مجنونة وبنت ***حلال برده ...إنته بتقبل الطرف التانى بكل عيوبه والموضوع عامل زى باكدج أو شروة والحب كما قيل لى من قبل أرض تجمع كل الإختلافات ... وكمان نقطتى اللى بتكلم فيها ... ميزتها البسيطة إن هى تبقى هى
هى مش حد تانى
لا بتقلد ولا بتحور ولا بتعيش ولا بتتمنظر ولا بتتغير ... هى هى يا بنى آدمين
وهوا برده كذلك
من أول يوم واثق وعارف هوا رايح فين وبيقدر وبيحافظ وبيضحى ولو حتى على أى حساب
أنا مبحبش أرغى فى توضيح وجهة النظر بتاعتى وإنتوا عارفين ليه (( لأن فى ناس بتتوه ومبتفهمش حاجة :D )
لكن ببساطة أقولها فى النهاية .....
اللى بيحب مبيفكرش بعد ما بيحب ... يمكن بيفكر وهوا بيختار بس مش بيفكر وهوا بيحب لأنه متأكد إنه خلاص إختار صح وهى دى بنت الحلال وهوا دا الراجل اللى هى بتحلم بيه ... كل واحد فينا هوا نفسه بإختصار ...
سامع صوت واحد فى آخر المدونة بيقولى بصوت سمير غانم الشهير فى فطوطة :D : من فضلك وضحلى الصورة ؟؟
وأنا من هنا بقوله : عندها يا أدهم :D
تحياتى
شاب فقرى

هناك 18 تعليقًا:

صمت المشاعر يقول...

بجد توبيك حلو اخر 99 حاجه

ومعاك حق فعلا في ناس تشل في حبها دا اذا كان حب اصلا وناس تبقي مافوره الحكايه خالص ولا كانها حبت بيتهوفن

عموما انا زي ما قلت اللي بيحب مبيفكرش بعد ما يحب لانه بيبقي متاكد انه اختار بنت الحلا


دمت بكل خير وسعاده دائمين

sony2000 يقول...

ههههههههههههههههه
فهمتك ياااااااااااااااااااااااجدح:)
ماشي يماااااان:))
ربنا يسهلو يااااعم
والله عندك حق

noon kiko يقول...

يعنى ما اصدق النت يشتغل ادخل الاقى التدوينه دى
ههههههههههههههههههه
ياد هتشبنى ياد انت وابن خالتك يارب الرحمه من عندك
حتة موضوع تحفه
وكلامك فطسنى م الضحك
بس عارف والله معاك حق
قريت مره ان الحب اللى بجد هو اللى مالوش سبب واللى متعرفش فيه انت ليه حبيت حبيبك
:)

vanilla scent يقول...

كنت كتبت موضوع بالمعنى دافي المدونة القديمة

ومعاك حق جدا في كلامك

وحشتنى المدونة دى جدا :)

Antika يقول...

فقرى انت حد لذيذ بجد
ومدونتك كلها حاجات كميلة خالص
PP=

وجهة نظر محترمة جدا وماعنديش اى تعليق عليها :)
بس كنت عايزة اقولك الكلمتين الـ عاجبينك اوى دول xD !! ..

ghada mOhsen يقول...

الحب الصافي هو حب الروح والجوهر
^^

حبيت البوست ده

يسلمووووو كيموووو
^_^

reemaas يقول...

فهمتتتتتتتتتتتتتتتتتتتتت

جميل اوى يعنى انا احبه شروة كده على بعضه بسلطاته ببابا غنوجه
صح الكلام ياعم فقرى؟؟؟
الاقيه انا بس واوعدك هنفز الكلام

همسات وبحــ الحياه ــر يقول...

هههههههههه
موضوع تحفه وربنا طول عمرك فى التوب بجد

المشكلة فى دا كله ان سواء البنت او الولد بيتكى اوى على ال20% اللى ظاهرين لكن 80 % من شخصيته واللى مبتبنش غير بالاحتكاك ودا طبعا بيكون بعد ماكل واحد اتدبس فى التانى
فتلاقى ان عتريس لما يتجوز فكيهة يقولها ايه انت اتغيرتى يافاتن حمامة خاالص وهى اتقولوا انت مبقتش رشدى اباظة بتاع زمان
المفروض ان العاقه ميكونش فيها تصنع
والمفروض انى محكمش بالمظاهر ويكون فيه عقل
بحييييييييك على البوست هو بصراحه عايز رغى كتيير

غير معرف يقول...

بجد بجد انت جبت من الاخر وقولت كل اللي جوايا وكل اللي بنقدر نقوله او منقدرش

والمشكله ان الناس دي بتستغرب اوي لما تلاقي حصل مشاكل واتفركشت اللعبه دي
ويقطع نفسي اغاني حزن بقى

Tears يقول...

العقل يجب ان يقود القلب و ليس العكس

قلم رصاص يقول...

فقري حبيبي يانور عييييني بيضربوا بيك المثللللللللللل

ايه يابني الكلام الحلو دا كله
بجد بوست خيال
انت اليومين دول الدي عندك عاليه اوي اوي اوي على رأي عادل امام

وينطبق عليك الكلمه اللي بتقول:

الراجل دا بيقول كلام زي الفل

فل؟

سلام بقى

غير معرف يقول...

سيبك انت الاختصار اللي انت قلته صح جدا .. احلى ما في النص التاني ان هو يبقى هو .. صح جدا

أحلى مافي البوست التعليق اللي مابين قوسين :)

كلمات من نور يقول...

كلام معقول وانا شايفه انك واخد مثل بصلة المحب خروف علشان العيد الكبير قرب وتوفيرا بدلا من غلاء أسعار اللحوم ابقى ادبح البصلة (:

بجد كلامك صح عن الحب والعلاقة وهي تكون هي وهو يكون هو ومحدش يحاول يغير التاني لازم كل واحد فينا يحترم أنت و أنا

زهرة يقول...

أول مرة أزورك .. عجبنى البوست جداً ..

بحييك على فكرك

هزورك دايماً إن شاء الله

تحياتى :)

be pleased يقول...

هااااااااااايل :)

غير معرف يقول...

كل سنة وانتة طيب...

Lady E يقول...

بجد يا فقري انا شايفة ان المواضيع اللي انت بتكتبها كميلة :) وسهلة ومش محتاجة كاتلوجات علشان نفهمها

معلش بقى سنوايت مكانتش هبلة متبوظش طفولتي البريئة سنوايت كانت طيبة وحسنة النية

وكلامك كلام موزون بجد

دمت بخير

شاب فقرى يقول...

كل سنة وانتم طيبين كلكم يارب
=========
صمت المشاعر
انا مرضيتش اقول الفكرة الاهم اللى مبنى عليها البوست المرة دى :)
وهى ان اللى بيتبقى لك هى الشخصية والتفكير والانسان فعلا
مش كل القشور زى الجمال والتصرفات وغيرها
دمتى بكل ود :)
فقرى

============
نون
دا نوع
بس فى انواع اكتر
:)
دمتى بكل ود
فقرى
==========
ميكانو
للاسف مقريتش الموضوع اللى انته كتبته قبل كدا
تقدر تبعتلى رابط :)
نورت جدا
فقرى
===========
Antika
انتيكا
هههههههههه
:D
تسلمى يارب
نورتى جدا
فقرى
===========
غادة
فكرتينى باغنيه عبد الوهاب
عشق الروح ملوش اخر
تسلمى يارب
===============
ريماس
بتحب كل حاجة فيه وبتلاقى حتى العيوب مميزات
ودا اللى هتكلم فيه النهارده اكيد :)
================
همسات
قلتى المفيد
والصح ان مبيتبقاش غير الجوهر والروح نفسها :)
نورتى جدا جدا
فقرى
===================
غير معرف
نورت جدا
بس انا عن نفسى بقالى سنين مش بسمع اغانى
بسمع حاجات معينة :)
حاول تبقى زيى وتشوف الاغنيه اللى بتقدم شىء مش مجرد احساس وبس
ولا ايه ؟
هوا انا بالنسبة لى الفراق مبيبقاش مفاجىء لانى بكون حاسس من الانطباع الاول ... الانطباع الاول هوا اساس كل شىء عندى
وعمره ما كدب عليه
:)
نورت
فقرى
===============
tears
هما المفروض الاتنين يمشوا فى طريق واحد ومحدش فيهم يغيب
:)
نورتى يا تيرز
فقرى
==============
قلم رصاص
ههههههههههههههههههههه
عالية عالية يعنى يا صديقى :)
==============
غير معرف
أحلى حاجة ان عجبك الجمل الاعتراضية المستخبية دى :D
=============
كلمات من نور
انا عن نفسى كدا كدا مش هاكل خالص فى العيد
لا خروف ولا بصلة
عصاير عشان معدتى بتتعب قبل العيد باسبوع وبتستمر تعبانة لمدة شهر
قبل اى عيد حتى لو كان سته اكتوبر عيد النصر :D
============
زهرة
سعيد جدا بزيارتك :)
ويارب تتابعينا دايما
نورتى :)
فقرى
===============
be pleased
تسلللللللللللم
فقرى
================
غير معرف ....
وإنت طيب ....
=================
Lady E
ربنا يخليكى يارب :)
وعلى فكرة انا من عشاق سنووايت
من اشد عشاقها على فكرة
:)
نورتى جدا وياريت متغيبيش عن المدونة كتير اوى كدا :)
فقرى
============

واخيرا كل سنة وانتم طيبين كلكم يارب

خالص التحية والاحترام والتقدير للجميع حتى اللى معرفهمش واللى قرا ومعلقش واللى مستنى رد على تعليقه
شاب فقرى